Dr Bindu kenth Distt coordinator pol science SBS Nagar

ਅੱਜ ਅਨੰਦਪੁਰ ਸਾਹਿਬ ਦੀ ਪਵਿੱਤਰ ਧਰਤੀ ਤੇ ਪੰਜਾਬ ਸਰਕਾਰ ਵਲੋਂ ਮੌਕ ਵਿਧਾਨ ਸਭਾ ਦਾ ਪਹਿਲੀ ਵਾਰ ਆਯੋਜਨ ਕੀਤਾ ਗਿਆ!ਜਿਸ ਵਿਚ ਆਪਣੇ ਜ਼ਿਲ੍ਹੇ ਦੇ 3 ਐਮ ਐਲ ਏ ਹਲਕਾ ਵਾਇਜ
ਨਵਾਂ ਸ਼ਹਿਰ ਤੋਂ ਡਾ ਨਛੱਤਰ ਪਾਲ,
ਬੰਗਾ ਹਲਕੇ ਤੋਂ ਡਾ ਸੁੱਖਵਿੰਦਰ ਕੁਮਾਰ ਸੁਖੀ,
ਬਲਾਚੌਰ ਹਲਕੇ ਤੋਂ ਸ੍ਰੀਮਤੀ ਸੰਤੋਸ਼ ਕਟਾਰੀਆ ਦੀ ਨੁਮਾਇੰਦਗੀ ਲਈ ਸਰਕਾਰੀ ਸਕੂਲ ਦੇ 11ਵੀਂ ਅਤੇ 12ਵੀਂ ਜਮਾਤ ਦੇ ਵਿਦਿਆਰਥੀਆਂ ਦੀ ਚੋਣ ਕੀਤੀ ਗਈ!
ਮਾਣਯੋਗ ਸਪੀਕਰ ਪੰਜਾਬ ਸ. ਕੁਲਤਾਰ ਸਿੰਘ ਸੰਧਵਾਂ, ਡਿਪਟੀ ਸਪੀਕਰ ਸ. ਜੈ ਕ੍ਰਿਸ਼ਨ ਸਿੰਘ ਰੋੜੀ ਅਤੇ ਸਿਖਿਆ ਮੰਤਰੀ ਸ ਹਰਜੋਤ ਸਿੰਘ ਬੈਂਸ ਨੇ ਵਿਦਿਆਰਥੀਆਂ ਦੀ ਹੌਸਲਾ ਅਫ਼ਜਾਈ ਇਸ ਮੌਕੇ ਵਿਰਾਜਮਾਨ ਰਹਿ ਕੇ ਕੀਤੀ!
ਆਪਣੇ ਟੀਮ ਮੇਂਬਰਸ ਦੀ ਧੰਨਵਾਦੀ ਹਾਂ ਜਿਨ੍ਹਾਂ ਨੇ ਇਸ ਕੰਮ ਨੂੰ ਨੇਪਰੇ ਚਾੜ੍ਹੀਆ!
ਮਾਣਯੋਗ ਜ਼ਿਲ੍ਹਾ ਸਿਖਿਆ ਅਫ਼ਸਰ ਮੈਡਮ ਅਨੀਤਾ ਸ਼ਰਮਾ ਜੀਂ ਦਾ, ਉਪ ਸਿਖਿਆ ਅਫ਼ਸਰ ਸ੍ਰੀ ਲਖਵੀਰ ਸਿੰਘ ਜੀ ਦਾ ਜਿਨ੍ਹਾਂ ਨੇ ਮੇਰੇ ਤੇ ਭਰੋਸਾ ਕਰਕੇ ਇਹ ਕੰਮ ਮੈਨੂੰ ਸੌਂਪੀਆਂ!

ਅੱਜ ਦਾ ਵਿਚਾਰ(1ਨਵੰਬਰ)ਅਜ਼ਾਦੀ ਤੋਂ ਭਾਵ ਗਰੀਬੀ ਤੇ ਅਨਪੜਤਾ ਦਾ ਖਾਤਮਾ ਹੋਵੇ,ਦੇਸ਼ ਦੇ ਲੱਖਾਂ ਮਿਹਨਤਕਸ਼ ਲੋਕਾਂ ਨੂੰ ਰਹਿਣ ਸਹਿਣ, ਸਿਹਤ, ਸਿੱਖਿਆ, ਘੱਟੋ- ਘੱਟ ਦੋ ਵੇਲੇ ਭੋਜਨ ਦੀ ਸਹੂਲਤ ਮਿਲੇ ਤੇ ਹਰੇਕ ਨੂੰ ਲਿਖਣ ਬੋਲਣ ਦਾ ਅਧਿਕਾਰ ਹੋਵੇ।
🌹🌹🪴🪴🌻🌻🌸🌸🌹💥🌳🌴☀️🪴🌻🌹
ਅੱਜ ਦੇ ਦਿਨ:1-11-1858 ਬ੍ਰਿਟਿਸ਼ ਸਰਕਾਰ ਨੇ ਭਾਰਤ ਦਾ ਰਾਜ ਪ੍ਰਬੰਧ ਈਸਟ ਇੰਡੀਆ ਕੰਪਨੀ ਤੋਂ ਲੈ ਕੇ ਆਪਣੇ ਹੱਥ ਵਿੱਚ ਕਰ ਲਿਆ।
1913 ਗਦਰ ਅਖ਼ਬਾਰ ਦਾ ਪਹਿਲਾ ਅੰਕ ਜਾਰੀ ਹੋਇਆ।
1956 ਪੰਜਾਬ ਤੇ ਪੈਪਸੂ ਨੂੰ ਮਿਲਾ ਕੇ ਇਕ ਸੂਬਾ ਬਣਾਇਆ ਗਿਆ।
1966 ਭਾਸ਼ਾ ਦੇ ਅਧਾਰ ਤੇ ਪੰਜਾਬ ਹੋਂਦ ਵਿੱਚ ਆਇਆ।
1984 ਦਿੱਲੀ ਵਿੱਚ ਸਿੱਖਾਂ ਦਾ ਕਤਲੇਆਮ।
2007 ਬਾਲ ਵਿਆਹ ਰੋਕੂ ਕਾਨੂੰਨ-2006 ਲਾਗੂ।

🌹🌹🌸🌱🌼🪴🌻🌻🪴🌼🌹🌸🌼🌹☀️🌱
*ਮਾਝਾ* ਮਾਝਾ (Majha) ਸਾਂਝੇ ਪੰਜਾਬ ਦਾ ਸਭ ਤੋਂ ਅਹਿਮ ਖੇਤਰ ਹੈ। ਮਾਝੇ ਦੀ ਬੋਲੀ ਨੂੰ ਪੰਜਾਬ ਦੀ ਸਟੈਂਡਰਡ ਬੋਲੀ ਵੱਜੋਂ ਰਜਿਸਟਰਡ ਕੀਤਾ ਗਿਆ ਹੈਂ। ਲਾਹੌਰ, ਅੰਮ੍ਰਿਤਸਰ (Lahore, Amritsar) ਮਾਝੇ ਦੇ ਸਭ ਤੋਂ ਮੁੱਖ ਸ਼ਹਿਰ ਹਨ। ਮਾਝਾ ਪੰਜਾਬ ਦਾ ਸਭ ਤੋਂ ਵਿਕਸਿਤ ਇਲਾਕਾ ਮੰਨਿਆ ਜਾਂਦਾ ਹੈ। ਪੰਜਾਬ ਦੇ ਵਿੱਚੋਂ ਵਿੱਚ ਕੇਂਦਰ ਵਿੱਚ ਹੋਣ ਕਰਕੇ ਇਸ ਨੂੰ ਮਾਝਾ ਕਿਹਾ ਜਾਂਦਾ ਹੈਂ। ਮਾਝੇ ਦੇ ਲੋਕਾਂ ਨੂੰ ਮਾਝੀ, ਮਝੈਲ ਕਿਹਾ ਜਾਂਦਾ ਹੈਂ। ਬਿਆਸ ਦਰਿਆ ਤੋਂ ਰਾਵੀ ਅਤੇ ਜੇਹਲਮ ਦਰਿਆ ਤੱਕ ਫੈਲਿਆ ਮਾਝੇ ਦਾ ਇਲਾਕਾ ਪੰਜਾਬ ਦਾ ਸਭ ਤੋਂ ਵੱਡਾ, ਪ੍ਮੁੱਖ ਖੇਤਰ ਹੈਂ। 1947 ਵਿੱਚ ਪੰਜਾਬ ਦੀ ਹੋਈ ਵੰਡ ਵਿੱਚ ਇੱਕਲਾ ਮਾਝਾ ਖੇਤਰ ਹੀ ਸੀ ਜੋ ਕਿ ਦੋਵੇਂ ਮੁਲਕਾਂ ਵਿੱਚ ਵੰਡਿਆ ਗਿਆ। ਲਾਹੌਰ, ਅੰਮ੍ਰਿਤਸਰ, ਗੁਜਰਾਂਵਾਲਾ, ਨਾਰੋਵਾਲ, ਗੁਰਦਾਸਪੁਰ, ਸਿਆਲਕੋਟ, ਗੁਜਰਾਤ, ਤਰਨਤਾਰਨ, ਕਸੂਰ, ਹਫੀਜਾਬਾਦ, ਸ਼ੇਖੁਪੂਰਾ, ਪਠਾਨਕੋਟ, ਨਨਕਾਣਾ ਸਾਹਿਬ, ਲਾਇਲਪੁਰ ਮਾਝੇ ਦੇ ਮੁੱਖ ਸ਼ਹਿਰ ਹਨ।

