অসমীয়া বিভাগ : তেজপুৰ বিশ্ববিদ্যালয় ৷ Dept. of Assamese : Tezpur University

বিশেষ ঘোষণাঃ

নামভৰ্তিৰ আবেদনৰ তাৰিখ ১০ মে’, ২০২৬ লৈ বৃদ্ধি কৰা হৈছে।
প্ৰৱেশ পৰীক্ষাৰ তাৰিখঃ ৫,৬ আৰু ৭ জুন, ২০২৬

তেজপুৰ বিশ্ববিদ্যালয়ৰ অসমীয়া বিভাগৰ স্নাতকোত্তৰ পাঠ্যক্ৰমৰ “অসমীয়া সংস্কৃতি” কাকতৰ অংশ হিচাপে চলিত ষাণ্মাসিকৰ ক্ষেত্ৰ-অধ্যয়ন আজি কাৰ্বি-আংলং জিলাৰ ডিফুত সম্পন্ন হয়৷ ক্ষেত্ৰ অধ্যয়নৰ অংশ হিচাপে অসম বিশ্ববিদ্যালয় ডিফু চৌহদৰ অসমীয়া বিভাগৰ সৈতে যৌথ উদ্যোগত “অসমৰ নৃগোষ্ঠীয় সংস্কৃতি” শীৰ্ষক এখন মনোজ্ঞ আলোচনা-সত্ৰৰ আয়োজন কৰা হয়৷ এই সত্ৰৰ উদ্বোধন কৰে অসম বিশ্ববিদ্যালয় ডিফু চৌহদৰ সম-উপাচাৰ্য অধ্যাপক শিৱাশীষ বিশ্বাসে৷ আলোচনা-সত্ৰৰ সভাপতিত্ব কৰে অসম বিশ্ববিদ্যালয় ডিফু চৌহদৰ অসমীয়া বিভাগৰ মুৰব্বী অধ্যাপক কুসুম্বৰ বৰুৱাই৷ এই অনুষ্ঠানৰ সমল ব্যক্তি হিচাপে অংশগ্ৰহণ কৰে কাৰ্বি ভাষা আৰু সংস্কৃতিৰ আন্তৰাষ্ট্ৰীয় খ্যাতিসম্পন্ন বিশিষ্ট গৱেষক, অনুবাদক, ভাষাবিদ চিকাৰী টিচু আৰু অসম বিশ্ববিদ্যালয় ডিফু চৌহদৰ জীৱবিজ্ঞান আৰু জৈৱ তথ্য প্রযুক্তি বিভাগৰ সহকাৰী অধ্যাপক, Ethnobotany আৰু পৰম্পৰাগত চিকিৎসা-পদ্ধতিৰ বিশিষ্ট গৱেষক ড° ৰবীন্দ্র টেৰণে৷ গৱেষক চিকাৰী টিচুৱে সচৰাচৰ পৰিলক্ষিত হোৱা মহাপুৰুষীয়া, খ্ৰীষ্টিয়ান, বৌদ্ধ অথবা আন ধৰ্মীয় দৃষ্টিভংগীৰে জনগোষ্ঠীয় লোকসংস্কৃতি অধ্যয়নৰ সীমাবদ্ধতাৰ প্ৰসংগ তুলি ধৰি এইক্ষেত্ৰত এক নিৰপেক্ষ দৃষ্টিকোণৰ প্ৰয়োজনীয়তাৰ কথা উত্থাপন কৰে৷ তেখেতে সামগ্ৰিকভাৱে কাৰ্বি লোকসংস্কৃতি