15/08/2026
ഏറെ പ്രിയപ്പെട്ടവരേ, ❤️
കാലം എത്ര വേഗമാണ് കടന്നുപോകുന്നത്… നോക്കിനിൽക്കുമ്പോഴേക്കും നമ്മുടെ ഈ പ്രിയപ്പെട്ട കൂട്ടായ്മ 11 വർഷങ്ങൾ പിന്നിട്ട് പന്ത്രണ്ടാം വയസ്സിലേക്ക് കാലെടുത്തുവെക്കുകയാണ്.
ഈ പതിനൊന്ന് വർഷങ്ങൾ വെറും അക്കങ്ങളല്ല. ഒരുപാട് അനുഭവങ്ങൾ, ഹൃദയത്തിൽ എന്നും നിറഞ്ഞുനിൽക്കുന്ന സൗഹൃദങ്ങൾ, മറക്കാനാകാത്ത ഓർമ്മകൾ, നമ്മളെ വിട്ടുപോയ ചില പ്രിയപ്പെട്ട മുഖങ്ങൾ, വിജയങ്ങളുടെ ആഹ്ലാദം, പരാജയങ്ങളുടെ വേദന, പ്രതീക്ഷകൾ, നിരാശകൾ, ചിരികളും കണ്ണീരും… ഇതെല്ലാം ചേർന്നാണ് നമ്മുടെ ഈ കുടുംബം വളർന്നത്.
ഈ ഗ്രൂപ്പിനെക്കുറിച്ച് ഓർക്കാത്ത ഒരു ഇന്നലെയുമില്ല, ഇന്നുമില്ല, നാളെയും ഉണ്ടാകില്ല. കാരണം ഇത് ഒരു സാധാരണ ഗ്രൂപ്പായിരുന്നില്ല ജീവിതത്തിലെ ഒരു വലിയ യാത്രയിൽ പരസ്പരം താങ്ങും തണലുമായിരുന്ന ഒരുപാട് ഹൃദയങ്ങളുടെ സംഗമമാണ്.
ഈ കൂട്ടായ്മയുടെ നന്മയ്ക്കും വളർച്ചയ്ക്കുമായി രാവും പകലും ആത്മാർത്ഥമായി പ്രവർത്തിച്ച ഒരുപാട് പേരുണ്ട്. അവരുടെ അധ്വാനത്തിന്റെയും ആത്മവിശ്വാസത്തിന്റെയും ഫലമായി പലരും അവർ സ്വപ്നം കണ്ട സർക്കാർ ജോലികളിലേക്ക് എത്തിച്ചേർന്നു. ചിലർക്ക് ലക്ഷ്യം കൈവരിക്കാൻ സാധിച്ചില്ലെങ്കിലും അവർ നൽകിയ പരിശ്രമവും ഈ കുടുംബത്തിനുവേണ്ടി ചെലവഴിച്ച സമയവും ഒരിക്കലും വിലമതിക്കാനാകാത്തതാണ്. ഇന്നും അതേ സ്വപ്നം നെഞ്ചിലേറ്റി കഠിനമായി പ്രയത്നിക്കുന്നവരും നമ്മുടെ കൂടെയുണ്ട്. ഓരോരുത്തരുടെയും യാത്രയും വ്യത്യസ്തമാണ്, പക്ഷേ അവരെല്ലാം നമ്മുടെ ഈ ചരിത്രത്തിന്റെ അഭിമാനകരമായ ഭാഗങ്ങളാണ്.
ഈ പതിനൊന്ന് വർഷങ്ങളിൽ ഒരുപാട് പുതിയ മുഖങ്ങളെ നമ്മൾ സ്വീകരിച്ചു. ചിലർ ജീവിതത്തിന്റെ തിരക്കുകൾക്കിടയിൽ സജീവത കുറച്ചെങ്കിലും അവരുടെ സാന്നിധ്യം ഇന്നും നമ്മുടെ ഓർമ്മകളിലുണ്ട്. ചിലർ ഇന്ന് ഈ ലോകത്തില്ലെങ്കിലും അവർ പങ്കുവെച്ച നിമിഷങ്ങളും വാക്കുകളും എന്നും നമ്മോടൊപ്പമുണ്ട്. ഓരോ ഓർമ്മയും ഈ കൂട്ടായ്മയുടെ അമൂല്യമായ സമ്പത്താണ്.
