Fab Lab Sauðárkrókur

Fab Lab (Fabrication Laboratory) er stafræn smiðja með tækjum til að búa til nánast hvað sem er. Hann er einnig hægt að nýta til að skera út mjúkar rafrásir.

Fab Lab smiðjan gefur einstaklingum og fyrirtækjum, tækifæri til að þjálfa sköpunargáfuna og láta hugmyndir verða að veruleika. Í smiðjunni eru fimm tölvustýrðar (cnc) vélar sem hægt er að nýta til ýmiskonar sköpunar. Roland Modela Fínfræsari, er lítill yfirfræsari með mikla nákvæmni. Hann er notaður til að fræsa út fíngerða smíði svo sem rafrásir í tvívídd, plastmót og gifsmót í þrívídd og fleira

. Við höfum einnig nýtt hann til að skanna litla þrívíða hluti inn. Vinnuflötur fræsarans er 203X152X60 mm

Roland Vínilskeri er tölvustýrður dúkaskeri sem er mikið notaður til að skera út límmiða og gluggafilmur. Vinnuborð dúkaskerans er 120cm á breidd og eins langt og dúkrúllan leyfir. Epilog 40w laserskeri er laserskurðarvél sem getur skorið með mikilli nákvæmni efni eins og acrylplast, þunnan krossvið, balsavið, pappír, leður og fleira. Skerann er einnig hægt að nýta til að grafa í þau efni sem áður hafa verið nefnd sem og gler og húðaða málma. Vinnuborð skerans er 30x60cm, en einnig er hægt að setja í hann sívala hluti allt að 50cm langa og 20cm í þvermál. Þetta hefur til dæmis verið nýtt til að skera í glös og blómavasa. Shopbot fræsari er stór fræsari sem hefur vinnuflöt uppá 150x300cm. Þessi fræsari er mikið notaður til að skera út húsgögn úr tré, stór mót fyrir plastsmíði og fleira. hann vinnur á þrem ásum þannig að hægt er að fræsa út í 180° þrívídd í honum. Önnur efni sem þessi fræsari hefur verið nýttur í eru ýmiskonar plastefni og þunnir málmar. Cube þrívíddarprentari prentar hluti úr ABS plasti. Vinnusvæði prentarans er 15x15x15 cm og hann nýtist til að smíða flókna smáhluti sem erfitt er að fræsa eða skera út. Þar sem erfitt er að skilja að hægt sé að prenta þrívíða hluti (við trúðum þessu varla sjálfir) þá ætlum við að setja myndband hérna á síðuna sem sýnir hvernig tækið vinnur. Að auki eru í Fab Lab á Sauðárkróki fullkomið rafeindaverkstæði og saumavél. Við stefnum að því á næstunni að bæta inn beygju og mótunarvélum fyrir plastvinnslu. Allar vélar í Fab Lab eru valdar með einfaldleika að leiðarljósi og í flestum tilvikum eru hlutirnir sem búnir eru til, prentaðir frá PDF skjali. Teikningar að hlut sem gerður er í Fab Lab má gera í hvaða teikniforriti sem er, Autocad, Inventor, Corell, en við bendum þeim sem ekki hafa aðgengi að dýrum teikniforritum á ókeypis hugbúnað svo sem Inkscape (www.inkscape.org) fyrir tvívíddar teikningar og Google sketchup (sketchup.google.com) eða Autodesk 123D (www.123dapp.com) fyrir þrívíddarteikningar. Við bjóðum ekki uppá námskeið að svo stöddu, en allir sem koma í Fab lab fá handleiðslu á staðnum og aðstoð við að komast í gang með verkefnin sín. Við aðstoðum einnig við teikningavinnu og gefum góð ráð um efnisval og hönnun. Við mælum eindregið með að þeir sem ekki hafa reynslu af tölvuteikningu nýti sér kennsluefnið sem Fab Lab á Íslandi er búið að koma á vefinn, en mikið af kennsluefni liggur nú þegar fyrir á www.fablab.is/wiki . Veljið íslensku sem tungumál til að komast í íslenska hlutann. Fyrir þá sem vilja formlegri kennslu er hægt að snúa sér til Fjölbrautaskóla Norðurlands vestra, sem býður uppá áfanga í Fab Lab í dagskóla og kvöldskóla.

