23/10/2019
اخوتي المتظاهرين ..
هالله هالله بالاملاك العامة، الدوائر، المنشآت النفطية، الموانيء، سيارات الدولة، أي مبنى حكومي فوكاه علم عراقي ..
هالله هالله باملاك الناس، محلاتهم، جنابرهم، سياراتهم، اذا ماتكدرون تحموهه لا تتقربون منها ..
هالله هالله بموظفين الدولة، شرطة المرور، كوادر المستشفيات، الدفاع المدني، موظفي الدوائر، ذوله اخوتكم ..
هالله هالله بقوات الامن، الجيش، الشرطة، لان كلنه نعرف اللي ضربكم مو همه، هذوله بين نارين، ووضعهم اصعب من وضعكم ..
السلمية اخوي اخوي، لا مولوتوف ولا غيره، بطل مي وعلم وقوطية ببسي للمسيل للدموع وبس ..
شعاراتك خليهه وطنية، لا تستفز الأمن، انتبه على ربعك لا يطب بينكم مخرب، اللي تحسوه مو راحة راقبوه، واذا تأكدتوا منه جروه وسلموه للشرطة والجيش ..
التظاهرة مو هدفهه القتال، ولا التخريب، انتو طالعين على حقكم بطريقة مشروعة وقانونية، لتحرفوهه عن مسارهه بسبب قوة العاطفة ..
الصدريين وغيرهم ينزلون وياكم هلا بيهم، عراقيين حالكم حالهم، ومنضبطين اكثر من غيرهم ..
ابتعدوا عن السلاح اللي بيد الامن، سياراتهم واجهزتهم ..
ديروا بالكم على نفسكم، انتو رايحين علمود حياة افضل، مو حتى تموتون ..
الظروف بعدتنه عنكم غصباً علينه، بس باقين وياكم لو من آخر الدنية ..
