04/09/2026
ب ناڤێ خودێ مەزن و دلۆڤان
قوتابیێن مە یێن سەربلند، دایک و بابێن ڕێزدار، و ستافێ پەروەردەیی یێ ماندونەناس،
ئەڤرۆ ڕۆژەکا مێژوویی و پر ب هەڵویستە د دیرۆکا ئامادەیا مە دا؛ ڕۆژا درووین و ب دەستڤەئینانا بەرهەمێ ڕەنج، شەڤیار و ماندیبوونا سالەکا پر ژ هەوڵدان و کۆششە. ب شانازیەکا بێ سنوور و دلەکێ پڕ ژ سەرفرازی، گەرمترین پیرۆزباهییان ئاراستەی تەڤایا جڤاتا خواندنگەها خوە دکەین ب هەلکەفتا ئەڤان دەستکەفتێن کێم وێنە و پڕی ڕۆناهی.
ل پێشیا هەمیان، پیرۆزباهییا تایبەت ئاراستەی قوتابیێ مە یێ ژیر و ژێهاتی (بختیار نعمت) دکەین ب هەلکەفتا ب دەستڤەئینانا ڕێزبەندا ئێکێ لسەر ئاستێ ڕێڤەبەریا گشتی یا پەروەردا زاخۆ. ئەڤ دەستکەفتە بتنێ نمرەک نینە د پەڕتووکا ژیانا تە دا، بەکو ئاڵایەکێ بەرزێ زانست و ڕەوشتێ بەرزە كو تە د ئەسمانێ پەروەردەیا زاخۆ دا چەقاندی و ناڤێ ئامادەیا مە ل لوتکەیێ هێلایی.
شانازییا مە ب ڤێ یەکێ بتنێ ب داوی ناهێت؛ ئامادەیا هەڤال یا کوڕان جارەکا دن سەلماند کو کانیا زانست و چاندنا سەرکەفتنێیە، ب دەستڤەئینانا ڕێزبەندێن سەرەکی ژ لایێ (١٥) قوتابیێن مە یێن ژیر ڤە کو نمرەیێن وان ژ ٩٠٪ی بەرڤ سەری نە. ئەڤ ژمارەیا زێڕین نیشانا ئاستێ بەرزێ هزرکرن و ئیرادەیا ئاسنین یا قوتابیێن مەیە کو شیان چیایێن ئاستەنگان بکەنە ڕێکێن ڕاست بۆ گەهشتنێ ب هیڤی و ئارمانجێن خوە.
سەمیانێن ڕێزدار،
ئەڤ سەرکەفتنە بەرهەمێ ماندیبوون و خەمخۆرییا وە یا بەردەوام بوو. وە ب ئارامی و بەخشینا خوە سها پشتەڤانیێ بۆ زاڕۆکێن خوە چێکر دا کو بگەهنە ڤێ لوتکەیێ. دەستکەفتێ ئەڤرۆ هێشا پتر یێ وەیە و ئەم ب کویڕی سوپاسیا وێ مۆڕاڵ و پشتەڤانییا وە یا بێ سنوور دکەین.
مامۆستایێن هێژا و ستافێ کارگێڕی یێ مەیێ دلسوز،
هوین ئەندازیارێن ئەڤێ سەرکەفتنێ و چرایا ڕۆناهی ڕێکا ڤان سەرکەفتنانن بوون. ب زانست، سەبر، دلخۆەشی و ڕێبەرییا وە یا پڕۆفێشناڵانە، وە شیا سەرەدەریێ ب جوانترین شێوە بکن و ڕێکا گەهشتن ب لوتکەیێ بۆ قوتابیان هەموار بکن. ڕۆلێ وە یێ زێڕین سەرمایەیێ ئامادەیا مەیە و جهێ بڵندترین ڕێز و پێزانینێیە.
قوتابیێن مە یێن خۆشتڤی،
ئەڤ سەرکەفتنە بتنێ دەستپێکا جیهانەکا بەرفراوانترا زانست و خزمەتکرنێیە. ئەم پشتڕاستین کو دلسوزییا وە دێ تەڤایا قۆناغێن داهاتی یێن زانکۆ و جڤاکی ڕۆن کەت. دەرگەهێن پاشەڕۆژەکا گەش ل هەمبەر وە ڤەکرینە، و ئەم هەردەم ب ناڤ و دەستکەفتێن وە دێ شانازیێ کەین.
ب ناڤێ خوە و کارگێڕییا ئامادەیا هەڤال یا كوڕان، دووبارە پیرۆزباهیێ ل ئێک ب ئێکەیا وە، مالباتێن وە یێن ڕێزدار، و تەڤایا خەڵکێ زاخۆ دکەین.
ب سەرکەفتن و سەرفرازییا بەردەوام،
مامۆستا دیار سرحان
ڕێڤەبەرێ ئامادەیا هەڤال یا كوڕان
٢٠٢٦/٠٩/٠٤
