21/09/2026
ಜಾಗತಿಕ ಸೆಮಿಕಂಡಕ್ಟರ್ ದೈತ್ಯರು ಭಾರತದಲ್ಲಿ ಭಾರಿ ಬಂಡವಾಳ ಹೂಡಿಕೆ ಮಾಡುತ್ತಿದ್ದು, ದೇಶವು ಕೇವಲ ಪ್ರೋತ್ಸಾಹಕ ನೀತಿಗಳ ಹಂತದಿಂದ ನೇರ ಉತ್ಪಾದನಾ ಯುಗಕ್ಕೆ ಹೆಜ್ಜೆ ಇಟ್ಟಿದೆ. ವಿಕಸಿತ ಭಾರತ 2047 ಆರ್ಥಿಕ ಗುರಿ ಸಾಧನೆಗೆ ಈ ವಲಯದ ಬೆಳವಣಿಗೆ ಅಡಿಪಾಯವಾಗಲಿದೆ. ಸೆಮಿಕಾನ್ ಇಂಡಿಯಾ 2026 ಪ್ರದರ್ಶನದಲ್ಲಿ ಉದ್ಘಾಟನೆಗೊಂಡ ₹1,27,500 ಕೋಟಿ ವೆಚ್ಚದ ನೂತನ ಸೆಮಿಕಾನ್ 2.0 ಯೋಜನೆಯ ಬೆಂಬಲದೊಂದಿಗೆ ದೇಶದಲ್ಲಿ ವಿನ್ಯಾಸ, ಫ್ಯಾಬ್ರಿಕೇಶನ್, ಪ್ಯಾಕೇಜಿಂಗ್, ಕಚ್ಚಾ ಸಾಮಗ್ರಿಗಳು ಹಾಗೂ ಉಪಕರಣಗಳ ಪೂರೈಕೆ ಶೃಪಖಲೆಯು ಸೃಷ್ಟಿಯಾಗುತ್ತಿದೆ. ಮೈಕ್ರಾನ್‌ನ ಪೈಲಟ್ ಘಟಕದಲ್ಲಿ ಡೈನಾಮಿಕ್ ಡಿರಾಮ್ ಮತ್ತು ನ್ಯಾಂಡ್ ಉತ್ಪಾದನೆ ಆರಂಭಗೊಂಡಿದ್ದು, ಟಾಟಾ ಇಲೆಕ್ಟ್ರಾನಿಕ್ಸ್ ಸಂಸ್ಥೆಯ ಫ್ಯಾಬ್ ಹಾಗೂ ಅಸೆಂಬ್ಲಿ ಘಟಕಗಳ ನಿರ್ಮಾಣ ವೇಗವಾಗಿ ಸಾಗುತ್ತಿದೆ.
ಈ ಕಾರ್ಯಕ್ರಮವು ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಯ ಆರು ಪ್ರಮುಖ ಅಂಶಗಳನ್ನು ಒಳಗೊಂಡಿದೆ. ಚಿಪ್ ವಿನ್ಯಾಸ, ಉಪಕರಣಗಳು, ರಾಸಾಯನಿಕ ಮತ್ತು ಅನಿಲಗಳ ಸರಬರಾಜು, ಸುಧಾರಿತ ಅಸೆಂಬ್ಲಿ ಹಾಗೂ ಪ್ಯಾಕೇಜಿಂಗ್, ಚಿಪ್ ತಂತ್ರಜ್ಞಾನದ ಸಂಶೋಧನೆ ಹಾಗೂ 68,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ತರಬೇತಿ ನೀಡುವುದು ಇದರ ಭಾಗವಾಗಿದೆ. ಸರ್ಕಾರವು ಪ್ರಸ್ತುತ ₹1.64 ಲಕ್ಷ ಕೋಟಿಗೂ ಅಧಿಕ ಮೌಲ್ಯದ 12 ಯೋಜನೆಗಳಿಗೆ ಅನುಮೋದನೆ ನೀಡಿದ್ದು, ಅದರಲ್ಲಿ 3 ಯೋಜನೆಗಳು ಈಗಾಗಲೇ ವಾಣಿಜ್ಯ ಉತ್ಪಾದನೆ ಆರಂಭಿಸಿವೆ. ಜೊತೆಗೆ ಸರ್ಕಾರದ ಪ್ರೋತ್ಸಾಹ ಪಡೆದ 24 ಚಿಪ್ ವಿನ್ಯಾಸ ಯೋಜನೆಗಳು ಹಾಗೂ 105ಕ್ಕೂ ಹೆಚ್ಚು ನವೋದ್ಯಮಗಳಿಗೆ ಸುಧಾರಿತ ಇಡಿಎ ಟೂಲ್ಸ್ ಒದಗಿಸಲಾಗಿದೆ.
ಐಇಎಸ್ಎ ವರದಿಯ ಪ್ರಕಾರ, ಭಾರತದ ಸೆಮಿಕಂಡಕ್ಟರ್ ಮಾರುಕಟ್ಟೆಯು 2026ರಲ್ಲಿ 64 ಬಿಲಿಯನ್ ಡಾಲರ್‌ಗೆ ತಲುಪಲಿದ್ದು, 2030ರ ವೇಳೆಗೆ 100 ಬಿಲಿಯನ್ ಡಾಲರ್ ಗಡಿ ದಾಟುವ ನಿರೀಕ್ಷೆಯಿದೆ. ಜಾಗತಿಕ ಚಿಪ್ ವಿನ್ಯಾಸ ಪ್ರತಿಭೆಯ ಶೇ. 20ರಷ್ಟು ಪಾಲು ಭಾರತದಲ್ಲೇ ಇರುವುದರಿಂದ ಡಿಸೈನ್ ಲಿಂಕ್ಡ್ ಇನ್ಸೆಂಟಿವ್ ಯೋಜನೆಯಡಿ ಸ್ವದೇಶಿ ಚಿಪ್ ಪ್ರೊಸೆಸರ್‌ಗಳು ರೂಪುಗೊಳ್ಳುತ್ತಿವೆ. ಸಿಂಗಾಪುರ ಹಾಗೂ ಜಪಾನ್ ಜತೆಗಿನ ಸಹಭಾಗಿತ್ವದೊಂದಿಗೆ, ಭಾರತವು ಕೇವಲ ಚಿಪ್ ಜೋಡಣೆಗೆ ಸೀಮಿತವಾಗದೆ, ಸಮಗ್ರ ಮೌಲ್ಯವರ್ಧಿತ ಸರಬರಾಜು ಶೃಂಖಲೆಯ ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ. ಈ ಕುರಿತು ಹೊಸದಿಗಂತ ದಿನಪತ್ರಿಕೆಯಲ್ಲಿ ವಿಶೇಷ ವರದಿ ಪ್ರಕಟವಾಗಿದೆ.
Hosa Digantha
Hariprakash Konemane
