عيادة طب الاطفال - دكتورة ازهار ناجي

❄️ تلاحظون هالشتا كثرت الامراض التنفسية؟

الشتا هالسنة كلش بارد
وإحنا هنا مو متأقلمين على البرد القارس
لا ببيوتنه، ولا بأجسامنه، ولا حتى بملابس الأطفال.

🔹 البرد ما يسبب المرض مباشرة
بس شيسوي؟
• ينشف مجاري التنفس
• يضيّق القصبات
• يخلي الفايروسات تدخل أسهل

👶 الأطفال، خصوصًا دون السنتين:
• يكثر عندهم السعال
• يطلع أزيز صوت يشبه الصفير
• يتعب صدرهم حتى بدون حرارة

وهذا مو ضعف مناعة
ولا إهمال من الأهل
هذا تأثير الجو البارد علينا كبلد غير متعوّد عليه

✅ شنسوي ؟
• تدفئة معتدلة بالبيت (لا برد ولا حر زايد)
• نلبّس الطفل طبقات
• نبعده عن الهوا البارد المباشر
• غسل الأنف بمحلول ملحي
• سوائل دافية

🚩 ملاحظة مهمة:
مو كل سعال يحتاج مضاد
ومو كل سعال حساسية

أحيانًا الجو وحده كافي يتعب الصدر

🩺 إذا السعال طول، أو صار رطب، أو الطفل ما يتحسن
هنا نراجع الطبيب ونقيم الحالة بهدوء.

💙 ديروا بالكم على أطفالكم
الشتا يعدي… وصحتهم أمانة.

د. ازهار ناجي
٧٨٢٧٧٣٠٧٧٦ #عيادة #الاطفال #ازهارناجي

طفلك اكمل السنة الاولى واسنانه بعدها ماطلعت !!!؟ اقرا هذا الموضوع !!

⁉️ متى يبدي التسنين ؟
• الأسنان الأولى عادة تظهر بين 6–10 أشهر.
• أول الأسنان غالباً القواطع السفلية الأمامية.
• بعض الأطفال يبدأ عندهم الأسنان قبل 6 أشهر وبعضهم بعد السنة، وهذا طبيعي غالباً.

⁉️ متى نقلق؟
• عادة لا داعي للقلق إذا لم يظهر أي سن حتى 18 شهر "يعني ممكن يتاخر الى السنة والنصف".


✔️ ممارسات تساعد على ظهور الأسنان وتخفف الالم
• تدليك اللثة: بإصبع نظيف أو شاش مبلل بالماء.
• العضاضة (Teethers): تكون سيليكون نظيفة، مبردة (ليست مجمدة).
• الأطعمة الباردة والطرية: جزر مسلوق، تفاح مسلوق، موز مبرد.

🍌🍎🥕 الأطعمة المناسبة للتسنين
• الخضار والفواكه الطرية: جزر، تفاح، (مسلوق أو بارد).
• الحبوب والمخبوزات المخصصة للأطفال: بسكويت الأطفال الخالي من السكر.
• الأطعمة الغنية بالكالسيوم: حليب، زبادي، جبن طرية.

❌ تجنبي الحلويات الصلبة والسكريات والمكسرات الكبيرة .

💊 الفيتامينات والمعادن المهمة

العنصر المهم والوحيد اللي ممكن ناخذه بشكل قطرات هو
فيتامين D3 يوميا 400 IU، اضافة الى التعرض لاشعة الشمس.
باقي العناصر مهمة طبعا لكن الكميات اللي يحتاجها الطفل تسدها التغذية السليمة مثل:
1. الكالسيوم :حليب، زبادي، جبن، بروكلي
2. فيتامين C:برتقال، كيوي، فراولة، بطاطا حلوة
3. الحديد: لحوم مهروسة، عدس، بيض
4. فيتامين A وB: جزر، بطاطا، حبوب، بيض

ودمتم بصحة وسلامة
د. ازهار ناجي
٧٨٢٧٧٣٠٧٧٦ #عيادة #الاطفال #ازهارناجي

سعال وصوت مبحوح؟ انتبهي… ممكن يكون كروب!

إذا سمعتي طفلچ يسعل سعال يشبه نباح الكلب وصوته صار مبحوح، خصوصًا بالليل، فغالبًا هذا اسمه الكروب (Croup).

