بەرێوەبەرێتی مۆزەخانەی پەروەردەیی

پەیامی پیرۆزبایی

هاونیشتمانیانی خۆشەویست..
مامۆستایان، خوێندکاران و دۆستانی مۆزەخانە..

سبەینێ، لە کاتێکدا سروشت بەرگی نوێی بەهار دەپۆشێت و یادی نەورۆز و سەری ساڵی کوردی دەکەینەوە، لە هەمان کاتدا پێشوازی لە شکۆی جەژنی ڕەمەزانی پیرۆز دەکەین.
ئەم هاوکاتبوونە دەگمەنەی جەژنی ئایینی و نەتەوەییمان، پەیامی نوێبوونەوە، لێبوردەیی و قووڵایی مێژوویی گەلەکەمان دووپات دەکاتەوە.

وەک مۆزەخانەی پەروەردەی سلێمانی، کە ناوەندێکی زیندووی پاراستنی کلتوور و مێژووی پەروەردەیی شارەکەمان کار دەکەین، گەرمترین پیرۆزبایی خۆمان ئاراستەی ئێوە و تەواوی گەلی کورد دەکەین.
هیوا دەخوازین ئەم جەژنە ببێتە مایەی ئاشتی، تەبایی و سەرکەوتنی زیاتر بۆ کەرتی پەروەردە و فێرکردن لە کوردستاندا.

نەورۆزتان پیرۆز و جەژنی ڕەمەزانتان پڕ بێت لە خێر و خۆشی.

سەهەند محمد سعید
بەڕێوەبەری مۆزەخانەی پەروەردەی سلێمانی
١٩ی ئازاری ٢٠٢٦

هەڵەبجە برینێکی سارێژنەبوو لە یادەوەریی نیشتمان و مرۆڤایەتیدا.

​کەس و کار و هاوڕێیان و هاوشارییان ​سبەی ١٦ی ئازار یادەوەری ٣٨ ساڵەی یەکێک لە تاریکترین و جەرگبڕترین تاوانەکانی مێژووی مرۆڤایەتییە ساڵیادی کیمیابارانی شاری هەڵەبجەی پایتەختی ئاشتی.
ئەو ڕۆژەی کە کاتژمێر و چرکەکان لە بەردەم بێدەنگیی جیهان و ستەمی داگیرکەردا وەستان، و پەپوولەکانی ئەو شارە لەبری هەڵمژینی بۆنی نێرگز، بە بۆنی سێو و گازی کوشندە خنکێنران.
​هەڵەبجە بۆ ئێمە تەنها یادکردنەوەی مەرگ نییەبەڵکو
​وانەیەکی مێژووییە بۆ ئەوەی نەوەکانی داهاتوومان بزانن ئەم گەلە چ قوربانییەکی گەورەی لەپێناو مانەوە و ناسنامەی خۆیدا داوە.
​پەیامی ئاشتییە بانگەوازێکە بۆ جیهان کە چیتر ڕێگە نەدرێت چەکی کۆکوژ و فیکری سڕینەوە، ژیان لە مرۆڤایەتی تێک بدات.
​بەرپرسیارێتییەکی پەروەردەیی و مەعریفییە ئەرکی ئێمەیە وەک مۆزەخانە و ناوەندی پەروەردەیی یادەوەریی قوربانییان بپارێزین و ڕێگری بکەین لە فەرامۆشکردنی مێژوو.
​ئێمە لە مۆزەخانەی پەروەردەیی، لەم یادە خەمناکەدا، سەری ڕێز و نەوازش بۆ گیانی پاکی پێنج هەزار شەهیدی هەڵەبجە و سەرجەم شەهیدانی ڕێگای ڕزگاری کوردستان دادەنەوێنین.
​سڵاو لە خۆڕاگریی هەڵەبجە و شکۆمەندی بۆ بریندارەکانمان.

