Stjórnmálafræðideild við HÍ / Political Science

Hefur þú áhuga á alþjóðamálum, öryggis- og varnarmálum eða diplómatíu?

Opnað hefur verið fyrir skráningu á Model NATO Reykjavík og nýtt 4 eininga námskeið við Stjórnmálafræðideild Háskóla Íslands sem tengist verkefninu.

Model NATO er ætlað ungu fólki á aldrinum 18–35 ára og háskólanemum úr öllum fræðigreinum. Þátttakendur fá tækifæri til að setja sig í spor fulltrúa aðildarríkja NATO og takast á við raunhæf verkefni tengd alþjóðlegu öryggi, samningaviðræðum og ákvarðanatöku.

Skráningarfrestur er til 20. ágúst. Hægt er að skrá sig í Model NATO án þess að skrá sig í námskeiðið.

Nánari upplýsingar um Model NATO má finna á vef Stjórnarráðsins og upplýsingar um námskeiðið í kennsluskrá HÍ.

https://www.stjornarradid.is/efst-a-baugi/frettir/stok-frett/2026/06/01/Model-NATO-radstefna-haldin-a-Althingi-i-haust/

Kynja- og margbreytileikafræði snýst ekki bara um fræði heldur líka um samfélagið sem við búum í og hvernig við getum haft áhrif á það.

Hildur Rún Sigurðardóttir Kvaran er meistaranemi í kynja- og margbreytileikafræði og hér segir hún frá því hvers vegna hún valdi námið, hvernig það hefur breytt sýn hennar og markmiði sínu um að vinna að öruggara samfélagi fyrir öll.

„Persónuleg reynsla mín af bæði réttarkerfinu og öðrum opinberum stofnunum sýndi mér hversu ábótavant kerfið á Íslandi er þegar það kemur að kynbundnu ofbeldi. Ég ákvað að skrá mig í meistaranám í kynjafræði til að afla mér verkfæra og þekkingar, svo ég gæti raunverulega látið gott af mér leiða í baráttunni gegn kynbundnu ofbeldi. Ég hef alltaf haft sterka réttlætiskennd, og eftir að ég hóf námið opnuðust augu mín fyrir margskonar misrétti sem á sér stað í samfélaginu okkar sem hefur haft mikil áhrif á hvernig ég sé hlutina í daglegu lífi, og hvernig ég bregst við þeim. Stemning í náminu er einstök að mínu mati, því bæði kennarar og nemendur hafa mikla ástríðu fyrir námsefninu, og mismunandi lífsreynsla gerir okkur kleift að sjá hlutina frá ólíkum sjónarhornum sem gerir umræðutíma alveg sérstaklega áhugaverða og lærdómsríka. Markmiðið mitt með náminu er að berjast fyrir öruggara samfélagi fyrir öll, og langar mig að starfa við það að námi loknu. Þetta nám er kjörið fyrir öll sem láta sig jafnrétti og mannréttindi varða, og vilja leggja sitt af mörkum til að búa til réttlátt samfélag.“

Í haust er Ásrún Aldís Hreinsdóttir að fara að hefja lokaárið sitt í blaðamennsku við Háskóla Íslands og hefur þegar fundið hvernig námið nýtist henni í starfi.

„Blaðamennskunámið hefur nýst mér á margvíslegan hátt. Í náminu lærum við að miðla upplýsingum á skilvirkan og skiljanlegan hátt, sem skiptir höfuðmáli í starfi blaðamanns. Við lærum líka að klippa og vinna útvarps- og sjónvarpsfréttir, og það kom sér sérstaklega vel þegar ég hóf störf á RÚV að hafa lært grunnatriðin í klippivinnslu.

Námið hefur opnað fyrir mér möguleika sem ég vissi ekki einu sinni að væru í boði. Mig dreymdi alltaf um að vinna í fjölmiðlun og nú geri ég það, þökk sé náminu.“

Sigrún Björk Hjartardóttir er að klára 1. árið í blaðamennsku og fer í gegnum prófatíðina með góðu skipulagi, Pomodoro-aðferðinni og smá „lock in“ fyrri part dags.

