22/08/2026
رسالة إلى أصحاب البيوت
بحب أوجّه رسالة لأصحاب البيوت: لما تقرروا تأجّروا بيوتكم لعيلة مستورة، حاولوا تحطّوا نفسكم مكانهم، وفكّروا بالظروف المعيشية الصعبة اللي بيمرّوا فيها.
مش كل الناس معها قدرة تدفع عدة أشهر مقدم، ومش كل شخص مستأجر لازم يكون عرسان أو عنده إمكانيات مادية كبيرة. تخيّلوا امرأة مطلقة أو أرملة عايشة مع أولادها؛ من وين بدها تجيب إيجار شقة غالي، وهي بالكاد قادرة توفّر الأساسيات لأولادها؟
أكيد صاحب البيت إله حق بإيجار بيته، وإحنا ما بنطلب من حدا يخسر، لكن الرحمة مطلوبة، ومراعاة ظروف الناس واجبة. “ارحموا من في الأرض يرحمكم من في السماء.”
خفّفوا على الناس، والله بيفرجها عليكم. في عائلات بتمرّ عليها أيام ما بتلاقي فيها قوت أطفالها، بينما همّها الأكبر تأمين سقف يحميهم.
يا أصحاب البيوت، إذا بتقدروا تخفّضوا الإيجارات أو تراعوا ظروف العائلات المستورة، اعملوها رحمةً بالناس وبالظروف الصعبة اللي نعيشها. كثير من البيوت صارت فاضية بسبب ارتفاع الإيجارات، وفي المقابل في عائلات مش لاقية مكان تسكن فيه.
الرحمة ما بتنقص من رزقكم، ومساعدة الناس وقت ضيقهم ممكن تكون سبب بفرج من رب العالمين.
حسّوا بالناس، وكونوا عونًا إلهم، مش عبئًا إضافيًا عليهم.
