14/08/2026
அமெரிக்க மருத்துவக் கல்லூரிகளில் அட்மிஷன் பெறுவது எப்படி எனப் பார்ப்போம்.
இந்தியாவில் பிரிட்டிஷ் கல்விமுறை பின்பற்றப்படுவதால் +2 முடித்ததும் நேரடியாக மருத்துவப் படிப்பில் (எம்.பி.பி.எஸ்) சேர முடியும்.
அமெரிக்காவில் முதலில் ஒரு இளங்கலைப் பட்டம் பெற வேண்டும். மருத்துவம் என்பது அங்கே முதுகலைப் பட்டத்திற்கு சற்று மேல், பி.எச்டி படிப்புக்கு சற்று கீழ் எனும் தரவரிசையில் உள்ளது (Professional Degree).
அந்த இளங்கலைப் பட்டம் பொதுவாக மருத்துவம் சார்ந்த படிப்புகளாக—உதாரணமாக பயாலஜி, பயோகெமிஸ்ட்ரி, சைக்காலஜி—இருப்பது நல்லது. ஆனால் டெக்னிக்கலாகப் பார்த்தால், கம்ப்யூட்டர் சயின்ஸ் இளங்கலைப் பட்டம் எடுத்துவிட்டுக்கூட முதுகலைப் படிப்பில் மருத்துவம் சேரத் தடையில்லை. ஆனால் பிராக்டிக்கலாக அப்படிப் பலரும் செய்வதில்லை.
அமெரிக்கக் கல்லூரிகளில் ஒரு நல்ல விஷயம், உங்கள் இளங்கலைப் பட்டம் உங்கள் வாழ்க்கையைத் தீர்மானிப்பதில்லை என்பதுதான். கம்ப்யூட்டர் சயின்ஸ் அல்லது பொறியியல் (Engineering) போன்ற மருத்துவம் சாராத துறைகளில் இளங்கலைப் பட்டம் பெற்றவர்களும், மருத்துவக் கல்லூரிக்குத் தேவையான அடிப்படை அறிவியல் பாடங்களைத் தனியாகப் படித்துவிட்டு (Prerequisite courses) MCAT (Medical College Admission Test) தேர்வு எழுதி மருத்துவப் படிப்பில் சேர முடியும். அமெரிக்கக் கல்வி முறையில் இந்த நெகிழ்வுத்தன்மை உள்ளது.
ஆனால் மருத்துவக் கல்லூரிகளில் சேரும் தயாரிப்பு உயர்நிலைப் பள்ளியிலேயே (High School) தொடங்கிவிடும் என்பார்கள். மருத்துவக் கல்லூரியில் சேர விரும்பும் மாணவர்கள் பள்ளியிலேயே பயாலஜி, கெமிஸ்ட்ரி போன்ற பாடங்களைப் படிப்பார்கள். ஆண்டு விடுமுறையில் மருத்துவமனைகள், ஆம்புலன்ஸ் பணியாளர், நர்ஸ் போன்ற மருத்துவம் சார்ந்த துறைகளில் தன்னார்வலராகச் (Volunteer) செயல்படுவார்கள் அல்லது வேலைக்குச் சேருவார்கள்.
இளங்கலைப் பட்டம் படிக்கும் நான்கு ஆண்டுகளும் மருத்துவம் சார்ந்த வேலைகளில் தொடர்வார்கள். பேராசிரியர்களிடம் சேர்ந்து ஆய்வு செய்வதும் உண்டு.
அதன்பின் நம் ஊரில் நீட் போல அங்கே எம்.காட் (MCAT) எனும் தேர்வும் உண்டு. இது உலகின் மிகக் கடினமான நுழைவுத் தேர்வுகளில் ஒன்றாகக் கருதப்படுகிறது.
10 வெவ்வேறு பாடப்பிரிவுகள், 3–4 ஆண்டுகள் படிக்க வேண்டிய இளங்கலை அறிவியல் பாடங்கள் என இதன் பாடத்திட்டம் மிக விரிவானது. எந்த ஒரு ஆசிரியராலும் அமர்ந்து இவை அனைத்தையும் முதன்முறையாக உங்களுக்குக் கற்றுத்தர முடியாது. 300-க்கும் மேற்பட்ட மணிநேரங்கள் சுயமாகப் படித்து (Self-study) நினைவில் வைத்துக்கொண்டால் மட்டுமே இதை எதிர்கொள்ள முடியும்.
மொத்தம் ஏழரை மணிநேரம் நடக்கும் தேர்வுகளில் பத்துக்கும் மேற்பட்ட மருத்துவம் சார்ந்த துறை சம்பந்தமான மிகக் கடினமான கேள்விகளுக்குப் பதிலளிக்க வேண்டும்.
இத்தேர்வில் "செல்லின் ஆற்றல் மையம் எது?" போன்ற நேரடி கேள்விகள் கேட்கப்பட மாட்டா. மாறாக, சமீபத்திய அறிவியல் ஆய்வுக் கட்டுரைகளில் (Research Papers) இருந்து 500 வார்த்தைகள் கொண்ட பத்திகள், வரைபடங்கள் (Graphs) மற்றும் சோதனைக் தரவுகளுடன் வழங்கப்படும்.
