ساداتی پیرخدری شاهۆ

هاونیشتمانیانی ئیماندۆست و سەربەرزو خۆشەویستی کوردستان
بنەماڵە بەڕێزەکانی ساداتی پیرخدری شاهۆ

بەبۆنەی هاتنەوەی جەژنی ڕەمەزانی پیرۆزەوە، گەرمترین و جوانترین پیرۆزبایی ئاڕاستەی یەک بە یەکی ئێوەی بەڕێز و سەرجەم موسڵمانانی جیهان دەکەین.
لە خودای گەورە و میهرەبان داواکارین، ڕۆژوو و پەرستش و عیباداتی هەموو لایەکی قبووڵ کردبێت و ئەم جەژنە ببێتە مایەی خێر و خۆشی و ئارامی بۆ هەمووان.
خوشک و برایانی بەڕێز
ئەمساڵ لە کاتێکدا پێشوازی لە جەژنی ڕەمەزان دەکەین، کە ناوچەکەمان و هەرێمی کوردستان بە دۆخێکی نەخوازراو، هەستیار و پڕ لە مەترسی ئەمنی و سیاسی نێودەوڵەتیدا تێدەپەڕێت. ئاکامەکانی ئەو جەنگە وێرانکەرەی نێوان (ئەمریکا و ئیسڕائیل) لە لایەک و (کۆماری ئیسلامی ئێران) لە لایەکی ترەوە، ڕۆژ بە ڕۆژ توندتر دەبێتەوە و سێبەری مەترسییەکانی بەسەر ئاسایشی ناوچەکەدا کێشاوە.
مایەی نیگەرانییەکی قووڵە کە هەرێمی کوردستان ڕووبەڕووی هەڕەشە و هێرشی ناڕەوای درۆن و ڕۆکێتەکانی هێزە میلیشیا توندڕەوەکان و لایەنە ناوچەییەکان دەبێتەوە، بەتایبەت بۆ سەر شارە خۆشەویستەکانی (هەولێر و سلێمانی)، کە ئەمەش هەڕەشەیەکی ڕاستەوخۆیە بۆ سەر ژیان و ئارامیی هاووڵاتیانمان.
ئێمە وەک مەڵبەندی ڕۆشنبیری و کۆمەڵایەتی ساداتی پیرخدری شاهۆ، لەم سۆنگەیەوە داوا لە سەرکردایەتی سیاسی و حکومەتی هەرێمی کوردستان دەکەین، کە لەم قۆناغە سەختەدا بە گیانی لێپرسراوێتی، یەکڕیزیی نەتەوەیی و بەکارهێنانی حیكمەت و عەقڵانیەتی سیاسی مامەڵە لەگەڵ ئەم دۆخە پڕ مەترسییەدا بکەن. پاراستنی قەوارەی هەرێم و گیانی هاووڵاتیان پێویستی بە یەکدەنگی و یەکهەڵوێستی هەموو لایەک هەیە بۆ تێپەڕاندنی ئەم گەردەلوولە نەخوازراوە.
لە کۆتاییدا، دووبارە جەژنتان پیرۆز بێت. نزا دەکەین خودای گەورە کوردستان و گەلانی ناوچەکە لە هەموو بەڵا و نەهامەتییەک بپارێزێت و ئاشتی و سەقامگیری هەمیشەیی باڵ بەسەر نیشتمانەکەماندا بکێشێت.
مەڵبەندی ڕۆشنبیری و کۆمەڵایەتی ساداتی پیرخدری شاهۆ
٣٠ ڕەمەزانی ١٤٤٧ ک بەرامبەر ١٩ ، ٣ ، ٢٠٢٦

بسم الله الرحمن الرحيم
يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي *
صدق الله العظيم.

