20/09/2026
جلوبەرگی قوتابیان وەک بارگرانی
تیشێرتێک و پانتڵۆنێکی قوتابخانە بۆ قۆناغی بنەڕەتی، 45 هەزار تاکو 50 هەزار دینارە، ئەگەر لە خێزانێکدا دوو یان سێ منداڵیان قوتابی بن، تێکڕا بۆ هەر خێزانێک 120 هەزار تاکو 150 هەزار دینار تەنها بۆ یەک دەستە جلوبەرگ پێویستە.
وەرزی خوێندن لە کوردستان لە پایزێکی گەرمەوە دەستپێدەکات و بەناو زستاندا بەردەوام دەبێت تا دەگاتە کۆتایی بەهارێکی گەرم. ئەمە بەو مانایە دێت کە هەر منداڵێک دوو شێوە جلوبەرگی قوتابخانەی پێویستە، هاوینی و زستانی (نیوقۆڵ و قۆڵی درێژ، قوماشی تەنک و ئەستور). جگە لەوەش لە وەرزی زستاندا جل شوشتنی قوتابیان ئاسان نیە هەر دوو رۆژ جارێک بشۆردرێن و وشک بکرێنەوە. لەبەر ئەوە دوو دەستە جل بۆ هەر قوتابیەک پێویستیەکی بنەڕەتیە. نەک بە تەنها منداڵی 6 ساڵان، من لە قوتابخانە منداڵی 15 ساڵانیشم بینیوە جلوبەرگی قوتابخانەیان بە هۆی خواردن و خواردنەوەکان یان یاریکردن و تەپوتۆزەوە پیس کردووە.
بەپێی ئەو رونکردنەوەیەی سەرەوە، ئایا هەر خێزانک ئەگەر دوو بۆ سێ قوتابی هەبێت، بۆ دابینکردنی جلوبەرگی قوتابخانە چەند پارەی پێویستە؟
ئایا لە بارودۆخی ئێستای ئابوری هەرێمی کوردستان، خێزانەکان دەتوانن تێچووی جلوبەرگی قوتابخانە بۆ منداڵەکانیان دابین بکەن؟ جگە لە جلوبەرگ، قوتابیان پێویستیان بە جانتا و پەڕاو و قرتاسیە و هەندێکیان پێویستییان بە دابینکردنی تاکسی و پاسیش هەیە. ئەگەر باسی قیستی خوێندنی قوتابی قوتابخانە ناحکومیەکان هەر نەکەین.
ساڵی پار، نرخی جلوبەرگی قوتابخانە (کراسێکی سپی و پانتڵۆنێکی رەساسی) نزسکەی 15 هەزار بۆ 20 هەزار دینارێک بوو، بۆ هەموو قۆناغەکانی خوێندنیش هەمان ئەو تێچووە بوو. لە هەندێک خێزاندا، جلوبەرگی قوتابی ئەمساڵ بۆ براکەی یان خوشکەکەی کە لەخۆی بچوکتر بوو بۆ ساڵی داهاتوو دەمایەوە. بەڵام ئەمساڵ بڕیارەکەی وەزارەتی پەروەردە بە سەپاندنی مەرجی رەنگ و دیزاین و کوالێتی و لۆگۆی وەزارەت، هەموو خێزانەکانی ناچارکرد، بۆ هەموو منداڵەکانیان جلی قوتابخانە بکڕن کە بەراستی بارگرانیە بۆ خێزانەکان لە دۆخێکدا کە موچە 45 رۆژ جارێک ئەدرێت. گرانی بەنزین کرێی گواستنەوەی قوتابیانی بۆ ئەمساڵ زیاد کردووە. لە پایزەوە بەرەو زستان ئەچین، نەوتی سپی دوو قات گران بووە کە خێزانەکان نەیانتوانیوە بیکڕن و دەبێت بشیکڕن. پارەی دوو شێوە کارەباشیان کەوتۆتە سەر دەبێت بیدەن تا کارەباکەیان لە سەر نەبڕن و منداڵەکانیان لە تاریکیدا نەزیڕێنن. تێچووی چارەسەری نەخۆشیەکان لە نەخۆشخانە حکومیەکانیش چەند قات بەرزبۆتەوە. کرێی شوقەیەکی 2 ژووری یان خانوێکی (100 مەتری) لە ناو شاری هەولێر 400 بۆ 500 هەزار دینارە. هەموو ئەم خەرجیانە و زۆری تریش کە بۆ ژیان پێویستن و زۆر خێزان ناتوانێت وەک پێویست بۆ خۆیانی دابین بکەن. تۆ بڵێی ئەم هەموو خەبیر و کەبیرەی وەزارەتی پەروەردە بیریان لە کاریگەری بڕیارەکەیان نەکردبێتەوە چ بارگرانیەک دەخاتە سەرشانی خێزانەکان؟ یان ئەوانەی ئەم بڕیارەیان دەرکردووە، لە گیرفانی خۆیانەوە سەیری ژیانی خەڵکیان کردووە!!
ساڵانە کە هەڵمەتی گەڕانەوە بۆ قوتابخانە بایەخێکی تایبەتی لەلایەن وەزارەتی پەروەردەوە پێدەدرێت بۆ گێڕانەوەی قوتابیانی دابڕاو لە خوێندن بۆ قوتابخانە، ئایا گرانی تێچووی خوێندن نابێتە هۆکار و پاڵنەر بۆ ئەوەی دیاردەی جێهێشتن و دابڕان لە خوێندن دووبارە سەرهەڵبداتەوە؟
شوان ڕەشید
رێنماکاری پەروەردەیی
