AKG Centre for Research and Studies

22/02/2026

അഞ്ചാമത് അന്താരാഷ്ട്ര കേരള പഠന കോൺഗ്രസ് സംഘാടക സമിതി

21/02/2026

20/02/2026

20/02/2026

സിസോസിയം 4

ശാസ്ത്രസാങ്കേതികവിദ്യകൾക്ക് ജനപക്ഷവും പുരോഗമനാത്മകവും വിജ്ഞാനസ്വാതന്ത്ര്യം ഉള്ളതുമായ നയം ഉണ്ടാകുക എന്നത് ഇതരമേഖലകളിൽ ബദലുകൾ സൃഷ്ടിച്ചു മുന്നേറുക എന്ന കേരളസമീപനത്തിൻ്റെ ഭാഗമാണ്. ഇന്നത്തെ കോർപ്പറേറ്റ് ക്യാപ്പിറ്റലിസത്തിൽ മുഖ്യ ഉത്പാദനോപാധിയായി നിലകൊള്ളുന്ന ശാസ്ത്രവും സാങ്കേതികവിദ്യകളും ലോകമെങ്ങും മൂലധനനിയന്ത്രണത്തിലാണ്. വൈജ്ഞാനികസമ്പദ്ഘടനയെ കേരളത്തിന് അനുഗുണമാകുമാറു പരിവർത്തിപ്പിക്കാനും അതിനു ശേഷിയുള്ള വൈജ്ഞാനികസമൂഹം കെട്ടിപ്പടുക്കാനുമാണു നാം ശ്രമിക്കുന്നത്. സഹകരണമേഖലയുടെയടക്കം സാദ്ധ്യതകൾ പ്രയോജനപ്പെടുത്തി ഈ പ്രക്രിയ എങ്ങനെ ഫലപ്രദമായി നിർവ്വഹിക്കാം എന്ന ആലോചന ഇന്ന് ഏറെ പ്രധാനമാണ്. അതിനുതകുന്ന നയങ്ങൾ ആവിഷ്കരിക്കാനുള്ള ആലോചനകൾക്ക് ഉള്ളതാണ് അന്താരാഷ്ട്ര കേരളപഠന കോൺഗ്രസിലെ നാലാം സിമ്പോസിയം.