بە ملکەچ بوون بە قەدەر و ویستی خوای گەورە، هەواڵی کۆچی دوایی (جەنابی مامۆستا حاجی سەید ئەنوەر)، سەرپەرشتیاری مزگەوت و خانەقای شێخانی زەمبیلی پیرخدری ڕادەگەیەنین.
جەنابی حاجی شێخ ئەنوەر، نەک تەنها کەسایەتییەکی ئایینی و کۆمەڵایەتیی ناودار، بەڵکو چرایەکی ڕوونی عیرفان و زانست بوو لە ڕۆژهەڵاتی کوردستان و خزمەتکارێکی دڵسۆزی ڕێبازو تەریقەت بوو.
ئێمە لە مەڵبەندی ساداتی پیرخدری شاهۆ، زۆر بە گەرمی پرسە و سەرەخۆشیی ئاراستەی بنەماڵەی بەڕێزیان و موریدان و هەوادارانی خانەقای زەمبیل دەکەین، خۆمان بەهاوبەشی ئەم خەم و پەژارەیە دەزانین، لە خوای گەورە داواکارین جێگای جەنابی شێخ بەهەشتی بەرین بێت و سەبووری و دڵنەوایی بە هەموو لایەک ببەخشێت و نەوە بەڕێزەکانی تەمەن درێژبن.
إنا لله وإنا إليه راجعون

دوو داواکاری لە ( مەڵبەندی ڕۆشنبیری و کۆمەڵایەتی ساداتی پیرخدری شاهۆ ) بۆ ڕای گشتی

سەرەتا دروودی الله ( ﷻ) بڕژێت بەسەر حەزرەتی فەخری کائینات خۆشەویست و نازدارو بەرز ڕەوشت محمدالمصطفی (ﷺ) کە لەفەرمایشتێکدا دەفەرموێت.
( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ، مَثَلُ الْجَسَدِ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى ) .
واتا ( وێنەی باوەڕداران لە خۆشەویستی و بەزەیی و سۆزیان بۆ یەکتری، وەک وێنەی جەستەیەک وایە، ئەگەر ئەندامێکی بێشێت و ئازاری هەبێت، هەموو ئەندامەکانی تری جەستە بە ؛ گەرمەتاو ؛ بێخەوی هاوسۆزی و ئازاری بۆ دەچێژن ).

پەیام و داواکاری
لەم ڕۆژە پیرۆزانەی بەرەو کۆتای مانگی ڕەمەزان، کە گەلەکەمان بەدۆخێکی دارایی سەخت و لەژێر سایەی جەنگێکی سەپاوو ( ناڕون ئاکامدا ) دەگوزەرێنێت، وەک ئەرکێکی نیشتمانی، ئاینی و ئیخلاقی، ئەم دوو داواکاریەی خوارەوەمان بەپێویست زانی بە پەیامێک بڵاوی بکەینەوە بۆ ڕای گشتی هەرێمەکەمان و لایەنە پەیوەندیدارەکان، والله من وراء القصد .

داواکاری یەکەم
ئاشکرایە براکانمان لە ڕۆژهەڵاتی کوردستان لەژێر باری جەنگ و تەنگژەیەکی ئابووریی خنکێنەردان، با مێژوو بەبیر خۆمان بهێنینەوە کە چۆن لە ساڵی ١٩٩١ و دوای ڕاپەڕین، ئەوان باوەشیان بۆ کردینەوە و نان و ماڵی خۆیان لەگەڵمان بەش کرد، ئێستا کاتی ئەوەیە ئێمەش بە هەمان مەردایەتی و کوردایەتی هاوکاری و کۆمەکیان بۆ بنێرین، بیسەلمێنین کە وەفا تەنها قسەی سەر مینبەرەکان نییە، بەڵکو کارێکە لە مەیداندا، بۆیە داوا لە خێرخوازان و چاکەکاران دەکەین کەمپینی هاوکاری بۆ ڕۆژهەڵات هاوشێوەی ڕۆژئاوا بەهەماهەنگی دەزگاکانی ڕاگەیاندن، ڕێکخراوو لایەنە خێرخوازیەکان ڕابگەێنن، ئێمەش لە مەڵبەندی ساداتی پیرخدری شاهۆ وەک هەمیشە چیمان پێبکرێت، ان شاء الله درێخی ناکەین.