⁉️ شنو هو الكروب؟

الكروب التهاب يصيب الحنجرة والقصبة الهوائية، يسبب:
• بُحّة بالصوت
• سعال جاف قوي
• أحيانًا صعوبة خفيفة بالتنفس
وغالبًا يظهر عند الأطفال من 6 أشهر إلى 5 سنوات.

⁉️الاسباب ؟

أغلب الحالات سببها فايروس (مو بكتيريا)، مثل:
• نزلات البرد
• الإنفلونزا
ويكثر ظهوره:
• بالشتاء
• بعد الزكام
• عند الأطفال اللي يتحسسون من البرد

⁉️ الاعراض:
• سعال جاف وصوته غريب (نُباحي)
• بُحّة بالصوت
• حرارة خفيفة أحيانًا
• الأعراض تزيد بالليل 🌙

⁉️ شلون نعالجه بالبيت؟

إذا الحالة خفيفة:

✔️ هواء رطب
• بخار حمّام دافي
• أو جهاز ترطيب الجو

✔️ السوائل
• مي، حليب، شوربة
(السوائل تهدّي الحنجرة)

✔️ تهدئة الطفل
• خلي الطفل هادئ قد ما تكدرين, ابد لا تخليه يبجي

❌ لا تعطي الطفل:
• مضادات حيوية (ما تفيد لأن السبب فايروسي)
• أدوية سعال بدون استشارة طبيب

🚑🚑🚑 راجعي الطبيب فورًا إذا:
• الطفل يتنفس بصعوبة
• صدره يدخل ويطلع بقوة
• صار لونه أزرق حول الفم
• ما يگدر يحچي أو يبچي من ضيق النفس

👈• الطبيب ممكن يعطي كورتيزون (شراب أو بخاخ)
هذا الدواء يخفف التورم بسرعة
وأحيانًا يحتاج الطفل تبخير خاص بالمستشفى للحالات الشديدة.

🤷‍♀️ شلون نقي أطفالنا من الكروب؟

✔ غسل اليدين باستمرار
✔ إبعاد الطفل عن المصابين بالزكام
✔ عدم تعريضه لهواء بارد مباشر
✔ علاج الزكام من بدايته
(يعني مختصر مفيد مااا حبكت الطلعة بهالبرد للحدايق والالعاب !!!)

دمتم بصحة وسلامة
د. ازهار ناجي
٧٨٢٧٧٣٠٧٧٦ #عيادة #الاطفال #ازهارناجي

🧬سالفة صغيرة بالوراثة🧬
🤔 سؤال يدوّخ العائلة:
الأب صنف دمه A
الأم صنف دمها A

👶 الطفل طلع O

شنو السالفة؟
خطأ بالتحليل؟
لو بدلوا الطفل ؟ 😳

لا هذا ولا ذاك

الحقيقة ببساطة:
صنف A "مرات "يكون مخبي وياه O

👨‍🦱 الأب = A + O
👩 الأم = A + O

اجتمعوا الـ O ويا الـ O
👉 طلع الطفل O

ودمتم بصحة وسلامة
د. ازهار ناجي
٧٨٢٧٧٣٠٧٧٦ #عيادة #الاطفال #ازهارناجي

💭 طفلي لا ينام!
دليل النوم الصحي للأطفال (0–2 سنة)

🔹 عدد ساعات النوم الموصى بها (WHO & AAP)
• حديثو الولادة (0–3 أشهر): ⏰ 14–17 ساعة يوميًا (متقطعة)
• الرضّع (4–11 شهر): ⏰ 12–16 ساعة يوميًا (تشمل الغفوات)
• الأطفال (1–2 سنة): ⏰ 11–14 ساعة يوميًا

📌 الغفوات النهارية جزء أساسي من النوم الصحي وليست نومًا زائدًا.
💡 غفوة الطفل تعني أن جسمه ودماغه محتاجان للنوم والراحة. إيقاظ الطفل بدون سبب طبي قد يسبب توتر وإرهاق عصبي 🚩

🔹 الأطعمة التي تساعد على النوم
✅ الموز
✅ الحليب الدافئ
✅ الشوفان
✅ الرز
✅ البطاطا
✅ التمر بكميات صغيرة
(تحتوي على مغنيسيوم وتريبتوفان يساعدان على الاسترخاء)

