21/07/2026
"स्वतःचे ध्येय ठरवा, अन्यथा दुसऱ्यांच्या ध्येयपूर्तीचे साधन बनाल" – प्रशिक्षक हिमांशू पझारे
हिवसे अध्यापक महाविद्यालयात महिंद्रा प्राईड क्लासरूम आणि नांदी फाऊंडेशनच्या संयुक्त विद्यमाने ७ दिवसीय प्रशिक्षण शिबिर उत्साहात संपन्न.
"युवकांनी आयुष्यात स्वतःचे ध्येय वेळेत निश्चित करणे अत्यंत गरजेचे आहे. जर तुम्ही स्वतःची उद्दिष्टे स्वतः ठरवली नाहीत, तर आयुष्यभर तुम्हाला दुसऱ्यांची ध्येये पूर्ण करण्यासाठी एक साधन म्हणून काम करावे लागेल," असे परखड मत प्रसिद्ध प्रशिक्षक हिमांशू पजारे यांनी व्यक्त केले. महिंद्रा प्राईड क्लासरूम आणि नांदी फाऊंडेशन (Naandi Foundation) यांच्या संयुक्त विद्यमाने स्वर्गीय शिवरामजी हिवसे अध्यापक महाविद्यालय वरुड येथे आयोजित करण्यात आलेल्या सात दिवसीय विशेष प्रशिक्षण शिबिराच्या प्रसंगी ते प्रमुख मार्गदर्शक म्हणून बोलत होते.
स्थानिक महाविद्यालयात आयोजित या शिबिराचे उद्घाटन आणि नियोजन महाविद्यालयाच्या संचालिका डॉ. प्राची ठाकरे यांच्या मार्गदर्शनात करण्यात आले होते, तर कार्यक्रमाच्या अध्यक्षस्थानी महाविद्यालयाचे प्राचार्य प्रा. किशोर तडस उपस्थित होते. आजच्या स्पर्धेच्या युगात केवळ पदवी मिळवणे पुरेसे नसून, विद्यार्थ्यांमध्ये व्यावसायिक कौशल्ये असणे काळाची गरज बनली आहे. हाच उद्देश डोळ्यांसमोर ठेवून बीएड द्वितीय वर्षाच्या प्रशिक्षणार्थ्यांसाठी या सात दिवसीय कार्यशाळेचे आयोजन करण्यात आले होते.
या सात दिवसांच्या प्रदीर्घ आणि अभ्यासपूर्ण शिबिरात प्रशिक्षक हिमांशू पझारे यांनी विद्यार्थ्यांना रोजगाराभिमुख आणि व्यक्तिमत्त्व विकासाशी संबंधित अनेक महत्त्वाच्या पैलूंवर सखोल मार्गदर्शन केले. यामध्ये स्वतःची ओळख निर्माण करण्यासाठी 'सेल्फ अवेअरनेस' आणि 'डिजिटल आयडेंटिटी'चे महत्त्व पटवून देण्यात आले. तसेच, व्यावसायिक जगतात प्रभाव पाडण्यासाठी 'बॉडी लँग्वेज', 'प्रोफेशनल ग्रुमिंग', 'आर्ट ऑफ स्पीकिंग' आणि 'प्रोफेशनल कम्युनिकेशन' यांसारख्या कौशल्यांचे व्यावहारिक धडे देण्यात आले.
याशिवाय, प्रत्यक्ष कार्यक्षेत्रात काम करताना येणाऱ्या अडचणींवर मात करण्यासाठी 'प्रॉब्लेम सॉल्व्हिंग', 'क्रिटिकल थिंकिंग', 'कॉन्फ्लिक्ट मॅनेजमेंट', 'टाईम मॅनेजमेंट' आणि 'वर्कप्लेस एथिक्स' या विषयांवरही विस्तृत चर्चा करण्यात आली. विद्यार्थ्यांचा आत्मविश्वास वाढवण्यासाठी आणि त्यांना भविष्यातील नोकरीच्या संधींसाठी (जॉब ऑपॉर्च्युनिटी) तयार करण्यासाठी शिबिरादरम्यान 'रिज्युम प्रिपरेशन' आणि प्रत्यक्ष 'इंटरव्यू प्रॅक्टिस' (मॉक मुलाखती) करून घेण्यात आल्या.
प्रशिक्षण शिबिराच्या अंतिम दिवशी समारोप, अभिप्राय (फीडबॅक) व आभार प्रदर्शन कार्यक्रमाचे आयोजन करण्यात आले होते. याप्रसंगी विद्यार्थ्यांनी या सात दिवसांत आलेल्या अनुभवांचे आणि शिकलेल्या गोष्टींचे मनोगत व्यक्त केले. या संपूर्ण कार्यक्रमाच्या यशस्वीतेसाठी महाविद्यालयातील प्रा. भारती ठाकरे, प्रा. प्रियंका इंगोले, प्रा. सविता गलपट, प्रा. राजू गोलाईत, प्रा. आरती देशमुख आणि प्रा. चेतना पाटील यांच्यासह बीएड द्वितीय वर्षाच्या प्रशिक्षणार्थ्यांनी मोलाचे परिश्रम घेतले.नांदी फाउंडेशन व महिंद्रा प्राईड क्लास रूम चे स्टेट कॉर्डिनेटर अनुराग पाटणकर, ट्रेनिंग कॉर्डिनेटर डॉमिनिक फ्रँक यांच्या मार्गदर्शनात उपरोक्त कार्यशाळेचे आयोजन करण्यात आले होते.
कार्यक्रमाच्या शेवटच्या सत्राचे उत्कृष्ट व बहारदार सूत्रसंचालन प्रियंका जगदेवे यांनी केले, तर उपस्थितांचे औचित्यपूर्ण आभार रेणुका चव्हाण यांनी मानले. या शिबीरामुळे विद्यार्थ्यांमध्ये एक नवीन ऊर्जा आणि आत्मविश्वास निर्माण झाला असून, भविष्यातील आव्हानांना सामोरे जाण्यासाठी मोठी मदत होईल असा विश्वास विद्यार्थ्यांनी व्यक्त केला.