20/02/2026

സിമ്പോസിയം 3
കേരളത്തെ കേരളമാക്കുന്നത് രാജ്യത്തെ ഇതരസംസ്ഥാനങ്ങളിൽനിന്നു വ്യത്യസ്തമായ നമ്മുടെ മതനിരപേക്ഷ-പുരോഗമനസംസ്ക്കാരമാണ്. മഹത്തായ നവോത്ഥാനപൈതൃകങ്ങളിൽ വേരാഴ്ന്നു വളർന്നുവന്ന ആ തനതുസംസ്ക്കാരം ഇന്നു കൊടിയ വെല്ലുവിളി നേരിടുകയാണ്. ഈ സംസ്ക്കാരത്തിന്റെ മുഖമുദ്രയായ മാനവികത വെറുപ്പിന്റെയും അപരവിദ്വേഷത്തിന്റെയും വിഷമേറ്റ് അതിവേഗം തളരുകയാണ്. മതനിരപേക്ഷതയുടെ സ്ഥാനത്തു മതവർഗ്ഗീയതയും ഭൂരിപക്ഷദേശീയതയും വളർത്തപ്പെടുന്നു. പുരോഗമനാത്മകമായതിനെയെല്ലാം അട്ടിമറിക്കാനും പ്രാകൃതവും ശാസ്ത്രവിരുദ്ധവും ചരിത്രവിരുദ്ധവുമായ തിന്മകളെ പുനഃസ്ഥാപിക്കാനും വടക്കേയിൻഡ്യയിൽനിന്ന് ഇറക്കുമതി ചെയ്യാനും ആസൂത്രിതശ്രമം നടക്കുന്നു. അന്ധവിശ്വാസങ്ങളും അനാചാരങ്ങളും ശാസ്ത്രത്തിന്റെ ദുർവ്യാഖ്യാനങ്ങൾ അണിയിച്ച് അവതരിപ്പിക്കുകയും പ്രചരിപ്പിക്കുകയും ചെയുന്നു. ബഹുസ്വരവും ജനാധിപത്യപൂർണ്ണവുമായ പൊതുവിടങ്ങളും സംവാദവേദികളും എന്തിന്, സംവാദമനസുകൾ പോലും അതിവേഗം ഇല്ലാതാകുന്നു. പുതുതലമുറയെയും സഹസ്രാബ്ദങ്ങൾ മുമ്പത്തെ അറിവുകേടുകളിലേക്കു പിൻനടത്താൻ പാഠപുസ്തകങ്ങളും പാഠ്യപദ്ധതിയും തിരുത്തിയെഴുതുന്നു; ചരിത്രം പുനർനിർമ്മിക്കുന്നു! സർവ്വകലാശാലകൾ അടക്കമുള്ള അക്കാദമികസ്ഥാപനങ്ങളെയും ഗവേഷണശാലകളെയും ശസ്ത്രവിരുദ്ധതയിൽ തളയ്ക്കാനും ധനവും പദ്ധതികളും നിഷേധിച്ചു തകർക്കാനും ശ്രമിക്കുന്നു. യൂണിയൻ സർക്കാരിനെ നയിക്കുന്ന ഹിന്ദുദേശീയവാദി പാർട്ടിയുടെ നയസമീപനങ്ങൾ നിർബ്ബാധം ഇങ്ങനെ അടിച്ചേല്പിക്കുകയാണ്. ഇതിനൊന്നും പിടികൊടുക്കാതെ മതനിരപേക്ഷ-പുരോഗമനസംസ്ക്കാരത്താൽ ഉയർന്നു നില്ക്കുന്ന മാനവികതയുടെ പച്ചത്തുരുത്തായ കേരളം ഇക്കൂട്ടരുടെ മുഖ്യ ഉന്നം ആയതോടെ പ്രതിസന്ധി കൂടുതൽ രൂക്ഷമാകുകയാണ്. വിഷം വമിക്കുന്ന നുണകളുടെ കേരളാസ്റ്റോറികൾ പരമ്പരകളായി രാജ്യമാകെ കേരളത്തെ മോശമായി ചിത്രീകരിച്ച് അപമാനിച്ചുകൊണ്ടിരിക്കുന്നു. ഇതെല്ലാം ചേർന്നു തീർക്കുന്ന ഗുരുതരമായ പ്രതിസന്ധി കേരളത്തെത്തന്നെ ഇല്ലാതാക്കാൻ പോന്നതാണ്. അതിശക്തമായി ഇതിനെ പ്രതിരോധിച്ചേ തീരൂ. അതിനുള്ള ഗഹനമായ ചർച്ചകൾക്കുള്ളതാണ് അഞ്ചാമത് അന്താരാഷ്ട്ര കേരളപഠന കോൺഗ്രസിലെ മൂന്നാം സിമ്പോസിയം.