বিষয়ক এক তথ্যসমৃদ্ধ বক্তব্য প্ৰদান কৰে৷ আন গৰাকী সমলব্যক্তি ড°ৰবীন্দ্ৰ টেৰণে কাৰ্বি লোক-ঔষধ আৰু লোক-চিকিৎসা সন্দৰ্ভত বক্তব্য ৰাখে৷ তেখেতে হেৰাই যাব খোজা লোকসংস্কৃতিৰ সমলসমূহৰ অধ্যয়ন-গৱেষণাৰ বাবে শিক্ষাৰ্থীসকলক উৎসাহিত কৰাৰ লগতে অধ্যয়নৰ সম্ভাৱনাৰ কেতবোৰ নতুন দিশ উন্মোচিত কৰে ৷ অসম বিশ্ববিদ্যালয়ৰ বিদ্যায়তনিক পৰিক্ৰমাৰ ডীন নৰেন্দ্ৰ সিং, তেজপুৰ বিশ্ববিদ্যালয়ৰ অসমীয়া বিভাগৰ মুৰব্বী ড°জুৰি দত্ত, সহযোগী অধ্যাপক ড°সুব্ৰতজ্যোতি নেওগেও বিষয় সন্দৰ্ভত নিজা মন্তব্য প্ৰদান কৰে৷ ক্ষেত্ৰ-অধ্যয়ন কাৰ্যসূচীৰ সমন্বয়ক ড°জ্যোতিষ্মান দাসে অসম বিশ্ববিদ্যালয়ৰ অসমীয়া বিভাগৰ এই সহযোগিতাৰ বাবে আনুষ্ঠানিকভাৱে কৃতজ্ঞতা জ্ঞাপন কৰে৷ আলোচনা-সত্ৰৰ পিছতে অসম বিশ্ববিদ্যালয়ৰ ডিফু চৌহদৰ শিক্ষাৰ্থীসকলে কাৰ্বি লোকগীত আৰু নৃত্যৰে এক বৰ্ণাঢ্য সাংস্কৃতিক কাৰ্যসূচী ৰূপায়ন কৰে৷ এই অনুষ্ঠানত অসম বিশ্ববিদ্যালয়ৰ অসমীয়া বিভাগৰ সহকাৰী অধ্যাপক তথা স্থানীয় সমন্বয়ক ড° সত্যজিৎ দাস, সহকাৰী অধ্যাপক ড° হীৰামন্না দাস, ড° প্ৰভাত ভূঞাৰ লগতে আন বিভাগৰো কেইবাগৰাকী অধ্যাপক-অধ্যাপিকাই অংশগ্ৰহণ কৰে৷ এই ক্ষেত্ৰ-অধ্যয়নত বিভাগৰ স্নাতকোত্তৰ দ্বিতীয় ষাণ্মাসিকৰ শিক্ষাৰ্থীসকলৰ লগতে কেইবাগৰাকী গৱেষক-শিক্ষাৰ্থীয়ে অংশগ্ৰহণ কৰে৷ আলোচনা-চক্ৰৰ পিছতে দলটিয়ে টাৰালাংচু স্থিত নথেংপী সংগ্ৰহালয় পৰিদৰ্শন কৰি কাৰ্বি লোক-সংস্কৃতিৰ সমল সংগ্ৰহ কৰে৷ তেজপুৰ বিশ্ববিদ্যালয়ৰ অসমীয়া বিভাগে প্ৰতি বছৰে এনে বিদ্যায়তিক ক্ষেত্ৰ-অধ্যয়নৰ আয়োজন কৰি আহিছে৷