سەهەند محمد سعید
بەڕێوەبەری مۆزەخانەی پەروەردەیی

(هەرجارەو ناساندنی پەروەردەکارێک)
مامۆستا (ڕزگار ) بناسە……

(ڕزگار خدر مستەفا ئەحمەد) لە ٣/٧/ ١٩٦٤ لە گەڕەکی کانێسکان لە شاری سلێمانی لەدایکبووە، لە ساڵی ١٩٧١ لەقوتابخانەی مەڵکەندی خراوەتە بەر خوێندن، دواتر دواناوەندی (سەڵاحەدین) و ئامادەیی (هەڵگورد)ی وێژەیی تەواوکردووە، دوای (10) ساڵ دابڕان و لەسەرەتای ڕاپەڕینی گەلی کوردستان و دامەزراندنەوەی زانکۆی (سلێمانی) گەڕاوەتەوە بۆ تەواوکردنی خوێندن تا لە ساڵی ١٩٩٧-١٩٩٨ لە زانکۆی سلێمانی کۆلێژی زمان، بەکالۆریۆسی هێناوە لە زمان و ئەدەبی کوردی دا، لەساڵی ١٩٩٩ لەگەڵ مامۆستا (نەسرین جه‌مال) هاوسەرگیری کردووە و خاوەنی دوو کچ و کوڕێکە بەناوەکانی (فرۆ، دینۆ، باکۆ).
سەرەتا وەک وانەبێژ لە دواناوەندی (سەرچنار) بۆتە مامۆستا و دواتر لە دواناوەندی (خەلەکان) دامەزراوە، پاشان گواستراوەتەوە بۆ ئامادەیی (ئەحمەدی خانی) تا رێكەوتی بوون بەسەرپەرشتیاری پەروەردەیی لە ٢٤/١٠/٢٠١١، یەکەم ساڵی سەرپەرشتیاری وەک مامۆستای خ*ل بۆ ماوەی یەک مانگ لە بەڕێوەبەرێتی مەشق و ڕاهێنان وانەی (ڕێزمان و ئەدەبی کوردی) بەمامۆستایان وتۆتەوە، بەشداریی دەیان خ*ل و کۆنفرانس و سمینار و دیداری پەروەردەیی و ئەدەبی کردووە، وەک توێژەر بەشداریی یەکەمین کۆنفرانسی پڕۆگرامەکان بووە لە شاری هەولێر، هۆنراوەیەكی مامۆستا بە ناوی (زمانی كوردی) لە پڕۆگرامی قۆناغی (چوار) لە ناو پڕۆگرامی زمانی كوردی دەخوێندرێت، مامۆستا دەیان ڕێز و سوپاسی لە پای کاروچالاکییە بەردەوامەکانی پێدراوە، لە ساڵی ٢٠٢٤ خانەنشین بووە.
لەبواری نووسین و چالاکی ئەدەبی دا سەرنووسەری گۆڤاری (ئاراستەی پەروەردەیی) بووە، کە بەڕێوەبەرێتی سەرپەرشتیکردن دەریدەکرد و (7) ژمارەی لێدەرچوو، ساڵی ٢٠٢٠ لەگەڵ دەستەیەک لە پەروەردەکاران پڕۆژەی (ناوەندی نیشتمانی بۆ پێگەیاندن)یان ڕاگەیاندووە.
هۆنراوە و بابەتی پەروەردەیی لە چەندین گۆڤاردا بڵاوکراوەتەوە ، لە ئێستادا بەرێوەبەری نووسینە لە گۆڤاری (ژیار)، و هاوکارێکی بەردەوامی بەشی پەروەردەیە لە(گۆڤاری بەیان) کە لە ڕۆژهەڵاتی كوردستان دەردەچێت، و زنجیرە وتارێکی هەیە بەناونیشانی (سلێمانی جاران) بۆ ناساندنی مێژووی پڕ سەروەری شار، ئەندامی دەستەی دامەزرێنەری (ڕێکخراوی پەروەردەی سەردەم)ە و دوای خانەنشینیش بەردەوامە لە خزمەتکردن بە بواری پەردوەردە.