20/02/2026

സിമ്പോസിയം 1

ലോകമെമ്പാടുമുള്ള വികസനവിദഗ്ദ്ധർക്കു വിസ്മയമാണ് ആധുനികകേരളം. സ്വാതന്ത്ര്യപൂർവ്വകാലത്തുതന്നെ വിദ്യാഭ്യാസത്തിനും തൊഴിലിനുമുള്ള അവകാശങ്ങൾക്കായി പ്രക്ഷോഭങ്ങൾ നയിച്ച കേരളം സ്വാതന്ത്ര്യാനന്തരം അവകാശങ്ങളുടെയും അവസരങ്ങളുടെയും തുല്യതയ്ക്കായി നിലകൊണ്ട് സവിശേഷമായ സാമൂഹികവികസനം കൈവരിക്കുകയായിരുന്നു. തെരഞ്ഞെടുപ്പിലൂടെ കമ്മ്യൂണിസ്റ്റുസർക്കാരിനെ അധികാരത്തിൽ എത്തിച്ചതിലൂടെ ലോകശ്രദ്ധ നേടിയ കേരളം, ആ കമ്മ്യൂണിസ്റ്റ് സർക്കാർ കൈക്കൊണ്ട നയസമീപനങ്ങളും നിയമനിർമ്മാണങ്ങളുംകൊണ്ടു പിന്നെയും ശ്രദ്ധിക്കപ്പെട്ടു. കുടിയൊഴിപ്പിക്കൽ തടഞ്ഞും ഭൂമി പുനർവിതരണം ചെയ്തും അടിസ്ഥാനജനതയെ മണ്ണിൽ ഉറപ്പിച്ചു നിർത്തിയതോടൊപ്പം വിദ്യാഭ്യാസം സൗജന്യവും സാർവ്വത്രികവും ആക്കാനുള്ള പ്രവർത്തനങ്ങളും പടിപടിയായി നടപ്പിലാക്കി. വിദ്യാഭ്യാസബില്ലിന്റെ പിൻബലത്തിൽ സ്കൂൾ വിദ്യാഭ്യാസം നേടിയ കുട്ടികൾക്കായി താലൂക്കുതോറും കോളെജുകൾ സ്ഥാപിച്ച് ഉന്നതവിദ്യാഭ്യാസവും അവർക്കു പ്രാപ്തമാക്കി. എന്നിടും ജീവിതസാഹചര്യങ്ങളാൽ അക്ഷരാഭ്യാസം നേടാൻ കഴിയാതെപോയവരെ കണ്ടെത്തി പഠിപ്പിച്ചു സമ്പൂർണ്ണസാക്ഷരമാക്കി സംസ്ഥാനത്തെ മാറ്റി. ഭക്ഷ്യവസ്തുക്കളുടെയും മണ്ണെണ്ണപോലുള്ള അവശ്യവസ്തുക്കളുടെയും റേഷനിലൂടെ തുടങ്ങിയ സാർവ്വത്രികമായ പൊതുവിതരണം പില്ക്കാലത്ത് ഒട്ടെല്ലാ ഉപഭോഗവസ്തുക്കളുടെയും സബ്സിഡി നിരക്കിലുള്ള വിപണനശൃംഖലകളിലേക്കും വളർന്നു. പൊതുജനാരോഗ്യത്തിനും ശുദ്ധമായ കുടിവെള്ളലഭ്യതയ്ക്കും വിപുലമായ സംവിധാനങ്ങളും ഇവയ്ക്കൊപ്പം വികസിപ്പിച്ചു. അത് ഇന്ന് അത്യാധുനികചികിത്സകളുടെ സൗജന്യനിരക്കുള്ള സുലഭതയിലേക്കു വളരുന്നു. ഒപ്പം, വിവിധങ്ങളായ പാർപ്പിടപദ്ധതികൾ വികസ്വരമായിക്കൊണ്ടിരുന്നു. ഇന്നു വെറും 10 കൊല്ലംകൊണ്ട് അഞ്ചരലക്ഷത്തിലേറെ പാർപ്പിടങ്ങൾ നിർമ്മിച്ചിരിക്കുന്നു! ആസൂത്രണവും