Govt. City VHSS TVM

PMG City സ്കൂളിൻ്റെ പണികൾ പൂർത്തിയായ ബഹുനില കെട്ടിടത്തിൻ്റെ ഉദ്ഘാടനം ബഹു: മന്ത്രി ശ്രീ.വി.ശിവൻകുട്ടി നിവ്വഹിച്ചു ❤️ #Vattiyoorkavu #വട്ടിയൂർക്കാവ്മുന്നോട്ട്❣️❣️

ഗവ. സിറ്റി വൊക്കേഷണൽ ഹയർ സെക്കന്ററി സ്കൂൾ പുതിയ ബഹുനില മന്ദിരം ഉദ്ഘാടനം ചെയ്തു

വട്ടിയൂർക്കാവ്: ഗവ. സിറ്റി വൊക്കേഷണഷൽ ഹയർ സെക്കന്ററി സ്കൂളിനായി നിർമ്മിച്ച പുതിയ ബഹുനില മന്ദിരം മന്ത്രി വി. ശിവൻകുട്ടി ഉദ്ഘാടനം ചെയ്തു. അഡ്വ. വി.കെ. പ്രശാന്ത് എംഎൽഎ അദ്ധ്യക്ഷനായിരുന്നു.

പൊതുമരാമത്ത് വകുപ്പിന്റെ പ്ലാൻ ഫണ്ടിൽ നിന്നും 3.26 കോടി രൂപയും അഡ്വ. വി.കെ. പ്രശാന്ത് എംഎൽഎയുടെ മണ്ഡലം ആസ്തി വികസന ഫണ്ടിൽ നിന്നും 99 ലക്ഷം രൂപയും ചേർത്ത് 4.25 കോടി രൂപ ചെലവിലാണ് നിർമ്മാണം പൂർത്തിയാക്കിയത്. മൂന്ന് നിലകളിലായി 13225 ചതു. അടി വിസ്തീർണ്ണമുള്ള കെട്ടിടത്തിൽ 11 ക്ലാസ് മുറികൾ, ലൈബ്രറി, ഓഫീസ് റൂം, 2 സ്റ്റാഫ് റൂമുകൾ എന്നിവ ഉൾപ്പെട്ടിട്ടുണ്ട്.

ഇതിനുപുറമെ പിഎംജി – ലാ കോളേജ് റോഡിൽ നിന്നും പ്രവേശന കവാടം, ശുചിമുറി സമുച്ചയം എന്നിവയും ഈ പദ്ധതിയിൽ ഉൾപ്പെടുത്തി നിർമ്മിച്ചിട്ടുണ്ട്. സ്മാർട്ട് ക്ലാസുകൾ സജ്ജമാക്കുന്നതിന് തിരുവനന്തപുരം സ്മാർട്ട് സിറ്റി ലിമിറ്റഡിന് ശുപാർശ സമർപ്പിച്ചിട്ടുണ്ട്.

1961 ൽ സ്ഥാപിതമായ സിറ്റി സ്കൂൾ സ്ഥിതി ചെയ്യുന്നത് നഗര ഹൃദയത്തിലാണെങ്കിലും പ്രധാന റോഡിൽ നിന്നും സ്കൂളിലേക്ക് പ്രവേശനമില്ലാതിരുന്നതുമൂലം ടി സ്കൂൾ പെട്ടെന്ന് ശ്രദ്ധയിൽ പെടുമായിരുന്നില്ല. പ്രധാന റോഡിൽ നിന്നും സ്കൂളിലേക്ക് പ്രവേശന കവാടം ഒരുക്കിയതിലൂടെ പിഎംജി ജംഗ്ഷനിലൂടെ കടന്നുപോകുന്നവരുടെ ശ്രദ്ധയാകർഷിക്കുന്ന പ്രധാന സ്ഥാപനമായി ഈ പൊതുവിദ്യാലയം മാറി.

