بيتونة

أدركت مؤخراً إن التربية الحسنة نوع من أنواع الرزق، وإنه مو شرط الي يتعب على تربية أطفاله بالمستقبل يكونون أفضل الناس ويجازون اهلهم بالخير، ياما شفنا بواقعنا الكثير من العوائل الطيبة والي معشرها حلو يكون أطفالهم ناكرين وجحودين وبالعكس، من عائلة سيئة ممكن أن يطلع أبناء ماكو بطيبة قلبهم...

كله رزق وتوفيق من الله، علينا التربية والاجتهاد وعليه التوفيق والإستقامة

فيا رب أرزقنا أبناء صالحين نافعين طيبي القلب.

#بيتونة

سؤال للكادر التعليمي...

إذا أنتَ/ أنتِ تُدَرِسون مادة الانكليزي، وخلال الدرس الطالب صحح لكم نطقكم وكان نطق الطالب هو الصحيح شنو راح يكون رد فعلكم؟

#بيتونة

الصاحب ... ساحب

هواية نسمع هذا المثل الي يوصف بالضبط تأثير أقراننا علينا خصوصاً إذا كانوا قدوة بالنسبة لنا.

قبل كم يوم كان عندي تدريب بإحدى المدارس وكان من ضمن فقرات هذا التدريب عرض صور لمجموعة حيوانات والطفل يختار الحيوان الأقرب لصفاته، وبدل ما يصير الأختيار فردي شفت الأطفال يشكلون مجموعات كل مجموعة تختار حيوان واحد إلا بعض الأطفال الي كان إختيارهم فردي وما تأثروا بالمجموعة.

ممكن الخوف من الإقصاء و الحب لأفراد المجموعة يخلينا نغير قراراتنا حتى ما نحس نفسنا غريبين عنهم حتى لو كان هذا القرار يخالف الشي الي نريده فعلاً.

وممكن يكون تأثير صديق واحد كبير لدرجة تغيير قناعاتنا أو سلوكياتنا، لذلك خلونا نحرص على إحاطة أطفالنا بأشخاص ممكن ان يكون تأثيرهم إيجابي وعدهم القدرة على تغيير قناعات سلبية ربما تكون موجودة عند الطفل لأن تأثير الطفل الصديق لا يقل أهمية عن تأثير المربي.

#بيتونة

صارلي هواية مختفية وهسة رجعت وية نفر جديد انضم لعائلة بيتونة....

رزقنا الله بطفلة الحمد لله ❤️

وصار لآدم أخت

ليش من الأم تنزل منشور بكروبات النساء تحتاج مساعدة أو نصيحة لأنها تعبت، ملت، تعاني من ضغط ... الخ هواية يطلعون ينتقدوها ويتجاوزون عليها ويتهموها بالإهمال وتبدي المقارنات الشخصية ويخلوها تندم على اليوم الي فكرت تفضفض بي.

منو كال لازم نكون مثاليين طول الوقت؟
منو كال لازم الام تمشي مثل الروبوت وميصير تشكي أو تتعب؟
كلنا أمهات ونعرف بس الزن والون مال أطفالنا يخلي الواحد يفقد طاقته كلها، ليش نستكثر على الأم التعبير عن تعبها وبدل ما نكوللها يابة عاشت ايدج ورحم الله والديج والله يجازيج كل خير نبدي نسمعها كلام يسم البدن ويخليها باتعس من الحال الي اجتي بي.

مو الدين نصيحة؟ مو الكلمة الطيبة صدقة؟

الدين مو بس صلاة وصوم، اكو حسن المعاملة واكو جبر الخواطر.

مهما كانت شكوى الام بسيطة بالنسبة الكم لا تستهينون بيها، يمكن هي تعكزت على هاي الشكوى والي بقلبها شي اكبر واعظم ما تكدر تحجي.

قل خيرا او اصمت، المرة القادمة من تشوفون احد محتاج لنصيحة او تحفيز إذا ما كنتوا تكدرون تطيبون خاطره اتركوه، الترك أفضل من اللوم والتوبيخ.