22/06/2026

03/06/2026

Innilegar hamingjuóskir Grunnskóli Austan vatna með frábæran árangur 🥳

Nýsköpunarkeppni grunnskólanna 2026 lauk með glæsilegu lokahófi

Laugardaginn 30. maí fór fram lokahóf Nýsköpunarkeppni grunnskólanna (NKG) 2026 á Sögutorgi í Sögu við Menntavísindasvið Háskóla Íslands. Þar lauk enn einu eftirminnilegu keppnisári þar sem sköpunargáfa, forvitni og lausnaleit barna úr grunnskólum landsins var í forgrunni.

Alls bárust rúmlega 500 hugmyndir hvaðanæva af landinu frá nemendum í 5. – 7. bekk. Af þeim voru 25 hugmyndir valdar til úrslita og tóku alls 38 nemendur þátt í vinnustofum og lokaviðburðum NKG 2026.

Dagana fyrir lokahófið tóku úrslitanemendur þátt í skapandi vinnustofum í Sögu þar sem þau þróuðu hugmyndir sínar áfram, fengu leiðsögn sérfræðinga og undirbjuggu kynningar á verkefnum sínum. Lokahófið sjálft var hátíð nýsköpunar þar sem tónlist, dans, kynningar og verðlaunaafhending fléttuðust saman.

Dagskráin hófst með ávarpi Kolbrúnar Pálsdóttur, forseta Menntavísindasviðs Háskóla Íslands, sem lagði áherslu á mikilvægi þess að skapa börnum vettvang þar sem hugmyndir þeirra fá að vaxa og verða sýnilegar.

Við sama tækifæri voru afhent hvatningarverðlaunin VILJI – Nýsköpunarkennari grunnskólanna 2026.

VILJI – Nýsköpunarkennari grunnskólanna 2026
Verðlaunin hlaut Drífa Hjördís Thorstensen, grunnskólakennari við Háaleitisskóla á Ásbrú, fyrir framúrskarandi framlag sitt til nýsköpunar í skólastarfi og fyrir að skapa nemendum sínum vettvang til að hugsa stórt, prófa sig áfram og láta hugmyndir sínar verða að veruleika.

Fyrir hönd Mennta- og barnamálaráðuneytisins flutti Linda Heiðarsdóttir, skrifstofustjóri Skrifstofu skóla- og íþróttamála, ávarp og lagði áherslu á mikilvægi þess að hlúa að nýsköpun, frumkvæði og skapandi hugsun í íslensku skólastarfi.

Nemendur fluttu tónlistar- og skemmtiatriði, kynntu verkefni sín og deildu hugmyndum sínum með gestum. Á dagskránni voru meðal annars píanóleikur, trompetleikur, dansatriði og stuttar kynningar á verðlaunahugmyndum ársins.

Lokahófið náði hápunkti þegar Halla Tómasdóttir, forseti Íslands og verndari Nýsköpunarkeppni grunnskólanna, flutti lokaávarp og afhenti aðalverðlaun keppninnar.

Verðlaunahafar NKG 2026
Forritunarbikar NKG
Elma Georgsdóttir og Maya Teresa Kamallakharan
5. bekkur – Fossvogsskóli
Maturinn minn
Leikjavætt app sem hjálpar börnum að velja hollan mat, skipuleggja nesti og draga úr matarsóun með umbunarkerfi og betri yfirsýn fyrir fjölskyldur.

Hönnunarbikar NKG og Hugverkastofu
Diðrik Nói Sigurjónsson
6. bekkur – Djúpavogsskóli
Chip picker
3D-prentað verkfæri sem tekur upp snakk, núðlur og annan mat án þess að notandinn fái krydd eða fitu á fingurna.