കുന്നുകുഴി വാർഡ് കൗൺസിലർ എ മേരിപുഷ്പം, മുൻ കൗൺസിലർ ഐ.പി ബിനു, പൊതുമരാമത്ത് സൂപ്രണ്ടിംഗ് എഞ്ചിനീയർ ഇന്ദു പി, എക്സിക്യൂട്ടീവ് എഞ്ചിനീയർ ബിജു ജി.ആർ, അസിസ്റ്റന്റ് എക്സിക്യൂട്ടീവ് എഞ്ചിനീയർ അജയകുമാർ എസ്, സ്കൂൾ പ്രിൻസിപ്പാൾ സുജിൻ വി.എസ്, ഹെഡ്മിസ്ട്രസ് ജിജി എസ്, പിറ്റിഎ പ്രസിഡന്റ് അസീല, സ്റ്റാഫ് സെക്രട്ടറി ബിബീഷ് കുട്ടി, സ്കൂൾ ലീഡർ ആദിത്യ എന്നിവർ പങ്കെടുത്തു.

ഏവർക്കും സ്വാഗതം...

(ഹയർ സെക്കൻ്ററി (വൊക്കേഷണൽ ) 2025-26 അധ്യയന വർഷത്തെ പ്രവേശനവുമായി ബന്ധപ്പെട്ട വിശദാംശങ്ങൾ
https://admission.vhseportal.kerala.gov.in/adm/

ഹയർസെക്കൻ്ററി (വൊക്കേഷണൽ) കോഴ്‌സുകൾ എന്നത് എസ്.എസ്.എൽ.സി/തത്തുല്യ പരീക്ഷ പാസാകുന്ന വിദ്യാർത്ഥികൾക്ക് ഹയർസെക്കൻ്ററി പഠനത്തോടൊപ്പം അഭിരുചിക്കനുസരിച്ചുള്ള ഒരു തൊഴിൽ മേഖല തിരഞ്ഞെടുക്കുന്നതിനും പരിശീലനം നേടുന്നതിനും സ്ക‌ിൽ സർട്ടിഫിക്കറ്റ് കരസ്ഥമാക്കുന്നതിനും അവസരമൊരുക്കുന്ന വേറിട്ട കോഴ്സാണ്.

2020-21 അധ്യയന വർഷം മുതൽ ദേശീയ നൈപുണ്യ വികസന ചട്ടക്കൂട് (എൻ.എസ്.ക്യു.എഫ്) പദ്ധതി പ്രകാരമുള്ള ജോബ് റോളുകളാണ് തൊഴിലധിഷ്‌ഠിത വിഷയമായി പരിശീലിപ്പിക്കുന്നത്. ഇവ വിജയകരമായി പൂർത്തിയാക്കുന്ന വിദ്യാർത്ഥികൾക്ക് ദേശീയാംഗീകാരമുള്ള എൻ.എസ്.ക്യു.എഫ് തൊഴിൽ/സ്‌കിൽ സർട്ടിഫിക്കറ്റ് ലഭിക്കും

പ്രധാന വിവരങ്ങൾ

🔰 പ്രവേശന രീതി സംസ്ഥാനത്തെ എല്ലാ ഹയർസെക്കൻ്ററി (വൊക്കേഷണൽ) സ്‌കൂളുകളിലും ഏകജാലക സംവിധാനത്തിലൂടെയാണ് പ്രവേശന പ്രക്രിയ നടക്കുന്നത്. ഒന്നാംവർഷ പ്രവേശനം സംബന്ധിച്ച പൊതുവിവരങ്ങളും നിയമങ്ങളും പ്രോസ്പെക്ടസിൽ ഉൾപ്പെടുത്തിയിട്ടുണ്ട്.

🔰 സ്കൂളുകളും സീറ്റുകളും

* സംസ്ഥാനത്തൊട്ടാകെയുള്ള 389 ഹയർസെക്കൻ്ററി (വൊക്കേഷണൽ) സ്‌കൂളുകളിലെ കോഴ്‌സുകൾക്ക് ഏകജാലക സംവിധാനത്തിലൂടെയാണ് പ്രവേശനം .
* ഒരു ബാച്ചിൽ 30 സീറ്റുകളാണുള്ളത്.

