Snælandsskóli

Gleðilegt sumar!

Starfsfólk Snælandsskóla óskar nemendum og fjölskyldum þeirra gleðilegs sumars og þakkar samstarfið á liðnu skólaári.
Við hlökkum til að sjá ykkur hress og endurnærð næsta haust!

Skrifstofa skólans verður lokuð frá 22. júní til 4. ágúst.

Skólaslit hjá nemendum í 1.–9. bekk

Í morgun fóru fram skólaslit hjá nemendum í 1.–9. bekk. Nemendur í 1.–6. bekk komu saman í sal skólans þar sem þeir tóku við vitnisburði vetrarins við hátíðlega athöfn. Nemendur í 7.–9. bekk söfnuðust síðan saman í gamla íþróttasalnum áður en þeir héldu í heimastofur sínar til að taka við vitnisburði sínum.

Við athöfnina var skólasöngurinn sunginn af miklum krafti við undirleik Margrétar Thoroddsen tónlistarkennara og skapaði það hlýlega og hátíðlega stemningu.

Kristín Pétursdóttir, deildarstjóri yngsta- og miðstigs, og Brynjar Marinó Ólafsson skólastjóri ávörpuðu nemendur og kvöddu þá með hlýjum orðum. Þau þökkuðu nemendum fyrir veturinn sem er að líða, hvöttu þau til að njóta sumarsins og óskuðu þeim góðs gengis á komandi tímum.

Með skólaslitunum lýkur enn einu skólaári sem einkenndist af fjölbreyttu og öflugu skólastarfi. Við óskum öllum nemendum og fjölskyldum þeirra gleðilegs sumars og hlökkum til að sjá þau aftur að hausti.

Glæsileg útskriftarhátíð 10. bekkjar í Snælandsskóla

Þann 9. júní fór fram glæsileg útskriftarhátíð 10. bekkjar í Snælandsskóla þar sem nemendur, foreldrar og starfsfólk komu saman til að fagna merkilegum tímamótum við lok grunnskólagöngu nemenda.

Hátíðin hófst með fallegum tónlistaratriðum þegar Þórunn og Þuríður Hekla fluttu lögin Flower Duet og Remember Me á klarinett og þverflautu. Flutningurinn skapaði hátíðlega og hlýlega stemningu sem setti tóninn fyrir dagskrána.

Að því loknu flutti Brynjar Marinó Ólafsson skólastjóri ávarp þar sem hann fór yfir helstu áfanga skólaársins, hrósaði nemendum fyrir árangur þeirra og óskaði þeim velfarnaðar á nýjum vettvangi.

Fulltrúar útskriftarnema, þær Tinna Líf, Hrafnhildur Ýr, Gyða Matthildur og Þórunn, fluttu einlæga og áhrifamikla ræður. Þar rifjuðu þær upp eftirminnilegar stundir úr skólagöngunni, þökkuðu kennurum og starfsfólki fyrir stuðninginn í gegnum árin og horfðu bjartsýnar til framtíðarinnar.

Tónlistin var áfram í öndvegi þegar Marel flutti lagið Down at the Drive-In á tenórsaxófón og vakti flutningurinn verðskuldaða athygli gesta.

Sjálf útskriftin fór síðan fram við virðulegt og hátíðlegt andrúmsloft þar sem nemendur tóku við útskriftarskjölum sínum. Á þessari stundu mátti finna bæði gleði yfir áfanganum sem náðst hafði og söknuð yfir því að kveðja samferðafólk eftir mörg ár saman í skólanum.

Síðar í dagskránni flutti Gyða Matthildur lagið We’ll Meet Again af mikilli innlifun.

Hátíðinni lauk með hlýjum kveðjuorðum og heilræðum frá stjórnendum skólans. Að því loknu voru veitingar bornar fram og gafst gestum tækifæri til að eiga notalega samverustund og fagna þessum mikilvæga áfanga með útskriftarnemum.

Snælandsskóli óskar útskriftarnemum sínum innilega til hamingju með áfangann og velfarnaðar á nýjum leiðum.

Vorleikar og blakmót settu svip á daginn
Posted on 9. júní, 2026
Í morgun var líf og fjör á skólalóðinni þegar haldnir voru Mikka- og Mínuleikar fyrir nemendur í 1.–3. bekk og Vorleikar fyrir 4.–6. bekk. Á sama tíma tóku nemendur í 7.–9. bekk þátt í spennandi blakmóti í Fagralundi.

Nemendur dreifðu sér á fjölbreyttar stöðvar um alla skólalóðina og fengu tækifæri til að spreyta sig á ýmsum skemmtilegum verkefnum og leikjum. Í Mikka- og Mínuleikum voru meðal annars limbó, hindrunarhlaup og pokahlaup á gervigrasinu, kassabílar, fótbolti á battavellinum, hreyfiþrautir á Parísarvöllunum við kastalann, auk pókó, krítarleikja og slönguspils.

Á Vorleikunum fyrir 4.–6. bekk voru stöðvar staðsettar við strandblaksvöllinn og leikvöllinn við aparóluna. Þar gátu nemendur tekið þátt í púttvelli, hindrunarhlaupi, hoppað yfir lækinn, strandblaki, hoppubelg, aparólu, snú-snú, sippuböndum og fótbolta.