নামভৰ্তি আবেদনৰ শেষ তাৰিখঃ ৩০ এপ্ৰিল, ২৬
প্ৰৱেশ পৰীক্ষাৰ তাৰিখঃ ৫,৬ আৰু ৭ জুন, ২৬

অধ্যাপক জ্যোতিপ্ৰকাশ তামুলী দেৱে কালি তেজপুৰ বিশ্ববিদ্যালয়ৰ অসমীয়া বিভাগত এবছৰৰ বাবে “Distinguished Visiting Faculty" হিচাপে যোগদান কৰে৷ বিশিষ্ট ভাষাবিদ-শিক্ষাবিদগৰাকীক অসমীয়া বিভাগলৈ আনুষ্ঠানিকভাৱে আদৰণি জনাই কালি এক অন্তৰংগ-অনুষ্ঠানৰো আয়োজন কৰা হয়৷

তেজপুৰ বিশ্ববিদ্যালয়ৰ আগন্তুক ষাণ্মাসিকৰ(Autumn 2026) স্নাতকোত্তৰ শ্ৰেণী আৰু পিএইচ.ডি. পাঠ্যক্ৰমৰ নামভৰ্তিৰ আবেদন প্ৰক্ৰিয়া ইতিমধ্যে আৰম্ভ হৈছে৷

আবেদনৰ অন্তিম তাৰিখঃ ৩০ এপ্ৰিল, ২০২৬

তেজপুৰ বিশ্ববিদ্যালয়ৰ অসমীয়া বিভাগে স্নাতকোত্তৰ দ্বিতীয় ষাণ্মাসিকৰ শিক্ষাৰ্থীসকলৰ বাবে আয়োজন কৰা 'থিয়েটাৰ কৰ্মশালা'ৰ অন্তিম দিনৰ সৈতে সংগতি ৰাখি শিক্ষাৰ্থীসকলে সত্যপ্ৰসাদ বৰুৱাৰ দ্বাৰা অনূদিত আৰু জ্যোতি নাৰায়ণ নাথৰ দ্বাৰা পৰিচালিত চফ'ক্লিছৰ 'এণ্টিগনি' নাটকৰ নিৰ্বাচিত দৃশ্যৰ মঞ্চায়ন কৰাৰ লগতে, এই কৰ্মশালাৰ সমল ব্যক্তি বিশিষ্ট পৰিচালক জ্যোতি নাৰায়ণ নাথৰ সৈতে এক 'অন্তৰংগ আলাপ' অনুষ্ঠান আজি অনুষ্ঠিত হয় । পাঠ্যক্ৰম-শিক্ষক ড° সুব্ৰত জ্যোতি নেওগৰ তত্ত্বাৱধানত 'অসমীয়া নাটক' শীৰ্ষক কাকতৰ অংশ হিচাপে এই কৰ্মশালাখনি বিগত বৰ্ষবোৰতো অনুষ্ঠিত হৈ আহিছে। ইয়াৰ পূৰ্বে ৰবিজিতা গগৈ, গুণাকৰ দেৱ গোস্বামী আদি বিশিষ্ট নাট্য পৰিচালকে এই কৰ্মশালাত সমল ব্যক্তি হিচাপে অংশগ্ৰহণ কৰিছিল। "এন্টিগনি" নামৰ নাটকখন পৰিৱেশনৰ প্ৰাক্‌মুহূৰ্তত বিভাগীয় প্ৰধান ড° জুৰি দত্তই শুভেচ্ছামূলক বাৰ্তা প্ৰদান কৰাৰ লগতে পৰিচালক জ্যোতি নাৰায়ণ নাথে মঞ্চায়ন হ'ব লগা নাটখনৰ বিষয়ে দুআষাৰ মন্তব্য আগবঢ়ায়। নাটক পৰিৱেশনৰ পিছমুহূৰ্ততে বিভাগৰ গৱেষক শিক্ষাৰ্থী ভাস্কৰ জ্যোতি বৰাই আঁত ধৰা পৰিচালক জ্যোতি নাৰায়ণ নাথৰ সৈতে অন্তৰংগ আলাপ অনুষ্ঠানটি উপস্থিত সকলোলৈকে মুকলি কৰি দিয়া হয়। উপস্থিত দৰ্শক-শ্ৰোতাৰ প্ৰশ্নৰ উত্তৰত নাথে নাট্য চৰ্চাৰ সময়ছোৱাত লাভ কৰা প্ৰসিদ্ধ পৰিচালকসকলৰ সান্নিধ্যৰ বৰ্ণনাৰ লগতে নতুন প্ৰজন্মৰ নাটক সম্পৰ্কীয় দৃষ্টিভংগী, অভিনয় কৌশল আৰু সমসাময়িক প্ৰেক্ষাপটত নাটকক পেচা হিচাপে গ্ৰহণ কৰাৰ ক্ষেত্ৰত সৃষ্টি হোৱা প্ৰত্যাহ্বান আদি ভালেমান দিশত আলোকপাত কৰে । তেজপুৰ বিশ্ববিদ্যালয়ৰ অসমীয়া বিভাগৰ শিক্ষক-শিক্ষাৰ্থীসকলৰ লগতে বিশ্ববিদ্যালয়ৰ বিভিন্ন বিভাগৰ অধ্যাপক-অধ্যাপিকা আৰু ছাত্ৰ-ছাত্ৰীয়ে এই নাট্যানুষ্ঠান উপভোগ কৰাৰ লগতে অন্তৰংগ আলাপ অনুষ্ঠানত অংশ লয় । অনুষ্ঠানটোৰ আঁত ধৰে বিভাগৰ গৱেষক-শিক্ষাৰ্থী মায়াশ্ৰী বড়াই।