🔰 കോഴ്സ് ദൈർഘ്യവും ഘടനയും

* എല്ലാ സ്കിൽ കോഴ്‌സുകളുടെയും ദൈർഘ്യം 2 വർഷമാണ്.
* എല്ലാ വിദ്യാർത്ഥികൾക്കും ഇംഗ്ലീഷ്, സംരംഭകത്വ വികസനം (Entrepreneurship Development) എന്നീ വിഷയങ്ങൾ പൊതുവായി പഠിക്കേണ്ടതുണ്ട്. എൻ.എസ്.ക്യു.എഫ് അധിഷ്ഠിത 43 തൊഴിലധിഷ്ഠിത കോഴ്സുകളാണ് ഉള്ളത്. തിരഞ്ഞെടുക്കുന്ന എൻ.എസ്.ക്യു.എഫ് കോഴ്‌സിൻ്റെ അടിസ്ഥാനത്തിൽ ഓരോ ഗ്രൂപ്പിലും പഠിക്കേണ്ട നോൺ വൊക്കേഷണൽ വിഷയങ്ങൾ വ്യത്യസ്തമായിരിക്കും.
* ഗ്രൂപ്പുകളും വിഷയങ്ങളും താഴെ നൽകുന്നു:
* ഗ്രൂപ്പ് A: ഫിസിക്സ്, കെമിസ്ട്രി, മാത്തമാറ്റിക്സ്
* ഗ്രൂപ്പ് B: ഫിസിക്സ്, കെമിസ്ട്രി, ബയോളജി
* ഗ്രൂപ്പ് C: ഹിസ്റ്ററി, ജ്യോഗ്രഫി, ഇക്കണോമിക്സ്
* ഗ്രൂപ്പ് D: അക്കൗണ്ടൻസി, ബിസിനസ് സ്റ്റഡീസ്, മാനേജ്മെൻ്റ്
* ഗ്രൂപ്പ് B വിഭാഗത്തിലെ വൊക്കേഷണൽ വിഷയങ്ങൾ തിരഞ്ഞെടുക്കുന്നവർക്ക് മാത്തമാറ്റിക്സ് ഒരു അധിക വിഷയമായി എടുത്തു പഠിക്കാവുന്നതാണ്.

🔰 പഠന മാധ്യമം ഹയർസെക്കൻ്ററി (വൊക്കേഷണൽ) പഠനത്തിൽ പഠനമാധ്യമം ഇംഗ്ലീഷാണ്. എന്നാൽ പരീക്ഷകൾ മലയാളം, തമിഴ്, കന്നട ഭാഷകളിലും എഴുതാവുന്നതാണ്.