لە بەرهەمە چاپکراوەکانی مامۆستا:
١-ئاڤێستا کلتوری دینی و نەتەوەیی کورد، توێژینەوەیەکی مێژووییە، لە ساڵی ١٩٩٨چاپکراوە.
٢-گەلبازی (الشعوبیە) بابەتی مێژوو، ساڵی ١٩٩٩.
٢-غەمنامە (دیوانی شیعر)لە ساڵی ٢٠١٧.
٣-سەد پەند(دیوانی شیعر) چاپی یەکەم لەساڵی ٢٠١٩ .
٤-خەمە پەروەردەییەکان ، کۆمەڵێک وتاری پەروەردەییە لە ساڵی ٢٠١٩ چاپکراوە.
٥-هەلوربلور(دیوانی شیعری منداڵان) ساڵی ٢٠١٩ چاپکراوە.
٦-با پەروەردە خەمی هەمووان بێت، کۆمەڵێک وتاری پەروەردەیی، یەکەمین کۆنفرانسی پەروەردەیی کۆمەڵگەی پەروەردەیی مارگرێت ٢٠١٩
٧-خوێندنی پیشەیی ئێستا و ئایندە، دیداری پەروەردەیی کۆمەڵگەی پەروەردەیی مارگرێت، ساڵی ٢٠٢٣ چاپکراوە.
٨- پەروەردە ئەزموون و ئاڵنگاری ، کۆمەڵێک وتاری پەروەردەیی ساڵی ٢٠٢٥ .
٩-پەندنامە ٢٠٢٤ کۆمەڵێک هۆنراوەی پەروەردەیی پەند ئامێزە.
ئەو بەرهەمانەی ئامادەن بۆ چاپ:
١-بیرەوەری مامۆستایەک یاداشت و بیرەوەری دەستەیەک لە مامۆستایان.
٢-سلێمانی جاران، بابەتی مێژوو کە بەزنجیرە لە گۆڤاری بەیان دا بڵاوکراوەتەوە.
٣-خەندەیەک بۆ ژیان، دیوانە شیعر بۆ منداڵان.
٤-سێکوچکەی ژیان، ئۆپەرێت و چیرۆکی منداڵان.
‎
نمونەیەکی شیعری مامۆستا بۆ شاری سلێمانی:
‎کە دێمــــــــەوە ئـامێزی تۆ
‎پڕ لـە ســــــۆزە و میهرەبانی
‎باوەڕ ناکەم شـــــارێک هەبێ
‎لـە تـــــــۆ جوانتر سـلێمانی
..
‎کـە دێمـــەوە گۆیژە و ئەزمڕ
‎جێی شانازیین لەدوور دیارن
‎هــــــەر بەپێوە ، ڕاوەستاون
‎لـە پێشـوازیی خەڵکی شارن
..
‎شەو بێت یا ڕۆژ چاولێکنانێی
‎بۆ هەمیشـە هــــــەر بێـداری
‎لـەهەواڵی هەرچــــوار پارچە
‎ئێشـکگر و ئـاگــــــــاداری
..
‎سـلێمانی تۆ ئەسـتێرەی!
‎پڕشـنگداری کوردسـتانی
‎تۆ بڵندگۆی سـەربەخۆیی
‎چوارپارچەکەی نیشـتمانی
..
‎سلێمانی بــــــوویتە هێمای
‎بەرخــــــۆدان و خۆڕاگری
‎بۆدۆست دۆست وبۆدوژمنیش
‎هـەر وەکـــ بڵێسەی ئاگــــری

ئامادەکردنی / نیهایەت محمود ـ محه‌مه‌د عبداللە
مۆزەخانەی پەروەردەيی سلێمانی
‎

(هەر جارەو ناساندنی پەروەردەکارێک)

مامۆستا (محمد) بناسە......