Tezpur University

কালি ১০ মাৰ্চ, ২০২৬ তাৰিখে তেজপুৰ বিশ্ববিদ্যালয়ৰ অসমীয়া বিভাগৰ দ্বাৰা স্নাতকোত্তৰ দ্বিতীয় ষাণ্মাসিকৰ শিক্ষাৰ্থীসকলৰ বাবে আয়োজন কৰা ‘থিয়েটাৰ কৰ্মশালা'ৰ আৰম্ভণী অনুষ্ঠানত সমল ব্যক্তি হিচাপে উপস্থিত থাকে বিশিষ্ট নাট্য পৰিচালক তথা সুদক্ষ অভিনেতা জ্যোতি নাৰায়ণ নাথ৷ আবেলি ৩.০০ বজাৰ পৰা আৰম্ভ হোৱা ‘থিয়েটাৰ কৰ্মশালা' আৰম্ভণী অনুষ্ঠানৰ আদৰণি ভাষণ প্ৰদান কৰে বিভাগীয় প্ৰধান ড° জুৰি দত্তই। বিশেষ বক্তৃতানুষ্ঠানত নাট্য পৰিচালক জ্যোতি নাৰায়ণ নাথে ‘‘A Director's Journey : Twenty Year of Theatre Making" শীৰ্ষক এক সাৰগৰ্ভ বক্তব্য প্ৰদান কৰে। বক্তৃতাত তেখেতে নাটকৰ সাহিত্য-পাঠ এটাৰ পৰা পৰিৱেশন শৈলীলৈকে আৰু নাটকৰ বিষয়বস্তুৰ পৰা আংগিকৰ নতুন সম্পৰীক্ষালৈকে বিভিন্ন দিশ সামৰি লয়। লগতে তেখেতে নাটক এখনৰ সফল মঞ্চ ৰূপায়ণৰ ক্ষেত্ৰত নাটকৰ গাঁথনিক দিশৰ গুৰুত্ব আৰু প্ৰাসংগিকতা সন্দৰ্ভত এক চিন্তা উদ্ৰেককাৰী আলোচনা আগবঢ়ায়।