🔰 പ്രവേശന യോഗ്യത

* എസ്.എസ്.എൽ.സി (കേരള സിലബസ്), സി.ബി.എസ്.ഇ, ഐ.സി.എസ്.ഇ, റ്റി.എച്ച്.എസ്.എൽ.സി തുടങ്ങിയവയിലേതെങ്കിലും പരീക്ഷ വിജയിച്ചവരും മറ്റ് സംസ്ഥാനങ്ങളിൽ/രാജ്യങ്ങളിൽ നിന്ന് തത്തുല്യമായ പരീക്ഷ ഔപചാരിക വിദ്യാഭ്യാസ സമ്പ്രദായത്തിലൂടെ വിജയിച്ചവരും അപേക്ഷിക്കാൻ യോഗ്യരാണ്.
* അനൗപചാരിക വിദ്യാഭ്യാസ സമ്പ്രദായത്തിലൂടെ പത്താം തരം യോഗ്യത നേടിയവർ (സാക്ഷരതാ മിഷൻ, നാഷണൽ ഇൻസ്റ്റിറ്റ്യൂട്ട് ഓഫ് ഓപ്പൺ സ്കൂൾ പോലുള്ളവ) നേരിട്ട് അപേക്ഷിക്കാൻ അർഹരല.
* എന്നാൽ തുല്യതാ സർട്ടിഫിക്കറ്റ് ലഭിച്ചവർക്ക് സ്കോൾ-കേരള മുഖാന്തിരം തുടർപഠനം സാധ്യമാകും.
* എസ്.എസ്.എൽ.സി (കേരള സിലബസ്) പഠിച്ച അപേക്ഷകർ ഓരോ പേപ്പറിനും ഡി പ്ലസ് ഗ്രേഡോ തത്തുല്യമായ സ്കോറോ വാങ്ങി ഉന്നതപഠനത്തിന് യോഗ്യത നേടിയിരിക്കണം
* മറ്റ് തത്തുല്യ പരീക്ഷകൾ വിജയിച്ചവർ അതാതു ബോർഡുകൾ നിശ്ചയിച്ച മിനിമം സ്കോർ നേടിയിരിക്കണം.
* യോഗ്യതാ പരീക്ഷ ജയിക്കുവാൻ മൂന്നിൽ കൂടുതൽ അവസരങ്ങൾ എടുത്തവർ അപേക്ഷിക്കാൻ യോഗ്യരല്ല.
* സി.ബി.എസ്.ഇ സ്ട്രീമിൽ Mathematics- Standard പാസ്സായിട്ടുള്ളവർക്ക് മാത്രമേ Mathematics ഉൾപ്പെട്ടിട്ടുള്ള വിഷയ കോമ്പിനേഷൻ ഓപ്ഷനായി തിരഞ്ഞെടുക്കാൻ സാധിക്കുകയുള്ളൂ.

🔰 വയസ്സ്

* കുറഞ്ഞ പ്രായപരിധി 2025 ജൂൺ 1 ന് 15 വയസ്സാണ് (കേരള സിലബസ് എസ്.എസ്.എൽ.സി പാസായവർക്ക് കുറഞ്ഞ പ്രായപരിധിയില്ല).
* ഉയർന്ന പ്രായപരിധി 2025 ജൂൺ 1 ന് 20 വയസ്സാണ്.
* പട്ടികജാതി, പട്ടികവർഗ്ഗ വിഭാഗങ്ങൾക്ക് ഉയർന്ന പ്രായപരിധിയിൽ 2 വർഷം വരെ ഇളവ് അനുവദിച്ചിട്ടുണ്ട്.
* കേരള സിലബസ് എസ്.എസ്.എൽ.സി പാസായവർക്ക് ഉയർന്ന പ്രായപരിധിയിൽ ആറുമാസം വരെ ഇളവ് അസിസ്റ്റൻ്റ് ഡയറക്ടർമാർക്ക് അനുവദിക്കാം.
* മറ്റ് ബോർഡുകളിൽ നിന്ന് പാസായവർക്ക് ഉയർന്ന/താഴ്ന്ന പ്രായപരിധിയിൽ 6 മാസം വരെ ഇളവ് പൊതുവിദ്യാഭ്യാസ ഡയറക്ടർക്ക് അനുവദിക്കാം.
* വിഭിന്നശേഷിയുള്ളവർക്കും കായിക താരങ്ങൾക്കും ഉയർന്ന പ്രായപരിധിയിൽ ഇളവുകൾക്ക് വ്യവസ്ഥയുണ്ട്.

🔰 സീറ്റ് സംവരണം

* മെരിറ്റ് സീറ്റുകളിൽ സാമൂഹികമായും സാമ്പത്തികമായും പിന്നാക്കം നിൽക്കുന്ന വിഭാഗങ്ങൾക്കായി നിശ്ചിത ശതമാനം സീറ്റുകൾ സംവരണം ചെയ്തിട്ടുണ്ട്.
* മത്സ്യത്തൊഴിലാളികളുടെ മക്കൾക്ക് ഫിഷറീസ് സ്കൂളുകളിൽ പ്രവേശനത്തിൽ മുൻഗണനയുണ്ട്.
* വിഭിന്നശേഷി വിഭാഗത്തിലുള്ളവർക്കായി ഓരോ ബാച്ചിലും ഒരു സീറ്റ് അധികമായി അനുവദിച്ചിട്ടുണ്ട്.
* ഭാഷാ ന്യൂനപക്ഷ വിദ്യാർത്ഥികൾക്ക് അഞ്ചു ശതമാനം സീറ്റുകൾ സംവരണം ചെയ്തിട്ടുണ്ട്.