ناوی تەواوی (محمد احمد كریم عزیز)ە، لە رێكەوتی (1/3/1960) لە هەڵەبجەی شەهید لەدایكبووە، باوكی بە (وەستا أحمدی كارەبا) ناسراوە بەهۆی كارەكەیەكەوە كە كارمەندی كارەبا بووە لە هەڵەبجە، دوای ماوەیەك ماڵیان دەگوازنەوە بۆ شاری رانیە، لە (20/9/1966) خراوەتە بەر خوێندن لە قوتابخانەی (بێتوێن) لە رانیە و پۆلەكانی (یەك و دوو و سێ)ی لەوی تەواو كردووە.
بەهۆی كاری باوكیەوە جارێگی تر ماڵیان دەگوازێتەوە و ئەمجارە لە شاری سلێمانی نیشتەجێ دەبن و مامۆستا لە قوتابخانەی (مەڵكەندی) بەردەوام دەبێت لە خویندنەكەی و پۆلی (چوار)ی سەرەتایی لەوێ تەواو دەكات، پاشان لە شاری هەڵەبجەی شەهید درێژە بە خوێندنكەی دەدات و لە قوتابخانەی (حەمدون) پۆلەكانی (پێنج و شەش)ی سەرەتایی تەواو دەكات، و لە ناوەندی (شارەزوور) قۆناغی ناوندی تەواو دەكات، و قۆناغی ئامادەییشی لە شاری هەڵەبجە تەواو دەكات.
مامۆستا لە ساڵی خوێندنی (1981-1982) لە كۆلێژی كارگێڕی و ئابووری لە زانكۆی (بەغداد) وەردەگیرێت، و ساڵی (1986) كۆلێژ تەواو دەكات. بۆهۆی جەنگی (ئێران – عێراق) نەیتوانیوە پەیوەندی بە خزمەتی سەربازیەوە بكات و ماوەیەكی زۆر بە (فیرار)ی ژیان بەسەردەبات، بەڵام بە ناچاری و بە بڕیاری (1937-1938) پەیوەندی دەكات بە خزمەتی سەربازیەوە وەك زۆرینەی هەموو فیرارەكان، و دەگوازرێتەوە بۆ (معسكر رشید) لە بەغداد و هەر لەوێ تە سریح دەبێت.
پاش راپەڕینە مەزنەكەی گەلی كوردستان و دامەزراندنی پەرلەمان و كردنەوەی دەرگای دامەزراندن، لە رێكەوتی (16/11/1992) بە مامۆستای ناوەندی دادەمەزرێت و لە (19/11/1992) پەیوەندی دەكات بە دواناوەندی (شەمێران) لە كۆمەڵگەی (نصر). پاش تێكەڵاوبونی هەردوو قوتابخانەی دواناوەندی (شەمێران) و ناوەندی (قانع) لەژێر ناوی دواناوەندی (قانع) بە دەنگی زۆرینەی مامۆستایان هەڵدەبژێردرێت وەك بەڕێوەبەر.
پاش دامەزراندنی بەڕێوەبەرێتی پەروەردەی شارەزوور، مامۆستا لە رێكەوتی (8/1/2008) وەك بەڕێوەبەری پەروەردەی شارەزوور دەستبەكار دەبێت.
مامۆستا لە ژیانی بەڕێوەبەڕێتیدا (دوو جار) یەكەمی هەرێمی كوردستان بووە لە رێژەی دەرچوونی پۆلی شەشەمی وێژەیی. هەروەها مامۆستا دەیان رێز و سوپاسی وەرگرتووە لە پای دڵسۆزی و سەركەوتوویی لە كارەكەی و رێژەی دەرچوون و نمرەی بەرزی قوتابیانی. هەروەها مامۆستا چەندین خ*لی پەروەردەیی و زانستی بینیوە لە ناوخۆ و دەرەوە لە وڵاتەكانی (ئێران و ئەردەن و لوبنان و توركیا).
مامۆستا پاش خزمەتكردنی بۆ ماوەی زیاتر (10 ساڵ) وەك بەڕێوەبەری پەروەردە و لە میانەی ئاڵوگۆڵكردنی (15) بەڕێوەبەری پەروەردە لە هەموو هەرێمی كوردستان، مامۆستا لە رێكەوتی (21/5/2018) پەیوەندی كرد بە یەكەی سەرپەرشتیكردنی پەروەردەیی ئامادەیی رۆژهەڵات لە شاری سلێمانی وەك سەرپەرشتیاری پسپۆڕی كارگێڕی و سەرپەرشتی خوێندنگە ئامادەییەكانی سنوری (دەربەندیخان و شارەزوور و سیدصادق و پێنجوێن)ی كردووە و بەردەوام بووە لە خزمەتی دلسۆزانەی بە بواری پەروەردە.
مامۆستا لە رێكەوتی (1/3/2023) و لە تەمەنی (63) ساڵیدا خانەنشین دەبێت.
هیوای ژیانێكی تەندروست و درێژ بۆ مامۆستای بەڕێز دەخوازین.

سه‌رنج: به‌شێك له‌ وێنه‌كان به‌ زیره‌كی ده‌ستكرد ره‌نگاوڕه‌نگ كراون.
ئامادەكردنی: محمد عبدالله – رێبوار حەمە وەیس

ئەندام پەرلەمانێکی کوردستان ئێوارە خوانێک بۆ فریشتەکانی پەروەردەی سلێمانی ڕێکدەخات