‘থিয়েটাৰ কৰ্মশালা'ৰ আৰম্ভণী অনুষ্ঠানৰ পিছতেই অসমীয়া বিভাগৰ দ্বাৰা আয়োজন কৰা বিশেষ ‘অন্তৰংগ আলাপ’ অনুষ্ঠানত সমল ব্যক্তি হিচাপে উপস্থিত থাকে আন্তঃৰাষ্ট্ৰীয় খ্যাতিসম্পন্ন চলচ্চিত্ৰ নিৰ্মাতা ৰীমা দাস। অন্তৰংগ আলাপত তেখেতে নিজৰ জীৱন সংগ্ৰামৰ পৰা জীৱনক উদ্‌যাপন কৰালৈকে, কেমেৰাৰ পৰা চলচ্চিত্ৰ নিৰ্মাণ কৰালৈকে তেখেতৰ চলচ্চিত্ৰ নিৰ্মাণ-যাত্ৰাৰ অভিজ্ঞতা প্ৰকাশ কৰে। লগতে তেখেতে তেখেতৰ চিনেমাত মানুহ আৰু প্ৰকৃতিৰ মাজৰ সহাৱস্থানৰ কথাও উল্লেখ কৰে। লগতে এই অনুষ্ঠানত উপস্থিত থাকে ‘ভিলেজ ৰকষ্টাৰ্ছ'ৰ মূল ‘ধুনু' চৰিত্ৰত অভিনয় কৰা অভিনেত্ৰী ভনিতা দাস । তেজপুৰ বিশ্ববিদ্যালয়ৰ অসমীয়া বিভাগৰ শিক্ষক-শিক্ষাৰ্থীসকলৰ লগতে বিশ্ববিদ্যালয়ৰ বিভিন্ন বিভাগৰ অধ্যাপক-অধ্যাপিকা আৰু ছাত্ৰ-ছাত্ৰীয়ে অংশগ্ৰহণ কৰা অনুষ্ঠান দুটাৰ আঁত ধৰে বিভাগৰ গৱেষক-শিক্ষাৰ্থী মায়াশ্ৰী বড়াই।

________________________________________________

On 10 March 2026, the Department of Assamese, Tezpur University organised a Theatre Workshop for Postgraduate Second Semester students, with eminent theatre director and actor Jyoti Narayan Nath as the resource person. The programme began at 3:00 PM with a welcome address by the Head of the Department, Dr. Juri Dutta.

In his lecture titled “A Director’s Journey: Twenty Years of Theatre Making,” Jyoti Narayan Nath spoke about his theatre journey, highlighting the process from reading a play to its stage performance and the importance of structural elements in successful staging.

Following the session, an interactive conversation was held with internationally acclaimed filmmaker Rima Das, where she shared experiences from her filmmaking journey and spoke about the theme of human–nature coexistence in her films. Actress Bhanita Das, known for her role as Dhunu in Village Rockstars, was also present.

The programmes were attended by teachers and students from various departments of Tezpur University and were anchored by research scholar Mayashree Bora.


Tezpur University

゚viralシfypシ゚viralシalシ

আন্তৰ্জাতিক মাতৃভাষা দিৱস উপলক্ষে তেজপুৰ বিশ্ববিদ‍্যালয়ৰ অসমীয়া বিভাগৰ উদ‍্যোগত আয়োজিত দুদিনীয়া কাৰ্যসূচীৰ দ্বিতীয় দিনা অনুষ্ঠিত বহুভাষিক অনলাইন কবি সন্মিলনখনৰ সঞ্চালনা কৰে বিভাগৰ অধ্যাপক বিনীতা বৰা দেৱচৌধুৰীয়ে। সন্মিলনত উপস্থিত থাকি কবিতা পাঠ কৰে ৰাভা ভাষাৰ কবি বিৰিঞ্চি ৰাভা, মিচিং ভাষাৰ কবি জীতেন নৰহ, হিন্দী ভাষাৰ কবি কুমাৰ সৌৰভ, ডিমাছা ভাষাৰ কবি সুৰঞ্জিতা হাঞ্ছু, খামতি ভাষাৰ কবি টানছেং কাংখেও, অসমীয়া ভাষাৰ কবি সমীৰ শংকৰ দত্ত, দেৱৰাজ মিলি, দ্বীপৰাজ, মিণ্টুল হাজৰিকায়ে। বিবিধ বিষয়ক সামৰি লোৱা প্ৰতিজন সন্মানীয় কবিৰ কবিতাত মাটিৰ গোন্ধ, প্ৰেম, ভাষিক জাতীয়তাবাদ, সমাজ বাস্তৱতা, অস্তিত্বৰ যুঁজ আদি প্ৰকাশিত হৈছে। অনুষ্ঠানৰ শেষত বিভাগীয় প্ৰধান ড° জুৰি দত্তই এনে অনুষ্ঠানৰ গুৰুত্ব প্ৰকাশ কৰি পুনৰ এনে অনুষ্ঠান আয়োজনৰ পোষকতা কৰে। শেষত শলাগৰ শৰাই আগবঢ়োৱাৰ লগতে এটি কবিতা পাঠ কৰে বিভাগৰ গৱেষক ছাত্ৰ তথা কবি কিৰণ দাসে। তেজপুৰ বিশ্ববিদ্যালয়ৰ অসমীয়া বিভাগৰ শিক্ষক-শিক্ষাৰ্থীসকলৰ লগতে অসমৰ বিভিন্ন শিক্ষানুষ্ঠানৰ কেইবাগৰাকী শিক্ষাৰ্থীয়ে অনুষ্ঠানটিত অংশগ্ৰহণ কৰে৷ অনুষ্ঠানটিৰ আঁত ধৰে দক্ষিণ কামৰূপ ছোৱালী মহাবিদ্যালয়ৰ অসমীয়া বিভাগৰ সহকাৰী অধ্যাপক, বিভাগৰ গৱেষক-ছাত্ৰ তথা অনুষ্ঠান-সমন্বয়ক কিৰণ দাসে।

