09/09/2026
Svavar Sigurðsson, fyrrum formaður hjá Knattspyrnudeild Grindavíkur UMFG, féll frá þann 31. ágúst síðastliðinn, 87 ára að aldri. Ungmennafélag Grindavíkur sendir aðstandendum og vinum Svavars okkar innstu samúðarkveðjur.
Svavar var formaður deildarinnar 1994-1996 sem voru stór ár í sögu grindvískrar knattspyrnu en vorið 1994 tryggði Grindavík sér sæti í efstu deild karla í fyrsta sinn og spilaði einnig til úrslita í bikarnum.
Jónas Þórhallsson, formaður knattspyrnudeildarinnar til marga ára, minnist Svavars á Faceboook síðu sinni og fengum við góðfúslegt leyfi til að endurbirta þá kveðju hér.
Svavar Sigurðsson, minning.
Þegar ég flutti til Grindavíkur 1974 vakti athygli mína hvað margir stuðningsmenn Akranes í fótbolta bjuggu í Grindavík. Síðar kom í ljós að nokkrir brottfluttir Skagamenn bjuggu í Grindavík og höfðu mikinn áhuga á fótbolta, t.d. Sigurður G. Ólafsson og Gylfi Halldórsson.
Uppúr 1990 flutti Svavar Sigurðsson til Grindavíkur og tók við starfi bankastjóra Landsbankans í Grindavík. Þar hófust okkar kynni sem áttu eftir að endast fram að andláti Svavars. Það kom fljótt í ljós áhugi Svavars á fótbolta og var hann kominn í stjórn Knattspyrnudeildar UMFG fljótlega eftir að hann flutti til Grindavíkur, sem var mikil lyftistöng fyrir Grindavík. Bróðir Svavars, Gunnar Sigurðsson fyrrum formaður ÍA var mín helsta fyrirmynd þegar ÍA vann alla titla á Íslandi.
Svavar var einstakur maður með hlýtt hjarta. Hann var formaður Knattspyrnudeildar UMFG 1994 þegar Grindavík fór upp í efstu deild og í bikarúrslit á móti KR. Hann fór í öll störf sem biðu stjórnarmanna tengd deildinni, tyrfa fótboltavelli og ógleymdum ferðum í Reykjvík til að afla fjár fyrir deildina. Við fórum ótal ferðir saman til Reykjavíkur, byrjuðum daginn snemma i kaffi uppúr 07:30 á Kaffivagninum á Granda og enduðum ávalt daginn í Laugardalslaug með því að synda 1000 metra.
Þing KSÍ á þessum árum voru skemmtileg, það skapaðist hefð hjá okkur í Grindavík að fara með alla stjórnarmenn á 3gja daga KSÍ-þing og makar okkar komu eina nótt. Eftirminnilegasta þing KSÍ var haldið 1994 á Höfn í Hornafirði þar sem okkar maður fór á kostum ásamt fleirri fulltrúum KSÍ.
Eftir að Svavar flutti frá Grindavík héldum við sambandi okkar áfram og ég heimsótti hann reglulega uppá Akranes og síðar í Hveragerði þar sem hann bjó síðustu árin.
Margar minningar koma upp í hugann.
Ógleymanleg ferð leikmanna, þjálfara og stjórnar ásamt mökum til Dublin 1994, gistingu á Hvanneyri í Borgarfirði fyrir leik við Akranes 1991 sem Grindavik vann 0-1 og Skagamenn með besta lið þá á Íslandi. Svavar spurði Gunnar bróðir sinn fyrir leik- er Skaginn ekki með sitt besta lið !
Ég gæti haldið áfram að rifja upp skemmtilegar sögur af ferðalagi okkar i gegnum lífið, ég mun sakna hans og sé hann brosandi eins og hann var alltaf þegar við hittumst. Ótal símtöl okkar byrjuðu ávalt hjá mínum kæra vin, blessaður maður.
Ég votta fjölskyldu Svavars mína innilegustu samúð.
Guð blessi minningu Svavars Sigurðssonar.