🔰 അപേക്ഷാ സമർപ്പണം

* പ്രവേശന നടപടികൾ പൂർണ്ണമായും ഓൺലൈൻ സംവിധാനത്തിലാണ് നടത്തപ്പെടുന്നത്.
* മെറിറ്റ് സീറ്റിലേക്ക് പ്രവേശനം നേടുന്നതിന് അപേക്ഷകൻ ഓൺലൈൻ സംവിധാനത്തിലൂടെ ഒരു അപേക്ഷ മാത്രം നൽകിയാൽ മതിയാകും. ഒന്നിൽ കൂടുതൽ അപേക്ഷകൾ നൽകുവാൻ പാടുള്ളതല്ല.
* വിവിധ സ്‌കൂളുകളും കോഴ്‌സുകളും അഡ്മിഷൻ ആഗ്രഹിക്കുന്ന മുൻഗണനാക്രമത്തിൽ ഓപ്ഷൻ നൽകേണ്ടതാണ്.
* അപേക്ഷകർക്ക് സ്വന്തമായോ, ഹൈസ്കൂളുകളിലെ/VHSE സ്കൂളുകളിലെ കമ്പ്യൂട്ടർ ലാബ് സൗകര്യവും അധ്യാപകരുടെ സഹായവും പ്രയോജനപ്പെടുത്തിയോ ഓൺലൈനായി അപേക്ഷ സമർപ്പിക്കാം.
* VHSE അഡ്മിഷൻ വെബ്സൈറ്റ് വഴിയാണ് ഓൺലൈൻ അപേക്ഷ സമർപ്പിക്കേണ്ടത്.
* അപേക്ഷയോടൊപ്പം സമർപ്പിക്കേണ്ട രേഖകളുടെ വിവരങ്ങൾ പ്രോസ്പെക്ടസിൽ ലഭ്യമാണ് (ഉദാഹരണത്തിന് അപേക്ഷാ ഫോമിന്റെ പകർപ്പ്, യോഗ്യതാ സർട്ടിഫിക്കറ്റുകൾ, ട്രാൻസ്ഫർ സർട്ടിഫിക്കറ്റ്, ജാതി സർട്ടിഫിക്കറ്റ്, വരുമാന സർട്ടിഫിക്കറ്റ് തുടങ്ങിയവ).

🔰 അലോട്ട്മെൻ്റ് പ്രക്രിയ

* ആദ്യഅലോട്ട്മെൻ്റ് ലിസ്റ്റ് പ്രസിദ്ധീകരിക്കുന്നതിനു മുമ്പ് ഒരു ട്രയൽ അലോട്ട്മെൻ്റ് നടത്തുന്നതാണ്. തെറ്റുകൾ തിരുത്തുന്നതിനും ഓപ്ഷനുകളിൽ മാറ്റം വരുത്തുന്നതിനും ഈ ഘട്ടത്തിൽ അവസരം ലഭിക്കും.
* ട്രയൽ അലോട്ട്മെൻറിനു ശേഷം മൂന്ന് മുഖ്യ അലോട്ട്മെൻ്റുകൾ ഉണ്ടായിരിക്കും.
* ഓരോ അലോട്ട്മെൻ്റിൻ്റെയും വിവരങ്ങൾ അഡ്മിഷൻ വെബ്സൈറ്റിൽ ലഭ്യമാകും. അലോട്ട്മെൻ്റ് ലഭിച്ചാൽ അലോട്ട്മെൻ്റ് ലെറ്റർ പ്രിൻ്റ് എടുത്ത് ആവശ്യമായ രേഖകളുമായി സ്കൂളിൽ ഹാജരാകണം.
* ഒന്നാം ഓപ്ഷൻ ലഭിക്കുന്നവർ സ്ഥിരപ്രവേശനം നേടണം. മറ്റ് ഓപ്ഷനുകളിൽ ലഭിക്കുന്നവർക്ക് താൽക്കാലിക പ്രവേശനം നേടാം. താൽക്കാലിക പ്രവേശനം നേടിയവർക്ക് ഉയർന്ന ഓപ്ഷനുകൾ നിലനിർത്തുകയോ റദ്ദ് ചെയ്യുകയോ ചെയ്യാം
* തുടർന്നുള്ള അലോട്ട്മെൻ്റുകളിൽ മെച്ചപ്പെട്ട ഓപ്ഷൻ ലഭിച്ചാൽ പുതിയ സ്കൂളിലേക്ക് മാറേണ്ടതാണ്
* മുഖ്യ അലോട്ട്മെൻ്റുകൾക്ക് ശേഷം ഒഴിവുള്ള സീറ്റുകളിലേക്ക് സപ്ലിമെൻ്ററി അലോട്ട്മെൻ്റുകൾ നടത്തും.
* മുഖ്യ അലോട്ട്മെൻ്റുകളിൽ ഉൾപ്പെടാത്തവർ സപ്ലിമെൻ്ററി അലോട്ട്മെൻ്റുകൾക്കായി നിലവിലുള്ള അപേക്ഷ പുതുക്കണം. നേരത്തെ അപേക്ഷിക്കാതിരുന്നവർക്കും സേ (SAY) പരീക്ഷയിലൂടെ യോഗ്യരാകുന്നവർക്കും ഈ ഘട്ടത്തിൽ പുതിയതായി അപേക്ഷ നൽകാം

