25/09/2026
Má klifra upp rennibrautina?
Veit ekki hve oft ég hef heyrt forráðamenn banna börnunum sínum að klifra upp rennibrautina. En áttum okkur á því að leiktæki og leikvellir eru hannaðir af fullorðnum. Börnin sjá hins vegar ótal möguleika sem okkur dettur ekki einu sinni í hug að prófa!
Þótt ég sé mikil áhugakona um náttúrulega leikvelli og vilji gjarnan sjá meira af þeim, er staðan enn sú á Íslandi að manngerðir leikvellir eru fleiri – takið eftir, ENN fleiri!
Vonandi breytist það með tímanum, en á meðan
skulum við nýta þau tækifæri sem þessir leikvellir bjóða upp á og leyfa börnunum að klifra, prófa sig áfram, reyna á sig og öðlast færni á eigin forsendum.
Þau klifra, skríða, toga, ýta, renna sér og prófa sig áfram. Þannig þjálfa þau styrk, jafnvægi, samhæfingu og hreyfistjórnun. Þau læra á eigin líkama, finna fótfestu og öðlast færni og öryggi með hverri nýrri áskorun.
Gefum börnum tækifæri til að reyna á sig, þjálfa hreyfifærni og læra að meta eigin getu – með stuðningi okkar þegar þörf krefur. Þannig eflum við sjálfstraust, seiglu og gróskuhugarfar, þar sem hver áskorun verður tækifæri til að læra og vaxa.
Hreysti barna skiptir máli! Hreyfing hefur minnkað og við þurfum að skapa fleiri tækifæri fyrir börn til að reyna á sig, ekki færri.
Trúið mér, þau munu prófa sig áfram, líka þegar við sjáum ekki til! Er þá ekki betra að þau hafi fengið tækifæri til að æfa sig, öðlast færni og læra að meta hvað þau ráða við?
Áhættuleikur snýst ekki um að leyfa allt, heldur að gefa börnum tækifæri til að takast á við viðráðanlegar áskoranir, með stuðningi okkar þegar þörf krefur.
Styðjum og styrkjum í stað þess að stýra öllu með boðum og bönnum.
Sterk börn skipta máli – og þannig byggjum við færni til framtíðar!
Góða helgi flotta fyrirmynd