Hún byrjar prófundirbúninginn á stórum gátlista yfir allt efnið helst á blaði, því það er fátt jafn satisfying og að krossa yfir með alvöru penna. Síðan skiptir hún efninu niður á dagana fram að prófi og passar að síðasti dagurinn fari bara í yfirferð, ekki að troða inn nýju efni á síðustu stundu.

Til að halda einbeitingu notar Sigrún Pomodoro: lærir í 25 mínútur og tekur 5 mínútna pásu. Hún mælir líka með Quizlet, Study Bunny og Speechify og er meira að segja komin með top creator badge á Quizlet.

Þegar þreytan kemur skiptir hún um umhverfi, fer í göngutúr eða búðarferð og bannar sér að hugsa um námið á meðan. Sem blaðamennskunemi endar hún líka stundum á því að scrolla fréttamiðlana og réttlætir það auðvitað sem hluta af náminu.

Best finnst henni að læra á Þjóðarbókhlöðunni, í lesherberginu í Gimli eða með vinum á þriðju hæð í Odda.

Og hennar skilaboð til þeirra sem eru að missa móðinn?
„Það styttist í sumarfrí, ekki gefast upp!“

Við óskum Sigrúnu góðs gengis í prófunum!

Jón Gunnar Ólafsson, lektor við Stjórnmálafræðideild, var gestur á Sprengisandi á Bylgjunni um helgina og ræddi um áhrif hinnar starfrænu byltingar á umhverfi stjórnmála, fjölmiðlunar og samræðu og þar með lýðræðisins á síðustu árum. Jón Gunnar hefur meðal annars rannsakað áhrif falsfrétta og upplýsingaóreiðu í opinberri umræðu.

Lýðræði vissulega ógnað af samfélgsmiðlum - Vísir Jón Gunnar Ólafsson lektor við Háskóla Íslands. Jón hefur langa reynslu af rannsóknum á áhrifum falsfrétta og upplýsingaóreiðu í opinberri umræðu - hvaða áhrif hafa stafrænar breytingar haft á umhverfi stjórnmála, fjömiðlunar og samræðu og þar með lýðræðisins á sí....

Starfsnám í Genf á vegum utanríkisráðuneytisins vegna setu Íslands í mannréttindaráði Sameinuðu þjóðanna. Spennandi tækifæri fyrir nemendur í stjórnmálafræði og alþjóðasamskiptum!

Utanríkisráðuneytið auglýsir eftir nemendum sem hafa áhuga á að taka þátt í störfum fastanefndar Íslands í Genf á meðan á vetrarlotu mannréttindaráðs Sameinuðu þjóðanna stendur. Ísland var kjörið til setu í mannréttindaráðinu frá 2025 til 2027.

Um er að ræða starfsnám á vegum utanríkisráðuneytisins í samstarfi við Alþjóðamálastofnun Íslands, og Stjórnmálafræðideild. Starfsnámið er gagnlegur undirbúningur fyrir nema sem mögulega hyggja á starf í stjórnsýslu, hjá alþjóðastofnunum eða á öðrum tengdum vettvangi. Þá getur starfsnámið nýst sem undirbúningur fyrir lokaverkefni.

Tímasetning
Háskólaneminn aðstoðar fastanefnd Íslands í Genf á tímabilinu 2.-13. mars 2026.

Skilyrði
Leitað er eftir nemanda á lokastigum BA náms eða á meistarastigi í stjórnmálafræði, alþjóðasamskiptum eða öðru námi sem nýst gæti í störfum fastanefndar Íslands í Genf.

Umsækjandi þarf að hafa góða kunnáttu í ensku og geta unnið sjálfstætt.

Starfslýsing
Háskólaneminn verður hluti af sendinefnd Íslands í vetrarlotu mannréttindaráðsins, sem stendur yfir frá lokum febrúar og fram í apríl. Nemandinn fær tækifæri til að kynnast starfi mannréttindaráðs Sameinuðu þjóðanna og störfum fastanefndarinnar í Genf vegna setu Íslands í ráðinu. Neminn aðstoðar við tilfallandi verkefni fastanefndar á umræddum tíma, meðal annars greiningar á efnislegum málefnum á dagskrá ráðsins. Nemandinn skilar stuttri samantekt í lok starfsnámsins til Alþjóðamálastofnunar og ráðuneytisins. Samantekt nemandans getur verið notuð sem grunnur að minnisblöðum utanríkisráðuneytisins um fundarlotuna.

Styrkur
Nemandinn fær fjórar einingar fyrir starfsnámið og fær greidda dagpeninga á meðan á dvöl stendur og ferðastyrk.

Umsóknum skal skilað til Alþjóðamálastofnunar á netfangið [email protected] eigi síðar en 22. janúar. Umsóknir skulu samanstanda af náms- og starfsferilsskrá auk stuttrar (að hámarki ein bls.) greinargerðar umsækjenda. Í greinargerð skal koma fram rökstuðningur fyrir því hvers vegna viðkomandi ætti að verða fyrir valinu og hvernig starfsnámið muni nýtast í áframhaldandi námi.

Heimasíða setu Íslands í mannréttindaráðinu 2025-2027: https://www.stjornarradid.is/verkefni/utanrikismal/mannrettindarad/

Mist Þormóðsdóttir Grönvold brautskráðist með MA gráðu í alþjóðasamskiptum með ágætiseinkunn frá Stjórnmálafræðideild HÍ í október. Hún skrifaði meistararitgerðina sína undir handleiðslu Maximilian Conrad, prófessor við deildina. Ritgerðin ber titilinn Universalist Aspirations, Strategic Realities: Iceland's Engagement in the Universal Periodic Review.

Um hvað fjallar lokaritgerðin þín?

Ritgerðin mín fjallar um þátttöku Íslands í jafningjarýni mannréttindaráðs Sameinuðu þjóðanna. Hún kannar viðbrögð Íslands við öllum tilmælum sem landið hefur fengið í þeim þremur úttektum sem það hefur tekið þátt í til þessa og skoðar hvort viðbrögð Íslands litist af hluttekningu í garð líktþenkjandi ríkja eða hvort hugmyndin um algildi mannréttinda vegi þyngra.

Hvernig valdir þú efnið?

Ég valdi efnið út frá starfsnáminu sem ég var í í Genf árið 2024 á vegum utanríkisþjónustunnar þar sem ég fékk að kynnast og taka þátt í störfum mannréttindaráðsins, þ.m.t. jafningjarýninni.

Af hverju valdir þú að fara í MA nám í Alþjóðasamskiptum?
Ég valdi að fara í MA nám í Alþjóðasamskiptum vegna þess að ég hef alltaf haft mikinn áhuga á alþjóðamálum og á því að starfa á alþjóðavettvangi. Auk þessa var ég í grunnámi í Bandaríkjunum og því fannst mér tilvalið að fara í Meistaranám heima.

Hvað tekur við eftir brautskráningu?
Ég held áfram að vinna á varnarmálaskrifstofu utanríkisráðuneytisins þar sem ég hef starfað frá því ég kom heim úr starfsnáminu í Genf lok síðasta árs, en síðan er aldrei að vita hvað framtíðin ber í skauti sér.

Ertu með góð ráð fyrir nemendur sem voru að hefja MA nám í Alþjóðasamskiptum?
Nám í alþjóðasamskiptum opnar á ótrúlega fjölbreytta og spennandi möguleika. Ég myndi mæla með því að stökkva á þau tækifæri sem bjóðast því það er aldrei að vita hvert þau geta leitt mann!

Við óskum Mist innilega til hamingju með áfangann og velfarnaðar í komandi verkefnum.