داواکاری دووەم
لە پشت دەرگا داخراوەکانی شاردا، باوکانی بەشکۆ و دایکانی نزاخوێن هەن کە نایانەوێت تەنگژەی دارایی، کەرامەتیان بشکێنێت.
داوا دەکەین لە هەموو بازرگان و فڕۆشیاری خۆراک و پێداویستی و هەرکەرەستەیەکی تری ڕۆژانەی هاوڵاتیان لە سەرجەم شارەکانی کوردستان، ئەو سەروەت و سامانەی بەدەستیدێنن، ئەمانەتێکە لە گەردنتان!.
تکایە تەنها لەبەرخواو بۆ خوا ڕەچاوی توانای دارایی هاوڵاتیان بکەن، و باریان قورستر مەکەن بە گرانکردنی نرخی خۆراک و پێداویستییە ڕۆژانەکان. دڵنیابن بەرەکەتی ڕاستەقینە لە قازانجی زۆردا نییە، بەڵکو لە ڕەزامەندی خودا و متمانەی خەڵکدایە، با بازاڕەکانمان تەنها شوێنی قازانج نەبن، بەڵکو ببنە مەیدانی مەردایەتی و پاراستنی شکۆی مرۆڤەکان، داواتان لێ دەکەین نەڵێن تەنها کڕین و فرۆشتنە، بەڵکو بیکەنە تیجارەت لەگەڵ خودا.
کەمکردنەوەی کرێیەک، هەرزانکردنی کاڵایەک، یان سڕینەوەی قەرزێکی سەر دەفتەری فڕۆشگاکان، لای خودا لە هەموو ناو و ناوبانگێک گەورەترە.

لە کۆتاییدا دەستەکانمان بەرەو ئاسمان بەرز دەکەینەوە و دەڵێین ـ خودایە، بە گەورەیی و ناوە جوانەکانت لێت دەپاڕێینەوە، گەلی کورد و خاکی کوردستان لە هەموو جەنگ، نەهامەتی و ناخۆشییەک بپارێزە. خوایە، دڵەکانمان بە ڕووناکی تەبایی و یەکڕیزی ئاوەدان بکەرەوە و ئاشتی و ئارامی بڕێژە بەسەر وڵاتەکەماندا. نزاکانمان لێ وەربگرە و مەهێڵە هیچ مرۆڤێک لە سایەی ڕەحمەتی تۆدا بێهیوا بێت.
رَبَّنَا وَ تَقَبَّلْ دُعَاء.

مەڵبەندی ڕۆشنبیری و کۆمەڵایەتی ساداتی پیرخدری شاهۆ
٧ ، ٣ ، ٢٠٢٦ بەرامبەر ١٨ ڕەمەزانی پیرۆزی ١٤٤٧ک

#کەناڵەکانی #ڕاگەیاندنی #ناوخۆ #بازرگانان #خێرخوازان #حکومت #ڕێکخراوەکان #یەکێتی #پارتی #یەکگرتوو #کۆمەڵ #هاوڵاتی #کوردستان .

دوای نیوەڕۆی ئەمڕۆ چوارشەممە ٢٥ ، ٢ ، ٢٠٢٦ شاندێکی مەڵبەندی ڕۆشنبیری و کۆمەڵایەتی ساداتی پیرخدری شاهۆ وێڕای بەشداربونیان لەپرسەی خزمان و ئامۆزایانی بەڕێزی ساداتی ئێناخی لەهۆڵی بۆنەکانی پیرخدری شاهۆ لە پارێزگای هەڵەبجە، ئەم دووسەردانەی خوارەوەشیان ئەنجامدا.
یەکەم، سەردانی ئامۆزای بەڕێزمان کاک سید احمدی میراولی ئەندامی ڕاوێژکاری مەڵبەندەکەمان لەماڵی خۆیان، بەمەبەستی بەسەرکردنەوەو هەواڵپرسی تەندروستی بەڕێزیان، زۆر خۆشحاڵ بووین بەدیداریان، خوای گەورە شیفای تەواوی جەنابیان بدات.
دووەم، سەردانی ئامۆزای بەڕێزمان کاک سید عادل تەپی سەفا ئەندامی ڕاوێژکاری مەڵبەندەکەمان لە گوندی تەپی سەفا بەمەبەستی بەسەرکردنەوەو هەواڵپرسی تەندروستی خاڵە سید حسنی جەنابی باوکیان، زۆر خۆشحاڵ بووین بەدیداریان، خوای گەورە شیفای تەواوی جەنابی باوکیان بدات.

