18/12/2025
ഇന്ന് കുറച്ചു സമയം മുന്നേ ഞാനും സഹപ്രവർത്തകനായ പി കെ ബിനുസാറും കൂടി സമഗ്ര ശിക്ഷാ കേരളയുടെ പ്രോജക്ടിലുൾപ്പെടുന്ന, പ്രധാനമന്ത്രിയുമായുള്ള *പരീക്ഷാ പേ ചർച്ച* എന്ന വലിയ പ്രോഗ്രാമിൻ്റെ ചില വിവരങ്ങൾ സംസാരിക്കുവാൻ പത്തനംതിട്ട കോഴഞ്ചേരി ഇലന്തൂർ ഗവ. വൊക്കേഷണൽ ഹയർ സെക്കൻഡറി സ്കൂളിൽ പോയി.
പോയ കാര്യമെല്ലാം കഴിഞ്ഞ് ഇറങ്ങി വരുമ്പോൾ സ്റ്റെയർകേയ്സിൻ്റെ ഗ്രില്ലിൽ ഒരു വസ്തു സ്ഥാപിച്ചിരിക്കുന്നു. ചെറിയ ബോട്ടിൽ ബൂത്താകുമെന്നാണാദ്യം കരുതിയത്. പക്ഷേ പിന്നീട് ഞങ്ങൾ അടുത്തു ചെന്നു നോക്കിയപ്പോൾ സംഭവം വേറൊന്നുമല്ല *പെൻ ബിൻ*😍
സ്കൂളാണ്...... നൂറു കണക്കിന് കുഞ്ഞുങ്ങൾ യഥേഷ്ടം പേന ഉപയോഗിക്കുന്നുണ്ട്. ഞങ്ങളുടെയൊക്കെ പഠനകാലത്ത് ബോൾ പേനയോ, ഫൗണ്ടൻ പേനയോ ഏതുമാകട്ടേ..... മഷി തീർന്നാൽ റീഫിൽ ചെയ്തുപയോഗിക്കും. ഇന്ന് അങ്ങനെയൊരു സമ്പ്രദായം പൊതുവേ കാണപ്പെടുന്നില്ല. മഷി തീർന്ന പ്ലാസ്റ്റിക് പേനകളാലലംകൃതമാണ് സ്കൂളങ്കണം !
ഇതിനൊരറുതി വരുത്തുവാൻ ഏതോ ഒരു ജീനിയസിൻ്റെ തലയിൽ വിരിഞ്ഞ ബുദ്ധിയാണ് ആ ഗ്രില്ലിൽ അങ്ങനെ പറ്റിപ്പിടിച്ചിരിക്കുന്നത്. അതിശയം തോന്നി😊 മനുഷ്യഭാവനയിലെന്തല്ലാം നൂതനാശയങ്ങൾ വിരിയുന്നു❤️
അഖിലേഷ് നന്ദകുമാർ
BRC കോഴഞ്ചേരി