ਅਮਰੀਕੀ ਰਾਸ਼ਟਰਪਤੀ ਦੀ ਚੋਣ
ਅਮਰੀਕਾ ਵਿੱਚ ਰਾਸ਼ਟਰਪਤੀ ਨੂੰ ਵੋਟਰ ਸਿੱਧਾ ਨਹੀਂ ਚੁਣਦੇ, ਸਗੋਂ ਇਹ ਇਲੈਕਟੋਰਲ ਕਾਲਜ ਰਾਹੀਂ ਤੈਅ ਕੀਤਾ ਜਾਂਦਾ ਹੈ।ਜਦੋਂ ਅਮਰੀਕੀ ਵੋਟਰ ਰਾਸ਼ਟਰਪਤੀ ਦੀ ਚੋਣ ਲਈ ਵੋਟ ਪਾਉਂਦੇ ਹਨ ਤਾਂ ਉਹ ਅਸਲ ਵਿੱਚ ਅਧਿਕਾਰੀਆਂ ਦੇ ਇੱਕ ਸਮੂਹ ਨੂੰ ਆਪਣਾ ਵੋਟ ਦਿੰਦੇ ਹਨ, ਜੋ ਕਿ ਇਲੈਕਟੋਰਲ ਕਾਲਜ ਬਣਾਉਂਦੇ ਹਨ।
"ਕਾਲਜ" ਸ਼ਬਦ ਦਾ ਅਰਥ, ਅਜਿਹੇ ਲੋਕਾਂ ਦਾ ਸਮੂਹ ਹੈ ਜੋ ਇੱਕੋ ਜਿਹੇ ਕੰਮਾਂ ਨਾਲ ਜੁੜੇ ਹੋਣ। ਜਿਹੜੇ ਲੋਕ ਇਲੈਕਟਰਜ਼ ਹੁੰਦੇ ਹਨ ਉਨ੍ਹਾਂ ਦਾ ਕੰਮ ਰਾਸ਼ਟਰਪਤੀ ਅਤੇ ਉਪ-ਰਾਸ਼ਟਰਪਤੀ ਨੂੰ ਚੁਣਨਾ ਹੁੰਦਾ ਹੈ।
ਇਲੈਕਟੋਰਲ ਕਾਲਜ ਦੀ ਬੈਠਕ ਹਰ ਚਾਰ ਸਾਲ 'ਚ ਚੋਣਾਂ ਤੋਂ ਕੁਝ ਹਫ਼ਤੇ ਬਾਅਦ ਹੁੰਦੀ ਹੈ ਤਾਂਕਿ ਇਸ ਕੰਮ ਨੂੰ ਅਮਲੀ ਰੂਪ ਦਿੱਤਾ ਜਾ ਸਕੇ।
ਇਲੈਕਟੋਰਲ ਕਾਲਜ ਕਿਸ ਤਰ੍ਹਾਂ ਕੰਮ ਕਰਦਾ ਹੈ?
ਹਰ ਸੂਬੇ ਵਿੱਚ ਇਲੈਕਟਰਜ਼ ਦੀ ਗਿਣਤੀ ਮੋਟੇ ਤੌਰ 'ਤੇ ਉਸ ਸੂਬੇ ਦੀ ਅਬਾਦੀ ਦੇ ਅਨੁਪਾਤ ਵਿੱਚ ਹੁੰਦੀ ਹੈ।
ਕੁੱਲ ਇਲੈਕਟਰਜ਼ ਦੀ ਗਿਣਤੀ 538 ਹੈ।
ਹਰ ਸੂਬੇ ਵਿੱਚ ਇਲੈਕਟਰਜ਼ ਦੀ ਗਿਣਤੀ ਮੋਟੇ ਤੌਰ 'ਤੇ ਉਸ ਸੂਬੇ ਦੀ ਅਬਾਦੀ ਦੇ ਅਨੁਪਾਤ ਵਿੱਚ ਹੁੰਦੀ ਹੈ
ਕੈਲੀਫੋਰਨੀਆ ਵਿੱਚ ਸਭ ਤੋਂ ਵੱਧ 55 ਇਲੈਕਟਰ ਹਨ ਜਦੋਂਕਿ ਵਿਓਮਿੰਗ, ਅਲਾਸਕਾ ਅਤੇ ਉੱਤਰੀ ਡੈਕੋਟਾ ਵਰਗੇ ਕੁਝ ਸੂਬਿਆਂ 'ਚ ਇਨ੍ਹਾਂ ਦੀ ਗਿਣਤੀ ਘੱਟ ਤੋਂ ਘੱਟ ਤਿੰਨ ਹੈ।
ਹਰ ਇਲੈਕਟਰ ਇੱਕ ਇਲੈਕਟੋਰਲ ਵੋਟ ਦੀ ਨੁਮਾਇੰਦਗੀ ਕਰਦਾ ਹੈ ਅਤੇ ਕਿਸੇ ਵੀ ਉਮੀਦਵਾਰ ਨੂੰ ਰਾਸ਼ਟਰਪਤੀ ਦਾ ਅਹੁਦਾ ਜਿੱਤਣ ਲਈ 270 ਜਾਂ ਉਸ ਤੋਂ ਵੱਧ ਵੋਟਾਂ ਦੀ ਲੋੜ ਹੁੰਦੀ ਹੈ।
ਆਮ ਤੌਰ 'ਤੇ ਸੂਬੇ ਆਪਣੇ ਸਾਰੇ ਇਲੈਕਟੋਰਲ ਕਾਲਜ ਵੋਟਾਂ ਉਸੇ ਨੂੰ ਦਿੰਦੇ ਹਨ ਜਿਸ ਨੂੰ ਸੂਬੇ ਵਿੱਚ ਆਮ ਵੋਟਰਾਂ ਨੇ ਜਿਤਾਇਆ ਹੁੰਦਾ ਹੈ।
ਮਿਸਾਲ ਦੇ ਤੌਰ 'ਤੇ, ਜੇਕਰ ਰਿਪਬਲੀਕਨ ਉਮੀਦਵਾਰ ਨੂੰ ਟੈਕਸਸ ਵਿੱਚ 50.1 ਫ਼ੀਸਦ ਵੋਟਾਂ ਨਾਲ ਜਿੱਤ ਹਾਸਿਲ ਹੋਈ ਹੈ ਤਾਂ ਉਸ ਨੂੰ ਸੂਬੇ ਦੇ ਸਾਰੇ 38 ਇਲੈਕਟੋਰਲ ਕਾਲਜ ਵੋਟ ਦੇ ਦਿੱਤੇ ਜਾਣਗੇ।
ਸਿਰਫ਼ ਦੋ ਸੂਬਿਆਂ (ਮਾਈਨ ਅਤੇ ਨੋਬ੍ਰਾਸਕਾ) ਅਜਿਹੇ ਹਨ ਜੋ ਕਿ ਆਪਣੇ ਇਲੈਕਟੋਰਲ ਕਾਲਜ ਨੂੰ ਆਪਣੇ ਵੋਟਰਾਂ ਵੱਲੋਂ ਹਰ ਉਮੀਦਵਾਰ ਨੂੰ ਦਿੱਤੇ ਵੋਟਾਂ ਦੇ ਹਿਸਾਬ ਨਾਲ ਵੰਡਦੇ ਹਨ।
ਇਸੇ ਕਰਕੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਖ਼ਾਸ 'ਸਵਿੰਗ ਸਟੇਟਸ' ਨੂੰ ਨਿਸ਼ਾਨਾ ਬਣਾਉਂਦੇ ਹਨ।
ਇਹ ਅਜਿਹੇ ਸੂਬੇ ਹਨ ਜਿੱਥੇ ਵੋਟ ਕਿਸੇ ਵੀ ਪਾਸੇ ਜਾ ਸਕਦੇ ਹਨ। ਇਸੇ ਕਰਕੇ ਉਮੀਦਵਾਰ ਦੇਸ਼ ਭਰ ਵਿੱਚ ਜ਼ਿਆਦਾ ਤੋਂ ਜ਼ਿਆਦਾ ਵੋਟਾਂ ਹਾਸਿਲ ਕਰਨ ਦੀ ਕੋਸ਼ਿਸ਼ ਨਹੀਂ ਕਰਦੇ।
ਇਹ ਉਮੀਦਵਾਰ ਜਿੰਨੇ ਸੂਬਿਆਂ ਵਿੱਚ ਜਿੱਤਦੇ ਜਾਂਦੇ ਹਨ ਉਹ ਉਨ੍ਹਾਂ ਨੂੰ ਲੋੜੀਂਦੇ 270 ਇਲੈਕਟੋਰਲ ਕਾਲਜ ਵੋਟਾਂ ਦੇ ਨੇੜੇ ਲੈ ਜਾਂਦੇ ਹਨ।
ਕੀ ਅਜਿਹਾ ਹੋ ਸਕਦਾ ਹੈ, ਲੋਕਾਂ ਦੀਆਂ ਵੋਟਾਂ ਤਾਂ ਵੱਧ ਮਿਲੀਆਂ ਹੋਣ, ਫ਼ਿਰ ਵੀ ਤੁਸੀਂ ਰਾਸ਼ਟਰਪਤੀ ਨਾ ਬਣ ਸਕੋ?
ਹਾਂ, ਅਜਿਹਾ ਹੋ ਸਕਦਾ ਹੈ।
ਅਜਿਹਾ ਉਨ੍ਹਾਂ ਉਮੀਦਵਾਰਾਂ ਨਾਲ ਹੋ ਸਕਦਾ ਹੈ ਜੋ ਕਿ ਦੇਸ਼ ਭਰ ਵਿੱਚ ਸਭ ਤੋਂ ਵੱਧ ਹਰਮਨ ਪਿਆਰੇ ਹੋਣ ਪਰ ਉਹ 270 ਇਲੈਕਟੋਰਲ ਵੋਟ ਹਾਸਿਲ ਕਰਨ ਲਈ ਲੋੜੀਂਦੇ ਸੂਬਿਆਂ ਵਿੱਚ ਨਾ ਜਿੱਤੇ ਹੋਣ।
ਅਸਲ ਵਿੱਚ ਪਿਛਲੀਆਂ ਪੰਜ ਚੋਣਾਂ ਵਿੱਚੋਂ ਦੋ ਵਿੱਚ ਅਜਿਹੇ ਉਮੀਦਵਾਰ ਜਿੱਤੇ ਹਨ ਜਿਨ੍ਹਾਂ ਨੂੰ ਉਨ੍ਹਾਂ ਦੇ ਵਿਰੋਧੀ ਉਮੀਦਵਾਰਾਂ ਦੇ ਮੁਕਾਬਲੇ ਆਮ ਲੋਕਾਂ ਦੀਆਂ ਘੱਟ ਵੋਟਾਂ ਮਿਲੀਆਂ ਸਨ।
2016 ਵਿੱਚ ਡੌਨਲਡ ਟਰੰਪ ਨੂੰ ਹਿਲੇਰੀ ਕਲਿੰਟਨ ਦੇ ਮੁਕਾਬਲੇ ਤਕਰਕੀਬਨ 30 ਲੱਖ ਘੱਟ ਵੋਟਾਂ ਮਿਲੀਆਂ ਸਨ ਪਰ ਉਹ ਰਾਸ਼ਟਰਪਤੀ ਬਣ ਗਏ, ਕਿਉਂਕਿ ਇਲੈਕੋਟਰਲ ਕਾਲਜ ਨੇ ਉਨ੍ਹਾਂ ਨੂੰ ਬਹੁਮਤ ਦੇ ਦਿੱਤਾ ਸੀ।
2000 ਵਿੱਚ ਜੌਰਜ ਡਬਲਯੂ ਬੁਸ਼ ਨੇ 271 ਇਲੈਕੋਰਲ ਵੋਟ ਜਿੱਤੇ ਸੀ। ਹਾਲਾਂਕਿ, ਡੈਮੋਕਰੈਟਿਕ ਉਮੀਦਵਾਰ ਅਲ ਗੌਰ ਨੂੰ ਆਮ ਲੋਕਾਂ ਤੋਂ ਪੰਜ ਲੱਖ ਤੋਂ ਵੱਧ ਵੋਟਾਂ ਮਿਲੀਆਂ ਸਨ।
ਅਜਿਹਾ ਸਿਸਟਮ ਕਿਉਂ ਬਣਾਇਆ ਗਿਆ ਸੀ?
ਜਦੋਂ 1787 ਵਿੱਚ ਅਮਰੀਕੀ ਸੰਵਿਧਾਨ ਤਿਆਰ ਹੋ ਰਿਹਾ ਸੀ ਉਦੋਂ ਆਮ ਲੋਕਾਂ ਦੁਆਰਾ ਚੁਣੇ ਗਏ ਵਿਅਕਤੀ ਨੂੰ ਰਾਸ਼ਟਰਪਤੀ ਬਣਾਉਣਾ ਅਮਲੀ ਰੂਪ ਵਿੱਚ ਅਸੰਭਵ ਸੀ। ਅਜਿਹਾ ਦੇਸ਼ ਦੇ ਅਕਾਰ ਅਤੇ ਸੰਚਾਰ ਦੀ ਮੁਸ਼ਕਿਲ ਕਾਰਨ ਸੀ।

ਅੱਜ ਦਾ ਵਿਚਾਰ (10 ਅਕਤੂਬਰ) ਹਰ ਵਿਅਕਤੀ ਸਰੀਰਕ ਤੌਰ ਤੇ ਰੋਗੀ ਹੋਣ ਕਾਰਨ ਇਲਾਜ ਕਰਵਾਉਦਾ ਹੈ ਪਰ ਮਾਨਸਿਕ ਰੋਗੀ ਹੋਣ ਤੇ ਵਿਅਕਤੀ ਆਪਣੇ ਆਪ ਨੂੰ ਠੀਕ ਸਮਝਦਾ ਹੈ।