ڕاپۆرتی چالاکییەکی زانستی و کولتووری لە مەڵبەندی ساداتی پیرخدری شاهۆ
بە ئامادەبوونی کەسایەتی دیاری کوردستان بەڕێز (حاکم قادر)، سیمینارێکی تەندروستی و فیکری ئەنجامدرا.
دوای نیوەڕۆی دوێنێ سێ شەممە (١٧ی شوباتی ٢٠٢٦)، لە چوارچێوەی پەرەپێدانی توانای گەنجان و دەرچوواندا، مەڵبەندی ڕۆشنبیری و کۆمەڵایەتی ساداتی پیرخدری شاهۆ بە هەماهەنگی لەگەڵ ڕێکخراوی گەشەپێدانی ئەکادیمی (ADO)، سیمینارێکی تایبەتی بۆ خوێندکاران و دەرچووانی بەشی تەندروستی ڕێکخست.
بڕگەکانی چالاکییەکە:
١. لایەنی زانستی: سیمینارەکە لەلایەن بەڕێز (دکتۆر ڕۆکان عبداللە حەمە) پێشکەشکرا، کە تێیدا بە وردی تیشکی خستە سەر (حاڵەتە کوتوپڕەکانی نەخۆشی) و چۆنیەتی مامەڵەکردن لەگەڵیاندا، کە سوودێکی زۆری بە ئامادەبووان گەیاند.
٢. وتاری نیشتمانی: بەڕێز (حاکم قادر) وەک میوانی فەرمی و کەسایەتی دیاری کوردستان، وتارێکی گرنگی پێشکەش کرد و تێیدا جەختی لەسەر ڕۆڵی گەنجان و گرنگیی زانست لە بونیادنانی کۆمەڵگەیەکی تەندروستدا کردەوە.
٣. خەڵاتکردن: لە کۆتایی سیمینارەکەدا، بڕوانامەی بەشداریکردن بەسەر خوێندکاراندا دابەشکرا و بە چەپڵەڕێزانی ئامادەبووان کۆتایی بەو بڕگەیە هات.
وەفایەک بۆ کتێب و مەعریفە:
هەر لە پەراوێزی ئەم چالاکییەدا، بەڕێز حاکم قادر کتێبخانەی مەڵبەندەکەمانی بەسەرکردەوە. شایەنی باسە، بەشێکی تایبەت لە کتێبخانەکە بۆ بەڕێزیان تەرخانکراوە، کە لە ئێستادا بەسوپاسێکی زۆرەوە (٣٠٠ کتێبی) بەنرخی پێشکەشی مەڵبەند کردووە و بڕیاریشیداوە لە داهاتوودا تەواوی ئەو بەشە بە کتێبی جۆراوجۆر دەوڵەمەند بکات.
ئەم جۆرە چالاکییانە، بەشێکن لە دیدگای مەڵبەندەکەمان بۆ بونیادنانی نەوەیەکی هۆشیار و ئاوەدانکردنەوەی ژێرخانە فیکری و تەندروستییەکانی کوردستان.

