montessori.iraq

23/08/2022

انواع الانشطة اللي تقدم من سنة فما فوق
اولا الانشطة اللي تدعم تناسق حركة اليد مع العين
انشطة اللضم بأنواعها
نبدأ بالتدريج
تحت عمر السنة من نقدملهم برج الحلقات اهتمامهم راح يكون فقط يطلعون الحلقة من مكانهه
بعد عمر السنة اهتمامهم يطلعوهه ويرجعون يدخلون الحلقة بالعمود الخشبي
بعد السنة ونصف يبدون يرتبون الحلقات من الاكبر للاصغر
اكو لضم اخر وهي مكونة من أعمدة خشبية ثلاثة اصفر واحمر وازرق بالبداية الطفل يخلي القطع مو عاللون بعد فترة الطفل يكتشف انو الحلقة الحمرة عالعمود الاحمر وهكذا
بعد ما يتقن كل الامثلة السابقة نعرض لضم من نوع اخر
وهو اللضم الافقي بدلا من العمودي هذا النشاط مقدمة لتعريف الطفل عن حركة عبور المنتصف crossing the midline
وهي الطفل يحرك ايد وحدة باتجاه واحد عابر منتصف جسمه للجهة الاخرى
للعلم كل الامثلة ذات اللضم العمودي تدعم حركة كلا اليدين ما عدا الافقي يدعم حركة يد واحد لعبور منتصف الجسم ونقلها الى الجهة الأخرى بدون مساعدة اليد الثانية
من نتقن هذه الانشطة نبدأ بنشاط لضم الخرز مع قطعة خشبية طولهه ٣٠ سم تقريبا
بعدها ننتقل للضم مع خيط (رباط الحذاء مثلا) بحيث تكون نهايتهه بيهه شي قاسي لتسهيل مسكه باصابع الطفل ومن يتقنه نبدي نصغر قطر الخيط والخرز تكون اصغر...
ممكن استخدام اي شي موجود بالبيت معكرونية ملونة مثلا وخيط
حلقات مال كارتون كلينكس نقصهه
قراصات شعر وندخلهه بقطعة عمودية
#مونتيسوري

02/02/2022

نشاط قديم نشاركة وياكم
من بدأ ايليا مهتم بالأرقام رأسا سويتله اشجار التفاح
كان عندي لوحة قديمة صبغتهه وورق جوخ كصصته اشجار وتفاح ولصقناهم
نخلي الكميات وراهه اكله يلة نهز الشجرة ونلم التفاح طريقة للتعليم واللعب بنفس الوقت
الطفل يربط الكمية بالعدد

16/01/2022

شلون تشجعون اطفالكم يقضون اكثر وقت على بطنهم؟
فكرة اليوم خلينة كتب ع شكل دائرة كاملة والطفل يظل يفتر ويشوف وبنفس الوقت تتقوى عضلاتة...

17/12/2021

للذكرى💕
ايلين صارلهه ٣ ايام متنام زين ابد كل شوية كاعدة تبجي ومتضايقة من خشمهه.
إيليا كعد الصبح قبلي وكلي ماما ابقي نايمة لتكومين اني اسويلج ريوك
راح سوة لفة جبن وجابلي باكيت حليب وهو فرحان انت تعبانه ايلين مخلتج تنامين
دائما من اشوفه تعبان اعرض عليه مساعدة بالايام العادية وخصوصا هو لزمتة نشله والتهاب جيوب انفية لاكثر من شهرين يطيب ويرجع يتمرض
وعدنه قصة عن مساعدة الام ومشاركتهه بالاعمال المنزلية
كلهه رسخت ببالة
وهاي كاعد كبالي فرحان ههههه 💕

12/12/2021

كيفية تحفيز الطفل الرضيع
#مونتيسوري

10/07/2021

‎دعم التركيز
‎الطفل قادر عالتركيز من لحظة الولادة فقط ننطيهم وقت وبيئة مرتبة

‎ #طفولة #تعليم

06/07/2021

‎حدود واضحة بلطف
‎الحرية بحدود. جملة تطور ضبط النفس عند الاطفال ونطبقهه من لحظة الولادة ننطي حرية للطفل ضمن حدود الآمان وقدراتهم الجسدية.
‎ننطيهم اختيارات ووقت وفرصة للحركة والنشاط ننطيهم الفرصة يوكلون نفسهم. كلمة الحرية مرات فهمهه صعب بس بمنهج مونتيسوري يقصد ننطي الحرية للطفل بالاختيار، بالحركة، بالتعبير عن نفسهم. مو ننطيهم الحق انو يسوون اي شي يعجبهم وانما الحرية بحدود وقوانين واضحة بالبيت وقوانين المجتمع العامة.
‎هاي بعض الحدود اللي نخليهه للاطفال