তেজপুৰ বিশ্ববিদ‍্যালয়ৰ অসমীয়া বিভাগৰ উদ‍্যোগত দুদিনীয়া কাৰ্যসূচীৰে আয়োজিত আন্তৰ্জাতিক মাতৃভাষা দিৱস(২১ ফেব্ৰুৱাৰী)ৰ প্ৰথম দিন(২০ ফেব্ৰুৱাৰী)ৰ কাৰ্যসূচী “বিশেষ বক্তৃতানুষ্ঠান”ত আমন্ত্ৰিত বক্তা হিচাপে উপস্থিত থাকে ডিব্ৰুগড় বিশ্ববিদ্যালয়ৰ অসমীয়া বিভাগৰ লক্ষ্মীনাথ বেজবৰুৱা আসনৰ অধ্যাপক ড° নীৰাজনা মহন্ত বেজবৰা। বিভাগীয় শিক্ষাৰ্থীসকলে পৰিৱেশন কৰা সমবেত সংগীতেৰে আৰম্ভ হোৱা সভাখনৰ আদৰণী ভাষণ প্ৰদান কৰে বিভাগীয় প্ৰধান ড° জুৰি দত্তই। অনুষ্ঠানৰ প্ৰাক্‌মুহূৰ্তত আমন্ত্ৰিত বক্তা মহোদয়াই বিভাগৰ প্ৰাচীৰ পত্ৰিকা 'উন্মীলন' উন্মোচন কৰে৷ তেজপুৰ বিশ্ববিদ্যালয়ৰ মানৱিকীবিদ্যা আৰু সমাজবিজ্ঞান বিদ্যাপীঠৰ ডীন অধ্যাপক চন্দন কুমাৰ শৰ্মাই সভাপতিত্ব কৰা সভাৰ উদ্বোধনী ভাষণ প্ৰদান কৰে তেজপুৰ বিশ্ববিদ্যালয়ৰ সংগনক বিজ্ঞান আৰু অভিযান্ত্ৰিক বিভাগৰ অধ্যাপক ধ্ৰুৱকুমাৰ ভট্টাচাৰ্যই। এই সভাতে সাহিত্য অকাডেমীৰ দ্বাৰা প্ৰকাশিত ড° জুৰি দত্তৰ 'মাটিৰ গান : উত্তৰ-পূব ভাৰতৰ চুটিগল্প' - শীৰ্ষক অনূদিত গ্ৰন্থখন উন্মোচিত হয়। আমন্ত্ৰিত অতিথিৰ পৰিচয়মূলক বক্তব্য আগবঢ়াই সহকাৰী অধ্যাপক ড° জোতিষ্মান দাসে। বক্তৃতানুষ্ঠানত অধ্যাপক নীৰাজনা মহন্ত বেজবৰাই 'মাতৃভাষা আৰু ভাষা মনোভংগী'- শীৰ্ষক এক সাৰগৰ্ভ বক্তৃতা প্ৰদান কৰে। তেখেতে - ২০২৬ চনৰ আন্তৰ্জাতিক মাতৃভাষা দিৱসৰ মূল বিষয়(theme) - "ভাষা অনেক, ভৱিষ্যত এক : ভাষিক বৈচিত্ৰ্যত যুৱকণ্ঠ" - এই প্ৰসংগৰ আঁত ধৰি ভাষা, প্ৰযুক্তি, যুৱপ্ৰজন্ম আৰু ভাষিক বহনক্ষমতা সন্দৰ্ভত তথ্যপূৰ্ণ আৰু সৰস ব্যাখ্যাৰে এক চিন্তা উদ্ৰেককাৰী বক্তব্য প্ৰদান কৰে। অনুষ্ঠানটিত শলাগৰ শৰাই আগবঢ়ায় বিভাগৰ সহযোগী অধ্যাপক ড° সুব্ৰতজ্যোতি নেওগে। তেজপুৰ বিশ্ববিদ্যালয়ৰ অসমীয়া বিভাগৰ শিক্ষক-শিক্ষাৰ্থীসকলৰ লগতে বিশ্ববিদ্যালয়ৰ বিভিন্ন বিভাগৰ কেইবাগৰাকী অধ্যাপক-অধ্যাপিকা, অনা-শিক্ষক কৰ্মচাৰীয়ে এই অনুষ্ঠানত অংশগ্ৰহণ কৰে৷ অনুষ্ঠানটিৰ আঁত ধৰে গৱেষক-শিক্ষাৰ্থী শিল্পী ভূঞাই।