مەڵبەندی ڕۆشنبیری و کۆمەڵایەتی ساداتی پیرخدری شاهۆ

بِسم الله الرحمن الرحيم
‎«شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ»
‎صدق الله العظيم
‎بەبۆنەی هاتنی مانگی پیرۆزی ڕەمەزان، مانگی میهرەبانی و لێبوردەیی، مەڵبەندی ڕۆشنبیری و کۆمەڵایەتی ساداتی پیرخدری شاهۆگەرمترین پیرۆزبایی ئاراستەی سەرجەم موسڵمانانی جیهان و گەلی کورد بەتایبەتی دەکات.
‎ئەم مانگە وێستگەیەکی گرنگی ڕۆحییە بۆ پاکبوونەوەی دەروون و قووڵکردنەوەی برایەتی و تەبایی لە نێوانماندا. داواکارین لە خوای میهرەبان، ڕۆژوو و پەرستشی هەموو لایەک قبوڵ بکات و ئەم مانگە بکاتە مایەی خێر و بەرەکەت بۆ کوردستان و جیهان، و ئەمن و ئاسایش و ئارامی لە هەموو شوێنێک بەرقەرار بێت.
‎هەر لەم سۆنگەیەوە، داوا لە سەرجەم بازرگانان و فرۆشیارانی بەڕێز دەکەین، ڕێز لە حورمەت و پیرۆزی ئەم مانگە بگرن و نەبنە هۆی گرانکردنی نرخ و دروستکردنی بارگرانی لەسەر شانی هاوڵاتیان؛ بەڵکو با ئەم مانگە بکەینە دەرفەتێک بۆ دەستگرتنی یەکتر و هاوکاری کردنی هەژاران و لێقەوماوان.
‎لە خودای گەورە دەپاڕێینەوە کە گەلی کوردستان و مرۆڤایەتی لە هەموو ناخۆشییەک بپارێزێت و ئاشتی و تەبایی باڵ بەسەر وڵاتەکەماندا بکێشێت.
‎ڕەمەزانی هەموو لایەک پیرۆز بێت.
‎مەڵبەندی ڕۆشنبیری و کۆمەڵایەتی ساداتی پیرخدری شاهۆ

لەسەر بانگهێشتی ڕێکخراوی ( بەرزجا )، ڕۆژانی یەک شەممەو دووشەممە ١٥ و ١٦ ، ٢ ، ٢٠٢٦ شاندێکی ڕۆشنبیری مەڵبەندی ڕۆشنبیری و کۆمەڵایەتی ساداتی پیرخدری شاهۆ کە پێکهاتبون لە بەڕێزان مامۆستا سید جعفر سلێمان دۆڵ سکرتێری دەستەی کارگێڕی و مامۆستا سید عبداللە سید نجم الدین سەرۆکی بەشی ڕاگەیاندن و ڕۆشنبیری و مامۆستا شێخ هەردی موبڕە ئەندامی ڕاوێژکاری و بەیاوەری جەنابی دکتۆر محمد عەبدولی کە لە ڕۆژهەڵاتەوە تەشریفیان هێنابوو، بەشداریانکرد لە دیداری زاناو شاعیری گەورەی کورد ( مەحوی )، زۆر سوپاسی ڕێکخراوی ( بەرزجا) و لیژنەی سەرپەرشتیاری دیدارەکە دەکەین بۆ بانگهێشتنامەکەیان