‎ #طفولة #تعليم

04/07/2021

جدول يومي للاطفال
روتين صباحي وروتين مسائي لأيام الدوام
الجدول مخليت بي تفاصيل اكثر لأن الوقت مقضي في المدرسة من الساعة الثامنه والنصف الى الساعة الرابعة
فهذا الجدول اول ساعة بعد الاستيقاظ وبعد الرجوع من المدرسة الى وقت النوم
بالنسبة لصور الطباعة فقط اكتبو
Free visual daily routine for kids
راح تطلعلكم هواية صور اختارو اللي تشوفو مناسب للجدول مالتكم
وعندي ملاحظة صغيرة وقت التلفزيون لازم يكون عالاقل قبل ساعتين من موعد النوم. هنا اني غلطانة فراح اغير اخلي وقت التلفزيون بعد الرجوع من المدرسة ويغسل ويبدل باعتبار وقت استراحة حتة ابعدة عن وقت النوم قدر الامكان وأحيانا بصراحة منشغل اي شي الكتروني نبقة نلعب او نطلع نتمشة. يعني حسب الظروف..
ان شاء الله تستفادون ولو شي قليل من الجدول.

20/06/2021

تكلمنا في المنشور السابق

https://tinyurl.com/eahds75h

عن المراحل المختلفة في حياة المولود الجديد 👶

وسنكمل بقية المراحل في هذا المنشور

لا تنس مشاركة المنشور

#طفولة #تعليم

13/06/2021

11/06/2021

حبينه نغير الوان غرفة إيليا
اختارينة صورة وسوينة تقريبا مثلهه
عمل عائلي مشترك 💕
المدة تقريبا شهر او اقل

07/06/2021

شنو نراقب؟
*الحركة: الاستجابة الجسدية للتحفيز البصري والسمعي.
*المهارات الحركية الدقيقة:
كيفية مسك الاجسام
اي الاصابع يستخدم واي يد اليسار او اليمين
شنو القبضة اللي يستخدمهه لمسك الخرخاشة او الملعقة
شنو الاشياء اللي ديحاول يعيدهه ويتدرب عليهه مثل استخدام مسكة القلم لو قبضة اليد كاملة
*المهارات الحركية الكبيرة:
شلون يوگفون او يگعدون
شلون يمشون
التوازن
هل البيئة تدعمهم لو تخفق من حركتهم
*التواصل:
الاصوات اللي يسووهه للتواصل
الابتسامة
البكاء
لغة الجسد
التواصل البصري اثناء الحديث
اللغة المستخدمة
شلون تكون ردة فعلنه لتواصلهم ويانة
*التطور الادراكي:
بشنو مهتمين
شنو الشي اللي يتدربون عليه حتة يتقنو
الانشطة اللي ديكملوهه للنهاية
كمية الوقت اللي يقضوهه وية النشاط
عدد المرات اللي يعيدون بيهه النشاط او تجربتة بطريقة مختلفة
*التطور الاجتماعي:
تفاعلهم مع الاخرين مثل الاخوان او الاطفال او البالغين
شلون يطلبون المساعدة
شلون يراقبون الآخرين
شلون يبدون تفاعلهم
شلون تكون ردة فعلهم لأشخاص ميعرفوهم
*التطور العاطفي:
شوكت يبچي، يبتسم ويضحك
شلون يريحون نفسهم
شلون يتعاملون مع وقت انفصالهم عن الام او الاب
شلون يتعاملون مع الاشياء اللي تخرج عن سيطرتهم
*التغذية:
الرضاعة الطبيعية او الصناعية وشكد الكمية والوقت اللي تستغرقه
شنو ياكلون وشكد
شنو جدولهم بالاكل
منو يوكل الطفل
هل الطفل يحاول يوكل نفسه او احد يوكله
هل دنشجعهم ياكلون وحدهم لو لا
*النوم
روتين النوم والاستيقاظ
الطريقة اللي تخليهم ينامون
نوعية النوم مستمر ام متقطع
شكل نومتهم
شلون يستيقظون
*الاستقلالية
العلاقة مع الام وباقي افراد العائلة
هل يوجد مساعدة لو عوائق تأخر من استقلالية الطفل
*الملابس
هل الملابس تساعدة او تعيق من حركته واستقلاليتة
هل ديحاول ينزع او يلبس وحدة
هل ديعبر عن رأيه بالملابس لو لا
*المراقبة الذاتية
نسجل اوقات تواصلنة وية الاطفال حتة نرجع نشوف شلون دنتواصل وياهم
شنو يجي ببالنة واحنة نراقب
شلون تكون ردة فعلنه اذا الطفل رفض النوم او الطعام
شنو نگول من الطفل يتصرف تصرف عجبنة او ماعجبنة
د. ريمان الوكيل
The Montessori baby
By Simone and Junnifa