مدرسة و روضة أكاديمية أركان السلام

🌹🌹 رسالة شكر 🌹🌹

السلام عليكم ورحمة الله وبركاته، وكل عام وأنتم بألف خير 🌹
مع نهاية كل عام دراسي نودّعه، نرسل إليكم رسائل شكر ومحبة ممزوجة بغصّة الوداع لأبنائنا الطلبة 👩‍❤️‍👩👨‍❤️‍👨

اسمحوا لي هذا العام أن أرسل لكم رسالتي بطريقة مختلفة، ولأكون أكثر وضوحًا، اسمحوا لي أن أخرج عن المعتاد وأتحدث إليكم بالعامية...

حبايبنا الطلاب... ❤️
هالسنة كانت مميزة، كلكم كبرتوا ما شاء الله قدّام عيوننا، وصرتوا جزءًا من أيامنا وحياتنا، فعلًا بكل إشي بتعملوه، حتى بشقاوتكم ولعبكم اللي أحيانًا بتتجاوز الحدود، لكن كلنا بنحكي: أطفال وبلعبوا، وهاي أحلى أيام، خليهم مبسوطين. 😍
ولأننا عم نصنع معكم ذكرياتكم، حاولنا تكون ذكريات حلوة.

بس تكبروا تحكوا: هاي المس ضحكتنا، وهاي المس عاقبتنا 🤭 بس بنحبها، وهاي المس بنحبها بس ما بنحب مادتها 😎، وهاي المس أسئلتها صعبة، وهاي المس حصتها ممتعة وخلّتنا نحب المادة، وهاي المس يا رب تدرسنا كل الصفوف.

وحكي كثير رح تحكوه 😊، بس بالنهاية بتمنى تحبونا مثل ما بنحبكم، ونشوفكم من أنجح الناس يا رب. ❤️

خواتي الأمهات..
يعطيكم ألف عافية، تعبتوا معنا أكيد، وتعاونكم معنا بالنهاية لهدف واحد، وهو مستقبل الطلاب.

حابة أحكيلكم إنه كل حصة انشرحت، أو صورة، أو امتحان، أو تلخيص، أو فيديو انبعث لكم، كان نتيجة جهد وتعب وضبط أعصاب ومراعاة مشاعر ومراعاة فروق فردية، ووقفة طويلة من المس، وأشياء كثيرة أنا متأكدة إنه كل وحدة فيكم عارفيتها وفاهميتها.

حابة أحكي من كل قلبي شكرًا جزيلًا لكل وحدة قدّرت وشكرت وعذرت، وانتقدت بروح حلوة، وأعطت ملاحظة إيجابية أو سلبية بنية سليمة، وحسّت بتعب المس، وفهمت إنه أي تقصير لا سمح الله مش مقصود، والمس بالنهاية إنسان ممكن يغفل. 😔

وحابة أحكي إنه كل وحدة من الكادر كانت بنهاية دوامها ما تخلي حد يروح مو فاهم درسه، أو زعلان، أو ماخذ على خاطره، وبنهاية يومها تحط راسها على المخدة بعد ما تكون كملت واجباتها العائلية، وتحكي: الحمد لله إن كل الطلاب وصلوا بيوتهم بسلامة وصحة وفرح.

بعرف إني طولت عليكم، بس حبيت أوصل مشاعرنا وحبنا وتقديرنا إلكم، ولجهودكم.
كل عام والجميع بألف خير، وبنشوفكم بسنوات قادمة أفضل بإذن الله تعالى. 💓💓

إدارة مدرسة أركان السلام