സ്കൂൾ മുറ്റത്തെ തളിർത്തു നിൽക്കുന്ന നെല്ലിമരചോട്ടിലിരുന്നു ഞാൻ ആലോചിച്ചു. ഈ സ്കൂളിന് എന്തൊക്കെ കഥകൾ ഉണ്ടാകും! ചരിത്രമായി മാറിയ ഓലഷെഡും മൺമറഞ്ഞുപോയ ഗുരുനാഥന്മാരും നമ്മുടെ മുൻതലമുറയ്ക്ക് സമ്മാനിച്ച അക്ഷരവെളിച്ചത്തിന്റെ ബാക്കിപത്രമാണല്ലോ ഈ ഞാനും.ഏകാധ്യാപക വിദ്യാലയമായി ൧൯൧൭-ല് (1917)ആരംഭിച്ച ഈ വിദ്യാലയം ഇന്ന് ശതാബ്ദിയുടെ നിറവിലാണ്. മണിപ്രവാളത്തില് നിന്ന് അച്ചടിച്ച പാഠപുസ്തകത്തിലേക്കും DPEP യിലേക്കും
സര്വശിക്ഷാ അഭിയാനിലേക്കും മാറിയപ്പോൾ കാലം പതിപ്പിച്ച മാറ്റം വലുതായിരുന്നു. എണ്ണമറ്റ മേഖലകളിൽ പ്രവർത്തിക്കുന്ന ധാരാളം പേർക്ക് അക്ഷരവെളിച്ചം പകർന്നു കഴിഞ്ഞു ഈ വിദ്യാലയമുത്തശ്ശി. അമ്പലങ്ങളും കാവുകളും തറവാടുകളും കൈകോർത്തുനിൽക്കുന്ന ഒരു ഗ്രാമത്തിലെ ജനങ്ങളുടെ അജ്ഞതയുടെ അന്ധകാരം അകറ്റി വിദ്യകളുടെ സഹായത്തോടെ അറിവിന്റെ കൊടുമുടിയിലേക്ക് കുഞ്ഞുങ്ങളെ കൈ പിടിച്ചുയർത്താൻ ഇന്നും, എന്നും സ്ക്കൂൾ സുസജ്ജമാണ്.
കാസറഗോഡ് ജില്ലയിലെ കാഞ്ഞങ്ങാട് മുനിസിപ്പാലിറ്റിയിൽ സ്ഥിതിചെയ്യുന്ന പുതുക്കൈ ജി.യു.പി സ്ക്കൂളിൽ ഒന്നുമുതല് ഏഴുവരെ ക്ലാസുകളിലായി ഇരുന്നൂറോളം കുട്ടികൾ പഠനം നടത്തുന്നു. തികച്ചും ഗ്രാമീണ അന്തരീക്ഷത്തില് നിലകൊള്ളുന്ന ഈ വിദ്യാലയത്തിന് പുതുക്കൈ, പട്ടേന, ചിറപ്പുറം, കൊഴുന്തിൽ , മൂലപ്പള്ളി, വാഴുന്നോറൊടി തുടങ്ങിയ പ്രദേശങ്ങളാണ് ജീവന് നല്കുന്നത്.