🔰 വെയിറ്റേജ്

* യോഗ്യതാപരീക്ഷയിൽ ലഭിച്ച ആകെ സ്കോറും വിദ്യാർത്ഥി തിരഞ്ഞെടുക്കുന്ന ഗ്രൂപ്പുമായി ബന്ധമുള്ള വിഷയങ്ങൾക്ക് ലഭിച്ച വെയിറ്റേജും അഡ്മിഷന് പരിഗണിക്കും
* വിവിധ വിഭാഗങ്ങൾക്ക് ബോണസ് പോയിൻ്റുകൾക്ക് അർഹതയുണ്ട് (ഉദാഹരണത്തിന് ജവാൻമാരുടെ മക്കൾ, എൻ.സി.സി, സ്കൗട്ട് & ഗൈഡ്, ലിറ്റിൽ കൈറ്റ്സ് അംഗങ്ങൾ, ഒരേ തദ്ദേശ സ്ഥാപനത്തിലുള്ളവർ, SSLC/THSLC പഠനം നടത്തിയ അതേ സ്കൂളിൽ അപേക്ഷിക്കുന്നവർ). ഒരു അപേക്ഷകന് ലഭിക്കുന്ന പരമാവധി ബോണസ് പോയിൻ്റ് 10 ആണ്. ഗ്രേസ് മാർക്ക് ലഭിച്ചവർക്ക് ചില ബോണസ് പോയിൻ്റുകൾക്ക് അർഹതയുണ്ടായിരിക്കില്ല.
* ആദ്യതവണ യോഗ്യതാ പരീക്ഷ പാസാകാത്തവർക്ക് മൈനസ് പോയിൻ്റ് ബാധകമായിരിക്കും (ചാൻസ് ഒന്നിന് ഒരു പോയിൻ്റ് കുറയ്ക്കും).
* SAY പരീക്ഷ എഴുതി വിജയിച്ചവർക്ക് ഇത് ബാധകമല്ല
* ഒന്നിലേറെ അപേക്ഷകർക്ക് തുല്യപോയിൻ്റ് വന്നാൽ ടൈ ബ്രേക്ക് ചെയ്യുന്നതിനായി വിവിധ മാനദണ്ഡങ്ങൾ പരിഗണിക്കും (ഉദാഹരണത്തിന് വെയിറ്റേജിന് കണക്കിലെടുത്ത വിഷയങ്ങളിലെ TGP, ഇംഗ്ലീഷിലെ ഗ്രേഡ്, ഒന്നാം ഭാഷയിലെ ഗ്രേഡ്, പ്രാദേശിക പശ്ചാത്തലം, കലാകായിക മത്സരങ്ങളിലെ മികവ്)

