07/06/2026
નમસ્કાર સ્નેહી કેળવણીકારશ્રી,શાળા વ્યવસ્થાપન સમિતિના સભ્યો, આચાર્યશ્રીઓ, શિક્ષક મિત્રો, સી.આર.સી. તથા બી.આર.સી. કો-ઓર્ડિનેટરશ્રીઓ, તાલુકા પ્રાથમિક શિક્ષણાધિકારીશ્રીઓ અને વહાલા વાલીઓ...
આવતીકાલથી આપણા પાટણ જિલ્લામાં એક નવા શૈક્ષણિક સત્રનો પ્રારંભ થવા જઈ રહ્યો છે. આ નવું સત્ર આપણા બાળકોના જીવનમાં જ્ઞાન, પ્રગતિ અને નવી આશાઓ લઈને આવે તેવી મંગલ કામના.
નવા શૈક્ષણિક સત્રના પ્રથમ દિવસથી જ શાળા પરિવાર બાળકોને આવકારવા માટે સંપૂર્ણ ઉત્સાહ અને તૈયારી સાથે જોડાય તે અત્યંત જરૂરી છે. આપણી શાળાઓ માત્ર શિક્ષણનું કેન્દ્ર નથી, પણ બાળકોના સર્વાંગી વિકાસનું પાવન ધામ છે.
આ નવી શૈક્ષણિક યાત્રાને અભૂતપૂર્વ બનાવવા માટે મારો આપ સૌને નમ્ર અનુરોધ છે કે, આપણે સૌ સાથે મળીને, ખાસ કરીને શાળા વ્યવસ્થાપન સમિતિ (SMC) ના સભ્યોની મદદ લઈ એવા પ્રયાસો કરીએ જેથી શાળાના પ્રથમ દિવસથી જ દરેક બાળકની ૧૦૦% હાજરી સુનિશ્ચિત થાય. એક પણ બાળક શિક્ષણના આ મહોત્સવથી વંચિત ન રહેવો જોઈએ.
આવો, આપણે સૌ સાથે મળીને એક મજબૂત ટીમ તરીકે કાર્ય કરીએ અને પાટણ જિલ્લાના શિક્ષણને નવી ઊંચાઈઓ પર લઈ જઈએ. આપ સૌના સહિયારા પ્રયાસો જ આપણા બાળકોનું ભવિષ્ય ઉજ્જવળ બનાવશે.
નવા સત્રની આપ સૌને હાર્દિક શુભેચ્છાઓ અને શુભકામનાઓ!
જિલ્લા પ્રાથમિક શિક્ષણાધિકારી અને
ટીમ એજ્યુકેશન - પાટણ
