30/12/2022
Educational Trip - RTO Office, Solapur
8th CBSE, 8th Semi ( 29.12.22 )
*शालेय विद्यार्थ्यांनी गिरवले रस्ता सुरक्षेचे धडे*
_सुयश गुरुकुलची सोलापूर उपप्रादेशिक परिवहन कार्यालयाला भेट_
अपघात कमी करण्यासाठी शालेय जीवनातच विद्यार्थ्यांना रस्ते सुरक्षेचे धडे सोलापूरच्या उपप्रादेशिक परिवहन कार्यालयाकडून दिले जात आहेत.
‘सुरक्षा कवच’ या संकल्पनेअंतर्गत सुयश गुरुकुल शाळेच्या विद्यार्थ्यांनी रस्ता सुरक्षेचे धडे गिरवले. मनोरंजनात्मक खेळातून वाहतूक नियमांची शिकवण देणारा 'सुरक्षा कवच' उपक्रम नुकताच सोलापूर आरटीओ मध्ये सुरू करण्यात आला आहे.
एरवी शाळेच्या मैदानात बागडणारी पावले आज आरटीओच्या ट्रॅक वरती आली. वर्गातली चाचणी परीक्षा माहिती होती परंतु वाहन चालवण्यासाठी घेण्यात येणारी चाचणी आज पहिल्यांदा विद्यार्थ्यांनी अनुभवली. हेल्मेट घालून दुचाकीवर तर सीट बेल्ट घालून चारचाकी मध्ये बसतानाचा 'सेल्फी पॉईंट' वरती फोटो घेण्याचा मोह विद्यार्थ्यांना आवरला नाही. यातून रस्ते सुरक्षेचा संदेश त्यांनी आपल्या मोबाईल मध्ये टिपला. सुरक्षा कवच मध्ये आल्यानंतर वाहतुकीच्या नियमांची सापशिडी खेळताना नियम तोडला की साप गिळणार व नियम पाळला की शिडीवर चढणार असा खेळ अनेकवेळ रंगला. रस्ता सुरक्षेचे नियम वाचल्यानंतर उचललेल्या चिट्ठीतून कोणते गिफ्ट मिळणार याची उत्सुकता मुलांमध्ये होती. आपत्कालीन वाहनांना रस्ता कशाप्रकारे मोकळा करून दिला पाहिजे याचे प्रत्यक्ष प्रात्यक्षिक पाहिले. रस्ता सुरक्षेचे धडे गिरवल्यानंतर त्यातून मिळलेला संदेश विद्यार्थ्यांनी ओथ वॉल वरती लावला.
विद्यार्थ्यांशी संवाद साधताना उपप्रादेशिक परिवहन अधिकारी अर्चना गायकवाड यांनी रस्ता सुरक्षेचे नियम हे संस्कारांमध्ये, वर्तणुकीमध्ये उतरावयाचे आहेत, त्यासाठी सुरक्षा कवचची स्थापना केली असल्याचे सांगितले. या उपक्रमाच्या सातत्यामुळे हा परिणाम आम्हाला साधता येईल असा विश्वास सहायक प्रादेशिक परिवहन अधिकारी अमरसिंह गवारे यांनी याप्रसंगी व्यक्त केला. यावेळी सहायक मोटार वाहन निरीक्षक बाळासाहेब सलगर, मयूर जाधव, अमृता देशमुख, हर्षदा ढेकळे, डॉ. राजकुमार देशमुख, अतुल दराडे, तेजस मखरे यांनी विविध उपक्रमांची माहिती दिली. विद्यार्थ्यांसोबत शाळेचे दिपा शिंदे मॅडम, स्नेहल कुलकर्णी मॅडम, विवेक सर, लक्ष्मीकांत बालगावकर सर, मठ सर हे शिक्षक उपस्थित होते. प्राचार्या विद्या शिंदे मॅडम आणि प्राचार्य केशव शिंदे सर यांच्या मार्गदर्शनाखाली सदर भेटीचे आयोजन करण्यात आले होते.