🔹 الأطعمة المسببة للأرق
❌ الشوكولاتة
❌ المشروبات المحلاة
❌ الأطعمة العالية بالسكر
❌ الأكل الثقيل قبل النوم
❌ الكاكاو والمنبهات

🔹 تصرفات ومفاهيم خاطئة عن نوم الطفل تحتاج للتصحيح

❌ إيقاظ الطفل بالقوة بحجة “حتى ينام بالليل”
❌ تغيير مواعيد النوم يوميًا
❌ الإضاءة القوية أو التلفزيون قبل النوم
❌ اللعب الزائد أو التحفيز قبل النوم مباشرة
❌ إعطاء أطعمة منبهة مساءً

نصيحة ذهبية

🔔 تنظيم النوم يعني احترام حاجة الطفل للراحة، لا حرمانه منها. #عيادة #الاطفال #ازهارناجي

🌡️ ارتفاع حرارة الطفل ليست العدو الاول!!!

أغلب حالات ارتفاع الحرارة عند الأطفال
علامة إن المناعة تشتغل وتحارب المرض 💪
مو مرض بحد ذاته بل هي دفاع ، ومو كل الحالات نحتاج نخفض الحرارة بسرعة ويصيبنا الرعب أول ما نشوف الرقم بالمحرار.

نهدأ وما نخاف إذا 👇
• الحرارة أقل من 38.5
• الطفل يلعب أو واعي
• يشرب سوائل
• ماكو خمول أو تعب غير طبيعي

بهالحالة؟
👀 نراقب فقط… وخلي المناعة تكمل شغلها.

⁉️لعد شوكت ننتبه ونبدي نخفض الحرارة ؟؟!!

🚩 ننتبه ونبدي ننزل الحرارة فورًا إذا:
• وصلت 38.5–39 أو أكثر
• الطفل خامل، متضايق، ما يشرب
• عمره أقل من 3 أشهر
• عنده تاريخ مسبق تشنجات حرارية
• الحرارة مستمرة أكثر من 3 أيام

💊 شلون ننزل الحرارة ؟
• البارستول حسب الوزن
• ملابس خفيفة + سوائل
• لا مي بارد ❌
• لا كحول ❌
• لا أسبرين ❌
طبعا الهدوء جزء من العلاج 🤍

دمتم بصحة وسلامة
د. ازهار ناجي
٧٨٢٧٧٣٠٧٧٦ #ازهارناجي #عيادة

✨ “مو كل بيضة طيبة… نعم، أكو بيض مر!”
بعض الأطفال بعمر 6–12 شهر يرفضون البيضة أو يبصقونها من فمهم.
هنا الام تفكر: “طفلي ما يحب البيض!”
لكن الحقيقة أحيانًا مختلفة تمامًا 👇

🍳 السبب ممكن يكون البيضة نفسها

البيض من أكثر الأطعمة الحساسة في الطعم والرائحة، لذلك ممكن يطلع بيها طعم مرّ أو غريب حتى لو شكلها طبيعي.

الطفل بهالعمر ما يقدر يقول:
“البيضة مرّة!”
فيسوي اللي يعرفه: يبصقها!!.

🎯 ليش البيض ممكن يطلع مرّ؟
1. نوع العلف
الدجاج اللي ياكل علف نوعيه سيئة او بي إضافات يبيض بيض طعمه مو مستساغ.
مو شرط فاسد، بس طعمه مو مريح.
2. مضادات أو أدوية للدجاج
إذا الدجاج أخذ علاج قبل فترة، ممكن يترك أثر بسيط على طعم البيض، خصوصًا أول كم يوم.
3. امتصاص روائح
قشرة البيض مسامية، وتمتص روائح من الثلاجة أو المخازن :
• بصل
• ثوم
• سمج
وهذا يغير الطعم.

4. طريقة الطبخ
• سلق طويل
• حرارة عالية
يسوي تفاعل كبريت → طعم معدني أو مرّ.
5. البيض قديم
مو لازم يكون فاسد، ممكن بس قديم شوية.

شلون نعرف بدون ما الطفل 👶 يتكلم؟
الطفل الجائع يبتلع الطعام بسهولة اذا الطعم عادي، لكن اذا مر او بي مشكلة يبصق، يبكي، يدفع الملعقة وهذا طبعا تصرف طبيعي دفاعي مو دلال.

