من وحي ذكراها ~ المعلمة سمر خطاب ~ أسكنها الله فسيح جناته

عبود العمري .. الله يرحمه و ما يبتلينا بموت الفجأة ..

بس رغم انه عنده تقريبا مليون و نصف متابع .. رؤيا اكبر قوة إعلامية بالأردن تقريبا .. متعاقد معاها هو الله يرحمه .. لكن شوفوا رؤيا .. حتى حداد ما عملوا .. و لو ساعة !!

كانوا ينزلوا الله يرحمه بخبر .. و بعديها ينزلوا فيديو رقص و ضحك و كوميديا .. ما في فاصل !

و مش بس هيك .. اجا يوم رؤيا ذكرت عبود العمري الله يرحمه و يحسن اله .. بس ذكرته اكتر من مرة .. فكانت ردة الفعل من المتابعين انه خلص قرفتونا كانه فش غيره مات !!

مين ما كنت .. و مهما قدمت .. انت مصيرك الإندثار في هاي الدنيا .. و ما بضل منك إلا ذكر طيب بين الجيل الحالي .. مش اكتر ..

بتتزوج .. بتخلف .. اولادك بذكروك لأنك روحهم .. و أحفادك أقل شوي .. و احفاد احفادك .. و هكذا لحد ما يصير الاسم الرباعي لحفيدك ما بذكرك أبدا !

مرعبة الفكرة صح ؟!

ربنا العظيم قال : "إن الإنسان لفي خسر" ..

احنا انخلقنا و احنا بنخسر .. عمرنا و صحتنا و فلوسنا و ذكرانا .. و كل شي ..

بس الأمل " إلا الذين آمنوا و عملوا الصالحات و تواصوا بالحق و تواصوا بالصبر"

١- تؤمن
٢- تعمل عمل صالح
٣- تتواصى بالحق "أمر بالمعروف و نهي عن المنكر"
٤- تصبر !

فقدان أي شرط من هدول الأربعة يعني زيادة قيمة خساراتك ..انت بتنزف من اول يوم بولادتك .. هدول الاربعة هم اللي بوقفوا النزيف .. غير هيك انت حر بخسارة اللي بخزّانك بإرادتك انت ..

و بالنهاية .. على قد ما ضل بخزّانك .. ربنا رح برحمته يعذبك أو يرحمك متل ما وعدك ..

فاسألوا ربنا الرحمة .. و اوعكم تستنوا الدنيا تزبط معاكم .. و حتى لو زبطت معاك يوم .. كل راس مالك لحظة .. و بتخسر اللي زبط معاك بالدنيا ..

خلي عينك على خسارة المؤبدة .. و لا تجزع اذا كانت خسارتك بالجزء المؤقت .. هاي الحياة مش إلك .. فلوسك و رح تتوزع .. صحتك و رح تروح .. و اولادك رح يتفرقوا بأشغالهم .. و مقدرتك رح تكون محدودة ..

احكيلك شي .. حط ايدك على رقبتك .. الموت أقربلك من ايدك بهاي الوضعية ..

ما بقول انه ممنوع تزعل على اي خسارة دنيوية .. و تروح تستسلم و تستنى الموت .. انما اجتهد تحقيقا للشرط التاني في عمل الصالحات .. زبطت اهلا و سهلا .. ما زبطت .. النية بتتحاسب عليها ..

فلا تجزع عند اي خسارة مؤقتة ..

ازعل .. احزن .. بس لا تجزع .. كمل .

عن شعورك دائمًا بآخر يوم برمضان..
لما تلوم نفسك على تقصيرك وتفريطك بأيامه ولياليه..
لما تصير تحكي: كان الأصل أكون أفضل..
كان من المفترض أتغير فعلا..
لما تنتابك مشاعر الندم والألم والحسرة..
ولما تخاف إنك ممكن ترجع لأغلاط كنت بتستنى رمضان حتى تكسرها وتتخلص منها..

عن دعواتك اللي بتحمل في طياتها خجل من ربنا..
يارب لو بلغتني رمضان الجاي وعد رح أكون أحسن..!


لو مريت بهذا الشعور فإنت على خير!
صدقوني ما حد بتحسر على فوات طاعة إلا والخير مالي قلبه..
ما حد بخاف يغلط إلا وفي صدق جواته..
ما حد بدعي ربنا يبلغه رمضان الجاي وبعاهده يكون أفضل إلا وهو حريص عرضاه وقربه..


الآن مش وقت تسمح للندم يسيطر عليك..
الآن وقت إنك ترسم خطة لبعد رمضان تثبت فيها لربنا حرصك وصدقك..
وقت إنك تعاهده بحد أدنى من الخير ما تتنازل عنه..
وقت إنك تستحضر إنك داخل على صراع جديد وممكن الشيطان يوقعك بغلط كنت مفكر حالك تخلصت منه..
وقت إنك تستمسك برحمة ربنا ومغفرته وعفوه..


الآن وقت إنك تودع رمضان بدعوات صادقة من قلبك:
يارب لو بلغتني رمضان الجاي وعد رح أكون أحسن..

ولو ما بلغك إياه!
فربنا الرحيم حيحاسبك على نيتك

اللهم أسكنها فسيح جناتك وارفع درجاتها واجعلها في عليين مع الأنبياء والصديقين والشهداء
تمر الأعوام تلو الأعوام وطيفها بيننا.. اللهم تجاوز عنها واغفر لها آميييين