Eldri nemendur skólans, í 7.–9. bekk, voru með blakmót í Fagralundi.

Dagurinn heppnaðist einstaklega vel og ríkti mikil gleði, samvera og hreyfing meðal nemenda.

Snælandsskóli fékk Grænfánann í ellefta sinn

Mikil gleði ríkti í Snælandsskóla í dag þegar skólinn fékk afhentan Grænfánann í ellefta sinn fyrir framúrskarandi umhverfisstarf.

Grænfánahátíðin hófst með því að nemendur söfnuðust saman á körfuboltavellinum þar sem þeir fundu vinabekki sína áður en lagt var af stað í skrúðgöngu um hverfið. Skólahljómsveitin leiddi gönguna og gengu nemendur, vinabekkir og starfsfólk skólans saman í hátíðlegri stemningu.

Að skrúðgöngunni lokinni fór fram afhending Grænfánans. Nemendur í umhverfisráði tóku við fánanum sem síðan var dreginn að húni. Ragnhildur Katla Jónsdóttir, upplýsingafulltrúi Landverndar, afhenti fánann við athöfnina. Að því loknu sungu nemendur skólasönginn.

Eftir nestistíma var nemendum skipt í hópa þar sem vinabekkir unnu saman að skapandi verkefni. Verkefnið fólst í að búa til Ísland úr snæri og náttúruefnum úr umhverfinu, svo sem steinum, sprekum og könglum. Nemendur merktu inn ýmis kennileiti og staðarheiti víðs vegar af landinu, meðal annars Vatnajökul, Akureyri, Ísafjörð, Snæfellsjökul og Kópavog.

Klukkan 11 fór fram hinn árlegi fótboltaleikur 10. bekkinga gegn kennurum og starfsfólki á gervigrasvellinum. Leikurinn var fjörugur og skemmtilegur og höfðu kennarar og starfsfólk að lokum betur.

Dagurinn endaði síðan með grilluðum pylsum í boði skólans fyrir nemendur og starfsfólk sem nutu samverunnar í góðu veðri og gleðilegri hátíðarstemningu.

Gönguferð um sögu og þjóðsögur Kópavogs

Nemendur í 4. bekk fóru nýlega í skemmtilega og fróðlega gönguferð um austurbæ Kópavogs ásamt umsjónarkennurum sínum, þeim Aðalheiði og Cecile. Markmið ferðarinnar var að skoða minjar, kennileiti, rústir og gömul bæjarstæði sem tengjast sögu Kópavogs og fræðast um áhugaverðar þjóðsögur svæðisins.

Gönguferðin er hluti af Kópavogsverkefni sem nemendur vinna að í samstarfi við Guðmundu kennara á bókasafninu. Þar eru þau að kynna sér sögu bæjarins og rannsaka meðal annars staði sem tengjast álfatrú í Kópavogi.

Einn af þeim stöðum sem heimsóttir voru var Álfhóllinn, sem er líklega kunnasti bústaður álfa í Kópavogi. Hóllinn stendur við Álfhólsveg, skammt frá Digranesskóla, og hefur um árabil verið tengdur sögum um huldufólk og álfa.

Nemendur heimsóttu einnig steininn Lata á Digraneshálsi. Latur er stór steinn sem stendur enn óhreyfður innst í einum af botnlöngum Hlíðarhjalla. Sagnir um steininn tengjast Jóni Guðmundssyni bónda í Digranesi. Sagt er að Jón hafi oft hvílt sig á steininum á ferðum sínum um landareign sína og jafnvel staðið þar og sungið af miklum krafti þegar hann var í góðu skapi.

Auk þess skoðuðu nemendur Víghól, sem talinn er merkilegur sögustaður, og rústir gamalla bæjarstæða. Meðal annars sáu þau rústir þar sem Jón bóndi bjó, nálægt HK-íþróttahúsinu, og rústir við Snæland sem minna á lífið í Kópavogi fyrr á tímum.

Ferðin vakti mikla athygli og áhuga hjá nemendum sem nutu þess að kynnast sögu heimabæjar síns á lifandi og skemmtilegan hátt. Með því að heimsækja söguslóðir og heyra þjóðsögur tengdar þeim fengu þau betri innsýn í menningu, sögu og arfleifð Kópavogs.

Strútsegg bætist í safn Snælandsskóla

Nemendur og starfsfólk Snælandsskóla fengu skemmtilega og óvenjulega gjöf í morgun þegar Freysteinn Páll Óttarsson í 4. bekk færði skólanum strútsegg að gjöf ásamt foreldrum sínum, þeim Sigurbjörgu Erlu Egilsdóttur og Óttari Helga Einarssyni.

Eggið mun fá heiðurssess í fuglaglerskápnum á gangi C-álmu skólans, þar sem það mun nýtast bæði til fróðleiks og skoðunar fyrir nemendur. Gjöfin er kærkomin viðbót við safnið og vekur án efa áhuga þeirra sem eiga leið hjá.