தவிர இதில் தத்துவம் (Philosophy), கலை வரலாறு, பொருளாதாரம் அல்லது இலக்கியம் போன்ற பாடங்களிலிருந்து சிக்கலான பத்திகள் கொடுக்கப்படும். ஆசிரியர் என்ன சொல்ல வருகிறார், அவரது கூற்றின் பின்னணியில் உள்ள யூகங்கள் என்ன என்பதைப் பகுப்பாய்வு செய்து விரைவாகப் பதிலளிக்க வேண்டும்.
இத்தனை கஷ்டப்பட்டு எம்.காட்டை முதல் முயற்சியிலேயே பாஸ் செய்பவர்கள் உண்டு. கேப் இயர் (Gap Year) எனும் ஓர் ஆண்டு இடைவெளி எடுத்து, படித்து, வேலை செய்து மீண்டும் முயற்சிப்பவர்கள் உண்டு. 2–3 ஆண்டுகள் எம்.காட்டிலேயே நேரத்தை வீணடித்து, மருத்துவக் கனவே வேண்டாம் எனச் செல்பவர்களும் உண்டு.
ஆனால் எம்.காட்டில் நல்ல மதிப்பெண் பெற்றால் மருத்துவச் சீட்டு உறுதியா என்றால் இல்லை. அதற்கு உங்கள் ஒட்டுமொத்த சுயவிவரத்தையும் (Profile) பார்ப்பார்கள். தன்னார்வலராகப் பணியாற்றிய நேரம் (Volunteer Hours), விளையாட்டுகள் (Sports), என்ன காரணத்திற்காக மருத்துவப் படிப்பில் சேர விரும்புகிறீர்கள் என ஒரு கட்டுரை (Personal Statement) எழுத வேண்டும். நேர்காணலிலும் (Interview) பங்கேற்க வேண்டும். உங்கள் மருத்துவம் சார்ந்த பணிகள், வேலைகள் எல்லாம் இங்கே உதவும்.
அதன்பின் தேர்ச்சி பெற்றால் மருத்துவக் கல்லூரியில் அட்மிஷன் வழங்கப்படும்.
இங்கே தனியார் கல்லூரி, அரசு கல்லூரி என உண்டு. ஆனால் கட்டணம் எல்லாவற்றிலும் மிக அதிகமாக இருக்கும். எனினும் மருத்துவக் கல்லூரி மாணவர்களுக்கு அரசின் கடன் உதவி கிடைக்கும். கடன் வாங்கியே படித்து முடித்துவிடலாம்.
அதன்பின் ரெசிடென்ஸி (Residency) எனப்படும் பயிற்சி ஆண்டுகள்...இதில் நல்ல சம்பளம் வழங்கபடும்
தோராயமாக:
இளங்கலை - 4 ஆண்டுகள்
கேப் இயர் (இருந்தால்)
முதுகலை (மருத்துவம்) - 4 ஆண்டுகள்
ரெசிடென்ஸி - 3 முதல் 7 ஆண்டுகள் (சம்பளத்துடன்)
என 10- 15 ஆண்டுகள் கழித்து மருத்துவர் எனும் பட்டத்துடன், கைநிறைய கடனுடனும் வெளியே வருவீர்கள்.
ஆனால்:
வேலைக்குச் சேர்கையில் கிராமப்புற மருத்துவமனைகளில் சேர முன்வந்தால், ஆள் பற்றாக்குறை காரணமாகக் கல்விக் கடனை மருத்துவமனைகளே முழுவதுமாகக் கட்டிவிடும். உங்கள் படிப்பு முழுக்க இலவசமாகிவிடும்!
அல்லது 10 ஆண்டுகள் லாபநோக்கமின்றி இயங்கும் தொண்டு நிறுவன மருத்துவமனைகளில் (Non-profit hospitals) பணிபுரிந்தால், அரசே கடனைத் தள்ளுபடி செய்துவிடும் (PSLF).
அல்லது நல்ல கார்ப்பரேட் மருத்துவமனைகளில் சேர்ந்தால், கிடைக்கும் சம்பளத்தில் கடனைக் கட்டுவது பெரிய விஷயமாக இருக்காது.
நல்ல மதிப்பும், வருமானமும், கடுமையான போட்டியும் இருக்கும் ஒரு துறை மருத்துவத்துறை.
அமெரிக்க மருத்துவர்களின் சம்பளம் உலகிலேயே மருத்துவத் துறையில் மிக அதிகமாகக் கருதப்படுகிறது. நல்ல மதிப்பும் வருமானமும் கூடிய துறை.
அதனால் தான் இதில் சேர இத்தனை அடிதடி, போட்டி!
உலகெங்கும் இருக்கும் கதைதான்.
~ Mr நியாண்டர் செல்வன் FB Post