നിർവ്വഹണവും അവലോകനവും അടക്കം വികസനത്തിൽ ജനപങ്കാളിത്തവും പ്രാദേശികവിഭവങ്ങളുടെ മികച്ച വിനിയോഗവും സാദ്ധ്യമാക്കുമാറ് അർത്ഥപൂർണ്ണമായ അധികാരവികേന്ദ്രീകരണം ‘ജനകീയാസൂത്രണം’ എന്ന സവിശേഷപദ്ധതിയിലൂടെ നടപ്പിലാക്കി. അതും മറ്റൊരു ലോകമാതൃകയായി. ഉത്പാദനസംസ്ഥാനം അല്ലാതിരുന്ന കേരളത്തെ സംരംഭകത്വത്തിലേക്കു നയിക്കുകയും നിയമലഘൂകരണവും പ്രോത്സാഹനവും നല്കി നിക്ഷേപസൗഹൃദം ആക്കുകയും ചെയ്ത് ഒരു നവകേരളം സൃഷ്ടിക്കുകയാണു നാം ഇന്ന്. നിക്ഷേപം ആകർഷിക്കാനായി അടിസ്ഥാനസൗകര്യവികസനം വൻതോതിൽ സാദ്ധ്യമാക്കുന്നു. അതിനും ഖജനാവിനു പുറത്തു ധനം കണ്ടെത്താനുള്ള സവിശേഷമാതൃകയായ കിഫ്ബി വികസിപ്പിച്ചു. പൊതുവിദ്യാലയങ്ങൾ ലോകോത്തരനിലവാരത്തിലേക്കുയർത്തി. പിന്നാലെ, ഉന്നതവിദ്യാഭ്യാസരംഗവും ആധുനികീകരിച്ചു. അങ്ങനെ ഒരു വിജ്ഞാനസമൂഹവും വിജ്ഞാനസമ്പദ്ഘടനയുമായി കേരളത്തെ മാറ്റാനുള്ള ഉദ്യമത്തിലാണു നാം. ഇതിനെല്ലാമൊപ്പം അർഹരായ മുഴുവൻ ജനങ്ങളെയും സാമൂഹികസുരക്ഷയുടെ ശൃംഖലയിൽ നാം കണ്ണിചേർത്തിരിക്കുന്നു; ഏതാണ്ട് 65 ലക്ഷം പേരെ! മാനവവിഭവവികസനത്തിന്റെയും സാമൂഹികവികാസത്തിന്റെയും മാനദണ്ഡങ്ങൾ പ്രകാരം ലോകത്തേതന്നെ ഒന്നാംകിടഭൂപ്രദേശമായി നാം ഉയർന്നിരിക്കുന്നു. ശിശുമരണനിരക്കിൽ അമേരിക്കയെയും പിന്നിലാക്കി. ഇങ്ങനെ നിരവധി ജനപക്ഷമാതൃകകൾ സൃഷ്ടിച്ച കേരളം, ധനികദരിദ്ര അന്തരം വളർത്തുകയും സ്വത്തു കുന്നുകൂട്ടുകയും ഭൂരിപക്ഷത്തെ ചൂഷണം ചെയ്യുകയും ചെയ്യുന്ന മുതലാളിത്തവികസനമാതൃകയ്ക്കു ബദലായി ലോകത്തിനു മുന്നിൽ ഉയർന്നു നില്ക്കുകയാണ്. ഈ വികസനാനുഭവങ്ങളെല്ലാം വസ്തുനിഷ്ഠമായി വിലയിരുത്തി മുന്നോട്ടുള്ള പാത നിർണ്ണയിക്കുക എന്നതു സുപ്രധാനമാണ്. അതിനുള്ള ചർച്ചകളാണ് അഞ്ചാമത് അന്താരാഷ്ട്ര കേരളപഠന കോൺഗ്രസിലെ ഒന്നാം സിമ്പോസിയം ചർച്ച ചെയ്യുന്നത്. കേരളത്തിന്റെ ഭാവിയുടെ ദിശാസൂചകം ആകാൻപോകുന്ന സമ്മേളനമാണിത്.

