Kennarafélag Suðurlands

Munið að kjósa!

Hér er hlekkur á allar kynningar vegna kosninga í stjórn FG.

https://www.ki.is/media/tbmlufza/fg_kynningar_frambjodenda.pdf

Endilega kynnið ykkur frambjóðendur - hægt er að kjósa á mínum síðum eftir kl. 12:00 í dag og til kl. 12:00 á hádegi á fimmtudag 🤗

www.ki.is

Mjöll Matthíasdóttir gefur kost á sér til áframhaldandi formennsku í Félagi grunnskólakennara!

Magnús Hlynur mætti á haustþing og þessi skemmtilega frétt birtist í dag.

„Gervigreind, netöryggi og skapandi verkefni“ í skólastarfi voru aðal málin á tveggja daga haustþingi kennara á Suðurlandi. Formaður Kennarafélags Suðurlands treystir sér ekki til að segja um hvort banna eigi símanotkun eða ekki í sunnlenskum skólum.

Kæra félagsfólk Kennarafélags Suðurlands, aðrir gestir
og fyrirlesarar haustþings 2025

Þá er haustþingi ársins 2025 lokið. Stjórn er ákaflega stolt af þeim mikla mannauði og þeirri grósku sem við sjáum hjá félagsfólki. Í dag voru 25 erindi flutt ásamt fjölmörgum kynningum frá skólunum á viðburðinum Líttu þér nær. Um 430 manns sóttu þingið í ár og enn og aftur segjum við hér frá því að þetta hafi verið stærsta þing sem Kennarafélag Suðurlands hefur haldið.
Þingið var sett í gær klukkan 14:15 og þar á eftir hlýddum við á erindi flutt af þeim Skúla Braga Geirdal og Hauki Brynjarssyni frá Netvís. Erindið hét Stolin athygli leitar eiganda síns og vakti áheyrendur sannarlega til umhugsunar um gervigreind, samfélagmiðla og skjátækjanotkun barna og ungmenna. Aðalfundur félagsins var vel sóttur og stóð Íris Árný Magnúsdóttir sig vel sem fundarstjóri. Á fundinum voru stjórnar-, varastjórnar- og formannskosningar sem gengu vel fyrir sig. Að loknum aðalfundi tók Mjöll Matthíasdóttir til máls og ræddi meðal annars um virðismatsvegferðina.

Á haustþingi fögnum við starfi sem skiptir sköpum. Kennarastarfið byggir brú milli drauma og veruleika. Kennarar eru draumasmiðir og hjálpa börnum og ungmennum að sjá það sem þau geta orðið, móta hæfni þeirra til að hugsa gagnrýnið, vinna saman og sýna hugrekki. Kennarar halda uppi jöfnuði, lýðræði og menningu sem við erum öll stolt af. Á þessu haustþingi höfum við ræktað forvitni og sköpun í öllu starfi, við höfum styrkt lærdómssamfélög skólanna og á svæðinu, deilt hugmyndum og lært fullt nýtt.

Árshátíð félagsins var svo haldin í gærkvöldi með pompi og prakt þar sem 180 félagsmenn komu saman og skemmtu sér konunglega. Skólarnir lögðu hendur á plóg í myndbandagerð og varð útkoman stórskemmtileg og uppskar hlátur og lófaklapp. Sérstakar þakkir til allra þeirra sem komu að því að gera myndbandið okkar svona frábært. Mannskapurinn steig svo trylltan en penan dans við undirspil þeirra bræðra Hlyns og Bessa og virtust allir skemmta sér eins og best var á kosið.

Við þökkum trúnaðarmönnum kærlega og sérstaklega fyrir gott samstarf og þeirra framlags til utanumhalds en við viljum einnig senda þakkir til alls félagsfólks og þeirra sem sóttu þingið, því án ykkar væri KS ekki það blómlega svæðafélag eins og raun ber vitni. Einnig sendum við þakkir til Flúðaskóla, íþróttahússins og þeirra starfsfólks sem og starfsfólks Félagsheimilis Hrunamanna, fyrir samstarfsviljann og frábærar móttökur.
Þið eruð ómissandi — lykillinn að því að gera góðar hugmyndir að góðu skólastarfi. Takk fyrir fagmennsku, dug og að mæta svona vel. Megi þetta skólaár verða ár samstöðu, gleði og vaxtar.

Stjórn Kennarafélags Suðurlands þakkar fyrir sig.

Bestu kveðjur

Kolbrún Guðmundsdóttir,
Elsie Kristinsdóttir,
Karen Heimisdóttir,
Leifur Viðarsson,
Már Ingólfur Másson

Alþjóðadagur kennara 2025
Í dag er alþjóðadagur kennara og í dag sem og aðra daga er ég stolt af því að vera kennari. Í mínum huga minnir dagurinn á allt það faglega og vel unna starfi sem unnið er í skólunum allt árið um kring. Mér er efst í huga komandi haustþing Kennarafélags Suðurlands. Þingið hefur verið í miklum vexti síðustu ár og stækkar á hverju ári. Mæting hefur aldrei verið eins mikil og núna en næsta föstudag verða tæplega 400 kennarar, úr öllum grunnskólum Suðurlands, saman komnir á Flúðum á stórum starfsþróunardegi. Kennarafélag Suðurlands býður upp á 26 erindi sem grunnskólakennarar geta valið sér og einnig verða þó nokkrir gestir á þinginu. Stjórn Kennarafélags Suðurlands sér um allt skipulag og utanumhald um þingið og er starf stjórnar ómetanlegt og því sinnt af miklum dugnaði og elju.

Kennarar hafa sjaldan ef nokkurn tíman sýnt aðra eins samstöðu og sást í síðustu kjaraviðræðum sem þó eru enn í gangi í formi umræðu um virðismat sem er langt frá því að vera lokið. Því er mikilvægt að halda fast í samstöðuna og þá samkennd sem einkenndi síðasta vetur. Síðastliðið ár hefur ekki verið tíðindalaust í menntamálum og að óskekju má segja að hún á tímum hefði alveg mátt vera bæði faglegri og uppbyggilegri fyrir skólastarf. Ég fagna allri umræðu um menntamál sem er fagleg og lausnamiðuð en á sama tíma legg ég áherslu á að það er gríðarlega mikilvægt að kennarar komi að samtalinu um skólana og að á þá sé hlustað. Við erum sérfræðingar í okkar starfi og þurfum að halda því vel á lofti, sérstaklega þar sem styttist í sveitarstjórnarkosningar.

Áfram kennarar og til hamingju með daginn allt skólafólk!

Bestu kveðjur
Kolbrún Guðmundsdóttir
Formaður Kennarafélags Suðurlands

Skráning á haustþing Kennarafélags Suðurlands er í fullum gangi.
Hlökkum til að sjá ykkur📚
Bestu kveðjur
Stjórn KS

Aðalfundur Kennarafélags Suðurlands verður haldinn á Flúðum þann 9. október 2025 klukkan 15:15❤️ Hlökkum til að sjá ykkur!

Hvetjum nýliða í kennslu til að kynna sér Rökvís!

Nú er vinna við undirbúning haustþings Kennarafélags Suðurlands alveg á fullu.
Hvað vilt þú sjá á þinginu?