لەپێناو گرنگیدانی زیاتر بە تواناکانی قوتابیان و خوێندکارانی خاوەن پێداویستی تایبەت و دروستکردنی کەشێکی دەروونی ئارام بۆیان، ئێوارەی ئەمڕۆ شەممە ۷ی ۳ی ۲۰۲٦ لەسەر ئەرکی بەڕێز ڕەوەز ئەحمەد شا ئەندامی پەرلەمانی کوردستان، بە ئامادەبوونی مامۆستا نەژاد عبداللە بەڕێوەبەری گشتی پەروەردەی سلێمانی و سەهەند محمد سعید بەڕێوەبەری مۆزەخانەی پەروەردەیی و مامۆستا جەمال بەڕێوەبەری بەشی خزمەتگوزاری و مامۆستا هەنسک عوسمان لێپرسراوی هۆبەی پەروەردەی تایبەت لە فێرکردنی نائاسایی بەبۆنەی مانگی ڕەمەزانی پیرۆزەوە ئێوارەخوانێکی تایبەتی بۆ کۆمەڵێک لە قوتابیان و خوێندکارانی پەروەردەی تایبەت ( داون، نابیستان ، نابینا ) لە کەشێکی خێزانی و دۆستانەدا سازکرد.

پرسەنامە......

(ئەو نموونەی ئەو نەوەیە بوو کە پەروەردەیان وەک پەیامێکی پیرۆز دەبینی نەک تەنها وەک وەزیفەیەکی حکومی)

بەداخ و پەژارەی زۆرەوە هەواڵی کۆچی یەکجارەکی مامۆستا (شێخ حسێن شێخ مستەفا) مان پێگەیشت لەناخی دڵمەوە پرسەو سەرەخۆشی ئاراستەی بنەماڵەو هاوڕێیان و هاوپیشەکانی دەکەم هیوادەخوازم ئەمە دواکۆست و دوا پەژارەی ئەم بنەماڵە شۆرشگێرە بەڕێزەبێت و ڕۆحی مامۆستاش فیردەوسی ئەعلابێت....
إنا لله وإنا إليه راجعون

سەهەند محمد سعید
بەڕێوەبەری مۆزەخانە

٥ی ئازار؛ چەخماخەی شکۆ و ڕاپەڕینی گەلی کوردستان.

ئەمڕۆ یادی ڕۆژێک دەکەینەوە کە تێیدا ئیرادەی گەلێکی ستەملێکراو، هەموو دیوارەکانی تەم و ترسی ڕووخاند. لە ٥ی ئازاری ١٩٩١دا، شاری ڕانیەی دەروازەی ڕاپەڕین، بوو بە مەڵبەندی تەقینەوەی ئەو تووڕەییەی کە چەندین ساڵ بوو لە ناخی تاک بە تاکی کوردا کۆببووەوە.
وەک دیارە ڕاپەڕین ​لە کاتژمێر ٩:٠٠ی سەرلەبەیانی ئەو ڕۆژەدا جەماوەری ڕانیە و دەوروبەری بە هەماهەنگی لەگەڵ ڕێکخستنەکان و هێزی پێشمەرگە دژ بە دامودەزگا سەرکوتکەرەکانی ڕژێمی بەعس ڕاپەڕین ئەم بزووتنەوە جەماوەرییە تەنها کاردانەوەیەکی کاتی نەبوو بەڵکو ئەنجامی ساڵانێک چەوسانەوە و مژدەی ئازادییەکی نوێ بوو.
​گرنگترین دەستکەوتەکانی ڕۆژی یەکەم ​ڕزگارکردنی دامەزراوەکان بوو کە لە ماوەیەکی کەمدا جەماوەر توانییان دەست بەسەر بنکەکانی پۆلیس و ئەمن و دامودەزگا حکومییەکاندا بگرن پاشان ​شکاندنی شکۆی داگیرکەر کە شاری ڕانیە لە ماوەی چەند کاتژمێرێکدا بەتەواوی لە پاشماوەکانی بەعس پاککرایەوە و ​پەیامی یەکگرتوویی درا ئەم ڕاپەڕینە نیشانیدا کە کاتێک گەل و هێزی پێشمەرگە و ڕێکخستنەکان یەکدەست بن هیچ هێزێکی داگیرکەر ناتوانێت بەرگەیان بگرێت.
​وەک مۆزەخانەی پەروەردەیی ئێمە لێرەدا تەنها یادی ڕووداوێکی مێژوویی ناکەینەوە بەڵکو جەخت لەسەر پەروەردەکردنی نەوەکانمان دەکەینەوە بە گیانی ئازادیخوازی و پاراستنی ئەو دەستکەوتانەی کە بە خوێنی شەهیدان بەدەستهاتوون.
​ئەم دەسپێکەی ڕانیە وای کرد کە ئەم شارە ناوبنرێت بە «دەروازەی ڕاپەڕین»​چونکە ئەو چەخماخەیەی لە ٥ی ئازار لەو شارەوە هەڵگیرسا بوو بە هۆی ئەوەی لە ڕۆژانی دواتردا شار و شارۆچکەکانی تری کوردستان وەک (سلێمانی، هەولێر، دهۆک و کەرکوک) یەک لە دوای یەک ڕاپەڕن و خاکی نیشتمان لە بەعس پاک بکەنەوە.
لەکۆتایی دا سەری ڕێز و نەوازش بۆ شەهیدانی ڕاپەڕین و سەرجەم شەهیدانی ڕێگای ڕزگاری کوردستان دادەنەوێنم.

