Tónlistarskóli Reykjanesbæjar

Skólaslit:
Skólaslit verða í Stapa, Hljómahöll, föstudaginn 29. maí kl.18.00.
Afhending vitnisburðarskjala vetrarins og áfangaprófsskírteina. Hvatningarverðlaun Íslandsbanka verða afhent og tónlistarflutningur.

Nýjar umsóknir:
Nú er heppilegur tími til að sækja um skólavist fyrir skólaárið 2026-2027. Því fyrr sem sótt er um, því meiri líkur eru á að komast að.
Sækja skal um á vef skólans tonrnb.is undir hnappnum „Sækja um nám“.

FRAMHALDSPRÓFSTÓNLEIKAR

Ösp Birgisdóttir sópran, heldur framhaldsprófstónleika sína í
Ytri-Njarðvíkurkirkju fimmtudaginn 21. maí 2026 kl. 20:00.
Meðleikari á píanó er Helga Bryndís Magnúsdóttir.

Á efnisskrá eru m.a. verk eftir César Franck, Sigvalda Kaldalóns, Andrew Lloyd Webber, Hugo Wolf, Árna Thorsteinsson og John Rutter.

Aðgangur ókeypis og allir velkomnir.

Gamanóperan „Gianni Schicchi“ í Stapa.

Óperufélagið Norðuróp og Tónlistarskóli Reykjanesbæjar eru þessa dagana að setja upp gamanóperuna „Gianni Schicchi“ eftir ítalska tónskáldið Giacomo Puccini.
Óperan er þýdd og staðfærð á Suðurnesin af Jóhanni Smára Sævarssyni listrænum stjórnanda Norðuróps og söngkennara við Tónlistarskólann.
Söguþráður óperunnar er í stuttu máli sá, að gamall ríkur karl liggur fyrir dauðanum og gráðugir ættingjarnir eru mættir til hans í von um arf. En karlinn vissi um græðgi þeirra og von um að komast yfir auðæfi hans og hafði því annað í huga. Ættingjarnir áttuðu sig fljótt á því að það yrði ekki svo auðvelt og í örvæntingu sinni leita þeir til Gianni Schicchi, ítalsks manns, og bjóða honum gull og græna skóga ef hann gæti leyst málið. Gianni gerir það, en þó ekki alveg eins og þau vonuðust til að yrði.
Uppfærslan er í Stapa, Hljómahöll, með sviðsmynd, hljómsveit og öðru sem til þarf til að gera góða sýningu. Miðaverð kr. 7900.
Miðasala á tix.is
Starfsfólk og nemendur skólans og eldri borgarar greiða kr. 6900.
Þá miða þarf að sækja á skrifstofu Tónlistarskólans milli kl. 9 og 17.

Sýningar verða sem hér segir:
Föstudagur 15. maí kl. 20 Frumsýning
Laugardagur 16. maí kl.16 2. sýning
Sunnudagur 17. maí kl.16 Lokasýning

Stjórnandi og leikstjóri: Jóhann Smári Sævarsson.
Konsertmeistari: Rozalia Mietus.

Vortónleikar lúðrasveita Tónlistarskólans kl 18:00 í Stapa í dag 🎶 Allir hjartanlega velkomnir 🙂

Vortónleikar Lúðrasveitar Tónlistarskóla Reykjanesbæjar verða í Stapa, Hljómahöll, þriðjudaginn 5. maí kl.18:00.
Fram koma allar deildir sveitarinnar; A, B og C sveitir.
Stjórnendur og kennarar lúðrasveitarinnar eru Anna Lilja Karlsdóttir, Magnús Már Newman og Ragnheiður Eir Magnúsdóttir.
Efnisskráin verður mjög fjölbreytt og áhugaverð.
Aðgangur er að sjálfsögðu ókeypis og allir hjartanlega velkomnir.