ئەمڕۆ یەک شەممە ١٥ ، ٢ ، ٢٠٢٦ شاندێکی مەڵبەندی ڕۆشنبیری و کۆمەڵایەتی ساداتی پیرخدری ئەم دوو بەشدارو سەردانەی خوارەوەیان ئەنجامدا.
یەکەم، لەسەر بانگهێشتی ئامۆزای گەورەو بەڕێزمان شێخ حەمەئەمین سلێمان دۆڵ پیرخدری، وە بە ئامادەبونی نزیک لە ٥٠٠ کەسایەتی جۆراوجۆر بەشداریمانکرد لە ئاهەنگی شەکراو خواردن و هاوسەرگیری کاکە شێخ ڕەوا کوڕی بەڕێزیان لەگەڵ خاتو شێنێ لە هۆڵی گراند میلینیۆم لەشاری جوانی سلێمانی، شایەنی باسە جەنابی مامۆستا شێخ علاءالدين بانی مۆرد پیرخدری سەرۆکی بەشی ئاینی و نەسەبی مەڵبەندەکەمان لەوتاری ئاهەنگەکە وێڕای پیرۆزبایی گەرم لەهەردوو بنەماڵەی بەڕێز نزای بەختەوەری و ژیانێکی پڕ خێرو بەرەکتیان بۆ خواستن.
دووەم، دواتر شاندی مەڵبەند سەردانی ماڵی جەنابی مامۆستا مەلا سید احمد اسیاف پیرخدری یانکرد بە مەبەستی بەسەرکردنەوەو هەواڵپرسی تەندروستی بەڕێزیان کە لەئێستادا بەهۆی هەڵکشانی تەمەنی پڕخێریان هەندێک ناتەندروستە، شایەنی باسە بەڕێزیان وێڕای خۆشحاڵبون بەو سەردان و بەسەرکردنەوەیە، دوا کتێبی چاپکراوی خۆیان پێشکەش بە کتێبخانەو شاندی مەڵبەندەکەمانکرد، زۆر سوپاس بۆ دیاریە بەنرخەکەیی و پێشوازی گەرمیان، خۆشحاڵبوین لەنزیکەوە بەدیداری بەڕێزیان گەیشتین، خوای گەورە شیفای تەواوی جەنابیان بدات.
خوای گەورە گشت لایەک بپارێزێت

شێخ حسن عەواڵانی - شاعیرێکی نەمر
یەکێک لە هۆنراوە جوانەکانی خوا لێ خۆشبوو شێخ حسن عەواڵانی لە ساڵی ١٩٦٣دا بۆ دوو شەهیدی خزمی خۆی بە ناوەکانی (شێخ عەزیز شێخ فتاح عواڵانی - شێخ محمد شێخ علی عەواڵانی) نووسیوە. دواتر ئەم سرودە لەلایەن تیپی مۆسیقای شۆڕشەوە لە گوندی وەسانی ناوچەی باڵەکایەتی تۆمار کراوە. ئەم سرودە دەنگ و سەدایەکی زۆری لەناو جەماوەردا هەبووە و بەردەوام لە ڕادیۆکانی شۆڕشەوە پەخش کراوە، هەتا ئێستاش وەک سرودێکی نەمر دادەنرێت.
ژیاننامە
حسن عەواڵانی کوڕی شێخ قادری شێخ عصام الدین عەواڵانییە، کە لە نەوەی شێخ ئیسماعیلی عەواڵانن. لە ساڵی ١٩٣٢دا لە بنەماڵەیەکی ئاینی کوردپەروەر لە گوندی عەواڵان، ناوچەی سوورداش، پارێزگای سلێمانی لەدایک بووە.
لە سەرەتای دروستبوونی شۆڕشدا، چەکی پێشمەرگایەتی لەشان کردووە و لە ناوچەی چەمی ڕەزان خەبات کردووە. دواتر لە ناوەڕاستی شەستەکاندا بەماڵەوە چووەتە چەمچەماڵ، پاش دوو ساڵیش لە سلێمانی نیشتەجێ بووە.
کار و چالاکی
لە کارگەی جگەرەی سلێمانی وەک کرێکار دەستی بە کارکردن کردووە. دواتر بە هۆی خوێندەواری و هۆشیاری چینایەتی و سیاسی، لە سەندیکای کرێکاران کاری کردووە و بووەتە سکرتێری نووسینی گۆڤاری "ڕەنجی کرێکار".
هونەری شیعری
شێخ حسن عەواڵانی هەر لە سەرەتای ژیانی لاویەتییەوە خولیای شیعر بووە، لە ڕێگەی شیعرەوە تەعبیری لە خەمە چینایەتی و نەتەوایەتیەکان کردووە. خاوەنی چەند دیوانێکی شیعری چاپکراوە، لەوانە:
• باخی عەواڵان
• چەمی ڕەزانی قارەمان
• چیای پیرەمەگروون
هەروەها کوڕێکیشی شەهیدی سەنگەرە بە ناوی ئازادی شێخ حسن کە ساڵی ١٩٩٣ شەهید بووە .
میراتی نەمر
ئەم شاعیرە خەون و خولیای ئازادی و ڕزگاری نیشتمانەکەی بووە، وەک لە بەرهەمەکانیدا ئاماژەی پێکردووە. بەڵام بە داخەوە، مەرگ بواری نەدا تا ئەم ئازادییە ببینێت.
لە ڕۆژی ٩ی شوباتی ١٩٩٠ لە تەمەنی ٥٨ ساڵیدا کۆچی دوایی کردووە و لە گردی شێخ محی الدینی شاری سلێمانی بە خاک سپێردراوە.