Strútseggið kemur frá Afríku, þar sem strúturinn á heimkynni sín. Strútur er stærsti fugl heims og verpir jafnframt stærstu eggjum fuglaríkisins. Strútsegg geta vegið allt að 1,5 kíló og samsvara innihaldslega um tveimur tugum hænueggja. Skurn eggsins er afar sterk og getur verið allt að nokkrir millimetrar á þykkt.

Snælandsskóli færir Freysteini Páli og fjölskyldu hans bestu þakkir fyrir þessa höfðinglegu gjöf og þann hlýhug sem hún ber vitni um.

Verðlaunaafhending Nýsköpunarkeppni Snælandsskóla

Verðlaunaafhending Nýsköpunarkeppni Snælandsskóla fór fram í dag í sal skólans. Allir nemendur á miðstigi sendu inn hugmynd í keppnina sem hluta af verkefni í Snillismiðjuflæði. Þetta er í annað sinn sem keppnin er haldin, en hún fór síðast fram vorið 2024.

Við athöfnina sagði Kristín Kata Sigurbjörnsdóttir nemandi í Snælandsskóla frá reynslu sinni af þátttöku í Nýsköpunarkeppni grunnskólanna og lýsti því hversu skemmtilegt og þroskandi það hefði verið að taka þátt í slíkri keppni.

Margrét Arna Vilhjálmsdóttir kennari kynnti þá nemendur sem hlutu viðurkenningar fyrir hugmyndir sínar. Fjórar hugmyndir fengu sérstaka viðurkenningu og auk þess voru veitt ein aðalverðlaun Nýsköpunarkeppni Snælandsskóla.

Dómnefnd valdi þau verkefni sem þóttu skara fram úr og kennarar fengu einnig að taka þátt í kosningunni. Atkvæðin dreifðust á fjölmörg verkefni enda voru hugmyndir nemenda bæði áhugaverðar, frumlegar og vel útfærðar.

Viðurkenning 1
Brynjar Gylfi G. Malmquist og Hjörleifur Brynjólfsson fyrir hugmyndina „Flokkari 2000“.

Tæki sem skannar rusl og segir til um hvernig eigi að flokka það.

Viðurkenning 2
Kári Kristinn Úlfarsson og Daníel Bragi Þórðarson fyrir hugmyndina „Plant Pod“.

Skynjari sem er settur í blómapott og segir til um hvort vökva þurfi plöntuna og hversu mikið.

Viðurkenning 3
Ríkharður Darri Reynisson og Aðalsteinn Kjaran Egilsson fyrir hugmyndina „Vatnshelt buff“.

Buff úr tveimur lögum; vatnshelt að utan en mjúkt bómullarefni að innan.

Viðurkenning 4
Kristín Kata Sigurbjörnsdóttir fyrir hugmyndina „Bdýna“.

Sérhönnuð dýna fyrir ófrískar konur.

Aðalverðlaun Nýsköpunarkeppni Snælandsskóla hlutu Baltasar Þór Magnússon og Dísella Albertsdóttir fyrir hugmynd sína „Flækjulausa hundabandið“.

Hugmyndin felur í sér búnað sem greiðir úr flækjum í hundabandi og auðveldar þannig líf hundaeigenda.

Sigurvegararnir fengu viðurkenningu, blóm, ísveislu og svo fengu aðaverðlaunahafar þar að auki nýsköpunarpakka sem innihélt skissubók og liti.

Við óskum öllum verðlaunahöfum innilega til hamingju með frábær verkefni og þökkum öllum nemendum fyrir glæsileg hönnunarverkefni. Það verður spennandi að fylgjast með þessum verkefnum sem komast áfram í Nýsköpunarkeppni grunnskólanna.

Sögusafnið heimsótt

Á vorferðadegi í maí fóru 4. bekkingar á Sögusafnið í Reykjavík. Þar fengu þau að máta búninga og setja sig í spor landnámsmanna. Nemendur skoðuðu einnig ýmsa forna muni og fræddust um líf og störf fólks á Íslandi fyrr á tímum. Á safninu eru sýningar sem segja sögu Íslendinga frá landnámi og allt til okkar daga. Heimsóknin var bæði skemmtileg og fróðleg og vakti mikinn áhuga hjá nemendum.

Íþróttahátíð miðstigs

Í morgun fór fram skemmtileg íþróttahátíð hjá miðstigi frá kl. 8:30–11:30. Nemendur tóku þátt í fjölbreyttum verkefnum og var gleðin allsráðandi.

Á fótboltavellinum fór fram spennandi fótboltamót þar sem keppt var í kynjablönduðum liðum. Breki var yfirdómari mótsins og naut aðstoðar frá nokkrum nemendum í 9. bekk og kennurum sem sáu um dómgæslu og hjálpuðu til við framkvæmdina.

Fyrir þau sem höfðu minni áhuga á fótbolta var nóg annað í boði. Á körfuboltavellinum var haldin Stinger-keppni, á Battavelli var dans og margir skemmtu sér við trampolínhopp og aðrar hreyfi- og leikjastöðvar. Tónlist ómaði yfir svæðinu og skapaði líflega og skemmtilega stemningu.