ਅੱਜ ਦੇ ਦਿਨ :10-10-1756 ਗਵਰਨਰ ਜਨਰਲ ਰਾਬਰਟ ਕਲਾਈਵ ਨੇ ਕਲਕੱਤੇ ਉਪਰ ਦੁਬਾਰਾ ਕਬਜਾ ਕੀਤਾ।
1955 ਮੁੱਖ ਮੰਤਰੀ ਭੀਮ ਸੈਨ ਸਚਰ ਨੇ 4 ਜੁਲਾਈ 1955 ਨੂੰ ਦਰਬਾਰ ਸਾਹਿਬ ਵਿੱਚ ਪੁਲਿਸ ਭੇਜਣ ਲਈ ਮੁਆਫੀ ਮੰਗੀ।
2011 ਪ੍ਰਸਿੱਧ ਗਜ਼ਲ ਜਗਜੀਤ ਸਿੰਘ ਦਾ ਦਿਹਾਂਤ।
2014 ਸਭ ਤੋਂ ਛੋਟੀ ਉਮਰ ਵਿੱਚ ਪਾਕਿਸਤਾਨ ਦੀ ਯੂਸਫਜਾਦੀ ਮਲਾਲਾ ਨੂੰ ਸ਼ਾਂਤੀ ਲਈ ਨੋਬਲ ਇਨਾਮ।
World Mental Health Day
ਵਿਸ਼ਵ ਮਾਨਸਿਕ ਸਿਹਤ (ਦਿਮਾਗੀ )ਦਿਵਸ: ਗਲੋਬਲ ਮਾਨਸਿਕ ਸਿਹਤ ਸਿੱਖਿਆ,ਜਾਗਰੂਕਤਾ ਅਤੇ ਵਕਾਲਤ ਲਈ ਇੱਕ ਦਿਹਾੜਾ ਹੈ।ਪਹਿਲੀ ਵਾਰ 150 ਤੋਂ ਵੱਧ ਦੇਸ਼ਾਂ ਵਿੱਚ ਸੰਪਰਕ ਅਤੇ ਮੈਂਬਰਾਂ ਵਾਲੇ ਗਲੋਬਲ ਮਾਨਸਿਕ ਸਿਹਤ ਸੰਗਠਨ,ਵਿਸ਼ਵ ਮਾਨਸਿਕ ਸਿਹਤ ਫੈਡਰੈਸ਼ਨ ਦੀ ਪਹਿਲਕਦਮੀ ਨਾਲ 1992 ਵਿੱਚ ਇਹ ਦਿਨ ਮਨਾਉਣਾ ਸ਼ੁਰੂ ਕੀਤਾ ਗਿਆ ਸੀ। ਹਰ ਵਾਰ ਅਕਤੂਬਰ ਦੇ ਇਸ ਦਿਨ, ਮਾਨਸਿਕ ਬਿਮਾਰੀ ਅਤੇ ਲੋਕਾਂ ਦੇ ਜੀਵਨ ਤੇ ਇਸ ਦੇ ਪ੍ਰਮੁੱਖ ਪ੍ਰਭਾਵਾਂ ਵੱਲ ਧਿਆਨ ਖਿੱਚਣ ਲਈ ਹਜ਼ਾਰਾਂ ਸਮਰਥਕ ਇਸ ਸਾਲਾਨਾ ਜਾਗਰੂਕਤਾ ਪ੍ਰੋਗਰਾਮ ਨੂੰ ਮਨਾਉਣ ਲਈ ਅੱਗੇ ਆਉਂਦੇ ਹਨ।
ਕੁਝ ਦੇਸ਼ਾਂ ਵਿੱਚ ਇਹ ਦਿਨ ਇੱਕ ਜਾਗਰੂਕਤਾ ਹਫਤੇ ਦਾ ਹਿੱਸਾ ਹੈ,ਜਿਵੇਂ ਅਮਰੀਕਾ ਵਿੱਚ ਮਾਨਸਿਕ ਬਿਮਾਰੀ ਜਾਗਰੂਕਤਾ ਹਫਤਾ ਅਤੇ ਆਸਟਰੇਲੀਆ ਵਿੱਚ ਮਾਨਸਿਕ ਸਿਹਤ ਹਫ਼ਤਾ ਮਨਾਇਆ ਜਾਂਦਾ ਹੈ।ਮਾਨਸਿਕ ਰੋਗ ਉਨਾਂ ਲੋਕਾਂ ਵਿੱਚ ਹੁੰਦੇ ਹਨ ਜੋ ਮਾਨਸਿਕ ਤੌਰ ਤੇ ਕਮਜੋਰ ਤੇ ਆਤਮ-ਵਿਸ਼ਵਾਸਹੀਣ ਹੁੰਦੇ।
ਭਾਰਤ ਵਿਚ ਮਾਨਸਿਕ ਰੋਗਾਂ ਦੇ ਮਾਹਿਰ ਡਾਕਟਰ ਬਹੁਤ ਘੱਟ ਭਾਵ ਦਸ ਲੱਖ ਲੋਕਾਂ ਪਿੱਛੇ ਤਿੰਨ ਹਨ।ਮਾਨਸਿਕ ਰੋਗਾਂ ਬਾਰੇ ਸਮਝ ਦੀ ਘਾਟ ਕਾਰਨ ਲੋਕ ਇਸਨੂੰ ਬਿਮਾਰੀ ਨਹੀ ਸਮਝਦੇ, ਰਿਸ਼ਤੇਦਾਰ, ਦੋਸਤ, ਮਿੱਤਰ ਜਾਂ ਗੁਆਂਢੀ ਦੇ ਕਹਿਣ ਤੇ ਅਜਿਹੇ ਲੋਕ ਧਾਗੇ ਤਵੀਤ ਕਰਨ ਵਾਲਿਆਂ, ਡੇਰਿਆਂ, ਬਾਬਿਆਂ ਦੇ ਪਿੱਛੇ ਪਿੱਛੇ ਤੁਰੇ ਫਿਰਦੇ ਹਨ।ਕਈ ਕਹਿਣਗੇ ਇਸਨੂੰ ਉਪਰੀ ਕਸਰ ਹੈ,ਉਪਰੀ ਹਵਾ ਹੈ,ਕਿਸੇ ਨੇ ਕੁਝ ਕੀਤਾ ਕਰਾਇਆ ਹੈ,ਤਵੀਤ ਪਾਏ ਹਨ,ਭੂਤ ਝਿੰਬੜਿਆ ਹੈ,ਇਸ ਉਪਰ ਸ਼ਨੀ ਜਾਂ ਮੰਗਲ ਗਰਿਹਾਂ ਦੀ ਕਰੋਪੀ ਹੈ।
ਵਿਸ਼ਵ ਵਿੱਚ 45 ਕਰੋੜ ਤੇ ਸਭ ਤੋਂ ਵੱਧ 36 ਫੀਸਦੀ ਮਾਨਸਿਕ ਤਣਾਅ ਤੋਂ ਪੀੜਤ ਰੋਗੀ ਜਾਂ ਮਾਨਸਿਕ ਰੋਗੀ(15 ਤੋੰ 29 ਸਾਲ ਦੇ )ਭਾਰਤ ਵਿੱਚ ਹਨ।90% ਆਪਣੇ ਆਪ ਨੂੰ ਰੋਗੀ ਨਹੀ ਸਮਝਦੇ।ਔਰਤਾਂ 60% ਤੇ ਮਰਦ 40% ਰੋਗੀ ਹੁੰਦੇ ਹਨ।
WHO ਮੁਤਾਬਿਕ ਹਰ ਦਸਵਾਂ ਭਾਰਤੀ ਮਾਨਸਿਕ ਰੋਗੀ ਹੈ। WHO ਦੇ ਡਾਇਰੈਕਟਰ ਜਨਰਲ ਡਾਕਟਰ ਮਾਰਗੇਟਚਾਨ ਦੇ ਨੇ ਕਿਹਾ ਹੈ ਕਿ ਇਹ ਅੰਕੜੇ ਵੇਖ ਕੇ ਸਾਰੇ ਦੇਸ਼ਾਂ ਨੂੰ ਅੱਖਾਂ ਖੋਲ ਲੈਣੀਆਂ ਚਾਹੀਦੀਆਂ ਹਨ।ਉਨਾਂ ਨੂੰ ਮਾਨਸਿਕ ਸਿਹਤ ਬਾਰੇ ਆਪਣੇ ਨਜ਼ਰੀਏ ਤੇ ਮੁੜ ਵਿਚਾਰ ਕਰਨਾ ਚਾਹੀਦਾ ਹੈ। 2005 ਤੋਂ 2015 ਤਕ ਇਨਾਂ ਲੋਕਾਂ ਦੀ ਗਿਣਤੀ ਵਿਚ 18 ਫੀਸਦੀ ਵਾਧਾ ਹੋਇਆ ਹੈ।
WHO ਨੇ ਇਕ ਲੰਮੀ ਮੁਹਿੰਮ ਸ਼ੁਰੂ ਕੀਤੀ ਹੈ ਜਿਸਦਾ ਉਦੇਸ਼ ਤਣਾਅ ਪੀੜਤ ਲੋਕਾਂ ਦੀ ਮਦਦ ਲਈ ਅੱਗੇ ਆਉਣ ਨੂੰ ਉਤਸ਼ਾਹਤ ਕਰਨਾ।ਲੋਕਾਂ ਵਲੋਂ ਸਹਿਯੋਗ ਨਾ ਮਿਲਣ ਕਰਕੇ ਇਸ ਸਮਾਜਿਕ ਸੋਚ ਕਾਰਨ ਤਣਾਅ ਪੀੜਤ ਇਲਾਜ ਨਹੀਂ ਕਰਾਉਦੇ।ਜਦ ਕਿ ਸਿਹਤਮੰਦ ਜੀਵਨ ਲਈ ਇਹ ਜਰੂਰੀ ਹੈ।ਪੀ ਜੀ ਆਈ ਚੰਡੀਗੜ੍ਹ ਦੇ ਸਾਈਕੈਟਰੀ ਵਿਭਾਗ 'ਚ ਮਾਨਸਿਕ ਰੋਗੀਆਂ ਲਈ ਨਵੀਂ ਕਿਸਮ ਦਾ ਇਲਾਜ RTMS ( ਰੋਪੀਟੇਟਿਵ ਟਰਾਂਸ ਕਾਰਨੀਅਲ ਮੈਗਨੇਟਿਕ ਸਟੀਮੂਲੇਸ਼ਨ) ਸ਼ੁਰੂ ਕੀਤਾ ਗਿਆ।ਇਹ ਉਹ ਤਕਨੀਕ ਹੈ ਜਿਸ ਵਿੱਚ ਖੋਪੜੀ ਤੇ ਇੰਸੁਲੈਟਿਡ ਕਾਇਲ ਰੱਖ ਕੇ ਮੈਗਨੇਟਿਕ ਫੀਲਡ ਜਨਰੇਟ ਕੀਤੀ ਜਾਂਦੀ ਹੈ।ਇਹ ਹਲਕਾ ਜਿਹਾ ਬਿਜਲੀ ਝਟਕਾ ਕਰੰਟ ਪੈਦਾ ਕਰਦੀ ਹੈ ਜੋ ਨਿਊਰਲ (ਦਿਮਾਗ ਦੇ ਸੈਲਾਂ ਦਾ ਸਰਕਟ) ਸਿਸਟਮ ਨੂੰ ਸਰਗਰਮ ਕਰੇਗਾ।ਇਸ ਇਲਾਜ ਵਿੱਚ ਕਿਸੇ ਤਰਾਂ ਦੀ ਦਵਾਈ,ਇੰਡਕਸ਼ਨ ਦੀ ਲੋੜ ਨਹੀਂ।ਡਿਸਆਰਡਰ ਦੇ ਮਰੀਜ ਜੋ ਹੋਰਨਾਂ ਤਰੀਕਾ ਨਾਲ ਠੀਕ ਨਹੀਂ ਹੁੰਦੇ,ਉਨਾਂ ਲਈ ਇਹ ਕਾਰਗਰ ਹੈ।
ਅੰਕੜਿਆਂ ਅਨੁਸਾਰ 79% ਬੱਚੇ ਦੇਰ ਨਾਲ ਜਨਮ ਲੈਣ ਕਾਰਨ 12% ਜੀਨਜ ਦੀ ਗੜਬੜੀ ਕਰਕੇ ਤੇ 9% ਗਰਭ ਦੌਰਾਨ ਗਲਤ ਦਵਾਈਆਂ ਦੀ ਵਰਤੋਂ ਕਰਕੇ ਮਾਨਸਿਕ ਰੋਗੀ ਹੋ ਜਾਂਦੇ ਹਨ।
ਲੱਛਣ
ਨੀਂਦ ਘੱਟ ਆਉਣੀ,ਚਿੰਤਾ ਕਰਨੀ, ਵਾਧੂ ਗਲਾਂ ਸੋਚਣਾ, ਜਿਆਦਾ ਦਬਾਅ ਵਿੱਚ ਰਹਿਣਾ,ਜਿਆਦਾ ਬੋਲਣਾ, ਦੂਜਿਆਂ ਦੀ ਗਲ ਨਾ ਸੁਣਨਾ ਤੇ ਉਨਾਂ ਦੇ ਕੰਮਾਂ ਵਿੱਚ ਦਖਲ ਦੇਣਾ,ਆਪਣੇ ਆਪ ਨੂੰ ਸਿਆਣਾ ਸਮਝਣਾ, ਸੈਕਸ ਰੁਚੀ ਦੀ ਘਾਟ,ਝਗੜਾ ਕਰਨਾ, ਖਿਝਣਾ, ਹਿੰਸਾਤਮਕ ਰਵੱਈਆ, ਉਦਾਸੀ, ਆਤਮ ਵਿਸ਼ਵਾਸ ਦੀ ਘਾਟ, ਘਬਰਾਹਟ ਆਦਿ।
ਵਾਤਾਵਰਣ ਤਣਾਅ,ਘਰੇਲੂ ਕਲੇਸ਼, ਤਲਾਕ,ਕੰਮ ਦਾ ਬੋਝ, ਵਹਿਮ ਹੋਣਾ, ਆਰਥਿਕ ਹਾਲਤ ਕਮਜੋਰ ਹੋਣੇ, ਕਿਸੇ ਕਾਰਨ ਸਵੈਮਾਨ ਘਟ ਹੋਣਾ,ਅਚਾਨਕ ਹੋਈ ਮੌਤ ਦਾ ਸਦਮਾ, ਸੱਟ, ਹਾਦਸਾ, ਬਲਾਤਕਾਰ,ਹਿੰਸਾ,ਮਨੋਵਿਗਿਆਨ ਹਾਦਸਾ ਆਦਿ ਕਾਰਣ ਹਨ।ਮਾਨਸਿਕ ਰੋਗੀਆਂ ਦਾ ਇਲਾਜ ਮਾਨਸਿਕ ਰੋਗਾਂ ਦੇ ਮਾਹਿਰ ਡਾਕਟਰਾਂ ਤੋਂ ਹੀ ਕਰਵਾਉਣਾ ਚਾਹੀਦਾ ਹੈ।
ਕਈ ਵਾਰ ਮਾਪੇ ਬੱਚੇ ਨੂੰ ਹੋਰ ਕੁਝ ਬਣਾਉਣਾ ਚਾਹੁੰਦੇ ਹਨ ਜਦ ਕਿ ਬੱਚੇ ਦਾ ਹੋਰ ਕੁਝ ਬਣਨਾਂ ਚਾਹੁੰਦਾ ਹੈ, ਉਸ ਉਪਰ ਬਣਾਇਆ ਦਬਾਅ ਉਸਦੀ ਮਾਨਸਿਕ ਹਾਲਤ ਨੂੰ ਵਿਗਾੜਦਾ ਹੈ।ਇਸੇ ਤਰਾਂ ਜਿੰਦਗੀ ਦੀ ਤੇਜ ਦੌੜ ਵਿੱਚ ਛੋਟੇ ਛੋਟੇ ਬੱਚਿਆਂ ਉਪਰ ਪੜਾਈ ਦਾ ਵਾਧੂ ਬੋਝ ਪਾ ਰਹੇ ਹਾਂ।ਉਨਾਂ ਨੂੰ ਸਰੀਰਕ ਖੇਡਾਂ ਵੱਲ ਆਉਣ ਹੀ ਨਹੀਂ ਦਿੰਦੇ।ਚੰਗੀ ਸਿਹਤ ਦੇ ਨਾਲ ਨਾਲ ਵਿਅਕਤੀ ਨੂੰ ਦਿਮਾਗੀ ਤੌਰ ਤੇ ਤੰਦਰੁਸਤ ਹੋਣਾ ਜਰੂਰੀ ਹੈ।