സമയം മാറി… ജീവിത സാഹചര്യങ്ങളും മാറി… ഓരോരുത്തരുടെയും ഉത്തരവാദിത്തങ്ങൾ വർധിച്ചു. അതിനിടയിൽ എവിടെയോ നമ്മൾക്ക് നമ്മളെത്തന്നെ കുറച്ചൊന്ന് നഷ്ടപ്പെട്ടുപോയി എന്ന തോന്നൽ പലപ്പോഴും ഉണ്ടാകാറുണ്ട്. ഒരുകാലത്ത് ഈ ഗ്രൂപ്പിൽ നിറഞ്ഞുനിന്നിരുന്ന ആ സജീവതയും തമാശകളും സൗഹൃദത്തിന്റെ ചൂടും വീണ്ടും അതേപോലെ തിരികെ കൊണ്ടുവരാൻ നമുക്ക് കഴിയുമോ എന്നറിയില്ല. പക്ഷേ അതിനുള്ള ആഗ്രഹം ഇന്നും ഓരോരുത്തരുടെയും മനസ്സിലുണ്ട്.
നമ്മളെ ഒരുമിച്ച് നിർത്തിയത് വെറും പഠനമോ പരീക്ഷകളോ ആയിരുന്നില്ല മറിച്ച് പരസ്പരമുള്ള വിശ്വാസവും സ്നേഹവും കരുതലുമായിരുന്നു. അതാണ് ഈ കൂട്ടായ്മയുടെ യഥാർത്ഥ ശക്തി. ആ ആത്മബന്ധം ഇനിയും നിലനിൽക്കട്ടെ. ഒരാൾ വിജയിക്കുമ്പോൾ എല്ലാവരും സന്തോഷിക്കുകയും, ഒരാൾ തളരുമ്പോൾ എല്ലാവരും ചേർന്ന് കൈപിടിച്ചുയർത്തുകയും ചെയ്യുന്ന ആ മനസ്സാണ് ഈ കുടുംബത്തിന്റെ ഏറ്റവും വലിയ സമ്പത്ത്.
സങ്കടങ്ങളും സന്തോഷങ്ങളും ഒരുപോലെ സമ്മാനിച്ച ഈ മനോഹരമായ 11 വർഷങ്ങളുടെ ഓർമ്മകൾ നെഞ്ചിലേറ്റി, പുതിയ പ്രതീക്ഷകളോടെയും കൂടുതൽ ഐക്യത്തോടെയും സ്നേഹത്തോടെയും നമുക്ക് പന്ത്രണ്ടാം വർഷത്തിലേക്ക് പ്രവേശിക്കാം.
ഈ യാത്രയുടെ ഭാഗമായിരുന്ന ഓരോ അംഗത്തിനും—ആദ്യദിവസം മുതൽ കൂടെയുണ്ടായവർക്കും, പിന്നീട് ചേർന്നവർക്കും, ഇന്ന് സജീവമായി പങ്കുചേരുന്നവർക്കും, ജീവിതത്തിന്റെ തിരക്കുകൾ കാരണം അകന്നുനിൽക്കുന്നവർക്കും—ഹൃദയം നിറഞ്ഞ നന്ദിയും സ്നേഹവും അറിയിക്കുന്നു.
നമ്മുടെ ഈ കൂട്ടായ്മ ഇനിയും ഒരുപാട് വർഷങ്ങൾ സൗഹൃദത്തിന്റെയും വിജയങ്ങളുടെയും നല്ല ഓർമ്മകളുടെയും വേദിയാകട്ടെ എന്ന് ആത്മാർത്ഥമായി ആശംസിക്കുന്നു.
പതിനൊന്നം വാർഷികാശംസകൾ! ❤️
സസ്നേഹം,
അഡ്മിൻ ❤️