🔰 ഫീസ് ഘടന

* ഒന്നാം വർഷത്തേക്കും രണ്ടാം വർഷത്തേക്കുമുള്ള ഫീസ് ഘടന പ്രോസ്പെക്ടസിൽ വിശദീകരിച്ചിട്ടുണ്ട്
* പട്ടികജാതി/പട്ടികവർഗ്ഗ വിഭാഗങ്ങൾ, കുമാരപിള്ള കമ്മീഷൻ റിപ്പോർട്ടിൻ്റെ പരിധിയിൽ വരുന്നവർ, ഫിഷർമെൻ വിഭാഗത്തിൽ പ്രവേശനം നേടുന്നവർ എന്നിവർക്ക് ഫീസിളവിന് അർഹതയുണ്ട്
* PTA ഫണ്ട്, സ്കൂൾ വികസന ഫണ്ട് തുടങ്ങിയവ സംബന്ധിച്ചും പ്രോസ്പെക്ടസിൽ വ്യക്തമായ നിർദ്ദേശങ്ങൾ നൽകിയിട്ടുണ്ട്

🔰മറ്റ് പ്രധാന വിവരങ്ങൾ

* ഓരോ സ്കൂളിലും ഹെൽപ് ഡെസ്ക്കുകൾ പ്രവർത്തിക്കും.
* സ്പെഷ്യൽ സ്കൂളുകളിലെ (ഡഫ് സ്കൂളുകൾ) പ്രവേശനവും ഏകജാലക സംവിധാനം വഴിയാണ്
* വിഭിന്നശേഷി വിഭാഗത്തിലെ കുട്ടികളുടെ പ്രവേശനത്തിന് പ്രത്യേക മാനദണ്ഡങ്ങളുണ്ട്
* എയ്ഡഡ് സ്കൂളുകളിലെ മാനേജ്മെൻ്റ് സീറ്റുകളിലേക്ക് അതത് മാനേജ്മെൻ്റുകളാണ് പ്രവേശനം നടത്തുന്നത്
* ഓൺ ദ ജോബ് ട്രെയിനിംഗ്, സ്കിൽ എക്സ്പോ, നാഷണൽ സർവ്വീസ് സ്കീം, കരിയർ ഗൈഡൻസ് ആൻ്റ് കൗൺസിലിംഗ് സെൽ തുടങ്ങിയ പാഠ്യപദ്ധതിയുമായി ബന്ധപ്പെട്ട പ്രവർത്തനങ്ങളും VHSEയിൽ ഉണ്ട്
* പൊതുപരീക്ഷ കണ്ടിന്യുവസ് ഇവാലുവേഷൻ ആൻ്റ് ഗ്രേഡിംഗ് സ്കീമിലാണ് നടത്തപ്പെടുന്നത്
* പരീക്ഷാ രജിസ്ട്രേഷന് കുറഞ്ഞത് 80% ഹാജർ ആവശ്യമാണ്
* അഡ്മിഷനുമായി ബന്ധപ്പെട്ട തർക്കങ്ങൾ ബഹുമാനപ്പെട്ട കേരള ഹൈക്കോടതിയുടെ അധികാരപരിധിയിലായിരിക്കും
* പ്രോസ്പെക്ടസിൽ ഉൾപ്പെടാത്ത വിഷയങ്ങളിൽ പൊതുവിദ്യാഭ്യാസ ഡയറക്ടറുടെ തീരുമാനം അന്തിമമായിരിക്കും.

കൂടുതൽ വിശദാംശങ്ങൾക്കും കൃത്യമായ സമയക്രമത്തിനും അഡ്മിഷൻ വെബ്സൈറ്റ് (https://admission.vhseportal.kerala.gov.in/adm/) സന്ദർശിക്കുകയോ അതത് സ്കൂളുകളിലെ ഹെൽപ് ഡെസ്കുകളുമായി ബന്ധപ്പെടുകയോ ചെയ്യാവുന്നതാണ്.