ਅੱਜ ਦਾ ਵਿਚਾਰ( 9 ਅਕਤੂਬਰ) ਚਾਪਲੂਸੀ ਤੇ ਫਫੜੇਬਾਜੀ ਨੂੰ ਰੱਦ ਕਰਕੇ,ਆਪਣੇ ਮੂੰਹੋਂ ਮੀਆਂ ਮਿੱਠੂ ਬਣਨ ਦੀ ਥਾਂ ਆਪਣੇ ਸਖਤ ਨੁਕਤਾਚੀਨ ਬਣੋ ( ਕਾ.ਚੀ ਗੁਵੇਰਾ)

ਅੱਜ ਦੇ ਦਿਨ :9-10-1876 ਪਹਿਲੀ ਵਾਰ ਬਿਨਾਂ ਤਾਰ ਦੇ ਟੈਲੀਫੋਨ ਤੇ ਗੱਲਬਾਤ!
1967 ਦੱਖਣੀ ਅਮਰੀਕਾ ਦੇ ਇਨਕਲਾਬੀ ਹੀਰੋ ਐਰਨੈਸਟੋ ਚੀ ਗੁਵੇਰਾ ਦੀ ਬੋਲੀਵੀਆ ਦੇਸ਼ ਵਿੱਚ ਹੱਤਿਆ।
2012 ਤਾਲਬਿਨਾਂ ਵਲੋਂ ਲੜਕੀਆਂ ਲਈ ਸਿੱਖਿਆ ਦੇ ਪ੍ਰਚਾਰ ਕਰਨ ਤੇ ਮਲਾਲਾ ਨੂੰ ਗੋਲੀ ਮਾਰੀ ਗਈ।
ਵਿਸ਼ਵ ਡਾਕ ਦਿਵਸ।
ਕਾਮਰੇਡ ਚੀ ਗੁਵੇਰਾ :-ਇਸ ਮਹਾਨ ਇਨਕਲਾਬੀ ਯੋਧੇ ਦਾ ਜਨਮ 14 ਜੂਨ 1928 ਨੂੰ ਅਰਜਨਟਾਇਨਾ ਦੇ ਸ਼ਹਿਰ ਰੋਜੇਰੀਉ ਵਿੱਚ ਡਾਨ ਅਰਨੈਸਟੋ ਗਵੇਰਾ ਲਿੰਚ ਦੇ ਘਰ ਹੋਇਆ।ਉਸ ਦੇ ਪਿਤਾ ਦਾ ਕਹਿਣਾ ਸੀ ਕਿ ਆਰਥਿਕ ਹਾਲਤ ਕਮਜੋਰ ਹੋਣ ਦੇ ਬਾਵਜੂਦ ਉਹ ਆਪਣੇ ਪੰਜਾਂ ਬੱਚਿਆਂ ਨੂੰ ਉਚੇਰੀ ਵਿਦਿਆ ਦਿਵਾਉਣ ਵਿਚ ਸਫਲ ਰਿਹਾ।ਮੈਨੂੰ ਸਭ ਤੋਂ ਵੱਧ ਮਾਣ ਆਪਣੇ ਪੁੱਤਰ ਅਰਨੈਸਟੋ ਚੀ ਗੁਵੇਰਾ ਤੇ ਹੈ ਜਿਸਨੂੰ ਮੈਂ 'ਟਿਟੀ' ਨਾਂ ਨਾਲ ਬੁਲਾਉਂਦਾ ਸੀ, ਉਹ ਇਕ ਸੱਚਾ ਮਨੁੱਖ ਤੇ ਅਸਲੀ ਯੋਧਾ ਸੀ।ਬਚਪਨ ਤੋਂ ਹੀ ਦਮੇ ਦਾ ਰੋਗੀ ਹੋਣ ਕਾਰਣ ਉਸਨੇ ਡਾਕਟਰ ਬਨਣ ਦਾ ਫੈਸਲਾ ਕਰ ਲਿਆ। ਅਰਜਨਟਾਇਨਾ ਦੀ ਰਾਜਧਾਨੀ ਤੋਂ ਡਾਕਟਰੀ ਦੀ ਡਿਗਰੀ ਹਾਸਲ ਕੀਤੀ ਤੇ ਪੜਾਈ ਦੌਰਾਨ 1953 ਵਿਚ ਉਹ ਇਕ ਸਾਥੀ ਨਾਲ ਮੋਟਰਸਾਇਕਲ ਤੇ ਕੋਲੰਬੀਆ,ਪੀਰੂ,ਚਿਲੀ ਤੇ ਵੈਨਜੂਏਲਾ ਗਿਆ।ਅਗਲੇ ਸਾਲ ਉਸਨੇ ਬੋਲੀਵੀਆ,ਏਕੁਆਡੋਰ, ਕੋਲੰਬੀਆਂ,ਕੋਸਟਰੀਕਾ,ਪਨਾਮਾ ਵਰਗੇ ਲਤੀਨੀ ਅਮਰੀਕੀ ਦੇਸ਼ਾਂ ਦਾ ਦੌਰਾ ਕੀਤਾ।ਉਥੋਂ ਦੇ ਲੋਕਾਂ ਦੀ ਗਰੀਬੀ ਤੇ ਦੁੱਖ ਦਰਦ ਵੇਖਕੇ ਕੁਝ ਕਰਨ ਦਾ ਫੈਸਲਾ ਕੀਤਾ।ਗੁਆਟੇਮਾਲਾ ਦੀ ਸਰਕਾਰ ਜੋ ਅਮਰੀਕਾ ਦੀ ਵਿਰੋਧੀ ਸੀ ਉਸ ਵਿੱਚ ਨੌਕਰੀ ਕਰ ਲਈ।ਅਮਰੀਕੀਆਂ ਨੇ ਰਾਜਧਾਨੀ ਤੇ ਬੰਬਾਂ ਨਾਲ ਹਮਲਾ ਕਰ ਦਿੱਤਾ ਤੇ ਚੀ ਗਵੇਰਾ ਨੇ ਪੂਰੀ ਮੱਦਦ ਕੀਤੀ।ਫਿਰ ਉਹ ਮੈਕਸੀਕੋ ਵਿੱਚ ਦਿਲ ਦੇ ਰੋਗਾਂ ਦੇ ਹਸਪਤਾਲ ਨੌਕਰੀ ਕਰਨ ਲੱਗ ਪਿਆ।ਜਦ ਉਸਨੂੰ ਪਤਾ ਲੱਗਾ ਕਿ ਕਿਉਬਾ ਵਿੱਚ ਫੀਡਲ ਕਾਸਟਰੋ ਇਨਕਲਾਬ ਦੀ ਜੰਗ ਲੜ ਰਿਹਾ ਹੈ ਤਾਂ ਉਹ ਉਸਦਾ ਸਾਥੀ ਬਣ ਗਿਆ।ਉਹ ਫੀਡਲ ਕਾਸਟਰੋ ਦੇ ਨਾਲ ਉਨਾਂ 81 ਸਾਥੀਆਂ ਵਿੱਚ ਸ਼ਾਮਲ ਸੀ ਜੋ ਬੇੜੀ ਰਾਂਹੀ 25-11-1956 ਨੂੰ ਕਿਉਬਾ ਵਿੱਚ ਦਾਖਲ ਹੋਣ ਦਾ ਯਤਨ ਕਰ ਰਹੇ ਸਨ ਪਰ ਕਿਉਬਾ ਦੇ ਤਾਨਸ਼ਾਹ ਬਾਤਸਿਤਾ ਦੀਆਂ ਫੌਜਾਂ ਨੇ ਕੰਢੇ ਲਾਗੇ ਪਹੁੰਚਣ ਤੇ ਹਵਾਈ ਹਮਲਾ ਕਰ ਦਿਤਾ।ਉਨਾਂ ਵਿਚੋਂ ਸਿਰਫ 12 ਹੀ ਜਿਉਦੇ ਸਾਥੀ ਉਥੋਂ ਪਹਾੜੀਆਂ ਉਤੇ ਚੜਨ ਵਿੱਚ ਸਫਲ ਹੋਏ ਜਿਨਾਂ ਵਿੱਚ ਚੀ ਗੁਵੇਰਾ,ਫੀਡਲ ਕਾਸਟਰੋ ਤੇ ਉਸਦਾ ਭਰਾ ਰਾਉਲ ਵੀ ਸ਼ਾਮਲ ਸੀ।ਇਥੇ ਲੜਦਿਆਂ ਛੇ ਵਾਰ ਚੀ ਗੁਵੇਰਾ ਜਖ਼ਮੀ ਹੋਏ।2 ਜੂਨ 1959 ਨੂੰ ਇਨਕਲਾਬੀ ਸਾਥਣ ਅਲਏਡਾ ਮਾਰਚ ਨਾਲ ਵਿਆਹ ਹੋਇਆ।ਉਨਾਂ ਦੇ ਚਾਰ ਬੱਚੇ ਹੋਏ।1959 ਨੂੰ ਕਿਉਬਾ ਵਿੱਚ ਇਨਕਲਾਬ ਹੋਣ ਤੇ ਚੀ ਗੁਵੇਰਾ ਨੂੰ ਦੋ ਨੰਬਰ ਦਾ ਸਨਅਤ ਮੰਤਰੀ ਬਣਾਇਆ ਗਿਆ ਪਰ ਉਹ ਮੰਤਰੀ ਦੀ ਕੁਰਸੀ ਤੇ ਇਕ ਦਿਨ ਵੀ ਨਾ ਬੈਠਾ,ਹਮੇਸ਼ਾਂ ਲੋਕਾਂ ਵਿੱਚ ਰਿਹਾ।ਪੰਜ ਸਾਲਾਂ ਦੌਰਾਨ ਰੂਸ,ਚੀਨ,ਕੋਰੀਆ,ਜਰਮਨ ਤੇ ਚੈਕਲੋਸਵਕੀਆ ਸਮੇਤ ਕਈ ਦੇਸ਼ਾਂ ਵਿਚ ਗਿਆ।ਯੂ ਐਨ ਓ ਤੇ ਅਮਰੀਕਾ ਵਿੱਚ ਭਾਸ਼ਨ ਦਿੱਤੇ।ਕਿਉਬਾ ਨੂੰ ਇਨਕਲਾਬ ਦੇ ਰਾਹ ਪੱਕਾ ਕਰਕੇ ਉਹ 14/3/1965 ਨੂੰ ਅਚਾਨਕ ਅੰਡਰ ਗਰਾਉਂਡ ਹੋ ਗਿਆ।ਲੋਕਾਂ ਨੇ ਪੁਛਿਆ ਕਿ ਚੀ ਗੁਵੇਰਾ ਕਿਥੇ ਹੈ ? ਤਾਂ ਕਾਸਟਰੋ ਨੇ ਕਿਹਾ ਕਿ ਉਹ ਜਿਥੇ ਵੀ ਹੋਵੇਗਾ ਉਥੇ ਹੀ ਇਨਕਲਾਬ ਲਈ ਕੰਮ ਕਰ ਰਿਹਾ ਹੋਵੇਗਾ।3 ਅਕਤੂਬਰ 1965 ਨੂੰ ਕਾਸਟਰੋ ਨੇ ਉਸਦੀ ਚਿੱਠੀ ਪੜ ਕੇ ਲੋਕਾਂ ਨੂੰ ਦਸਿਆ ਕਿ ਉਹ ਬੋਲੀਵੀਆ ਦੇਸ਼ ਦੇ ਜੰਗਲਾਂ ਵਿੱਚ ੳਹ ਗੁਰੀਲਿਆਂ ਨੂੰ ਯੁੱਧ ਲੜਨ ਲਈ ਜਥੇਬੰਦ ਕਰ ਰਿਹਾ ਹੈ।ਉਸਨੇ ਕਿਹਾ *ਜੇ ਮੈਂ ਲੜਾਈ ਵਿਚ ਲੜਦਾ ਮਾਰਿਆ ਗਿਆ ਤਾਂ ਅੰਤ ਸਮੇਂ ਵੀ ਮੈਂ ਇਨਕਲਾਬ ਬਾਰੇ ਸੋਚ ਰਿਹਾ ਹੋਵਾਂਗਾ।* 8 ਅਕਤੂਬਰ 1967 ਨੂੰ ਬੋਲੀਵੀਆ ਦੀ ਯੂਰੋ ਖੱਡ ਵਿੱਚ ਜਖ਼ਮੀ ਹੋਣ ਤੇ ਫੜ ਲਿਆ ਗਿਆ।ਬੋਲੀਵੀਆ ਸੈਨਿਕਾਂ ਨੇ ਅਗਲੇ ਦਿਨ ਹਿਗਏਰਾ ਪਿੰਡ ਵਿੱਚ ਪਹਿਲਾਂ ਉਸਨੂੰ ਪੁਛਿਆ,"ਕੀ ਤੂੰ ਆਪਣੀ ਅਮਰਤਾ (ਅਮਰ ਹੋਣ ਬਾਰੇ) ਸੋਚ ਰਿਹਾ ਹੈਂ ?" ਉਸਨੇ ਜੁਆਬ ਦਿਤਾ,"ਨਹੀਂ,ਮੈਂ ਇਨਕਲਾਬ ਦੀ ਅਮਰਤਾ ਬਾਰੇ ਸੋਚ ਰਿਹਾ ਹਾਂ।" ਉਸ ਤੋਂ ਬਾਅਦ ਨੌ ਗੋਲੀਆਂ ਮਾਰ ਕੇ ਸ਼ਹੀਦ ਕਰ ਦਿਤਾ ਤੇ ਉਸਦੇ ਹੱਥ ਕੱਟ ਦਿਤੇ।ਇਹ ਹੱਥ ਅਜੇ ਵੀ ਕਿਊਬਾ ਦੇ ਲੋਕਾਂ ਨੇ ਆਪਣੇ ਹੀਰੋ ਨੂੰ ਪ੍ਰਣਾਮ ਕਰਨ ਵਾਸਤੇ ਸਾਂਭ ਕੇ ਰੱਖੇ ਹੋਏ ਹਨ।ਉਸਦੀ ਸ਼ਹਾਦਤ ਵਾਲੇ ਦਿਨ ਕਿਊਬਾ ਵਿਚ ਛੁੱਟੀ ਕੀਤੀ ਜਾਂਦੀ ਹੈ।
ਉਸਨੂੰ ਪਿਆਰ ਨਾਲ ਚੀ ਗੁਵੇਰਾ ਦੀ ਥਾਂ ਛੀ ਗੁਵੇਰਾ ਕਹਿ ਕੇ ਯਾਦ ਕੀਤਾ ਜਾਂਦਾ ਹੈ।

