26/07/2026
🐝 Hvers vegna verða geitungar árásagjarnari í ágúst?
Margir hafa tekið eftir því að geitungar virðast vera ágengari þegar fer að líða á ágúst. En skýringin er líklega allt önnur en flestir halda.
Á fyrri hluta sumars eru þernurnar afar uppteknar við eitt mikilvægasta hlutverk sitt – að ala upp næstu kynslóð. Þær veiða maðka, flugur og önnur smádýr, tyggja bráðina niður og færa lirfunum sem próteinríka fæðu.
Samkvæmt nýrri rannsókn gefa lirfurnar þernunum sykurríkan vökva í staðinn, sem talinn er vera helsti orkugjafi fullorðinna verkageitunga. Þegar lirfum fækkar síðsumars minnkar þessi orkugjafi og verkageitungarnir/þernurnar fara því í auknum mæli að leita sér að sykri annars staðar frá, til dæmis í gosdrykkjum, ávöxtum og öðrum sætindum.
Á sama tíma eru geitungabúin orðin fullmótuð og þúsundir verkageitunga eru á ferðinni. Það gerir það að verkum að við verðum mun oftar vör við þá.
Skemmtileg staðreynd: Geitungabú eru byggð úr pappír sem geitungarnir búa sjálfir til. Þeir naga við, blanda honum við munnvatn og mynda þannig pappírsmassa sem þeir byggja búin úr. Í bókinni Geitungar á Íslandi kemur einnig fram að stærsta holugeitungabú sem fundist hefur hér á landi innihélt 6.105 geitunga – ótrúlegur fjöldi í einu búi.
Svo næst þegar geitungur sveimar í kringum gosdósina þína er hann líklega ekki að reyna að ráðast á þig – hann er einfaldlega að leita að þeim orkugjafa sem hann fékk áður frá lirfunum í búinu.
Heimildir:
Geitungar á Íslandi – Erling Ólafsson, Námsgagnastofnun (2008).
Seirian Sumner (University College London), Analysis: Why wasps become so annoying at the end of summer.
Natural History Museum, What do wasps do?