تێکستی شیعرەکە :
من ناڵێم نەورۆز نەورۆزی منە
جـــــەژنـــــــە پیرۆزە پیرۆزی منە
هەتا نەبینم کوردستان گشتی
یــــــــــەکی گرتوە وردو درشتی
ئەوساکە ئەڵێم چەکوشەکەی کاوە
لـــــــــــەکەلەی سەری زوحاکی داوە
------------------------------------------
ئەو شەهیدانەی خوێنیان ڕژاوە
مژدەی ئــازادی کوردیان هێناوە
شەهیدن نامرن هەتاهەتایا
ناویان تامردن لەسۆڕشدایا
ئــــەوقـــــوربانیانەی کۆن و تازەی کورد
گیانی شیرینیان بۆکورد پێشکەش کرد
ئێمەیان هان دا بۆکـــوردایەتی
بەهێزیان کردین بۆمەردایەتی

سێ شەممە ١٠ ، ٢ ، ٢٠٢٦
لەسەر بانگهێشتی بەڕێزان آغای محمودیان سەرکونسڵی گشتی کونسڵخانەی ئێران لە سلێمانی و مامۆستا آمانج سەرۆکی ناوەندی ڕوناکبیری شارباژێڕ، دوو شاند بەنوێنەرایەتی مەڵبەندی ڕۆشنبیری و کۆمەڵایەتی ساداتی پیرخدری شاهۆ بەشداریانکرد لەهەردوو بۆنەی بانگهێشتکراو لە هۆڵی کۆنفرانسەکانی ڕێکخراوی CDO و هوتێل تایتانیک لەشاری سلێمانی.

سەرلەبەیانی دوێنێ یەکشەممە (٨ / ٢ / ٢٠٢٦)، شاندێکی مەڵبەندەکەمان( مەڵبەندی ڕۆشنبیری و کۆمەڵایەتی ساداتی پیرخدری شاهۆ) بە یاوەری شاندێکی باڵای (ناوەندی کۆمەڵایەتی و ڕۆشنبیری ئازادی)، سەردانی شارۆچکەی عەربەت، قەزای پێنجوێن و دەروازەی نێودەوڵەتی باشماخیان کرد، بە مەبەستی گەیاندنی پەیام و چەپکەگوڵی پیرۆزبایی بەبۆنەی دەستبەکاربوونی ئەم بەڕێزانەی خوارەوە لە پۆستە نوێیەکانیاندا:
یەکەم: سەردانی ئامۆزای بەڕێزمان (عەدنان سەید کاکەڕەش) پیرخدری، قائیمقامی نوێی قەزای پێنجوێن.
دووەم: سەردانی بەڕێز (هاوژین سالار)، بەڕێوەبەری نوێی گومرگی دەروازەی نێودەوڵەتی باشماخ.
سێیەم: سەردانی بەڕێز (موقەدەم حاجی عومەر محەمەد)، لێپرسراوی یاریدەدەرێتی ئاسایشی شارۆچکەی عەربەت.
شایەنی باسە لەو سەردان و بەسەرکردنەوانەی سەرەوەدا، وێڕای گەیاندنی پەیام و چەپکەگوڵی پیرۆزبایی، ئومێدی سەرکەوتنمان بۆ خواستن لە ئەرکە نوێکانیاندا. زۆر سوپاس بۆ پێشوازی گەرم و دیداری ئەو بەڕێزانە و شاندی باڵای یاوەرمان لە (ناوەندی کۆمەڵایەتی و ڕۆشنبیری ئازادی) لەو سەردانانەدا.