ਵਿਸ਼ਵ ਡਾਕ ਦਿਵਸ : 9-10-1874 ਨੂੰ ਸਵਿਟਜ਼ਰਲੈਂਡ ਵਿੱਚ ਯੂਨੀਵਰਸਲ ਪੋਸਟਲ ਯੂਨੀਅਨ ਦੀ ਮੀਟਿੰਗ ਹੋਈ ਸੀ,ਜਿਸ ਕਰਕੇ 1969 ਨੂੰ ਜਪਾਨ ਵਿਚ ਯੂਨੀਵਰਸਲ ਪੋਸਟਲ ਕਾਂਗਰਸ ਨੇ ਹਰ ਸਾਲ 9 ਅਕਤੂਬਰ ਨੂੰ ਇਹ ਦਿਨ ਮਨਾਉਣ ਦਾ ਫੈਸਲਾ ਕੀਤਾ।ਲਾਰਡ ਕਲਾਈਵ ਨੇ ਭਾਰਤ ਵਿੱਚ 1766 ਨੂੰ ਪਹਿਲਾ ਡਾਕ ਵਿਵਸਥਾ ਕੀਤੀ।1774 ਵਿੱਚ ਪਹਿਲਾ ਡਾਕਘਰ ਕਲਕੱਤਾ ਵਿਖੇ ਸਥਾਪਿਤ ਕੀਤਾ।
ਚਿੱਠੀਆਂ ਉਪਰ ਸਟੈਂਪ 1852 ਤੋਂ ਲੱਗਣੀ ਸ਼ੁਰੂ ਹੋਈ।ਪਹਿਲਾਂ ਰਾਜੇ ਪੈਦਲ ਜਾਂ ਘੋੜ ਸਵਾਰ ਰਾਂਹੀ ਡਾਕ ਭੇਜਦੇ ਸਨ।
ਫਿਰ ਚਿੱਠੀਆਂ ਕਬੂਤਰਾਂ ਰਾਂਹੀ ਭੇਜੀਆਂ ਜਾਣ ਲਗੀਆਂ।
ਦੇਸ਼ ਭਗਤ ਤੇਜਾ ਸਿੰਘ ਸੁੰਤਤਰ ਨੇ ਇਕ ਬਿੱਲਾ ਰਖਿਆ ਸੀ ਉਸ ਦੇ ਗਲ ਵਿੱਚ ਚਿੱਠੀ ਬਣ ਕੇ ਬਾਹਰ ਚਾਹ ਵਾਲੇ ਕੋਲ ਭੇਜਦਾ ਸੀ, ਜਿਥੋਂ ਦੂਜੇ ਦੇਸ਼ ਭਗਤਾਂ ਨੂੰ ਮਿਲ ਜਾਂਦੀ।
1947 ਨੂੰ ਦੇਸ ਵਿਚ 23344 ਤੇ 2014 ਤਕ 1,54,882 ਡਾਕ ਘਰ ਸਨ।ਚਿੱਠੀ ਲਿਖਣ ਦੀ ਕਲਾ ਨੇ ਕਈ ਨਾਮੀ ਲੇਖਕ ਪੈਦਾ ਕੀਤੇ।ਟੈਲੀਫੋਨ ਤੇ ਮੋਬਾਈਲ ਤੇ ਸਮਾਰਟ ਫੋਨ ਹੁਣ ਅਹਿਮ ਭੂਮਿਕਾ ਨਿਭਾ ਰਹੇ ਹਨ।ਚਿੱਠੀ ਉਪਰ ਪਿੰਨ ਕੋਡ (15-8- 1972 ਤੋਂ ਸ਼ੁਰੂ ਹੋਇਆ) ਲਿਖਿਆ ਹੋਵੇ ਤਾਂ ਛੇਤੀ ਪਹੁੰਚ ਜਾਂਦੀ।
ਟੈਲੀਗਰਾਮ,ਮਨੀਆਰਡਰ ਦਾ ਬਹੁਤ ਸਬੰਧ ਰਿਹਾ ਹੈ।
ਡਾਕਖਾਨੇ ਵਿਚ ਸਰਕਾਰੀ ਪੱਤਰ, ਮੈਗਜ਼ੀਨ ਤੇ ਹੋਰ ਸਾਹਿਤ ਜਿਆਦਾ ਆਉਦਾ ਹੈ।ਲੈਟਰ ਬਕਸ ਗਾਇਬ ਹੋ ਰਹੇ ਹਨ।

ਅੱਜ ਦਾ ਵਿਚਾਰ (8 ਅਕਤੂਬਰ) ਸ਼ਬਦਾਂ ਦੇ ਦੰਦ ਨਹੀ ਹੁੰਦੇ ਪਰ ਸ਼ਬਦ ਕੱਟਦੇ ਨੇ,ਤਾਂ ਜਖ਼ਮ ਏਨੇ ਡੂੰਘੇ ਹੋ ਜਾਂਦੇ ਨੇ ਕਿ ਜਿੰਦਗੀ ਖਤਮ ਹੋ ਜਾਂਦੀ ਹੈ ਪਰ ਇਹ ਜਖ਼ਮ ਨਹੀਂ ਭਰਦੇ।

