15/07/2026
ئەوڕۆ سەر لەبەیانی زوو، چووم بۆ گۆڕستان، بۆ خزمەت باوکی ئازیزم، تەنها یەک پیاوی لێ بوو، له دوورەوە سەلامم لێی کرد، دواتر بینیم چەند جار لەسەر یەک کێلی گۆڕێکی ماچ دەکرد، لێی نزیک بوومەوە و سەلامێکم لێی کرد و ...، لێم پرسی ئەو گۆڕە هی کێیە؟ گوتی: هی خێزانمە، لێم پرسی چەند دەبێ وەفانی کردووە، گوتی: سێ چوار مانگە، گوتم: زوو زوو دێی؟ گوتی: هەموو ڕۆژێ دوو جار دێم! دواتر ویستم زیاتر گفتوگۆی لەگەڵدا بکەم، بەڵام دەستی کردە گریان و ڕۆیشت ...
نموونەی ئاوام زۆر بینیوە لە گۆڕستان
ڕۆژێکی تر، پیاوێکم بینی، زۆر بە تاسەوە لەسەر گۆڕێک دانیشتبوو، لێی نزیک بوومەوە و هەندێ گفتوگۆم لەگەڵ کرد، زۆر تێکچووبوو، لێم پرسی: موالید چەندی، گوتی: ۷۲، بەڵام تاڵی ڕەش بە سەر و ڕیشیەوە نەمابوو، لێم پرسی: کێیە ئەوە؟ گوتی: خێزانمە و سێ ساڵە وەفاتی کردووە.
گوتی: ژنیشم نەهێناوەتەوە چونکە کچێکی بچووکم هەیە دەترسم بیخەمە بەردەستی زڕ دایک! هەموو بەیانیان خۆم هەڵیدەستێنم و نانی دەدەمێ و بەڕێی دەکەم بۆ مەکتەب.
دوای باس و خواس، گوتم ئەو دونیایە دونیایەکی هیچە. گوتی: بەڵێ، هیچ نیە، من و خێزانم سی (۳۰) ساڵ بەیەکەوە ژیاین، بەڵام بە یەک وشە، بۆ یەک ڕۆژیش دڵی یەکترمان نەهێشاندووە!
لێم پرسی چەند چەند دێی بۆ سەر گۆڕەکەی؟ گوتی: سەرەتا ڕۆژی دووجار، دواتر هەموو ڕۆژێ، ئێستاش هەفتەی دووجار دێم.
سەرەتا وام هەست کرد تازە وفاتی کردووە، بەڵام گوتی نەخێر سێ ساڵە وەفاتی کردووە. بەڵام ئەوەندەی لێ دیاربوو وەک بڵێی یەک دوو ڕۆژە وەفاتی کردووە.
چاوم لێکرد کرێکارە و سێتەگەرە بچووکەکانی پێیە، هەموو جارێ بەو سێتەگەیەرەیە دێتە سەر گۆڕەکەی و هێشتا دەڵێی تازە هاوسەرگرییان کردووە! لەگەڵ خۆیشی دەبەیەکی ئاوی پێ بوو دارەکانی سەر گۆڕی خێزانی ئاو دەدا ....
ڕۆژێکی تر، ئێوارەیەکی درەنگ بوو، نزیکی بانگی مەغریب و تاریک بوون، پیاوێکی بە تەمەن، نزیک هەشتا ساڵ هات و چەپکێک گوڵی پێ بوو، هات و لەسەر گۆڕێکی دانا، کە گەڕایەوە ویستم هەندێ گفتوگۆی لەگەڵ بکەم، لێم پرسی: ئەوە گۆڕی کێیە؟ گوتی: هی خێزانمە، دوو ساڵە وەفاتی کردووە. لێم پرسی چەند چەند دێی بۆ لای؟ گوتی: هەموو ڕۆژێ. لێم پرسی هیچ ڕۆژێک نیە نەیەی یان نەهاتبی؟ گوتی: نەخێر. بەفریش باری بێت هەر هاتووم. ئینجا گریا و گوتی: پێم خۆشە منیش بچمەوە لای ئەو، چونکە دوای ئەو ژیان هیچ تامی نەماوە .....
بەڕاستی وەفا زۆر کەم بووە لەو سەردەمە بێ وەفاییەدا، مرۆڤ زۆر زۆر زوو لەبیردەکرێت، بەڵام هێشتاش جیلە قەدیمەکە ئەو وەفایەیان زیاترە بۆ زینددوو و مردوو.
| صلاح الدین احمد