سەهەند محمد سعید
بەڕێوەبەری مۆزەخانەی پەروەردەیی

پرسە نامە....
بەداخ و کەسەرێکی گەورەوە هەواڵی کۆچی دوای نوسەرو ڕوناکبیری قەدرگرانمان مامۆستا محمد باقی مان پێگەیشت دڵگران و خەمباری کردین لە یەزدانی مەزن داواکارین جێگەو مەکانی بەهەشتی نەبراوە بێت و سەبوری ئێمەو خانەوادەو خزمان و هاوڕێیانی بدات .

سەهەند محمد سعید
بەڕێوەبەری مۆزەخانەی پەروەردەیی

بۆ بینینی ژیاننامەی مامۆستا ئەم لینکە بکەرەوە
https://www.facebook.com/share/1Gy4FhX8vN/?mibextid=wwXIfr

ساڵیادی كۆچی مامۆستا عومەری وەرزشكاری دێرینی پارێزگای سلێمانی.
ئەمڕۆ ٣_٣_٢٠٢٦ ساڵیادی کۆچی دوایی مامۆستای قەدرگران مامۆستا عمر حمە ساڵح وەرزشکاری دێرینی شاری سلێمانی لە هۆڵی بۆنەکانی ڕێکخراوی وەرزشکارە دێرینەکانی سلێمانی بەڕێوەچوو بە ئامادە بوونی هەریەک لە بەڕێزان بەڕێوەبەری گشتی پەروەردەی سلێمانی و بەڕێوەبەری مۆزەخانەی پەروەردەیی و بە ئامادەبوونی خزمان و هاوڕێیان و مامۆستاكانی هاوڕێ وەرزشكارە دێرینەكانی .
جێگەی باسە وێنەیەک لە وێنەکانی مامۆستا عمر پێشکەش بە مۆزەخانەی پەروەردەیی کرا تاکو وێنەی مامۆستا لەنێو وێنەی یادەوەری مامۆستایان لە مۆزەخانەی پەروەردەیی لەپاڵ هاوپیشەکانی دابنرێت....... ڕۆحی مامۆستا شاد و ئارام بێت

