19/01/2021
قاعدة رقم 28
**ابني ما بيوووكل**
الاطفال بين عمر السنة و 3 سنوات ، اللي هو العمر اللي بيزيد فيه النمو ، بنلاقي انه شهية الاطفال بتخف .
واللي بيوكله الطفل لليوم ، ممكن يرفضه بكرة ، و احيانا بيقعد اسابيع بس على صنف او صنفين ..
الاطفال بهاد العمر بيسموهم picky eaters ، أو (انتقائيين في الطعام) ..
لنحل هاي المشكلة و حسب الاكاديمية الامريكية لطب الاطفال ، ممكن :
1) خلوا وجبة الطعام عائلية 👨👩👧👧👨👩👧👦 ، يعني الكل يوكل بنفس الوقت ، و الكل يتجمع للوجبة ، بدون تشويش من تلفزيون او يوتيوب او chu chu T.V ، زي اجواء الزمن الجميل ، يفضّل يكون في طبق رئيسي واحد ، مش صحن كبسة و صحن ملوخية و صحن دوالي 😑 .
2 ) اذا الطفل مش جوعان ، لا تجبروه ⛔ ، من الكويس انه لطفل يسمع كويس لجسمه و لجوعه ، اذا مش جوعان ما حيوكل ، و الاطفال بهاد العمر اذا افطر مليخ او تغدا مليح ، ممكن باقي الوجبات يوكل يا دوب أكمن لقمة .
3 ) لا تستخدموا نظام الجوائز ، ما بينفع نحكي للطفل كل صحنك بنجيبلك شوكلاته ، هيك فعلا بيخزن بعقله الباطن انه هالصحن عقاب و الشوكلاته اشي عال العال ،، لا جوائز في الطعام .
4 ) جرب اليوم و جرب بكرة و كمان جرب الاسبوع الجاي و اللي بعده ، احيانا الطفل بيحتاج يتذوق صنف معين 10 مرات لحتى مستقبلات التذوق تستسيغ الأكل .
5 ) خلوا الاكل ممتع ، حطوا الاكل بالصحن بطريقة ملفتة و حلوة ، ارسموا الاكل بالصحن رسم ، و يكون فيه الوان و حركات ، و عادي لو الطفل أكل باصابعه و كركب الدنيا ، عادي ، مش بالشيراتون احنا 😅
6 ) كويس انه الطفل يشارك بتجهيز الاكل ، يجيب الجزر من الثلاجة ، يحط الرز بالطنجرة ، 😍 ، كويس و بيشجع الطفل للأكل .
طبعا بعيدا عن الغاز و الادوات الحادة .
7 ) الاطفال بيحبوا المالح و الحلو ، و بيكرهوا المر و الحامض .. حاولوا تمزجوا هاد مع هاد ، يعني مالح مع حامض ، مر مع حلو ..
مثلا بروكلي ( مر ) مع جبنة (مالح )
بس اذا لاحظتوا انه في نقص شديد بالشهية ، اللي ممكن يأثر عالوزن او الطول ، او انه الطفل بيوكل اشياء غريبة مثل التراب و الورق ، بهاي الحالة لازم نستشير طبيب الاطفال 💉💊 ..
و صحتين و عافية
