31/12/2018
★ तुमची मुलं किती वेळ टि.व्ही बघतात ?★
दिवसातल्या दोन तासांपेक्षा जास्त टीव्ही पहिला तर मुले होऊ शकतात बुद्धू हा लेख वाचला. अमेरिकेमध्ये हे संशोधन झाले आहे.8 ते 11 वयोगटातील चार हजार पाचशे मुलांवर हा अभ्यास करण्यात आला आहे. टीव्ही पाहिल्याने मुलांचा मेंदू जास्त सक्रिय नसतो. त्यांच्या डोळ्यासमोर आयत्या प्रतिमा दिसत असतात. पण वाचन करत असतांना मेंदूला एकाच वेळी मन एकाग्र ठेवणे व डोळ्यासमोर वाचत असलेल्या मजकुराच्या चित्ररूपात प्रतिमा तयार करणे ह्या दोन्ही गोष्टी कराव्या लागतात. त्यामुळे मेंदूला जास्त सक्रिय राहावे लागते. त्यामुळे मेंदूकडे होणारा रक्तपुरवठा वाढतो.यात मेंदू अधिक सक्षम होत जातो. आपण शरीर तंदुरुस्त ठेवण्यासाठी जसे व्यायाम करतो व पोषक आहार घेतो. तसेच मेंदू तंदुरुस्त राहण्यासाठी वाचन करणे हा एकप्रकारचा व्यायाम आहे तर वेगवेगळ्या विषय, विचारांवरील वाचन हे मेंदूचा आहार आहे. अर्थात केवळ एकाच प्रकारचे वाचन करू नये. मानवी जीवनाशी संबंधित सर्व क्षेत्रातील लिखाण, कथा,कादंबऱ्या, कविता, नाटक, इतिहास, भूगोल, विज्ञान, तंत्रज्ञान, वेगवेगळ्या विचारधारा यांचे वाचन केले पाहिजे. लहान मुलांना चांगली गोष्टींची पुस्तके देऊन त्यांना वाचनाच्या सवयीकडे ओढले पाहिजे.
दिवसातला विशिष्ट वेळच टीव्ही पहायची व इतर वेळ वाचन,लेखन,खेळ ,अभ्यास यात घालवण्याची सवय मुलांमध्ये लावायला हवी. केवळ मुलांना सांगून नाही तर आपणही काहीतरी वेळ मिळेल तसे व जमेल तसे वाचले पाहिजे. तरच आपण भविष्यातील चांगल्या वैचारिक पिढीचा पाया रचू शकतो. बी रुजत असतांनाच त्याला आवश्यक ते खतपाणी, प्रकाश याची सोय करा.