তেজপুৰ বিশ্ববিদ্যালয়ৰ অসমীয়া বিভাগৰ উদ্যোগত অহা ইংৰাজী ২০ আৰু ২১ ফেব্ৰুৱাৰী, ২০২৬ তাৰিখে দুদিনীয়া কাৰ্যসূচীৰে আন্তৰ্জাতিক মাতৃভাষা দিৱস উদ্‌যাপন কৰা হ’ব । প্ৰথম দিনাৰ কাৰ্যসূচী হিচাপে পুৱা ৯.৩০ বজাত বিশ্ববিদ্যালয়ৰ কাউন্সিল হলত ‘মাতৃভাষা আৰু ভাষা মনোভংগী' বিষয়ক এটি বক্তৃতা প্ৰদান কৰিব ডিব্ৰুগড় বিশ্ববিদ্যালয়ৰ অসমীয়া বিভাগৰ অধ্যাপক ড° নীৰাজনা মহন্ত বেজবৰাই । দ্বিতীয় দিনাৰ কাৰ্যসূচী হিচাপে দিনৰ ১১ বজাত গুগল মিট যোগে অনুষ্ঠিত হ’ব বহুভাষিক কবি সন্মিলন । উক্ত অনুষ্ঠানত সমূহ ছাত্ৰ-ছাত্ৰী, গৱেষক তথা অধ্যাপক আৰু শুভাকাংক্ষীৰ উপস্থিতি শ্ৰদ্ধাৰে কামনা কৰা হ’ল ।

তেজপুৰ বিশ্ববিদ্যালয়ৰ অসমীয়া বিভাগৰ উদ্যোগত এইবেলিও আয়োজন কৰা হৈছে বিভাগৰ স্নাতকোত্তৰ দ্বিতীয় ষাণ্মাসিকৰ শিক্ষাৰ্থীসকলৰ বাবে ‘থিয়েটাৰ কৰ্মশালা’ । কৰ্মশালাখনিত সমল ব্যক্তি হিচাপে অংশগ্ৰহণ কৰিব গুৱাহাটীৰ বিশিষ্ট নাট্য পৰিচালক জ্যোতি নাৰায়ণ নাথদেৱে ।

We are pleased to announce that the Assamese Department, Tezpur University, will be organizing a Theatre Workshop for Post Graduate 2nd Semester students from 10 March to 14 March 2026.

The workshop will be conducted under the guidance of eminent theatre director Jyoti Narayan Nath.