„Nótan-uppskeruhátíð tónlistarskóla“ stendur fyrir tónleikum á nokkrum stöðum á landinu n.k. laugardag, þann 18. apríl, þar sem fram koma nemendur tónlistarskóla eftir landsvæðum.
Í Salnum í Kópavogi verða tvennir tónleikar fyrir svæðið „Kraginn, sem er höfuðborgarsvæðið utan Reykjavíkur, Suðurland og Suðurnes“. Alls munu 10 tónlistarskólar frá þessu svæði taka þátt. Fyrri tónleikarnir verða kl.11:00 og þeir seinni kl.13:00.
Við tökum sjálfsögðu þátt í hátíðinni og teflum fram þremur atriðum á tónleikunum kl.13:00. Sara Cvjetkovic, píanónemandi mun ásamt Mariiu Ishchenko kennaranum sínum, leika fjórhent verkið „Marche Militaire Ópus 51 Nr.1“ eftir Franz Schubert. Strengjakvartett sem þær Gisselle Pinto, Vanessa Godlewska, Helena Ósk Vilhjálmsdóttir og Elin Mia Hardonk skipa, munu flytja lagið „Promise“ eftir Laufeyju Lín Jónsdóttur í glænýrri útsetningu eftir Þórunni Harðardóttur stjórnanda kvartettsins. Þriðja atriðið frá okkur er tríó-atriði úr gamanóperunni „Gianni Schicchi“ eftir ítalska óperutónskáldið Giacomo Puccini. Flytjendur eru þær Birna Rúnarsdóttir, Jelena Raschke og Bryndís Schram Reed, en að auki mun fjórði aðilinn, Kristinn Thor Schram Reed, koma við sögu. Við píaníóið verður Antonía Hevesi.
Aðgangur að tónleikum Nótunnar er ókeypis og allir eru hjartanlega velkomnir. Við hvetjum alla sem hafa tök á, að mæta í Salinn í Kópavogi á laugardaginn. Þetta verða frábærir tónleikar.
Skólinn ásamt Óperufélaginu Norðurópi er að vinna að uppsetningu óperunnar „Gianni Schicchi“ í Stapa, Hljómahöll. Óperan er þýdd og staðfærð á Suðurnesin, sem mun auka á skemmtilegheitin fyrir heimamenn. Frumsýning verður 15. maí n.k.

Vegna slæmrar veðurspár, sem hljóðar uppá appelsínugula viðvörun, sem og vegna spár um erfið akstursskilyrði á Reykjanesbrautinni, en margir af kennurum okkar koma hingað af höfuðborgarsvæðinu, fellum við niður hljóðfærakennslu í grunnskólunum í fyrramálið og fram yfir hádegi. Samkvæmt veðurspám á verðið að ganga niður strax upp úr hádeginu og við vonumst til að það gangi eftir.

Óperustúdíó Norðuróps og Tónlistarskóla Reykjanesbæjar verður með Masterklassa í óperusöng í Stapa laugardaginn 14. og sunnudaginn 15. mars n.k. fyrir nemendur Óperustúdíósins. Leiðbeinandi verður óperusöngkonan Arnheiður Eiríksdóttir sem gerir nú garðinn frægan hér heima og erlendis. Hún var valin ungstirni óperuheimsins á Alþjóðlegu Óperuverðlaununum í Munchen árið 2024. Arnheiður er nú fastráðinn einsöngvari við Þjóðaróperuna í Prag. Hún söng eftirminnilega á Galatónleikum Norðuróps og Tónlistarskóla Reykjanesbæjar í Stapa haustið 2024 og það er mikill fengur að fá hana aftur til liðs við okkur.
Dagskrá sunnudagsins endar svo með glæsilegum óperutónleikum í Stapa kl.16:00 þar sem þátttakendur masterklassans koma fram og hver veit nema Arnheiður "taki lagið" líka.
Á tónleikana verður gengið inn um inngang Stapa.
Það verður frítt inn á tónleikana og allir hjartanlega velkomnir. Frjáls framlög verða hins vegar vel þegin, en þau munu renna upp í kostnað við næstu uppfærslu Óperustúdíósins. Um er að ræða gamanóperuna Gianni Schicchi eftir Puccini sem sýnd verður í Stapa. Óperan verður flutt með hljómsveit, leikmynd og öllu tilheyrandi og öll helstu hlutverk verða í höndum okkar fremstu söngvara af Suðurnesja- og höfuðborgarsvæðinu.
Frumsýning verður föstudaginn 15. maí n.k.

Það verða tvær breytingar á kennslu hjá okkur í þessari viku.

Á morgun, miðvikudaginn 18. febrúar, Öskudag, halda tónlistarskólarnir á Suðurnesjum sinn árlega starfsþróunardag/námskeiðsdag, sem þeir hafa gert sameiginlega á Öskudegi um langt árabil.
Það verður því engin kennsla hjá okkur á morgun.

Föstudagurinn 20. febrúar er vinnutímastyttingardagur hjá okkur og því engin kennsla þann dag. Skrifstofan verður jafnframt lokuð.

N.k. sunnudag, þann 15. febrúar, halda Sinfóníuhljómsveit Tónlistarskóla Hafnarfjarðar og Strengjasveit Tónlistarskóla Reykjanesbæjar sameiginlega sem ein stór hljómsveit, tónleika í Bergi kl.14:00. Tónleikarnir eru afrakstur mjög skemmtilegs samstarfsverkefnis skólanna.
Flutt verður tónlist úr þekktum bíómyndum, m.a. Harry Potter og Star Wars. Stjórnandi er Ármann Helgason.
Aðgangur er ókeypis og allir velkomnir.