وأعاننا الله وإياكم على ضغوط الحياة وألهمنا الصبر

#بيتونة

بنهاية دوام المدرسة كنت واكفة دا انتظر آدم وعلى مسافة بعيدة شوية كان اكو إمرأة وطفلين و3 رجال ما وصلني منهم بس عياط الأم وهي تهدد وتتوعد، بالبداية بالي ما كان يمهم لأن كنت اراقب الاطفال حتى أبني يندل مكاني وبعدها صار طريقنا بأتجاه هذا التجمع، كلما اقتربنا على صوت الأم بوجه الطفل وهي تتوعد انها راح تمسحه بالكاع ومدري شتسوي بي وبعدني ما وصلت الهم وأشوف احد الرجال يضرب الطفل (دفرة) اجتي ضبط اسفل بطنه وعلى عضوه الحساس بحيث الطفل (شهگ) قبل لا يبجي، وبتصرف لا إرادي رفعت صوتي على الرجل الي انصدم من رد فعلي بينما الام اخذت الطفل الثاني وغادرت.

بقيت واكفة افهم الموضوع وطلع انه اطفال اثنين بصف ثاني ابتدائي كل واحد طوله شبر ونص متعاركين بالمدرسة وام الطفل الي انضرب بدل ما تهدأ الوضع استفردت بالطفل الآخر (كدام ابوه) وبقت تعيط وترزل والاب كرد فعل على تصرف ابنه ورفضه للعنف الي بدر من ابنه تجاه زميله دفره دفرة ممكن تسبب له إعاقة لا قدر الله.

سؤالي هنا، يستوجب انت كأم توبخين طفل آخر وتهدديه بأسلوب اقل ما يمكن ان يقال عنه انه همجي وتعلين صوتج بنص الشارع و بدل ما تصالحين بين طفلين اثنينهم مو واعين وممكن بعد ايام يكونون اعز الاصدقاء تأججين المشكلة وتتسببين بعنف شديد للطفل الآخر؟

وانت الاب الله قدر ولطف هذه المرة، لو ان الطفل نتيجة هالدفرة توقفت كليته او سببت له ضرر في عضوه الحساس هل راح تكون الاب الصالح الي ما يرضى على الغلط؟ راح يعجبك ان تكابل ابنك بإعاقة او خلل انت سببته اله بس لأنك انحرجت من ذيج الام وحبيت تاخذ رد فعل كدامها؟

بصراحة الى الآن اعصابي مشدودة من هذا الموقف واتمنى أشوف أب الطفل باجر حتى افهمه بكل هدوء انه ماكو طفل بهذه الدنيا ما يعيش تجربة الشجار والصلح ... الخ

اعرف المتابعين هنا واعين ومدركين، لذلك اتمنى منكم ان تكونون انتو الطرف الحكيم بشجار الاطفال وتحاولون تساعدوهم على تحويل هذا الشجار لصداقة بدل ان نفقد احد منهم نتيجة عنف آني ممكن يسبب لهم إعاقة او يخليهم يخسرون حياتهم

#بيتونة

بيج توصيل من شي ان بدون تحميل شحن ع القطعة وبسعر الصرف ١٣٢٠

instagram.com

ليش اكو أطفال يحفظون بسرعة وأطفال ينشلع قلب الأم وهم ما حافظين؟؟

خلينا نعرف بالبداية ان عملية حفظ المعلومة وإسترجاعها تعتبر عملية كلش معقدة، كلنا نعرف أن الدماغ مكون من عدد هائل من الخلايا وهاي الخلايا حتى تشتغل وتأدي واجبها على اكمل وجه لازم يكونون مجموعين على حب الله، يعني بيناتهم روابط وعلاقة طيبة.

خلونا نتخيل المعلومة مثل الكرة الي امررها لصف من الاطفال الي واكفين سرة واطلب منهم ان يخلون الكرة توصل لنهاية السرة وترجعلي، اذا كان الاطفال متحمسين ومتعاونين الكرة راح ترجعلي بعد ثواني بس إذا الاطفال زعلانين وكم واحد منهم عاند يمررها احتمال اصلا هاي الكرة ما راح توصل للنهاية وبنص السرة راح تنشمر وتضيع.

