20/10/2023
كلنة اول ما ردنة نختار تخصص الحاسبات واجهنة هذا السوال وين اروح علوم حاسبات لو هندسة حاسبات؟ زين شنو الفرق بيناتهن ؟ ياهو احسن ؟
المتخرجين او حاليا جاي يدرسون شاركونة رايكم و تجاربكم وية قسمكم ليش اختاريتوا و شتنصحون طلاب جدد ؟
اول شي لازم نعرف كل اختصاص و شنو فرق بيناتهم
1- علوم الحاسبات:
علوم الحاسبات تركز على السوفت وير يعني على برامج الحاسبات نظام التشغيل ومن خلال هل اختصاص نتعلم شلون نصنع هاي البرامح و التطبيقات راح نتعلم بي شنو انواع اللغات البرمجية نتعلم خوارزميات و قواعد البيانات.
2- هندسة الحاسبات
هندسة الحاسبات تركز على هارد وير و يعني معمارية مال حاسبة و معالجات ومن خلال هل اختصاص نتعلم شلون نصمم و نبني هاي القطع مثل روبوتات و معرفة بالدوائر الكهربائية و اجهزة الشبكات.
يعني هسة اذا اروح هندسة ما اكدر اتعلم برمجة ؟
الاختصاصين عدهم امور مشتركة راح تتعلم البرمجة و عن روبوتات سواء هندسة او علوم الاختلاف هو شكد التعمق بهل مجال من هاي الامور المشتركة
- تتعلم شنو هو الهارد وير و شنو هو السوفت وير
- تتعلم على مختلف اللغات البرمجية و الفرق بينهم
- تتعلم على انظمة التشغيل و الشبكات و الاتصالات
بس يبقى كل واحد يقدم معرفة اوسع بمجال معين
زين هسىة يعني شختار يا قسم ؟
اذا جنت مهتم بالسوفت وير و تريد تصير مبرمج و تسوي مواقع او تطبيقات مهتم اكثر بالجانب البرمجي للحاسبات روح علوم حاسبات
اما اذا جان اهتمامك اكثر بالهارد وير و تريد تشتغل باشياء ملموسة و تبي اجهزة و روح هندسة حاسبات
و بالاخير مهما جان القسم الي اختاريتة هذا ما يمنعك انو تشتغل باي مجال اله علاقة بالحاسبات لان بالاخير يعتمد عليك شكد تريد تطور نفسك تكدر تشتغل بالشبكات وانت خريج علوم حاسبات و تكدر تصير مبرمج وانت خريح علوم القسمين ينطنون معلومات عامة عن الواقع الحالي و متطلبات سوق العمل اذا تريد تنجح بهذا المجال لازم انت تطور نفسك و تاخذ كورسات و تحضر ورش و تشتغل بمشاريع وهاي الامور اهم من الشهادة اختصاص الحاسبات من الاختصاصت القليلة الي الخبرة مالتك اهم من الشهادة تكدر تتعلم على هاي المواد حتى اذا جنت بغير اختصاص.
17/05/2023
شنو هو Git وشنو هي استخداماتة ؟
منو يستخدم Git او Github بشكل شخصي خارج شركة ؟ منو مشتغل وية فريق بـ GitHub ؟
17/05/2023
صرحت مايكروسوفت على انه تم اضافة خاصية ربط اجهزة الـ IOS الى الـ windows 11. الان يمكنك ربط جهاز الـ iPhone واستخدام تطبيقات مثل iMessage وغيرها من التطبيقات و الخصائص
13/05/2023
تكتب بسرعة او تحفظ الكيبورد شي مهم باي مجال اله علاقة بالحاسبات وحتى لشخص غير اختصاص فهاي مجموعة من المواقع راح تساعدك توصل لهل مرحلة 🔥
شاركونة نتائجكم شكم كلمة بالدقيقة 🌝
10/05/2023
يا نظام تشغيل جاي تستخدمون 😎 و ليش اختاريتوا هل نظام 🤨 !؟
واذا لنكس ياهو منهن 😅😅
08/05/2023
احسن طريقة للتعلم هي انو تبدي تشتغل هاي المواقع تنطي شي بسيط تبدي تشتغل بي عبارة عن تحديات و مهمات بسيطة تخلي عندك معرفة باساسيات كل لغة
بالاضافة الى تكسر الروتين انو في حال مالك واهس تتعلم شي جديد تكدر من خلال هل الالعاب هم تتمرن و هم تتونس على التحديات
07/05/2023
مو الكل عدهم المعرفة باللغة الانكليزية لدرجة يتابع كورس انكليزي او محتوى تعليمي كامل لذالك هاي مجموعة من المواقع توفر محتوى لتعلم البرمجة والحاسبات بشكل عام باللغة العربية.