ਅੱਜ ਦੇ ਦਿਨ:8-10-1967 ਇਨਕਲਾਬੀ ਯੋਧੇ ਚੀ ਗੁਵੇਰਾ ਦੀ ਬੋਲਵੀਆ ਸਰਕਾਰ ਵੱਲੋਂ ਸਾਥੀਆਂ ਸਮੇਤ ਗਿਰਫਤਾਰੀ।
1984 ਦਰਬਾਰ ਸਾਹਿਬ ਅੰਮ੍ਰਿਤਸਰ 'ਚੋਂ ਭਾਰਤੀ ਫੌਜ ਦੀ ਵਾਪਸੀ।
2005 ਪਾਕਿਸਤਾਨ ਤੇ ਕਸ਼ਮੀਰ 'ਚ ਆਏ ਭੂਚਾਲ ਨਾਲ 70 ਹਜ਼ਾਰ ਤੋਂ ਵੱਧ ਮੌਤਾਂ।
Air Force Day.ਹਵਾਈ ਸੈਨਾ ਦਿਵਸ
(1932 'ਚ ਸਥਾਪਤ)
ਚੰਡੀਗੜ੍ਹ + ਪੰਜਾਬ 1947 ਦੀ ਵੰਡ ਉਪਰੰਤ ਸਦੀਆਂ ਤੋਂ ਬਣੀ ਰਾਜਧਾਨੀ ਲਾਹੌਰ ਸਾਡੇ ਕੋਲੋਂ ਖੁਸ ਚੁੱਕੀ ਹੈ ਤੇ ਹੁਣ ਚੰਡੀਗੜ੍ਹ ਹੈ। ਸਿੱਖਾਂ ਦੀ ਅਗਵਾਈ ਕਰਨ ਵਾਲੇ ਜਥੇਦਾਰ ਜਿੰਨਾਂ ਵਿੱਚ ਮਾਸਟਰ ਤਾਰਾ ਸਿੰਘ ਅੰਮ੍ਰਿਤਸਰ ਦੇ ਨਿਵਾਸੀ ਸਨ ਤੇ ਚਾਹੁੰਦੇ ਸਨ ਇਹ ਸਨਅਤੀ ਸ਼ਹਿਰ ਰਾਜਧਾਨੀ ਬਣੇ।ਜੇ ਪੱਛਮੀ ਪੰਜਾਬ ਦੇ ਪੂਰਬੀ ਖੂੰਜੇ ਵਿੱਚ ਸਥਿਤ ਲਾਹੌਰ ਉਨਾਂ ਦੀ ਰਾਜਧਾਨੀ ਰਹਿ ਸਕਦਾ!
।ਲਾਹੌਰ ਤੋਂ ਜਿਹੜੀਆਂ ਮਿਸਲਾਂ ਪੂਰਬੀ ਪੰਜਾਬ ਆਈਆਂ ਸਨ ਉਹ ਜਲੰਧਰ ਤੇ ਹੱਕ ਦਿੱਤਾ ਰਹੀਆਂ ਸਨ।ਅੰਗਰੇਜ਼ਾਂ ਨੇ ਗਰਮੀਆਂ ਚ ਸ਼ਿਮਲਾ ਨੂੰ ਰਾਜਧਾਨੀ ਬਣਾਇਆ ਸੀ ਉਥੇ ਇਮਾਰਤਾਂ ਵੀ ਸਨ ਪਰ ਉਥੇ ਪਹੁੰਚਣਾ ਮੁਸ਼ਕਲ ਸੀ।ਕੁਝ ਲੋਕ ਲੁਧਿਆਣੇ ਨੂੰ ਰਾਜਧਾਨੀ ਚਾਹੁੰਦੇ ਸਨ।ਪਟਿਆਲੇ ਵਿੱਚ ਇਮਾਰਤਾਂ ਜਿਆਦਾ ਸਨ ਉਥੋਂ ਦੇ ਲੋਕ ਆਪਣਾ ਹੱਕ ਜਿਤਾ ਰਹੇ ਸਨ।ਅੰਬਾਲਾ ਵੀ ਆਪਣਾ ਹੱਕ ਜਿਤਾ ਰਿਹਾ ਸੀ ਕਿਉਕਿ ਦੇਸ਼ ਦੀ ਵੰਡ ਤੋਂ ਬਾਅਦ ਕਰਨਾਲ ਤੇ ਅੰਬਾਲਾ ਵਿੱਚ ਵੱਡੀ ਗਿਣਤੀ ਵਿੱਚ ਪੱਛਮੀ ਪੰਜਾਬ ਦੇ ਸ਼ਰਨਾਰਥੀ ਵਸੇ ਸਨ।ਭਾਰਤ ਦੇ ਰੱਖਿਆ ਮੰਤਰੀ ਬਲਦੇਵ ਸਿੰਘ ਅੰਬਾਲਾ ਦੀ ਤਹਿਸੀਲ ਖਰੜ ਦੇ ਪਿੰਡ ਦਮਣਾ ਦੇ ਨਿਵਾਸੀ ਸਨ ਜੋ ਪ੍ਰਧਾਨ ਮੰਤਰੀ ਨਹਿਰੂ ਦੇ ਨੇੜੇ ਸਨ ਉਹ ਵੀ ਇਥੇ ਨੇੜੇ ਰਾਜਧਾਨੀ ਚਾਹੁੰਦੇ ਸਨ।ਆਖਰ ਕੇਂਦਰ ਸਰਕਾਰ ਨੇ ਪੂਰਬੀ ਪੰਜਾਬ ਨੂੰ ਖਰੜ ਤਹਿਸੀਲ ਦੇ ਇਲਾਕੇ ਵਿੱਚੋਂ 12 ਪਿੰਡਾਂ ਦੀ ਜਮੀਨ ਪ੍ਰਾਪਤ ਕਰਕੇ ਰਾਜਧਾਨੀ ਬਣਾਉਣ ਦਾ ਫੈਸਲਾ ਕਰ ਲਿਆ।ਸ਼ਹਿਰ ਦਾ ਸਿਰ ਉਤਰ (ਪਹਾੜਾਂ) ਵੱਲ ਰੱਖਿਆ ਅਸੈਂਬਲੀ ਹਾਲ, ਕੋਰਟ ਤੇ ਰੋਕ ਗਾਰਡਨ ਹਨ।ਦਿਲ(ਵਿਚਕਾਰ)17 ਸੈਕਟਰ ਵਿੱਚ ਵਿਦਿਅਕ ਅਦਾਰੇ,ਪੰਜਾਬ ਇੰਜਨੀਅਰਿੰਗ ਕਾਲਜ,ਸਰਕਾਰੀ ਕਾਲਜ ਅਤੇ ਪੰਜਾਬ ਯੂਨੀਵਰਸਿਟੀ ਸ਼ਹਿਰ ਦੀ ਪੱਛਮੀ ਬਾਂਹ ਸਨ।ਬਾਗ ਤੇ ਜੰਗਲ ਵਾਲਾ ਇਲਾਕਾ 3 ਸੈਕਟਰ ਤੋਂ ਲੈ ਕੇ 10 ਤੇ 16 ਵਿੱਚ ਬਣਾਇਆ ਗਿਆ।ਰੇਲਵੇ ਸ਼ਟੇਸਨ ਪੂਰਬ ਤੇ ਹਵਾਈ ਅੱਡਾ ਦੱਖਣ ਵਿੱਚ ਬਣਾਏ ਗਏ।ਇਹ ਵੀ ਫੈਸਲਾ ਕੀਤਾ ਕਿ ਚੰਡੀਗੜ ਵਿੱਚ ਸਿਰਫ ਸਰਕਾਰੀ ਬੱਸਾਂ ਚੱਲਣਗੀਆਂ ਤੇ ਅੰਬਾਲਾ ਬਸ ਸਿੰਡੀਕੇਟ ਹੀ ਪੁਰਾਣੇ ਅਧਿਕਾਰਾਂ ਕਾਰਣ ਹੀ ਚਲੇਗੀ

ਸ਼ਹਿਰੀ ਯੋਜਨਾਕਾਰ ਆਰਕੀਟੈਕਟ ਫਰਾਂਸ ਦੇ ਲੀ ਕਾਰਬੂਜ਼ੀਅਰ ਨੂੰ ਚੁਣਿਆ ਗਿਆ।ਸ਼ਹਿਰ ਕਈ ਸੈਕਟਰਾਂ ਵਿੱਚ ਵੰਡਿਆ ਹੋਇਆ ਹੈ ਇਸ ਦੀ ਉਸਾਰੀ ਦਾ ਕੰਮ1955-56 ਵਿੱਚ ਸ਼ੁਰੂ ਹੋਇਆ। 114 ਸੁਕੈਅਰ ਕਿਲੋਮੀਟਰ ਦੇ ਘੇਰੇ ਵਿੱਚ ਫੈਲੇ ਸ਼ਹਿਰ ਨਾਲ 23 ਪਿੰਡ ਵੀ ਜੁੜੇ ਹਨ ਤੇ ਅਬਾਦੀ 2011 ਵਿੱਚ 10,54,686 ਸੀ।
ਏਸ਼ੀਆ ਦੇ ਖੂਬਸੂਰਤ ਸ਼ਹਿਰ ਨੂੰ 1ਨਵੰਬਰ 1966 ਨੂੰ ਕੇਂਦਰੀ ਪ੍ਰਸ਼ਾਸਤ ਇਲਾਕਾ ਐਲਾਨਿਆ ਗਿਆ।ਇਹ ਪੰਜਾਬ ਦੀ ਰਾਜਧਾਨੀ ਪਹਿਲਾਂ ਹੀ ਸੀ ਪਰ ਨਵੇਂ ਜੰਮੇ ਹਰਿਆਣੇ ਦੀ ਵੀ ਰਾਜਧਾਨੀ ਬਣਾ ਦਿੱਤਾ,ਹੋਰ ਕਿਤੇ ਵੀ ਦੋ ਰਾਜਾਂ ਦੀ ਇਕ ਰਾਜਧਾਨੀ ਨਹੀਂ।ਪਿਛਲੇ 5 ਦਹਾਕਿਆਂ ਤੋਂ ਦੋਹਾਂ ਰਾਜਾਂ ਦੀ ਰਾਜਧਾਨੀ ਚਲੀ ਆ ਰਹੀ ਹੈ।ਜਦ ਨਵਾਂ ਰਾਜ ਬਣਦਾ ਹੈ ਤਾਂ ਕੇਂਦਰ ਉਸ ਸਮੇਂ ਨਵੀ ਰਾਜਧਾਨੀ ਲਈ ਮਾਲੀ ਮਦਦ ਕਰਦਾ ਹੈ।ਛੱਤੀਸਗੜ੍ਹ, ਝਾਰਖੰਡ,ਉਤਰਾਖੰਡ ਤੇ ਨਵੇਂ ਬਣੇ ਰਾਜ ਤਿਲੰਗਾਨਾ ਦੀ ਮਦਦ ਕੀਤੀ ਗਈ।ਪੰਜਾਬ ਨਾਲ ਵਿਤਕਰਾ ਕਿਉਂ ? ਹਰ ਸਾਲ ਜਦੋਂ ਬਜਟ ਸ਼ੈਸਨ ਸ਼ੁਰੂ ਹੁੰਦੇ ਹਨ ਤਾਂ ਗਵਰਨਰ ਵੱਲੋਂ ਰਾਜਾਂ ਦੀਆਂ ਸਰਕਾਰਾਂ ਵੱਲੋਂ ਦਿੱਤੀਆਂ ਲਿਖਤੀ ਮੰਗਾਂ ਦੇ ਜਿਕਰ ਵੇਲੇ ਚੰਡੀਗੜ ਦੀ ਵੀ ਗੱਲ ਹੁੰਦੀ ਹੈ।ਇਹ ਨਾਹਰਾ ਸਿਆਸੀ ਪਾਰਟੀਆਂ ਲਈ ਕਿਤੇ ਗਵਾਚ ਜਾਂ ਭੁੱਲ ਚੁੱਕਾ ਹੈ। "ਖਿੜਿਆ ਫੁਲ ਗੁਲਾਬ ਦਾ,ਚੰਡੀਗੜ ਪੰਜਾਬ ਦਾ।"
ਪੁਰਾਣਾ ਪੰਜਾਬ ਬਹੁਤ ਵੱਡਾ ਸੀ ਜਿਸ 'ਚ ਲਹਿੰਦਾ ਪੰਜਾਬ(ਸਾਰਾ ਪਾਕਿਸਤਾਨ) ਜੰਮੂ ਕਸ਼ਮੀਰ,ਹਿਮਾਚਲ,ਹਰਿਆਣਾ ਰਾਜਸਥਾਨ, ਦਿੱਲੀ ਵੀ ਆਉਂਦੇ ਸੀ ,ਉਸ ਸਮੇ ਪੰਜਾਬ ਦੀਆਂ 5 ਡਵੀਜ਼ਨਾਂ ਅਤੇ 29 ਜ਼ਿਲ੍ਹੇ ਸਨ।
1-ਅੰਬਾਲਾ ਡਵੀਜ਼ਨ ਵਿੱਚ ਗੁੜਗਾਉਂ,ਰੋਹਤਕ, ਕਰਨਾਲ, ਹਿਸਾਰ, ਸ਼ਿਮਲਾ ਅਤੇ ਅੰਬਾਲਾ ਸ਼ਾਮਲ ਸਨ।
2-ਜਲੰਧਰ ਵਿੱਚ ਹੁਸ਼ਿਆਰਪੁਰ,ਜਲੰਧਰ, ਲੁਧਿਆਣਾ,ਫ਼ਿਰੋਜ਼ਪੁਰ ਅਤੇ ਕਾਂਗੜਾ ਆਉਂਦੇ ਸਨ
3-ਲਾਹੌਰ ਡਵੀਜ਼ਨ ਵਿੱਚ ਲਾਹੌਰ,ਗੁਜਰਾਂਵਾਲਾ, ਸ਼ੇਖੂਪੁਰਾ, ਸਿਆਲਕੋਟ, ਗੁਰਦਾਸਪੁਰ,ਅੰਮ੍ਰਿਤਸਰ ਛੇ ਜ਼ਿਲ੍ਹੇ ਆਉਂਦੇ ਸਨ।
4-ਰਾਵਲਪਿੰਡੀ ਵਿੱਚ ਜੇਹਲਮ, ਗੁਜਰਾਤ, ਰਾਵਲਪਿੰਡੀ, ਅਟਕ,ਸ਼ਾਹਪੁਰਾ ਤੇ ਮੀਆਂਵਾਲੀ ਜ਼ਿਲ੍ਹੇ ਸਨ।
5-ਮੁਲਤਾਨ ਡਵੀਜ਼ਨ ਵਿੱਚ ਲਾਇਲਪੁਰ,ਝੰਗ,ਮੁਲਤਾਨ,ਮੁਜ਼ੱਫ਼ਰਗੜ੍ਹ ਅਤੇ ਡੇਰਾ ਗਾਜ਼ੀ ਖ਼ਾਨ ਸ਼ਾਮਲ ਸਨ।
ਪੰਜਾਬ ਦੇ ਰੀਤੀ ਰਿਵਾਜ ਵੱਖ ਸੀ ਰਹਿਣ ਸਹਿਣ ਵੱਖ ਸੀ ਬੋਲੀ ਵੱਖ ਸੀ ਪਹਿਰਾਵਾ ਵੱਖ ਸੀ ਕਾਨੂੰਨ ਵੱਖ ਸੀ।
ਪਰ ਅੰਗਰੇਜ਼ਾਂ ਦੇ ਜਾਣ ਤੋ ਬਾਅਦ ਸੰਨ 1947 ਨੂੰ ਵੰਡ ਸਮੇਂ ਪੰਜਾਬ ਦੇ 2 ਹਿੱਸੇ ਕਰ ਦਿੱਤੇ ਇੱਕ ਹਿੱਸੇ ਦਾ ਪਾਕਿਸਤਾਨ ਤੇ ਇੱਕ ਹਿੱਸਾ ਭਾਰਤ ਵਿੱਚ ਰਲਾ ਲਿਆ ਗਿਆ ਤੇ ਫਿਰ ਪੰਜਾਬ ਵੀ ਹੋਰ ਛੋਟਾ ਕਰ ਦਿੱਤਾ ਗਿਆ ਜਿਹਦੇ ਰਾਜਸਥਾਨ, ਜੰਮੂ, ਕਸ਼ਮੀਰ, ਦਿੱਲੀ ਕੱਢ ਦਿੱਤੇ ਗਏ ਤੇ 1966 ਨੂੰ ਪੰਜਾਬ 'ਚੋਂ ਹਰਿਆਣਾ ਤੇ ਹਿਮਾਚਲ ਬਣਾ ਦਿੱਤੇ।
ਅੰਗਰੇਜ਼ਾਂ ਨੇ ਸੰਨ1849 ਨੂੰ ਪੰਜਾਬ ਜਬਤ ਕੀਤਾ ਸੀ,ਉਸ ਸਮੇਂ ਅੰਗਰੇਜ਼ੀ ਗਵਰਨਰ ਹਾਰਡਿੰਗ ਤੇ ਲਾਰਡ ਲਾਰੇਸ ਦਾ ਦਫ਼ਤਰ ਕਲਕੱਤੇ ਭਾਰਤ ਦੇਸ਼ ਵਿੱਚ ਸੀ ਪੰਜਾਬ ਵਿੱਚ ਨਹੀਂ।

