06/05/2024
Treating the Deities … 4 (Last in this series)
(How to deal with break in Daily Worship?)
ఇక చివరగా- నిత్యపూజలకు సంబంధించిన విషయం.
ఇంట్లో గానీ, గుడిలో గానీ, మండపములో గానీ ఎవరికైనా ప్రతిదినం ఆహారము పెడుతుంటే, వారికి మన దగ్గరకు రావడం అలవాటు అవుతుంది. చివరికి ప్రతిదినం తిండికి వచ్చే జంతువులు సైతం (పిల్లి, ఆవు, కుక్కలు, ఇంట్లో పిల్లలు కూడ) ఆ సమయానికి వచ్చి నిలబడతారు. ఇక, నిత్యార్చనలో మనం గౌరవించి పిలుచుకునే దేవుళ్ళు రారా?
ఒకవేళ వస్తారనే విశ్వాసమే నీకు లేకపోతే, ఎవరికి పూజ చేస్తున్నట్లు? అందువల్ల, దేవతాసన్నిధిపై నమ్మకముతోనే నిత్య కైంకర్యం ఉండాలి – అనేది ప్రాథమిక అంశము.
ఇక రోజూ మన దగ్గరకు వచ్చేవారిని, ఒకపూట పట్టించుకోకపోతే ఏమవుతుంది? కలత చెంది, మనను పట్టించుకోరు. పిలిచినప్పుడు రారు. దానివల్ల మనకు (పిల్లలకు, పశువులకు) కలగవలసిన క్షేమం ఉండకపోవచ్చు.
సాయఁయావానశ్చ వై దేవా ప్రాతర్యావాణ శ్చాగ్నిహోత్రిణో గృహ మా గచ్ఛన్తి. తాన్ యన్న తర్పయేత్. ప్రజయాస్య పశుభి ర్వి తిష్ఠేరన్న్. యత్తర్పయేత్. తృప్తా ఏనం ప్రజయా పశుభి స్తర్పయేయుః. (తైత్తిరీయ బ్రాహ్మణము – అగ్నిహోత్రప్రకరణము 2.1.5)
అందువల్ల మధ్యలో అనారోగ్యం, ప్రయాణం, మైల, పురుడు మొదలైన ఇబ్బందులు వస్తే పర్యాయంగా వేరేవారికి అప్పచెప్పాలి గానీ, మధ్యలో అర్ధాంతరంగా వదిలేయకూడదు. కాదు కూడదు అనే పరిస్థితిలో ఎవరూ దొరకకపోతే, గౌరవంగా ఉద్వాసన చెప్పి, మళ్ళీ కుదిరిన వెంటనే మొదలు పెట్టాలి.
నిత్యం సకాలములో ఇచ్చే నైవేద్యము, ఆహుతులవల్ల దేవతలు తృప్తి పడి, మనను అనుగ్రహిస్తారు అని భావము.
ఉపసంహారము –
వేదములో చెప్పిన ఈ ధర్మసూక్ష్మాలు ప్రతి కుటుంబానికి ఏదో సందర్భముగా ఉపయోగిస్తాయి. దీనిని ఆచరణలో పెట్టుకుని, ధార్మికులు దైవానుగ్రహమునకు పాత్రులు కాగలరు.
శ్రీ రామచంద్రః శ్రితపారిజాతః సమస్త కళ్యాణ గుణాభిరామః।
సీతాముఖాంభోరుహాచంచరీకో నిరంతరం మంగళమాతనోతు।।
