16/08/2026
شركات التمويل،،،
فخ اصاب شعبنا في مقتل،،،
اليوم انتشر خبر الحجز على (٥٦٨٤) سيارة وعدد من الشقق ،،،
القضية باختصار ، انت مواطن بدك تشتري سيارة / بيت ، وما معك دفعة اولى ، تمام شركات التمويل بتحل تلك المشكلة ،،،
ببساطة المعادلة واضحة ، مواطن طفران بده يركب سيارة ، وشركة تمويل فاهمة اللعبة كويس ، وبنوك فوائدها كبيرة وإجراءاتها معقدة لمنح قرض ،،،
شو بصير ،،،؟!!!
المواطن ، بروح على معرض / شركة ، مرحبا بدي سيارة .
المعرض : تفضل ، شو النوع وقديش الموازنة المرصودة ؟
المواطن : معيش ، وما معي دفعة اولى وبدي سيارة !!!
المعرض : بسيطة ، هل انت موظف وزوجتك موظفة ؟
المواطن نعم .
المعرض : بدنا هويتك وهوية زوجتك ، اختار السيارة واعطينا يومين واترك الباقي علينا .
المواطن : شكرا ، بارك الله فيكم .
المعرض بعد يومين ، الو مرحبا ، معاملتك جاهزة وبدنا تيجي انت والمدام توقعوا ،،،
المواطن : مسافة الطريق وبنكون عندكم او في المكان الذي يحدده المعرض ،، المواطن المعمي ضوه من سرعة الاجراءات وسهولتها بفوت على مكاتب شركة التمويل ،،
شركة التمويل : اهلا سيد فلان اهلا مدام ، شو قهوتكم ، وممكن هوياتكم ، وبعد تصويرها وتعبئة المعلومات ، تفضلوا وقعوا هون ، طبعا الورقة مكتوبة بخط صغير ونقاط كثيرة ، والمواطن بشمط توقيعه عليها والمدام بتوقع ،،
شركة التمويل : معاملتكم جاهزة وبتلاقونا في الترخيص حتى تستلموا سيارتكم والف مبروك ،،
وطبعا يروحوا ويستلموا
السيارة وبروحوا فرحانين ويومها يطلبوا اكل جاهز لان المدام ما كانت فاضية تطبخ ، والاولاد يفرحوا لان ابوهم طلب كرسبي ،،،
ماذا بعد ،،،
شركة التمويل وحسب العقد ، يحق لها رهن السيارة / الشقة لطرف آخر ، بنك ، شركة اخرى ، وبتستلم ثمن السيارة كاملة مقابل اعادة الرهن.
المواطن يبدأ برحلة دفع الاقساط الشهرية،،،
بعد سنة سنتين ثلاث من دفع الاقساط لشركة التمويل التي لا تدفع للطرف الذي رهنت السيارات / الشقق لها ، مما يضطر الجهة الممولة على رفع قضية على شركة التمويل والحجز على أملاكها والسيارات التي اعادت رهنها (سيارات المواطنين وشققهم).
المواطن : يا غافل الك الله ، بتأشر له دورية ، رخصتك ورخصة السيارة لو سمحت ؟
المواطن : تفضل ،،
الدورية : السيارة عليها حجز ، لو سمحت انزل منها ودبر حالك بتكسي ،،،
المواطن : شو الي صاير ، ليش حجز ، ومين حاجز ،،
الدورية : ما بنعرف ، راجع المحكمة ،،
المواطن : براجع ، ومسكين مسدد أقساطه بمواعيدها وضل عليه قسطين او ثلاثة وبفك رهن السيارة ، والسيارة راحت منه على ساحات الحجز ، وهناك سلامتك راحت السيارة قطع وشمس وغبرة ،،،
والمواطن ينتظر المحكمة والمحامي شهر شهرين سنة،،
شو الي بصير ؟
طبعا رح يسمع الف خبر ،،
شركة التمويل مفلسة .
صاحب شركة التمويل هرب بالفلوس وما كان يسدد .
والخاسر الوحيد ، انت كمواطن ، راحت سيارتك / شقتك وراح املك ، وبدك تستنى الاجراءات القانونية والمحاكم والتصفية لشركة التمويل ويمكن يطلع الك مبلغ بسيط ويمكن لا ،،
وحظا اوفر في المرات القادمة باسلوب ومصيدة جديدة يصيدوك فيها ،،،
احذروا شركات التمويل
فهي كالبورصات ولكن باسم وشكل جديد ،،،