هه‌ر جاره‌و ناساندنی په‌روه‌رده‌كارێك
مامۆستا (ئامینه‌) بناسه‌

ئامینه‌ محه‌مه‌د غه‌ریب غه‌فور، ساڵی (1950) له‌ گه‌ڕه‌كی قه‌زازه‌كانی سلێمانی له‌دایكبووه‌، له‌ ته‌مه‌نی (حه‌وت) ساڵیدا له‌ قوتابخانه‌ی (مه‌لیكه‌ عالیه‌) ده‌ستی به‌ خوێندن كردووه‌، پاشان به‌هۆی گواستنه‌وه‌ی ماڵیان ده‌گوازرێته‌وه‌ بۆ قوتابخانه‌ی (گۆیژه‌) و دواتریش گه‌‌ڕاوه‌ته‌وه‌ بۆ قوتابخانه‌ی (مه‌لیكه‌ عالیه‌).
له‌ ساڵی (1959) به‌هۆی نه‌مانی (مه‌لیك فه‌یصه‌ل) ناوی قوتابخانه‌كه‌ گۆڕاوه‌ بۆ (سه‌ربه‌ستی) له‌ گه‌ڕه‌كی چوارباخ، كه‌ پێشتر به‌هۆی دایكی مه‌لیك فه‌یسه‌ڵه‌وه‌ ئه‌و ناوه‌ی لێ نرابوو. پاشان له‌ ناوه‌ندی (سلێمانی كچان) درێژهی‌ به‌ خوێندن داوه‌ كه‌ ئه‌وكات به‌ڕێز (نه‌سرین مسته‌قا مه‌زهه‌ر) به‌ڕێوه‌به‌ر بووه‌، پاشان چووه‌ته‌ ئاماده‌یی (فنون بیتی) و خوێندن ته‌واو ده‌كات.
مامۆستا پاش (3) ساڵ له‌ ده‌رچوونی له‌ ساڵی (1973) وه‌ك مامۆستا ده‌ستبه‌كار بووه‌ له‌ قوتابخانه‌ی (ولیان) له‌ ناوچه‌ی قه‌ره‌داغ.
ساڵی (1974) به‌هۆی (شۆڕشی ئه‌یلول)ـه‌وه‌ گواستراوه‌ته‌وه‌ بۆ قوتابخانه‌ی (چوارتاق) له‌ نزیك (عه‌ربه‌ت) و بۆ ماوه‌ی (دوو) ساڵ له‌وێ به‌رده‌وام بووه‌ له‌ خزمه‌ت، به‌ڵام به‌هۆی خراپی باری ته‌ندروستیی دایك و باوكی چووه‌ته‌ قوتابخانه‌ی (عه‌ربه‌ت)ی سه‌ره‌تایی كچان و له‌وێ بۆ ماوه‌ی (دوو) ساڵ وانه‌ی وتووه‌ته‌وه‌.
مامۆستا ئامینه‌ ساڵی (1978) ژیانی هاوسه‌رگیری پێكهێناوه‌، له‌ ساڵی (1979) گواستراوه‌ته‌وه‌ بۆ قوتابخانه‌ی (نیگار) له‌ شه‌هیدانی ئازادی له‌ سلێمانی، پاشان له‌ ساڵی (1993) چووه‌ته‌ قوتابخانه‌ی (مه‌ڵكه‌ندی).
له‌ ساڵی (2013) و پاش ته‌واوكردنی ماوه‌ی یاسایی و خزمه‌تی (40) ساڵ له‌ بواری په‌روه‌رده‌و فێركردن خانه‌نشین بووه‌.
مامۆستا له‌ ماوه‌ی خزمه‌تیدا به‌شداری چه‌ندین خ*لی په‌روه‌رده‌یی و پسپۆڕی كردووه‌و خاوه‌نی چه‌ندین رێزو سوپاسه‌.
هیوای ته‌مه‌ن درێژی و ته‌ندروستی باش بۆ مامۆستا ئامینه‌ ده‌خوازین..

ئاماده‌كردنی: نهایه‌ت مه‌حمود – محه‌مد عه‌بدوڵا
مۆزەخانەی پەروەردەیی سلێمانی

خوێندکارانی قوتابخانەی کازیوەی بنەڕەتی سەردانی مۆزەخانەی پەروەردەییان کرد...
ڕۆژی یەک شەممە 22ی شوباتی 2026, بەشێکی دیکە لە خوێندکارانی قوتابخانەی کازیوەی بنەڕەتی سەردانی مۆزەخانەی پەروەردەییان کرد و بەشەکانی مۆزەخانەیان بەسەرکردەوە، لە هەر بەشێکی مۆزەخانەدا ڕوونکردنەوەو زانیاریی پێویست بەخوێندکاران درا، لەبارەی مێژووی پرۆسەی پەروەردە لە قۆناغە جیاوازەکاندا و خوێندکاران ئاشناکران بە هۆیەکانی فێرکردن و ئەو کەرەستە و پێداویستییانەی لە ڕابردوودا لە پرۆسەی پەروەردە و فێرکردندا سوودیان لێوەرگیراوە.

هه‌رجاره‌و ناساندنی په‌روه‌رده‌كارێك

مامۆستا (نعمان) بناسه‌......

