16/06/2026
Ársfundur EAEA í Varsjá 2026
Dagana 9.–10. júní 2026 fór fram ársfundur og árleg ráðstefna European Association for the Education of Adults (EAEA) í Varsjá í Póllandi. Yfirskrift fundarins var „Resilience and Community-Building“, eða seigla og samfélagsuppbygging.
Guðrún Vala Elísdóttir sótti fundinn fyrir hönd Leiknar. Dagskráin var fjölbreytt og skiptist meðal annars í aðalfund EAEA, stefnumótunarvinnu, afhendingu Grundtvig-verðlaunanna, erindi, pallborðsumræður og vinnustofur.
Megináhersla fundarins var á hvernig fullorðinsfræðsla getur stutt einstaklinga og samfélög í að takast á við breytingar, óvissu og á tímum kreppu. Rætt var um mikilvægi þess að fullorðinsfræðsla snúist ekki aðeins um hæfniþróun fyrir vinnumarkað, heldur einnig um lýðræðisþátttöku, félagslega samheldni, inngildingu, vellíðan og traust í samfélögum.
Á ráðstefnunni flutti prófessor Alicja Gałązka frá University of Silesia erindi um hvernig fullorðinsfræðsla getur eflt innri styrk einstaklinga og samfélagstengsl. Þá fóru fram pallborðsumræður um seiglu í samfélögum á tímum kreppu og sjö vinnustofur þar sem fjallað var meðal annars um lýðræði, gæði í fullorðinsfræðslu, fjöltyngi, menntun í lokuðum stofnunum og mikilvægi þess að líta á menntun sem mannréttindi.
Helsti lærdómur fundarins er að fullorðinsfræðsla er mikilvægur hluti samfélagslegra innviða. Hún getur stutt fólk við að byggja upp sjálfstraust, borgaravitund, traust og getu til samfélagslegar þátttöku. Fyrir íslenskt samhengi felast mikil tækifæri í því að tengja fullorðinsfræðslu enn betur við samfélagsþátttöku, inngildingu og seiglu nærsamfélaga.