Mannréttindabikar NKG og ÖBÍ
Hjördís Lilja Egilsdóttir og Stefania Szymanowska
5. bekkur – Njarðvíkurskóli
Bókin ykkar
Lífleg og aðgengileg bók fyrir blinda þar sem efni er bæði áþreifanlegt og hljóðrænt og blindaletur verður hluti af upplifuninni.

Samfélagsbikar NKG
Guðlaug Sóley Jokumsen Bergman og Elvar Ólafsson
6. bekkur – Víðistaðaskóli
Saltblásari
Blástursvél sem getur einnig tekið við salti og dreift því yfir götur og stíga þegar hálka myndast.

Tæknibikar NKG
Trausti Viðar Fjólmundsson og Jón Greipur Þorgilsson
7. bekkur – Grunnskólinn austan Vatna
Léttingarkefli
Kefli með rótor sem auðveldar bændum að taka niður girðingar með minni fyrirhöfn.

Ræðubikar JCI
Kristín Kata Sigurbjörnsdóttir
7. bekkur – Snælandsskóli
Bdýnan
Dýna sem er í laginu eins og B, með holur fyrir brjóst og bumbu, líka hentug fyrir óléttar konur.

Umhverfisbikar NKG og ELKO
Fannar Tindur Jónsson
5. bekkur – Brúarárskóli
Plasthitarinn
Lausn sem hitar upp plastrusl og minnkar umfang þess fyrir heimili.

Aðalverðlaun NKG 2026
Katrín Svala Ólafsdóttir og María Lilja Davíðsdóttir
6. bekkur – Víðistaðaskóli
Hjálmur á hlaupahjól
Öryggiskerfi fyrir leiguhlaupahjól þar sem hjálmur er tengdur hjólinu og hjólið fer ekki af stað nema hjálmurinn sé notaður.

Viðurkenningar og verðlaun
Öllum verðlaunahöfum í flokkum NKG 2026 voru afhent viðurkenning og 20.000 króna gjafakort frá ELKO sem styrkti keppnina með rausnarlegum hætti.

Sigurvegarar aðalverðlauna NKG 2026 hlutu auk þess 40.000 króna aðalverðlaun.

Nýsköpunarkeppni grunnskólanna leggur jafnframt ríka áherslu á að fagna þátttöku og framlagi allra barna. Því fengu allir nemendur sem komust í úrslit og tóku þátt í vinnustofum NKG sérstaka viðurkenningu og 15.000 króna hvatningarverðlaun frá NKG sem þakkarvott fyrir árangur þeirra, vinnu og hugrekki.

Nýsköpunarkeppni grunnskólanna hefur nú verið haldin í 35 ár og sýnir ár eftir ár hvað gerist þegar börn fá tækifæri til að spyrja spurninga, finna lausnir og skapa eitthvað nýtt.

Við óskum öllum verðlaunahöfum, úrslitanemendum, kennurum, foreldrum, samstarfsaðilum, dómnefnd og styrktaraðilum innilega til hamingju og þökkum fyrir að gera NKG 2026 að sannkallaðri hátíð hugmynda, hugrekkis og framtíðarsýnar.

Við hlökkum til að sjá hvaða hugmyndir verða til næst.

02/06/2026

Hér má lesa smá um heimsókn Fab Lab starfsmanna á Sauðárkróki vikuna 26.-29. maí.
https://www.fablabskr.is/post/fab-lab-bootcamp-550

26/05/2026

Fab Lab Bootcamp er þegar starfsmenn Fab Lab smiðja um allt land hittast.
Við nýtum tækifærið til að styrkja tenglsnet, endurmennta og læra hvert af öðru.
Upplifum nýtt umhverfi, kynnumst land og menningu.
Að þessu sinni erum við að hittast á Sauðárkróki og eru 22 einstaklingar að koma og vera hjá okkur þessa vikuna.
Metnaður hefur verið settur í veglega dagskrá og að bjóða alla velkomna og njóta samverunnar.