ناوی ته‌واوی (نعمان عوسمان مه‌حمود)ه‌، له‌ (1/7/1965) له‌ شارۆچكه‌ى ته‌وێڵه‌ له‌ خێزانێكى مام ناوه‌ند له‌ دايك بووه‌، ته‌مه‌نى چه‌ند مانگێك بووه‌ كه‌ باوكى كۆچى دوایى كردووه‌، به‌ تاقانه‌يی دايكى ژيانى خۆى بۆ ته‌رخان ده‌كات و په‌روه‌رده‌ى ده‌كات.
خوێندنى سه‌ره‌تايى و ناوه‌ندى هه‌ر له‌ شارۆچكه‌ى ته‌وێڵه‌ ته‌واو ده‌كات. به‌ هۆى شه‌ڕى عێراق و ئێران ساڵى 1980 وه‌ك هه‌موو خه‌ڵكى ناوچه‌كه‌ ئاواره‌ى هه‌ڵه‌بجه‌ و سلێمانى ده‌بێت.
ساڵى 1982 له‌ خانه‌ى مامۆستايانى سلێمانى وه‌رده‌گيرێت و ساڵى 1984 – 1985 به‌ پله‌يه‌كی به‌رز خانه‌ى مامۆستايان ته‌واو ده‌كات، به‌ هۆى بارودۆخى ناله‌بارى ئه‌وكاته‌ و كاره‌ساتى هه‌ڵه‌بجه‌ ماوه‌يه‌ك ئاواره‌ى ئێران ده‌بێت، هه‌ر له‌ ته‌مه‌نى لاويیه‌وه‌ په‌يوه‌ندى به‌ ڕێكخستنه‌كانى يه‌كێتیی نيشتمانى كوردستانه‌وه‌ ده‌كات.
ساڵى 1992 بۆ يه‌كه‌مجار وه‌ك مامۆستا له‌ قوتابخانه‌ى ( شه‌مێران ) له‌ شارۆچكه‌ی ( نصر) داده‌مه‌زرێت و دواتر له‌ هه‌مان قوتابخانه‌ وه‌ك ياريده‌ده‌ر و پاشان به‌ڕێوه‌به‌ر خزمه‌ت ده‌كات، دواتر ده‌گواسترێته‌وه‌ بۆ قوتابخانه‌ى (شێخ سه‌لام ) له‌ هه‌مان شارۆچكه‌ ( نصر ).
ساڵی 1998 بڕوانامه‌ى‌ خ*لى كاديرانى يه‌كێتیى نيشتمانیى كوردستانى پێ ده‌به‌خشرێت، ساڵى 1998 بۆ هه‌ڵه‌بجه‌ى تازه‌ گواستراوه‌ته‌وه‌ و له‌ قوتابخانه‌ى (هه‌تاو) به‌ڕێوه‌به‌ر بووه‌ تا ساڵى 2002، شانبه‌شانى كارى ڕێكخراوه‌يى و حزبى. دواتر له‌ سلێمانى له‌ قوتابخانه‌ى (خانزاد) به‌ڕێوه‌به‌ر بووه‌.
ساڵى 2004 وه‌ك سه‌رپه‌رشتيارى په‌روه‌رده‌يی ده‌ستبه‌كاربووه‌، ساڵى 2006 وه‌ك لێپرسراوى خۆيه‌تى له‌ ديوانى په‌روه‌رده‌ى ناوه‌ندى سلێمانى ده‌ستبه‌كاربووه. ساڵى 2011 بڕوانامه‌ى به‌كالۆريۆسى له‌ به‌شى ( مێژوو ) له‌ زانكۆى (التربية المفتوحة) به‌ده‌ستهێناوه‌. وه‌ك به‌ڕێوه‌رى ته‌نفيزى ساڵى 2012 گواستراوه‌ته‌وه‌ بۆ به‌ڕێوه‌به‌رێتى (ته‌جهيزات).
له‌ 18/12/2025 فه‌رمانى خانه‌نشينى بۆ ده‌رده‌چێت. له‌ ماوه‌ى ته‌مه‌نى ڕێكخراوه‌يى و حزبى و په‌روه‌رده‌ييدا به‌شدارى چه‌ندين كۆڕ و كۆبونه‌وه‌ و سيمينارى په‌روه‌رده‌يي كردوه‌، دوا پله‌ى حزبى (كارگێڕى مه‌كته‌بی ڕێخستن) بووه‌.
به‌ داخه‌وه‌ له‌ 25/12/2025 به‌ هۆى نه‌خۆشييه‌وه‌ كۆچى دوايی ده‌كات.
خوای گه‌وره‌ له‌ مامۆستا نعمان خۆشبێت و هیوای ته‌مه‌ندرێژی بۆ خانه‌واده‌كه‌ی ده‌خوازین.

ناردنی وێنه‌ و زانیاری: لاڤه‌ نعمان
ئامادەکردن : نیهایەت محمود محمد