09/02/2020
ഓഫീസിലെ തിരക്കിനിടയിലാണ് ഭാര്യയുടെ ഫോൺ വന്നത് , " മോനെ നമ്മൾക്ക് ട്യൂഷനയച്ചാലോ , നല്ലതല്ലേ ?
"എപ്പോഴാ ടൂഷന് സമയമുള്ളത് " ഞാൻ അവളോട് ചോദിച്ചു
"വൈകീട്ട് നാല് മുതൽ ഏഴു വരെ"
അവളുടെ മറുപടി കേട്ട് ഞാൻ ഞെട്ടി !!!😳
"അത് മോന് കളിക്കാനുള്ള സമയമല്ലേ , കളിക്കാനുള്ള സമയം അപഹരിച്ചുള്ള ഒരു പഠനവും വേണ്ട".
"അടുത്തുള്ള കുട്ടികളൊക്ക പോകുന്നുണ്ട് " അവൾ മറുപടി പറഞ്ഞു
"അവനെ അടുത്തുള്ള കുട്ടിയാക്കുകയല്ല, അവനെ അവനാക്കുകയാണ് .. പഠിക്കാൻ സമയം കുറഞ്ഞാലും പ്രശ്നമില്ല .. കളിക്കാനുള്ള സമയം കുറയാൻ പാടില്ല " അതും പറഞ്ഞു ഞാൻ ഫോൺ കട്ട് ചെയ്തു
നമ്മുടെ കുട്ടികൾക്ക് പതിനഞ്ചു വയസ്സുവരെ എങ്കിലും കളിക്കാൻ മതിയായ സമയം കിട്ടുന്നുണ്ട് എന്ന് നാം ഉറപ്പു വരുത്തണം , പഠിക്കാൻ സമയം കുറഞ്ഞു പോയാലും വലിയ പ്രശ്നമൊന്നും ഇല്ല .. പ്രൈമറിയിൽ കുട്ടികൾ വാങ്ങുന്ന റാങ്കും മാർക്കും ഒന്നുമല്ല കുട്ടിയുടെ ഭാവി നിശ്ചയിക്കുന്നത് .
കുട്ടികൾ വലുതായാലും അവര്ക്ക് വേണമെങ്കിൽ പഠിക്കാൻ ധാരാളം സമയം കിട്ടും , പക്ഷെ കളിക്കാൻ , മതിമറന്നു കളിക്കാൻ പതിനഞ്ചു വയസ്സ് വരെയേ ഒരു കുട്ടിക്ക് കഴിയൂ.
പഠിക്കാൻ ചിലവഴിച്ചതിലേറെ സമയം കളിക്കാൻ ചിലവഴിച്ച വ്യക്തികൾ ആണു നല്ല മനുഷ്യർ ആയിട്ടുള്ളത്, ചെറിയ ക്ലാസ്സുകളിൽ പരീക്ഷ നേരത്തെ കഴിഞ്ഞാൽ ബാക്കിയുള്ള സമയം ഗ്രൗണ്ടിലേക്കാണ് ഓടിയിരുന്നത്.
ചുറ്റുപാടുകൾ , പ്രകൃതി , സാമൂഹ്യ ജീവിതം , ലീഡർഷിപ്പ് , കായിക ക്ഷമത , മാനസിക ഉല്ലാസം ഇതെല്ലാം ധാരാളം കിട്ടിയിട്ടുണ്ട് . തിരിഞ്ഞു നോക്കുമ്പോൾ വർണ്ണ ശബളമായ ഒരു കുട്ടിക്കാലം ഉണ്ട് എന്നത് തന്നെയാണ് വലിയ സന്തോഷം .
കുട്ടികളെ പഠിപ്പിക്കേണ്ട എന്നല്ല , പഠിപ്പിക്കണം , അവർ എന്തിനാണ് പഠിക്കേണ്ടത് എന്ന് അവരെ ബോധ്യപ്പെടുത്തണം , മാർക്കിനോടൊപ്പം, ജീവിത മൂല്യം , ധാർമികത , പ്രതിസന്ധികളെ അതിജയിക്കാനുള്ള കഴിവ് , നേതൃത്വ ഗുണം , കുടുംബ സാമൂഹ്യ ബന്ധങ്ങൾ , എല്ലാം കുട്ടികൾക്ക് പകർന്നു കൊടുക്കണം . പലപ്പോഴും കുട്ടികളെ വലിയവരാക്കുന്നത് അവർക്കു ലഭിക്കുന്ന മൂല്യങ്ങളാണ്, മാർക്കുകളല്ല.
കുട്ടികളുടെ പഠനം ഒരിക്കലും മാതാപിതാക്കളുടെ അഭിമാന പ്രശ്നം ആയി മാറരുത് .
കുട്ടികളുടെ അഭിരുചി കണ്ടെത്തി അതിനെ പരിപോഷിപ്പിക്കുക എന്നതാണ് ഏറ്റവും പ്രധാനം ,
ഓർക്കുക ലോകത്തിലെ എല്ലാ ഹീറോസും ഹീറോകൾ ആയിത്തീർന്നത് അവരുടെ കഴിവിനെ പരിപോഷിപ്പിച്ചിട്ടാണ് , മാര്ക്ക്ഷീറ്റിലെ നമ്പറുകൾ അല്ല.
പരീക്ഷയിൽ തോറ്റവരും ജീവിതത്തിൽ വിജയിച്ചിട്ടുണ്ട് , ജീവിതത്തിൽ ജയിക്കാൻ കഴിയാത്തവൻ എത്ര പരീക്ഷ ജയിച്ചിട്ടും കാര്യമില്ല.
അത് കൊണ്ട് നമ്മുടെ കുട്ടികൾ കളിക്കട്ടെ , അവരുടെ ബാല്യം അവര്ക്ക് തന്നെ കൊടുക്കാം , അദ്ധ്യാപകരും മാതാപിതാക്കളും കുട്ടികളുടെ ബാല്യം അവരിൽ നിന്നും മോഷ്ടിക്കരുത്.
(കടപ്പാട്)
*നല്ലവരായ രക്ഷകർത്താക്കൾക്ക് വേണ്ടി..........
