11/09/2026
കുട്ടികൾക്കൊപ്പം 'കുട്ടി'യായി മാറി, നമ്മുടെ യുവ MLA അപു ജോൺ ജോസഫ്
കോതമംഗലം കോർപ്പറേറ്റ് എജുക്കേഷണൽ ഏജൻസിയുടെ 2025–26 അധ്യയന വർഷത്തെ മികച്ച വിദ്യാലയങ്ങൾക്കുള്ള അംഗീകാരമാണ് കല്ലാനിക്കൽ സെന്റ് ജോർജസ് യു.പി. സ്കൂളിനും, ഹയർ സെക്കൻഡറി സ്കൂളിനും ലഭിച്ചത്. ഇതിന്റെ ഭാഗമായി സംഘടിപ്പിച്ച അനുമോദനച്ചടങ്ങ് കല്ലാനിക്കൽ പാരിഷ് ഹാളിൽ നടന്നു.ഗവൺമെന്റ് ചീഫ് വിപ്പും തൊടുപുഴ എം.എൽ.എയുമായ അപു ജോൺ ജോസഫ് ചടങ്ങ് ഉദ്ഘാടനം ചെയ്തു.
കല്ലാനിക്കൽ യുപി, ഹൈസ്കൂൾ,ഹയർസെക്കൻഡറി വിഭാഗങ്ങളിലെ മുഴുവൻ കുട്ടികളും അധ്യാപകരും പങ്കെടുത്ത പ്രൗഢഗംഭീരമായ ചടങ്ങിൽ മികച്ച വിദ്യാലയത്തിനുള്ള മെമെന്റോകൾ അദ്ദേഹം സ്കൂൾ മാനേജർ റവ. ഫാ. ജോർജ് നെടുങ്കല്ലേലിന് കൈമാറി.
യുവതലമുറയുടെ കഴിവുകൾ കണ്ടെത്തി അവരെ പ്രോത്സാഹിപ്പിക്കാൻ കഴിഞ്ഞാൽ തെറ്റായ മാർഗങ്ങളിലേക്ക് സഞ്ചരിക്കുന്നതിൽ നിന്ന് അവരെ തടയാൻ സാധിക്കുമെന്ന് അപു ജോൺ ജോസഫ് പറഞ്ഞു. വിദ്യാർത്ഥികളുടെ കഴിവുകൾ വളർത്തുന്നതിലും അവരുടെ സർവതോന്മുഖമായ വികസനത്തിലും വിദ്യാലയങ്ങൾ വഹിക്കുന്ന നിർണായക പങ്കും അദ്ദേഹം ചൂണ്ടിക്കാട്ടി.
ചടങ്ങിലെ ശ്രദ്ധേയമായ മറ്റൊരു നിമിഷമായിരുന്നു കല്ലാനിക്കൽ സെന്റ് ജോർജസ് യു.പി. സ്കൂളിന്റെ പുതിയ ജേഴ്സി അപു ജോൺ ജോസഫിന് സമ്മാനിച്ചത്. സമ്മാനം ഏറ്റുവാങ്ങിയ അദ്ദേഹം വേദിയിൽവെച്ച് തന്നെ ജേഴ്സി ധരിച്ചത് ചടങ്ങിന് കൗതുകമായി.
സ്കൂൾ പ്രിൻസിപ്പൽ ഡോ. സാജൻ മാത്യു സ്വാഗതം ആശംസിച്ചു. സ്കൂൾ മാനേജർ റവ. ഫാ. ജോർജ് നെടുങ്കല്ലേൽ അധ്യക്ഷത വഹിച്ചു. തൊടുപുഴ ബ്ലോക്ക് പഞ്ചായത്ത് പ്രസിഡന്റ് അൻഷാദ് മുഹമ്മദ് മുഖ്യപ്രഭാഷണം നടത്തി. ഇടവെട്ടി ഗ്രാമപഞ്ചായത്ത് പ്രസിഡന്റ് മുഹമ്മദ് അമീർ ആശംസകൾ നേർന്നു.
ഹെഡ്മിസ്ട്രസ് ഷൈനി തോമസ്, ഇടവെട്ടി പഞ്ചായത്ത് സ്റ്റാൻഡിംഗ് കമ്മിറ്റി അംഗം ബിൻസി മാർട്ടിൻ, വാർഡ് മെമ്പർമാരായ അനിഷ ബാലൻ, ഷീല ദീപു, പി.ടി.എ പ്രസിഡന്റുമാരായ സിബി ജോർജ് കോടമുളളിൽ, ബിൻസൺ മാത്യു, എം.പി.ടി.എ പ്രസിഡന്റുമാരായ ജിൻസി ജിജോ, നീന ജോസ്, മുൻ പി.ടി.എ അംഗങ്ങളായ ബിനോയി സെബാസ്റ്റ്യൻ, ശരണ്യ കെ. എന്നിവർ ആശംസകൾ അറിയിച്ചു.
സെൻ്റ്. ജോർജ്ജ് യുപി സ്കൂൾ ഹെഡ്മാസ്റ്റർ ലിൻ്റോ ജോർജ്ജ് ചടങ്ങിന് നന്ദി അറിയിച്ചു.