الكرة هنا تمثل المعلومة ونهاية السرة يمثل الذاكرة طويلة المدى الي هدفنا ان نخزن بيها المعلومة (لان اي معلومة تروح هناك بعد صعب تنسي)

بعض الأطفال يولدون وخلاياهم هاي متصلة ومتشابكة وما يحتاجون نتعب وياهم حتى ياخذون المعلومة للذاكرة الطويلة ويرجعوها لذلك راح نشوفهم شنو يسمعون راح يعيدوه بالفارزة والنقطة ويكون حفظهم للمعلومة مميز لأن ببساطة الخلايا (أسرة مع بعضيهم) ومتعاونين كلش ومتحمسين لأي شي جديد.

أما الجزء الآخر من الأطفال فخلاياهم كل واحد ساد الباب على عائلته وكاعد وما عدهم علاقة بجيرانهم، فأي كرة توكع بحديقتهم لازم ننساها لأن مو طبعهم يطلعون ويمررون الكرة. لذلك المعلومة راح تضيع وتنسي.

طيب شنو الحل؟

الدماغ حاله حال اي جزء بالجسم يحتاج تمرين ورياضة وهذه التمارين تبدي من الولادة لحد الممات وتختلف هذه التمارين بمدتها وشدتها حسب الحاجة ويمكن حصر التمارين بالآتي:

تمارين حسية
تمارين حركية
تمارين ذهنية

كل وحدة من هذه الانواع تنطينا نفس النتيجة وهي زيادة التشابك بين الخلايا وبالتالي سهولة حفظ المعلومة واسترجاعها.

للمهتمين بأنواع التمارين ابحثوا عن المواضيع التالية:
- خرائط العقل
-العاب العقل
- انشطة الذاكرة البصرية
- العاب ايجاد الفروقات بين الصور
- العاب ايجاد المتشابهات

وأكيد ما ننسى الرياضات المختلفة والنظام الغذائي الصحيح والنوم الكافي.

الموضوع بي تفاصيل اخرى كثيرة ممكن ان تطلعون عليها

#بيتونة

تگدرون تكتمون الاشياء الحلوة بحياتكم بس غير مقبول أنه تظهروها على إنها سيئة جداً...

أحياناً أصادف شخصيات مُحبطة لدرجة تخليك تختنگ...

(ما عدنه، علاقتي بزوجي مو زينة، أطفالي ٢٤ ساعة مرضى، راتبنا كله ع الاطباء، صحتنا مو تمام، عيون الناس علينا ... الخ) طبعاً كل هذه الشكوى تجي من شخص واحد في وقت واحد وما تتركك الا توصلك لمرحلة كره ونبذ لكل شيء بحياتك.

ورغم ظاهرياً حالهم يبدو مختلف تماماً لكنهم ما يرتاحون إلا أن يستمروا بالشكوى.

ما أعرف سبب هذا الفعل وأتمنى أفهمه لأن من حق نعمة الله الموجودة عدنه أن تُقابل بالشكر وأن نُقابل واهب هذه النعمة بالحمد والطريف أن أطفالهم يبدون يحاكون نفس أسلوب البالغين وتلاگيهم عبارة عن كائنات صغيرة قلقة ومتوترة ومشبعة بالسلبية.

صح ممكن أكو ناس تحسد بس نشر السلبية بهذا الشكل يدعو للنفور.

تعرفون هيچ شخصيات؟

#بيتونة

أمهات صف الأول الإبتدائي قريبًا

يرجى مشاركة المنشور بلكي يلکوه

الله يساعد كل أم عدها طفل بحالة خاصة، المجتمع لا يتقبل هالطفل كطفل ولا يتقبله كمراهق ولا كبالغ او حتى إنسان، واحنا نعرف كلش زين اي ام عدها هيج طفل طلعتها وطبتها تكون لازم ملازمة لهالطفل والا ما تكدر تطلع وباليوم الي تلكه مجتمع يحويها ويتقبل طفلها لازم يطلعلها شخص ينغص عليهم هالفرحة!