ਅੱਜ ਦਾ ਵਿਚਾਰ (7 ਅਕਤੂਬਰ) ਜਿੰਦਗੀ ਦਾ ਕੋਈ ਮਹੱਤਵ ਨਹੀਂ ਕੋਈ ਕਿੰਨਾ ਚਿਰ ਜੀਵਿਆ, ਅਸਲ ਗੱਲ ਇਹ ਹੈ ਕਿ ਕੋਈ ਕਿਵੇਂ ਜੀਵਿਆ।ਜਿੰਦਗੀ ਨੂੰ ਸਾਲਾਂ ਦੀ ਗਿਣਤੀ ਨਾਲ ਨਾਪਣਾ ਠੀਕ ਸੋਚਣੀ ਦਾ ਪ੍ਰਤੀਕ ਨਹੀਂ।(ਜੋਹਨਸਨ)
ਅੱਜ ਦੇ ਦਿਨ
1708 ਈ:ਗੁਰੂ ਗੋਬਿੰਦ ਸਿੰਘ ਜੀ ਜੋਤੀ ਜੋਤ ਸਮਾਏ।
1885 ਡੈਨਮਾਰਕ ਦੇ ਭੌਤਿਕ ਵਿਗਿਆਨੀ ਨੀਲਸ ਬੋਰ ਦਾ ਜਨਮ।
1907 ਭਾਰਤੀ ਇਨਕਲਾਬੀ ਅਤੇ ਇੱਕ ਆਜ਼ਾਦੀ ਘੁਲਾਟਣ ਦੁਰਗਾ ਭਾਬੀ ਦੁਰਗਾ ਭਾਬੀ ਦਾ ਜਨਮ।
1932 ਦੱਖਣੀ ਅਫ਼ਰੀਕੀ ਸਮਾਜਸੇਵੀ ਅਤੇ ਨੋਬਲ ਸ਼ਾਂਤੀ ਇਨਾਮ ਜੇਤੂ ਦੇਸਮੰਡ ਟੂਟੂ ਦਾ ਜਨਮ।
1952 ਰੂਸੀ ਰਾਜਨੀਤੀਵੇਤਾ ਅਤੇ ਰਾਸ਼ਟਰਪਤੀ ਵਲਾਦੀਮੀਰ ਪੂਤਿਨ ਦਾ ਜਨਮ।
1963 ਅਮਰੀਕਨ ਰਾਸ਼ਟਰਪਤੀ ਜੇ ਐੱਫ਼ ਕੈਨੇਡੀ ਨੇ ਇੰਗਲੈਂਡ ਅਤੇ ਰੂਸ ਨਾਲ ਨਿਊਕਲਰ ਤਜਰਬਿਆਂ ਉੱਤੇ ਪਾਬੰਦੀ ਲਾਉਣ ਦੇ ਸਮਝੌਤੇ ਉੱਤੇ ਦਸਤਖ਼ਤ ਕੀਤੇ।
1985 ਅਮਰੀਕਾ ਨੇ ਐਲਾਨ ਕੀਤਾ ਕਿ ਉਹ ਕੌਮਾਂਤਰੀ ਅਦਾਲਤ ਦੇ ਹਰ ਫ਼ੈਸਲੇ ਨੂੰ ਮੰਨਣ ਦਾ ਪਾਬੰਦ ਨਹੀਂ ਹੋਵੇਗਾ।
1997 ਪੰਜਾਬੀ ਦਾ ਨਾਟਕਕਾਰ, ਗਲਪ-ਲੇਖਕ ਅਤੇ ਖੋਜੀ ਆਲੋਚਕ ਸੰਤ ਸਿੰਘ ਸੇਖੋਂ ਦਾ ਦਿਹਾਂਤ।

ਪ੍ਰਿੰਗਿਲ ਚਿਪਸ
ਪ੍ਰਿੰਗਿਲ ਚਿਪਸ ਅਸਲ ਚ ਆਲੂਆਂ ਦੇ ਚਿਪਸ ਨਹੀਂ ਹੁੰਦੇ,ਇਸਨੂੰ ਬਣਾਉਣ ਲਈ ਮੱਕੀ,ਚੌਲ,ਕਣਕ ਅਤੇ ਆਲੂਆਂ ਦਾ ਇਸਤੇਮਾਲ ਹੁੰਦਾ ਹੈ,ਇਸ ਸਾਰੀ ਸਮੱਗਰੀ ਨੂੰ ਇਕ ਖ਼ਾਸ ਵਿਧੀ ਨਾਲ ਤਿਆਰ ਕਰਕੇ ਇਕ ਗਾੜਾ ਪੇਸਟ ਤਿਆਰ ਕਰਕੇ ਫਿਰ ਉਸਨੂੰ ਆਲੂ ਚਿਪਸ ਦੀ ਸ਼ਕਲ ਚ ਤਿਆਰ ਕੀਤਾ ਜਾਂਦਾ ਹੈ,ਸ਼ੁਰੂਆਤ ਸਮੇ ਹੀ ਕੰਪਨੀ ਆਲੂਆਂ ਦੀ ਗੁਣਵੱਤਾ ਸਾਂਭ ਸੰਭਾਲ ਅਤੇ ਉਸਨੂੰ ਪਕਾਉਣ ਦੇ ਖਰਚ ਨੂੰ ਘੱਟ ਰੱਖਣਾ ਚਾਹੁੰਦੀ ਸੀ,ਪਰ ਓਹ ਇਹ ਵੀ ਚਾਹੁੰਦੇ ਸਨ ਕਿ ਪਹਿਲੀ ਦੇਖਣ ਚ ਆਲੂ ਦੇ ਚਿਪਸ ਲੱਗਣ,ਇਸ ਕਰਕੇ ਇਸ ਵਿੱਚ ਸਿਰਫ 2% ਆਲੂਆਂ ਦਾ ਇਸਤੇਮਾਲ ਹੁੰਦਾ ਹੈ,ਇਸ ਵਾਰੇ ਕੰਪਨੀ ਵੱਲੋਂ ਖੁਦ ਕਿਹਾ ਗਿਆ ਸੀ ਕਿ ਓਹਨਾ ਦਾ ਉਤਪਾਦ ਆਲੂ ਚਿਪਸ(Pto chips) ਨਹੀਂ ਹੈ,ਇਸ ਸ ਸਮੇ ਇਸਦਾ ਨਾਮ Pringle's Newfangled Potato Chips ਸੀ,ਪਰ ਇੰਗਲੈਂਡ ਚ ਇਕ ਹੋਏ ਮੁਕੱਦਮੇ ਤੋਂ ਬਾਅਦ ਕੰਪਨੀ ਨੇ ਮੰਨਿਆ ਕਿ ਇਹ ਆਲੂ ਚਿਪਸ ਨਹੀਂ ਹਨ ਅਤੇ ਇਸਦਾ ਨਾਮ ਵੀ ਬਦਲ ਕੇ Pringles ਕਰ ਦਿੱਤਾ ਗਿਆ,2012 ਚ ਇਸਨੂੰ Kellogg's ਵੱਲੋਂ ਖਰੀਦ ਲਿਆ ਗਿਆ ਸੀ,ਅਮਰੀਕੀ ਕਾਨੂੰਨ ਦੇ ਹਿਸਾਬ ਨਾਲ ਆਲੂ ਚਿਪਸ ਲਿਖਣ ਤੇ ਉਸ ਵਿੱਚ ਆਲੂ ਤੋਂ ਇਲਾਵਾ ਕੋਈ ਸਮੱਗਰੀ ਨਹੀਂ ਮਿਲਾਈ ਜਾ ਸਕਦੀ,(ਮਸਾਲਿਆਂ ਤੋਂ ਇਲਾਵਾ)Pringles ਨਾਮ ਕਾਰਨ ਕੰਪਨੀ ਨੂੰ ਇਸ ਵਿੱਚ ਮਾਸਾਹਾਰੀ ਅਤੇ ਹੋਰ ਕਈ ਤਰਾਂ ਦੇ ਸਵਾਦ ਜੋੜਨ ਚ ਕੋਈ ਕਾਨੂੰਨੀ ਦਿੱਕਤ ਨਹੀਂ ਆਈ,ਅੱਜ ਇਹ ਚਿਪਸ ਲੱਗਭੱਗ ਪੂਰੀ ਦੁਨੀਆਂ ਚ ਮਿਲਦੇ ਹਨ,ਨਿਊਯਾਰਕ ਦੀ ਇਕ ਸਿਹਤ ਸੰਸਥਾ public health initiatives North Shore ਮੁਤਾਬਿਕ ਇਹ ਚਿਪਸ ਆਮ ਚਿਪਸ ਨਾਲੋਂ ਲੱਗਭੱਗ 3% ਜਿਆਦਾ ਸਿਹਤ ਲਈ ਹਾਨੀਕਾਰਕ ਹਨ,ਇਸ ਦੇ ਲਗਾਤਾਰ ਖਾਣ ਨਾਲ ਦਿਲ ਅਤੇ ਪੇਟ ਸੰਬੰਧੀ ਗੰਭੀਰ ਬਿਮਾਰੀਆਂ ਲੱਗ ਸਕਦੀਆ ਹਨ,ਇਸ ਵਿੱਚ ਪਾਇਆ ਜਾਣ ਵਾਲਾ ਇਕ ਕੈਮੀਕਲ Acrylamide ਜੋ ਕੈਂਸਰ ਤੱਕ ਦੀ ਬਿਮਾਰੀ ਨੂੰ ਵੀ ਪੈਦਾ ਕਰ ਸਕਦਾ ਹੈ।