20/02/2026

സിമ്പോസിയം 2
ഫെഡറൽ റിപ്പബ്ലിക്കായ ഇൻഡ്യയിൽ ധനവിഭവങ്ങൾ യൂണിയൻ സക്കാരിനും സംസ്ഥാനങ്ങൾക്കും പങ്കുവയ്ക്കാൻ ഏർപ്പെടുത്തിയിട്ടുള്ള സംവിധാനമാണ് ധനക്കമിഷനുകൾ. ഓരോ സംസ്ഥാനത്തിന്റെയും പൊതുവിൽ രാജ്യത്തിന്റെയും സാഹചര്യങ്ങളും വികസന-ക്ഷേമാവശ്യങ്ങളും അതതുകാലത്തെ വിഭവലഭ്യതയുമെല്ലാം സമഗ്രമായി പരിശോധിച്ച് വിഭവം പങ്കിടലിനു നീതിയുക്തമായ മാനദണ്ഡങ്ങൾ നിശ്ചയിക്കുകയാണു കമ്മിഷനുകൾ തുടക്കംമുതൽ ചെയ്തിരുന്നത്. എന്നാൽ, യൂണിയൻ സർക്കാരിൽ അധികാരകേന്ദ്രീകരണപ്രവണതകൾ ശക്തിപ്പെട്ടുതുടങ്ങിയ കാലംമുതൽ കമ്മിഷനുകളുടെ സമീപനങ്ങളിലും ഈ ഫെഡറൽവിരുദ്ധനിലപാടുകൾ കടന്നുകൂടാൻ തുടങ്ങിയതാണ്. ബിജെപി നേതൃത്വത്തിലുള്ള സർക്കാരുകൾ വന്നതോടെ ഈ പ്രവണത എല്ലാ സീമയും ലംഘിച്ച് സ്വജനപക്ഷപാതത്തിന്റെയും രാഷ്ട്രീയവിരോധത്തിന്റെയും ചട്ടുകങ്ങളായി ധനക്കമ്മിഷനുകൾ അധഃപതിച്ചിരിക്കുന്നു. മുമ്പുതെന്ന കേരളം ധനക്കമ്മിഷനുകളുടെ അശാസ്ത്രീയമായ നയനിലപാടുകളുടെ ഇരയായിരുന്നു. സവിശേഷമായ ജനപക്ഷവികസനസമീപനം സ്വീകരിച്ചുവരുന്ന കേരളം അതിന്റെ ഫലമായി ഒട്ടുമിക്ക മാനവവികസന, സാമൂഹികവികസന കാര്യങ്ങളിലും ഇതരസംസ്ഥാനങ്ങളെ അപേക്ഷിച്ച് ഏറെ മുന്നിലാണ്. എന്നാൽ, പിന്നാക്കം നില്ക്കുന്ന സംസ്ഥാനങ്ങളെ മുന്നിൽക്കണ്ടു രൂപം നല്കുന്ന പദ്ധതികൾക്കു നിശ്ചയിക്കുന്ന അർഹതാമാനദണ്ഡങ്ങൾ ആ ലക്ഷ്യങ്ങൾ നേടിക്കഴിഞ്ഞ കേരളത്തിന്റെ കാര്യത്തിൽ അപ്രസക്തമാണ്. നമ്മുടെ പ്രശ്നങ്ങൾ നാം നേടിയ മാനവവികസനത്തിന്റെ രണ്ടാംതലമുറപ്രശ്നങ്ങളാണ്. അതുകൊണ്ട്, യൂണിയൻ പദ്ധതികളും മാനദണ്ഡങ്ങളും കേരളത്തിലെ സാഹചര്യത്തിന് അനുസരിച്ചു മാറ്റണമെന്നും അതിന്റെ അടിസ്ഥാനത്തിൽ കൂടുതൽ മുന്നോട്ടു പോകാൻ വേണ്ട ധനം ലഭിക്കാൻ വ്യവസ്ഥ ചെയ്യണമെന്നും കാലാകാലം നാം ധനക്കമ്മിഷനുകളോട് ആവശ്യപ്പെടാറുണ്ട്. എന്നാൽ, അത് ഉൾക്കൊള്ളാനോ അനുഭാവത്തോടെ മാനദണ്ഡങ്ങൾ പരിഷ്ക്കരിക്കാനോ കമ്മിഷനുകൾ തയ്യാറാകാറില്ല. അതിനാൽ, കേരളത്തിന്റെ വിഹിതം ഗണ്യമായി കുറഞ്ഞുവരികയാണ്. വികസനവും ക്ഷേമവും കൈവരിച്ചതിനു കേരളം ശിക്ഷിക്കപ്പെടുന്ന അവസ്ഥ! ഇതിന്റെ ഏറ്റവും മോശമായ രൂപമാണ് 2026 - 2030 കാലത്തേക്കുള്ള 16–ാം ധനകാര്യ കമ്മിഷൻ തീർപ്പിൽ കണ്ടത്. നമ്മുടെ പ്രധാനപ്പെട്ടതും ന്യായവുമായ ഒട്ടെല്ലാ ആവശ്യങ്ങളും അവഗണിക്കപ്പെട്ടു. ഇത് കേരളത്തിന്റെ വികസന-ക്ഷേമപ്രവർത്തനങ്ങളെ താറുമാറാക്കുന്ന സ്ഥിതിയാണുള്ളത്. ഈ സാഹചര്യം എങ്ങനെ നേരിടുകയും അതിജീവിക്കുകയും ചെയ്യാം എന്നത് ഗൗരവമുള്ള ചർച്ച ആവശ്യപ്പെടുന്നു. ഇതിനുള്ള വേദിയാണ് അഞ്ചാമത് അന്താരാഷ്ട്ര കേരളപഠന കോൺഗ്രസിലെ രണ്ടാം സിമ്പോസിയം.

20/02/2026

21/01/2024

Migration Conclave - 2024