دواتر شاندی مەڵبەندەکەمان بەجیا لەناو شاری پێنجوێن بۆ خوانی نیوەڕۆ چوونە خزمەت خانەوادەی پڕمیهری خوالێخۆشبوو (خاڵە شێخ حەمەمین حاجی مامەند پیرخدری) لە ماڵی کوڕی بەڕێزیان (کاک شێخ فەرهاد)، ئەندامی ڕاوێژکاری مەڵبەندەکەمان. زۆر سوپاسی پێشوازی گەرم، ئەرک و ماندووبوون و خوانە تایبەتەکەیان دەکەین، گەورەییان نواند، خوای گەورە پاداشتی خێریان بداتەوە.
هەروەها دوای نیوەڕۆ شاندی مەڵبەند سەردانی ماڵی جەنابی (کاک شێخ کەمالی بناوەسوتە پیرخدری)یان کرد بە مەبەستی بەسەرکردنەوە و هەواڵپرسی لە تەندروستی بەڕێزیان، سوپاس بۆ خوا لە ئێستادا باری تەندروستییان جێگیرە؛ زۆر سوپاس بۆ پێشوازی گەرمیان، خۆشحاڵ بووین بە دیداریان و خوای گەورە شیفای تەواوی جەنابیان بدات.
دواتر شاندی مەڵبەند سەردانی کەسایەتی دیاری ناوچەکە (مامە شێخ لەتیفی بناوەسوتە پیرخدری)یان کرد لە ماڵە دڵگیر و جوان و نوێکەی (کاک شێخ سەلام)ی کوڕی بەڕێزیان، بە مەبەستی بەسەرکردنەوە و هەواڵپرسی و گەیاندنی پەیامی پیرۆزبایی مەڵبەندەکەمان بۆ خانوە نوێکەیان. خوای گەورە لێیان پیرۆز بکات و تیایدا بحەسێنەوە، بإذنه تعالى . زۆر سوپاسی پێشوازی گەرم و لوتفی میواندۆستییان دەکەین، خۆشحاڵ بووین بە دیداریان.
خوای گەورە گشت لایەک بپارێزێت.

شەممە ٧ ، ٢ ، ٢٠٢٦
ئەنجامدانی یەکەمین کۆبونەوەی فراوانی ساڵی نوێ بۆ نوێنەری بنەماڵە بەڕێزەکانی ساداتی پیرخدری شاهۆ لە باڵەخانەی مەڵبەند کەتیایدا وێڕای سوێند خواردنی ئەندامانی بەڕێزی دەستەی کارگێڕی هەڵبژێردراوی دوەمین کۆنگرەی مەڵبەندەکەمان و خستنەڕوی پلان و بەرنامە پەسەندکراوەکانی تایبەت بەکاروو چالاکیەکانی ساڵی ٢٠٢٦، بەشداربوانی بەڕێزی کۆبونەوەکە بەچەندین سەرنج و پێشنیار و دەستخۆشی بەرنامەکانیان دەوڵەمەندکرد، شایەنی باسە وە بەسوپاسێکی زۆرەوە ئامۆزایانی بەڕێز جەنابی کاک شێخ محمد مامۆستا مەلا شێخ حسین پیرخدری و جەنابی کاک شێخ طە حاجی شێخ بهاءالدين پیرخدری بەهاوبەشی ئەرکی دارایی نیوەڕۆخوانی بەشداربوانی کۆبونەوەکەیان لە ئەستۆگرت، خوای گەورە بەسەدەقەی ڕوحیانەتی باوک و دایکیان قبوڵی بکات و پاداشتی خێریان بداتەوە.