ਅੱਜ ਦਾ ਵਿਚਾਰ (6 ਅਕਤੂਬਰ) ਜਿਹੜੇ ਲੋਕ ਜਾਂ ਜਿਹੜੀਆਂ ਕੌਮਾਂ ਕਿਤਾਬਾਂ ਨੂੰ ਮੁਹੱਬਤ ਨਹੀਂ ਕਰਦੀਆਂ, ਬਹੁਤਾ ਚਿਰ ਜਿੰਦਾ ਨਹੀਂ ਰਹਿੰਦੀਆਂ,ਕਿਤਾਬਾਂ ਕੌਮਾਂ(ਲੋਕਾਂ)ਦਾ ਰਾਹ ਰੁਸ਼ਨਾਉਦੀਆਂ ਹਨ।
ਅੱਜ ਦੇ ਦਿਨ :
6-10-1860 ਅੰਗਰੇਜ਼ ਸਰਕਾਰ ਨੇ ਇੰਡੀਅਨ ਪੈਨਲ ਕੋਡ (IPC) ਬਣਾਇਆ।
1893 ਭੌਤਿਕ ਵਿਗਿਆਨੀ ਮੇਘਨਾਦ ਸ਼ਾਹਾ ਦਾ ਜਨਮ।
1981 ਮਿਸਰ ਦੇ ਨੋਬਲ ਇਨਾਮ ਜੇਤੂ ਰਾਸ਼ਟਰਪਤੀ ਅਨਵਰ ਸਾਦਤ ਦਾ ਪਰੇਡ ਸਮੇਂ ਕਤਲ।
1983 ਪੰਜਾਬ ਵਿੱਚ ਰਾਸ਼ਟਰਪਤੀ ਰਾਜ ਲਾਗੂ ਹੋਇਆ।
1989 ਸੁਪਰੀਮ ਕੋਰਟ ਦੀ ਪਹਿਲੀ ਔਰਤ ਜੱਜ ਫਾਤਿਮਾ ਬੀਵੀ ਬਣੀ ਜੋ ਏਸ਼ੀਆ ਵਿੱਚ ਵੀ ਪਹਿਲੀ ਔਰਤ ਜੱਜ ਸੀ।ਜੋ ਤਾਮਿਲਨਾਡੂ ਦੀ 1997 ਤੋਂ 2001 ਤੱਕ ਗਵਰਨਰ ਵੀ ਰਹੀ।

ਖੱਬੇ ਹੱਥ ਵਾਲਿਆਂ ਦਾ ਕਮਾਲ:
ਸੰਸਾਰ ਵਿੱਚ 90% ਲੋਕ ਸੱਜੇ ਹੱਥ ਤੇ 10% ਖੱਬੇ ਹੱਥ ਨਾਲ ਆਪਣੇ ਸਾਰੇ ਕੰਮ ਕਰਦੇ ਹਨ।ਅਕਸਰ ਲੋਕ ਖੱਬੇ ਹੱਥ ਵਾਲਿਆਂ ਨੂੰ ਟੇਢੀ ਨਜ਼ਰ ਨਾਲ ਵੇਖਦੇ ਹਨ,ਜਦ ਕਿ ਤੱਥ ਇਹ ਹੈ ਕਿ ਇਤਿਹਾਸ ਵਿੱਚ ਖੱਬੇ ਹੱਥ ਵਾਲੇ ਲੋਕ ਵੀ ਕਾਫੀ ਸਫਲ ਤੇ ਹਰਮਨ ਪਿਆਰੇ ਰਹੇ ਹਨ।ਕਿਸੇ ਵਿਅਕਤੀ ਦਾ ਪ੍ਰਸਿੱਧ ਹੋਣਾ ਜਾਂ ਨਾ ਹੋਣਾ ਉਸ ਦੀਆਂ ਕੋਸ਼ਿਸਾਂ ਤੇ ਨਿਰਭਰ ਕਰਦਾ ਹੈ।
ਖੱਬੇ ਹੱਥ ਨਾਲ ਕਮਾਲ ਕਰਨ ਵਾਲੀਆਂ ਸ਼ਖਸੀਅਤਾਂ ਵਿੱਚ
ਮਹਾਨ ਵਿਗਿਆਨੀ ਅਲਬਰਟ ਆਈਨਸਟਾਈਨ,
ਮਹਾਨ ਰਾਜਾ ਸਿੰਕਦਰ,
ਚਾਰਲੀ ਚੈਂਪੀਅਨ,
ਨੈਪੋਲੀਅਨ ਬੋਨਾਪਾਰਟ,
ਜੂਲੀਅਸ ਸੀਜਰ,
ਰੂਸੀ ਲੇਖਕ ਲਿਉ ਟਾਲਸਟਾਏ,
ਝਾਂਸੀ ਦੀ ਰਾਣੀ ਲਕਸ਼ਮੀ ਬਾਈ,
ਚਿੱਤਰਕਾਰ ਪਿਕਾਸੋ,
ਕੰਮਪਿਉਟਰ ਬਾਦਸ਼ਾਹ ਬਿਲ ਗੇਟਸ,
ਅਮਰੀਕੀ ਰਾਸ਼ਟਰਪਤੀ ਬਰਾਕ ਹੁਸੈਨ ਉਬਾਮਾ,
ਫੁੱਟਬਾਲ ਖਿਡਾਰੀ ਡਿਯਾਗੋ ਮਾਰਡੋਨਾ,
ਕਈ ਦੋਸਤਾਂ ਤੇ ਰਿਸ਼ਤੇਦਾਰਾਂ ਨੂੰ ਵੀ ਖੱਬੇ ਹੱਥ ਨਾਲ ਕੰਮ ਕਰਦੇ ਵੇਖਦੇ ਹਾਂ।ਅਸਲ ਵਿੱਚ ਸਾਰੇ ਜਾਣਦੇ ਹਨ ਕਿ ਕਾਮਯਾਬੀ ਦਾ ਸੰਬੰਧ ਸੱਜੇ ਜਾਂ ਖੱਬੇ ਹੱਥ ਨਾਲ ਨਹੀ,ਸਗੋਂ ਮਿਹਨਤ ਕਰਨ ਵਾਲਿਆਂ ਨਾਲ ਹੁੰਦਾ ਹੈ।ਖੱਬੇ ਹੱਥ ਟਰੈਫਿਕ ਕਿਉਂ ? ਇਹ ਮੰਨਿਆ ਜਾਂਦਾ ਹੈ ਕਿ ਬਰਤਾਨੀਆ ਵਿੱਚ ਸੜਕਾਂ ਤੇ ਘੋੜਾ ਗੱਡੀਆਂ ਦੇ ਕੋਚਵਾਨਾਂ ਨੂੰ ਇਸ ਲਈ ਖੱਬੇ ਪਾਸੇ ਚਲਣਾ ਪੈਂਦਾ ਸੀ ਕਿਉਂਕਿ ਸੱਜੇ ਹੱਥ ਵਿੱਚ ਉਨਾਂ ਦੇ ਛਾਂਟਾ ਹੁੰਦਾ ਸੀ ਇਸ ਤਰਾਂ ਬਾਦਸ਼ਾਹ ਦੇ ਅੰਗ-ਰੱਖਿਅਕ ਖੱਬੇ ਪਾਸੇ ਚਲਦੇ ਸਨ ਕਿਉਂਕਿ ਉਨਾਂ ਦੇ ਸੱਜੇ ਹੱਥ ਵਿੱਚ ਤਲਵਾਰਾਂ ਹੁੰਦੀਆਂ ਸਨ ਇਹ ਛਾਂਟਾ ਜਾਂ ਤਲਵਾਰਾਂ ਸੱਜੇ ਪਾਸੇ ਉਗੀਆਂ ਝਾੜੀਆਂ ਜਾਂ ਬੂਟਿਆਂ ਨਾਲ ਨਾ ਟਕਰਾਉਣ।ਭਾਰਤ ਸਮੇਤ 50 ਦੇਸ਼ਾਂ ਵਿੱਚ ਖੱਬੇ ਹੱਥ ਟਰੈਫਿਕ ਚਲਦੀ ਹੈ,ਦੂਜੇ ਪਾਸੇ ਯੂਰਪ ਦੇ ਜੇਤੂ ਨੈਪੋਲੀਅਨ ਬੋਨਾਪਾਰਟ ਨੇ ਆਪਣੇ ਹੁਕਮ ਨਾਲ ਸਜੇ ਪਾਸੇ ਟਰੈਫਿਕ ਚਲਾਉਣ ਦੇ ਹੁਕਮ ਦਿਤੇ। ਯੂਰਪ ਦਾ ਸਵੀਡਨ ਆਖਰੀ ਦੇਸ਼ ਸੀ ਜਿਥੇ ਖੱਬੇ ਹੱਥ ਟਰੈਫਿਕ ਚਲਦੀ ਸੀ ਉਥੇ ਵੀ 3 ਸਤੰਬਰ 1967 ਤੋਂ ਸੱਜੇ ਹੱਥ ਟਰੈਫਿਕ ਚਲਾਉਣ ਨੂੰ ਮਨਜੂਰੀ ਦਿੱਤੀ ਗਈ ਸੀ!

ਅੱਜ ਦਾ ਵਿਚਾਰ (5 ਅਕਤੂਬਰ) ਜੇਕਰ ਤੁਸੀਂ ਚੰਗੇ ਇਨਸਾਨ ਹੋ ਤਾਂ ਤੁਹਾਨੂੰ ਧਾਰਮਿਕ ਹੋਣ ਦੀ ਲੋੜ ਨਹੀਂ,ਪਰ ਜੇਕਰ ਤੁਸੀਂ ਧਾਰਮਿਕ ਹੋ ਤਾਂ ਚੰਗੇ ਇਨਸਾਨ ਜਰੂਰ ਬਣਿਓ।

ਅੱਜ ਦੇ ਦਿਨ
5-10-1864 ਕਲਕੱਤੇ ਵਿੱਚ ਭਾਰੀ ਤੁਫਾਨ ਨਾਲ 60,000 ਤੋਂ ਵੱਧ ਮੌਤਾਂ ਤੇ ਭਾਰੀ ਤਬਾਹੀ।
1940 ਲੇਖਕ ਸਤਿੰਦਰ ਸਿੰਘ ਨੂਰ ਦਾ ਜਨਮ।
1947 ਪਾਕਿਸਤਾਨ ਵਿੱਚ ਆਰਜੀ ਸਰਕਾਰ ਦਾ ਐਲਾਨ।
2011 ਵਿਗਿਆਨੀ ਸਟੀਵ ਜੋਬਸ ਦੀ ਕੈਂਸਰ ਨਾਲ ਮੌਤ।

ਭੇਡਚਾਲ ਤੇ ਆਪਣੇ ਲੋਕ
ਕਦੀ ਆਪਣੇ ਬਜ਼ੁਰਗਾਂ ਨੂੰ ਪੁੱਛੋ ਕਿ ਉਹ ਹਰੀ ਮਿਰਚ ਖਾਂਦੇ ਸਨ ?
ਸਾਡੀ ਸਵੇਰ ਦੀ ਰੋਟੀ ਵਿੱਚ ਲਾਲ ਮਿਰਚਾਂ ਦਾ ਆਚਾਰ ਅਤੇ ਅੰਬ ਦਾ ਆਚਾਰ ਹੁੰਦਾ ਸੀ । ਜਾਂ ਵੱਧ ਤੋਂ ਵੱਧ ਦਹੀਂ ਲੱਸੀ ਤੇ ਮੱਖਣੀ ਨਾਲ ਹੁੰਦੀ ਸੀ । ਫਿਰ ਦੁਪਿਹਰੇ ਦੀ ਰੋਟੀ ਦਾਲ ਜਾਂ ਸਬਜੀ ਨਾਲ ਆਉਂਦੀ ਸੀ । ਤੀਜੇ ਪਹਿਰ ਮਿੱਸੀਆਂ ਰੋਟੀਆਂ ਲਾਲ ਮਿਰਚ ਭੁੱਕ ਕੇ ਤੇ ਮੱਖਣੀ ਨਾਲ ਚੋਪੜ ਕੇ ਖਾਂਦੇ ਸਨ । ਹਰੀ ਮਿਰਚ ਕਦੀ ਕਦਾਈਂ ਉਂਝ ਤੋੜਕੇ ਰੋਟੀ ਨਾਲ ਚੱਬ ਜਾਣੀ । ਸਾਡਾ ਅੰਬ ਦਾ ਆਚਾਰ ਕਿਸੇ ਦਵਾਈ ਤੋਂ ਘੱਟ ਨਹੀਂ ਸੀ ਹੁੰਦਾ । ਕਲੌਂਜੀ, ਮੇਥੇ, ਰਾਈ, ