Bókasafn Seljaskóla

Bókasafn Seljaskóla Bókasafn Seljaskóla er opið alla virka daga milli klukkan 8.30 og 14.30

16/12/2025

Það er hefð á skólasafninu að búa til skemmtilegt jólahorn á aðventunni. Þá eru teknar fram allar bækur sem fjalla um jólin, jólaklúbburinn hefst og einhver sérstaklega skemmtileg og jólaleg umgjörð er gerð utan um þetta allt saman. Þeir nemendur sem vilja taka þátt fá sérstök jólabókamerki, lesa þrjár jólabækur, safna límmiðum á merkið sitt og fá verðlaun þegar þau ljúka klúbbnum. 🎄
Í ár var bókasafnsfræðingurinn dálítið hugmyndalaus um hvaða þema ætti að byggja í ár þar til hann einn daginn sá stóran kassa á göngum skólans sem átti að fara í rusl, sá var veglegur og flottur og minnti á klefa eða sölubás. Þá kviknaði sú hugmynd að búa til miðasölu og jólabókalest.
Nemendur sem vilja taka þátt fá lestarmiða í miðasölunni. Jólabókalestin fer til mismunandi landa, til dæmis Ævintýralands, Töfralands, Sögulands, Bókalands og Draumalands. Farþegar fá líka mimunandi sætum úthlutað líkt og “besta sætið”, “notalega sætið” og “bókaormasætið”. Þau sem koma um borð í jólabókalestina safna þremur límmiðum á lestarmiðann sinn (sem er líka notaður sem bókamerki) og fá að lokum verðlaun fyrir að hafa lesið þrjár jólabækur og hoppað um borð í jólabókalestina 🚂📕

Það er gaman að heyra hversu margir nemendur á öllum aldri hafa fylgst spenntir með þáttunum um Vigdísi Finnbogadóttur. ...
21/01/2025

Það er gaman að heyra hversu margir nemendur á öllum aldri hafa fylgst spenntir með þáttunum um Vigdísi Finnbogadóttur. Síðast í dag var nemandi í 3. bekk að mæla með þeim við bekkjarfélaga sinn; “þú VERÐUR að horfa á þessa þætti, þeir eru mjög skemmtilegir!”🥰

Jólabókakofinn á skólasafninu fékk yfirhalningu eftir að jólunum lauk og er nú orðinn að forseta- og draumahúsi! Hér er hægt að lesa sér til um Vígdísi, kvennabaráttuna og allt litla fólkið og stóru draumana þeirra. 💭💫

Aðventan er gengin í garð og jólaundirbúningurinn hafinn á skólasafninu í Seljaskóla. 🎅🏼Síðastliðnar vikur hefur mikið v...
10/12/2024

Aðventan er gengin í garð og jólaundirbúningurinn hafinn á skólasafninu í Seljaskóla. 🎅🏼

Síðastliðnar vikur hefur mikið verið sýnt og lesið úr nýju jólabókunum á safninu, enda er mikill spenningur fyrir nýjustu bókunum meðal nemenda og margar nýútkomnar bækur komnar á skólasafnið. 📚

Jólaklúbburinn vinsæli hefur þegar staðið yfir í nokkrar vikur og þegar hafa yfir 50 nemendur lokið við klúbbinn! Það ríkir alltaf spenna meðal nemenda varðandi hver umgjörðin í kringum jólabókaklúbbinn verður. Í ár reis hvorki meira né minna en heill jólabókakofi upp á skólasafninu! Þar er að finna allar jólabækurnar, arineld sem snarkar í, þægilegan hægindastól, jólatónlist og almenn jólakósýheit! Nemendur sækja mikið í jólabókakofann því þar er svo notalegt að vera og þar ríkir sannarlega jólaandi. 🎄

Jólaklúbburinn gengur út á það lesa fjórar jólabækur, nemandinn fær að velja sér jólalímmiða fyrir hverja lesna bók og safnar þeim á sérstakt jólabókamerki. Þegar lestrarhesturinn hefur safnað fjórum límmiðum þá fær hann úthlutað sérstöku jólanafni og fær sérhannað bókamerki með jólanafninu á. En í ofanálag þá fær nemandinn hvorki meira né minna en að velja sér bók til eignar í verðlaun. Það er gaman að því að margir nemendur velja fremur bók fyrir systkini, vin eða foreldri til að gefa viðkomandi í jólagjöf, í stað þess að velja bók fyrir sjálfa sig. ❤️

Í gær, öskudag, breyttist skólasafnið í bókakaffihús. Þar var sérlegur bakarameistari við afgreiðslu og nokkrir stubba-a...
15/02/2024

Í gær, öskudag, breyttist skólasafnið í bókakaffihús. Þar var sérlegur bakarameistari við afgreiðslu og nokkrir stubba-aðstoðabakarar hjálpuðu til. Einn nemandi, sem er ákaflega fær í öllum tæknimálum, byrjaði daginn á því að laga afgreiðslukassann sem var bilaður, það var mjög gleðilegt fyrir bókakaffihúsið. Í framhaldinu vann þessi nemandi á kaffishúsinu allan tímann við að slá inn hverja einustu sölu og var mjög umhugað um að allir gestir fengju kassakvittun – sem þeir og fengu!
En ekkert fé var þó reitt af hendi því gestirnir fengu safa, snúða og kex gegn því að lesa bækur á meðan þeir nutu veitinganna. Kertaljós, blóm, kósý kaffihúsatónlist og góð bókastemmning ríkti á bókakaffihúsinu allan tímann. Miðað við veitinga“söluna“ þá reiknast bókakaffihúsinu að gestir hafi verið tæplega 700 og mikil ánægja ríkti með daginn.

Í hvert sinn sem nemandi fær bók lánaða af skólasafninu getur hann ýtt á rauða hnappinn og fengið góð skilaboð til að ta...
14/11/2023

Í hvert sinn sem nemandi fær bók lánaða af skólasafninu getur hann ýtt á rauða hnappinn og fengið góð skilaboð til að taka með sér út í daginn! ⭐️😁🅾️

Hrekkjavakan var haldin hátíðleg á skólasafninu nýverið. Allir nemendur skólans (sem þorðu) fengu að koma í hópum á skó...
10/11/2023

Hrekkjavakan var haldin hátíðleg á skólasafninu nýverið.
Allir nemendur skólans (sem þorðu) fengu að koma í hópum á skólasafnið og upplifa hryllingssafnið! Það var niðamyrkur á bókasafninu og safngestir fengu því afhent vasaljós við komuna. Hryllilega draugaleg hljóð hljómuðu úr öllum hornum. Þykkur reykur umlukti bókasafnið allan daginn.
Hryllilegur trúður var á safninu sem vantaði í annað augað! Hann gekk því um og safnaði augum og var með slímug og illa lyktandi augu í poka, sem hugrökkustu krakkarnir þreifuðu á í blindni með tilheyrandi ópum og ógeði.
Óli kokkur hafði breyst í uppvakning og hafði eldað hræðilegt hakk og spaghettí sem var búið til úr einhverju(m) sem engan langaði að vita hvað (hver) væri!
Svakalega stór könguló var búin að hreiðra um sig á skólasafninu og var sterklega grunuð um að hafa smjattað á bókasafnsfræðingnum sem var hvergi að sjá á safninu því það heyrðust hávær smjatthljóð frá köngulónni þegar gestir gengu fram hjá og það lágu hja henni blóðugar fætur!
Það var margt fleira hryllilegt og spennandi að skoða líkt og myndir og myndbönd bera með sér.

Í gær fengum við ótrúlega skemmtilega heimsókn. Rit- og myndhöfundar metsölubókanna, Handbók fyrir ofurhetjur, hjónin El...
21/09/2023

Í gær fengum við ótrúlega skemmtilega heimsókn. Rit- og myndhöfundar metsölubókanna, Handbók fyrir ofurhetjur, hjónin Elias og Agnes Våhlund komu í Seljaskóla!
Þau voru með stórkostlega skemmtilega kynningu fyrir nemendur í 4. og 5. bekk. Þau sýndu frá gerð bókanna, sögðu frá tilurð þeirra og sýndu frá allri vinnunni við myndlýsinguna. Ekki nóg með það heldur fengu Seljaskólanemendur, fyrstir allra í heiminum, að sjá kápuna á næstu bók, Handbók fyrir ofurhetjur 9 – nýr vinur! Sú bók kemur út eftir áramótin en þau hjónin áforma að gefa út 24 bækur í þessum bókaflokki, tvær á hverju ári.

Eftir þessa skemmtilegu kynningu árituðu hjónin bæði bækur og handarbök en Ási útgefandi var líka vinsæll og áritaði mörg handarbök! 😊 Frábær heimsókn sem jók enn við vinsældir þessa frábæra bókaflokks sem var þó ákaflega vinsæll fyrir.

(Myndbönd í athugasemdum)

Handbok för Superhjältar
Drápa

í tilefni öskudagsins umbreyttist skólasafn Seljaskóla í dýraspítala með vaska dýralækna að störfum! Tæplega 400 dýr vor...
22/02/2023

í tilefni öskudagsins umbreyttist skólasafn Seljaskóla í dýraspítala með vaska dýralækna að störfum! Tæplega 400 dýr voru innlögð á dýraspítalann og biðu þess óþreyjufull að fá nýja eigendur; umhyggjusöm Seljaskólabörn sem væru tilbúin að annast þau, hjúkra þeim og lesa fyrir þau.

Og sem betur fer þurftu þau ekki að bíða lengi, því í dag, sprengidag, komu nemendur í 2., 3., 5. og 6. bekk á dýraspítalann og tóku afar spennt á móti dýrinu sínu en á morgun, öskudag, koma nemendur í 1. og 4. bekk. Hverju dýri fylgir spjald þar sem fram kemur nafn dýrsins (ekkert dýranna ber sama nafn), afmælisdagur, ástæða innlagnar á dýraspítalann og svo hvenær dýrin vilja láta lesa fyrir sig ásamt auðvitað nafni nýja eigandans.

Ómæld gleði ríkti og kærleikur blómstraði þegar börnin tóku við dýrinu sínu. Mörg hver tengdu mikið við sjúkdóma dýranna sinna líkt og kvíða, eyrnabólgu eða magapínu. Eins fannst þeim fæðingardagar dýranna sinna spennandi því sum dýrin áttu afmæli í sama mánuði og eigendur sínir. Einum dýraeigandanum fannst það stórkostleg staðreynd að dýrið hans ætti afmæli á aðfangadag; "þetta er líka jóladýr!!".

Einhverjir hófu þegar að áforma afmælisveislur fyrir dýrin sín og önnur spáðu mikið í hvenær best væri að lesa fyrir dýrið sitt og hvort þau myndu ekki örugglega koma því við að lesa fyrir þau á tilsettum tímum.

Eftir móttöku á dýrunum þá hófust eigendur handa við að meðhöndla dýrin við kvillum sínum með allskyns lyfjum, sprautum, sárabindum og plástrum. Þá var líka mældur í þeim hitinn, greitt í gegnum feldinn, klær klipptar, peli gefinn og tennur burstaðar.

Í 2. bekk þá hófust síðan nýir gæludýraeigendur strax handa við að teikna dýrið sitt og áforma að skrifa um það dagbók.

Markmið Dýraspítala-verkefnisins eru eftirfarandi:

• Skemmtilegur viðburður á skólasafninu í tengslum við öskudag.

• Nemendur fá að eiga og taka með sér heim „lestardýr“ sem verður þeim vonandi hvatning til þess að lesa upphátt fyrir dýrin.

• „Ég er eins og ég er“. Nemendur samþykkja að taka að sér og annast dýrið, burtséð frá því hvernig það er. Stórt eða lítið, bleikt eða blátt, veikt eða heilbrigt. Nemendur draga númer og taka því dýri sem þeim er úthlutað af dýraspítalanum. Þetta tengist jafnframt verkefninu sem unnið verður með nemendum í 1.-3. bekk á þemadögum í næsta mánuði, „ég er eins og ég er“ og gengur út á að temja sér umburðarlyndi og að vinna gegn fordómum.

Strax í kvöld fór Dýraspítala Seljaskóla að berast fallegar myndir frá hamingjusömum dýrum heima hjá nýjum eigendum, sem sinntu þeim og lásu fyrir þau líkt og dýrin höfðu svo lengi þráð. Dýraspítalinn óskar öllum fallegu dýrunum til hamingju með nýja ástríka eigendur.

Meðfylgjandi eru myndir frá Dýraspítala Seljaskóla (myndbönd í athugasemdum)

Það ríkir mikil spenna meðal nemanda á skólasafninu nú um mundir yfir þessum nýju og sniðugu sófa-dýnum. Taumlaust ímynd...
03/01/2023

Það ríkir mikil spenna meðal nemanda á skólasafninu nú um mundir yfir þessum nýju og sniðugu sófa-dýnum. Taumlaust ímyndunarafl Seljaskólanemenda hefur fengið að njóta sín vel og ótal margt skemmtilegt og snjallt byggt úr dýnunum. Í ofanálag þá eru kassarnir utan af dýnunum svo stórsniðugir því það er hægt að lita á þá og margir krakkar sem vilja spreyta sig á því.

Þessi vinna örvar ímyndunaraflið, vekur forvitni, æfir einbeitingu og elfir sköpunargáfuna. Og það á nú aldeilis vel við á skólasafni því allt eru þetta þættir sem eru undirstaða lesturs.

Ævar Þór Benediktsson kom í heimsókn í vikunni og las fyrir nemendur í 7. - 10. bekk úr nýjustu bókinni sinni, Drengurin...
09/12/2022

Ævar Þór Benediktsson kom í heimsókn í vikunni og las fyrir nemendur í 7. - 10. bekk úr nýjustu bókinni sinni, Drengurinn með ljáinn. Það mátti heyra saumnál detta á meðan Ævar las úr bókinni sem er ákaflega spennandi og með mögnuðum myndheimi eftir bróður Ævars, Sigurjón Líndal Benediktsson.
Krökkunum fannst líka sniðugt að heyra að Sella, frábæri kennarinn þeirra í unglingadeild, ætti fleyga setningu í bókinni. Ævar er nefnilega duglegur að leita ráða hjá allskonar fólki til að ljá bókunum sínum raunsannan blæ.
Í kjölfar upplestursins lá straumur unglinga upp á skólabókasafnið í þeirri von að geta nælt sér i eintak af bókinni. 📚
Ævar Þór á einmitt afmæli í dag - hjartans afmæliskveðjur til þín! 🥳

Ævar vísindamaður

Í dag kom Gunnar Helgason og las upp úr nýjustu bókinni sinni Bannað að ljúga. Þetta er önnur bókin í bókaflokknum um Al...
08/12/2022

Í dag kom Gunnar Helgason og las upp úr nýjustu bókinni sinni Bannað að ljúga. Þetta er önnur bókin í bókaflokknum um Alexander sem er fjörugur drengur sem gengur í Fellaskóla.
Þegar Gunni var hjá okkur í fyrra, og kynnti fyrstu bókina í bókaflokknum, tók hann niður nöfnin á nokkrum nemendum sem eru nú í 7. bekk og sem æfa fótbolta. Ástæðan var sú að Alexander átti að keppa í fótboltaleik með Fellaskóla á móti Seljaskóla í næstu bók og Gunni vildi nota nöfn alvöru Seljaskólakrakka.

Það var því mikil spenna meðal nemenda í dag þegar Gunni las upp úr æsispennandi fótboltakafla í bókinni þar sem þau Breki, Birgitta, Edda, Egill, Elmar, Eva, Fribbi, Kaleb, Guðni og Tómas í 7. bekk í Seljaskóla öttu kappi við Alexanders og vini hans úr Fellaskóla. Söguhetjurnar okkar fengu að sitja á fyrsta bekk í upplestrinum og í þakkarskyni fyrir að fá að nota nöfnin þeirra í bókinni áritaði Gunni veggspjöld og gaf þeim.
Eins og venjulega skemmtu krakkarnir sér konunglega á upplestrinum hjá Gunna sem mætti eiginlega frekar kalla leiksýningu. Þau veltust um af hlátri í bland við undrunarhróp og stundum grúfðu þau andlitið í hendur sér þegar hann las um ægilega vandræðaleg atvik. Í kjölfar þessarar frábæru heimsóknar hreinsuðust allar bækurnar eftir Gunna úr hillum skólabókasafnsins! 📚

Address

Kleifarsel 28
Reykjavík
109

Telephone

+3544117506

Website

Alerts

Be the first to know and let us send you an email when Bókasafn Seljaskóla posts news and promotions. Your email address will not be used for any other purpose, and you can unsubscribe at any time.

Shortcuts

Share

Category