✔️ الحل شنو ؟
قبل ما تقدمي البيض للطفل:
• اكسرّي البيضة بصحن وشميها وتاكدي انه طازجة حتى ممكن تتذوقين بطرف اللسان.
• بعد سلقها او قليها، تذوقي قبل الطفل.
•جرّبيه مرة ثانية بعد أيام، بشكل اخر :
• مسلوق
• مقلي
• أومليت ناعم

ودمتم بصحة وسلامة
د. ازهار ناجي
٧٨٢٧٧٣٠٧٧٦

💊 الاستخدام الامن للأدوية عند الأطفال

الأدوية نعمة إذا استُخدمت بشكل صحيح، لكن أي دواء قد يُسبب ضرر إذا أُعطي بجرعة أو طريقة غير مناسبة.
- كل طفل يختلف عن الاخر لاتعطي دواء لطفل لان اخو استفاد منه، استشر الطبيب قبل اعطاء الدواء
- جرعة العلاج تحدد حسب الوزن اولا ثم العمر ، ولا نستخدم ملعقة البيت او تقدير عشوائي الصح نستخدم ملعقة مدرجة من الصيدليه او سرنجة.

- يمنع استخدام المسكنات القوية الا بإشراف الطبيب، لذلك يفضل ان يبدا الاهل بالباراسيتامول او ايبوبروفين.

- مو كل حرارة تحتاج مضاد حيوي نزلات البرد والزكام فيروسي ماتحتاج مضاد، نستخدم المضاد اذا الطبيب شخص عدوى بكتيرية.
واذا استخدمنه المضاد مانوقفه اول مايتحسن الطفل !! نكمل المدة اللازمة حتى لا نسبب مقاومة بكتيرية.

- بعض الادوية تحتوي نفس المادة باسماء تجارية مختلفة اذا استخدمنا هذي الادويه نفس الوقت ممكن تسبب جرعة زايدة.
مثال: طفل عنده زكام وحرارة يستخدم ادول تحميله و شراب كولدين المادتين تحتوي على باراسيتامول وطبعا الامر يزداد سوء اذا اخذ بارستول وريدي بنفس الوقت قد يصل الامر الى تسمم لا قدر الله.
( لاتنسى تاخذ وصفة الطبيب والادوية من تراجع مستشفى اوطبيب اخر )

- الاطفال الرضع تحت عمر ال٣ اشهر
اي حرارة يجب مراجعة الطبيب .

دمتم بصحة وسلامة
د. ازهار ناجي
٧٨٢٧٧٣٠٧٧٦ #عيادة #الاطفال #ازهارناجي

نداء الى من يهمه الامر

إذا راس الهرم مشغول بغير أمور…
فما يبقى غير نبدأ من القاعدة.

نبدأ من الناس اللي بعدهم يحسون بالمسؤولية،
من الأهل اللي يمنعون طفلهم المريض من الذهاب للمدرسة،
من المعلّم اللي يتفهم،
ومن الإدارات اللي تختار الرحمة قبل النظام.

لأن الوقاية مو قرار وزاري،
هي وعي يبدأ من بيت، ويمتد لصف،
ويكبر حتى يصير صوت يسمعه “الهرم” كله.

مراجعينا الكرام
تستقبلكم عيادة الدكتورة ازهار ناجي
من الساعة٤ عصرا الى ٨ مساء
عطلة العيادة (الاثنين، الخميس ، الجمعة)
مع تمنياتنا للجميع بالصحة والسلامة
رقم الحجز

‪+964 782 773 0776‬
واتس اب
وموبايل

مراجعينا الكرام
🌙رمضان كريم
تعاود عيادة الدكتورة ازهار ناجي استقبال المراجعين من يوم السبت القادم ١٥/٣ باذن الله ويكون الدوام في شهر رمضان قبل الفطور من الساعة ٣-٦ عصرا
عطلة العيادة (الاثنين،الخميس،الجمعة)
"دمتم بخير"

“ تعاود العيادة تقديم خدماتها اعتبارا من يوم السبت الاول من شباط ٢٠٢٥"
من الساعة ٤ عصرا -٨ مساء
عطلة العيادة الاثنين- الخميس- الجمعة