19/08/2026
بەیانییەکی زووە، منداڵەکەت بەڕێکردووە بۆ قوتابخانەکەی، دوای تۆزێک ماڵەکە کۆدەکەیتەوە دەبینی کتێبێک یان دەفتەرێکی بیرچووە کە ئەو ڕۆژە پێویستیانە تۆش بێ بیرکردنەوە کارەکانت جێدەهێڵیت و بە پەلە دەچیت بۆ قوتابخانە بۆی دەبەیت، تەنها بۆ ئەوەی مامۆستاکە سەرزەنشتی نەکات و دڵی نەشکێت.
ئەمە وێنەیەکی زۆر باوی ناو خێزانەکانمانە. زۆرجار لەوپەڕی خۆشەویستی و سۆزەوە دەمانەوێت «منداڵەکانمان هیچ ناڕەحتییەک نەبینن».
بەڵام ڕاستییەکی شاراوە هەیە: ئەو منداڵەی ئەمڕۆ لە هەموو زەحمەتی و باجێکی سروشتی دەیپارێزین، سبەی لەبەردەم یەکەم کێشەی ڕاستەقینەی ژیانیدا دەڕووخێت. کاتێک بەردەوام دەبینە فریادڕەسیان، لەبری یارمەتیدان، لە ڕاستیدا دەرفەتی فێربوونی بەرپرسیارێتییان لێ زەوت دەکەین.
پەروەردەی دروست ئەوە نییە ڕێگاکە بۆ منداڵ تەخت و بێبەرد بکەین، بەڵکو ئەوەیە فێری بکەین چۆن پێڵاوی قایم لەپێ بکات بۆ ڕۆیشتن بەسەر بەردەکاندا. کاتێک دەهێڵیت ڕۆژێک بەبێ دەفتەرەکەی لە پۆلدا دابنیشێت و ڕووبەڕووی لۆمەی مامۆستاکەی ببێتەوە، تۆ دڵڕەق نیت؛ بەڵکو خەریکیت ماسوولکەی بەرپرسیارێتیی ئەو دروست دەکەیت، تا شەوانی دواتر خۆی جانتاکەی پێش خەوتن ئامادە بکات.
بۆ ئەمڕۆ، با تەنها یەک شت بگۆڕین: کاتێک منداڵەکەت شتێکی لێ تێکچوو، ئەرکێکی لەبیرچوو، یان یارییەکی پێ نەکرا، یەکسەر مەچۆ بە هانایەوە بۆ ئەوەی بۆی چاک بکەیت. بوەستە، با کەمێک بێزار بێت، با کەمێک هەوڵ بدات. ڕێک لەناو ئەو بێزارییە و هەوڵدانەیدایە کە فێر دەبێت لەسەر پێیەکانی خۆی بوەستێت.