منشور اليوم اني جدا حزينه ومستائة واني اكتبه
موقف حصل ويه احد الأمهات ماخذه ابنها من أطفالنا المميزين بالتوحد الطفل عمره خمس سنوات ونص
رايحين يوم ترفيهي حتى الطفل يفرح ويلعب حاله حال اي طفل
بيتهم بالكرخ وجزيرة بغداد السياحيه
الي بيها المدينة المائيه بالرصافه وكلش بعيده وكلنا نعرف هذا الكلام يعني اذا ماكو ازدحام الطريق ياخذ ساعه على الاقل
الام ماخذه ابنها على اساس انه يوم الثلاثاء للنساء مثل ما موضح بالصوره وماخذتها الام موجوده باب المدينه
واصلين بالباب كايليها الولد ممنوع يطب
زبن ليش لانه ولد ومايصير يطب ويه النساء
يابه هذا طفل مجرد طفل يعني الأمهات لازم يعوفون أطفالهم بالبيت ويجون وحدهم
وفوكاها بي توحد
كايليها دخلي واحجي ويه المسؤلين جوه
طبعا الام قاطعه مسافه طويله ومحضره الطفل
المسؤول يكللهاا مايطب الطفل لو تروحين ترجعي للبيت وتجين
لو تدخلين وتعوفي يمنا
الام كايلتله هذا طفل توحد مايعرف يتواصل ومستحيل يبقى يم شخص غيري يخاف ويكوم يبجي
يجاوبها يكللها هاي التعليمات
طيب اني اريد أسألكم يامسؤولي المدينة المائيه
انتوا تقبلون تتركون أطفالكم ويه شخص غريب ماتعرفوا حتى إذا كانوا طبيعين
شحال الي بي توحد لايحجي لايعبر
طيب انتوا يامسؤلي المدينه المائيه الي حطيتوا هذه التعليمات
مافكرتوا بالأطفال من ذوي الهمم والحالات الخاصه
والمسؤول شايف الطفل بالكاميرا
ويكللهم كبير مايدخل لانه أطفالنا نموهم قوي
شخص ثاني يكللها زين انتي شايله جنسيته وياج
والأم تكللهم الطفل عنده توحد يعني نظرته للاشياء مو مثل الطفل العادي حتى لو عمره 15 سنه
طيب وين جانت تعليماتكم وانتوا كاتبين بالقطعه بباب المدينه
اربع ايام بالأسبوع مختلط
فقط يوم واحد للعوائل ويوم واحد للنساء
والأم كلتلكم جايين من مكان بعيد
ليش ماذكرتوا انه بيوم النساء ممنوع اصطحاب الاولاد
زين هاي الاربع ايام مختلط ماراح يدخلون بيها اولاد وشباب ورجال من جميع الأعمار وين تعليماتكم
ليش ماكو تعليمات تخص هذا الشي
التعليمات جتي من يم طفل مريض ولازم تنفذ
علما انه سعر بطاقة الدخول 25 الف دينار
كلش عيب هذا التصرف
الطفل راجع الطريق كله يبجي
كان الاحرى بيكم يا إدارة المدينة المائيه يكون عدكم وعي وانسانيه بالتعامل مع الحالات الخاصه
وتحذون حذوا هوايه مرافق ترفيهيه ومولات ببغداد حتى سعر تذكره الدخول ماياخذوها من الأطفال ذوي الهمم ومحترمين الأطفال وعوائلهم ويقدروهم بكل الطرق
معيب جدا هذا التصرف ومو إنساني
اتمنى منكم أن تشاركون هذا المنشور لانه اريد الصوت يوصل للشخص الي وضع هذه التعليمات
والي يكلي خصوصيه ويجوز النساء مايقبلون لو حرام
احب اكول انه اكيد بيهم أمهات وراح يقدرون معنى انه هذا طفل من ذوي الهمم
اضافه إلى كون أطفال التوحد قمه بالبرائه حتى لو الشخص يكبر بعمر العشرين
يجوز عقله بعده بعمر 12 سنه
ارجو منكم مشاركة هذا المنشور حتى يوصل صوت أطفالنا وفعلوا هاشتاج
#لطفلي حقوق
@الجميع