الي عندة مواقع غير المذكورة شاركنة بالتعليقات ممكن يستفاد منها شخص ثاني 🔥🔥
06/05/2023
ياهو تفضل و ليش ؟؟ 🤓
عن نفسي vs code وبس 😎 بس مرات تحتاج غيرة للغات معينة 🥹
05/05/2023
اكيد محد يستخدم نافذة الاوامر 😏
01/05/2023
الصراع الازلي بين البرامج المقرصنة والاصلية 🔥
بعد ما سوية احصائية بالصفحة تبين ان اكو هواي يستخدمون البرامج المقرصنة لعدد من الاسباب الاهم انو مجانية او انو يشوف البرنامج او الخدمة ما تستحق الدفع علمودها. وخاصة بالنسبة للألعاب واكو بعضهم انهم ما واجو مشاكل من هاي البرامج من قبل المشكلة ان هل مشاكل ما تكون دائما ظاهرية او تاثيرها يكون بطيء
خل يكون بعلمك الشخص الي جاي يسوي هاي البرامج مجانية هو هكر بالاخير ومجاي يسوي هل شي لهدف نبيل ممكن جاي يستهدف الافراد الي ينزلون هاي البرامج او بعض الاحيان يكون يستهدف الشركة نفسها. هذا ما يعني انو مراح يحاول يستفاد من المستخدم.
الخطر بهاي البرامج هو مو بس البرامج بحد ذاتة المواقع الي توفرها ايضا خطرة اشوف هواي حالات بكروبات عن ناس انضربت حاسباتهم بفايروس الفدية حتى قبل ما ينزل البرنامج فما بالك بعد ما تنزل البرنامج، هاي اهم الاشياء الي ممكن تصيب جهازك من خلال هاي البرامج
اولا: ممكن يستغل البرامج موارد جهازك للتعدين وهاي الحدث موجود بهواي برامج وحتى مواقع اغلب مواقع التورنيت تستخدم موادر المستخدم للتعدين من خلال مجرد زيارة الصفحة، وهذا الشي اكيد راح يقلل من اداء الجهاز ويقلل من عمرة الافتراضي.
ثانيا: يبيع بيانات المستخدمين ممكن البرامج يقوم بسرقة معلومات كموقع او تاريخ البحث والكاش الخاص بالتصفح مالتك ويبيعة للشركات اخرة ممكن تستفاذ منه. وكل هذا بدون علمك.
ثالثا: يحمل برامج اخرى دون علمك كلش سهل انو برامج يكدر ينزل برامج بالخلفية من دون ما تحس ويخفي عنك شايفين من تفتح المتصفح وتلكه محرك البحث مو كوكل هيج شي غريب اكيد مارين بيها إذا مو متصفح مالتك أصلا هيج حالته حاليا
كل هاي الي انذكرت لحد الان هي أمور بسيطة مقارنة بالمخاطر الباقية.
رابعا: ممكن ان يحتوي البرامج على payload راح تسمح للمخترق انو يوصل للجهاز ويتحكم بي او مجرد يخرب.
خامسا: انو تحوي على فايروس الفدية وراح تشفر كل بياناتك خاصة إذا تستخدم حاسوب العمل او حاسوبك الشخصي كل بيانات راح تشفر وما تكدر تسترجعها صورك، شغلك،
بعد كل هاي المعلومات اكيد البعض مراح يتهم حاليا الحصول على نسخ اصلية أسهل من قبل اكو هواي خدمات وطرق تكدر تحصل على عروض وتخفيضات على أسعار الاشتراكات مثل مرة وضحنه أهمية الايميل الجامعي توفر اغلب المواقع تخفيض او حتى نسخ مجانية للطلاب. واكو هواي بدائل مجانية لأغلب البرامج على سبيل المثال photoshop. اكو Gimp برامج مفتوح المصدر مشابه للفوتوشوب ممكن يكون بداية الك الى ان يصير الك دخل من التصميم تكدر تتحمل تكلفة البرامج، بالنسبة للألعاب مثلا تقدم steam خدمة مال family share تكدر تشترك بلعبة انت و اصدقائك و مجرد تشتروها من حساب هو يكون الرئيسي وينطي صلاحيات وصول للبقية اكو برامج توفر نفس هاي خاصية مثل office 365 اكو اشتراك family سعرة 100$ يوصل ل 5 مستخدمين تكدر انت و اصدقائك تشتركون يصير كل فرد علية 20$ بالسنة.
بالأخير القرار يعود الك و اكيد أتمنى ان تشاركونه نظرتكم عن الموضوع و تجاربكم 😊
15/04/2023
الفرق بين الـ compiler و Interpreter 🔥
14/04/2023
شاركونة بالتعليقات اذا عدكم موقع مفيد مو الكل تعرفة 😏
رابط الموقع: https://www.remove.bg
08/05/2023
07/05/2023
06/05/2023
05/05/2023
01/05/2023
15/04/2023
14/04/2023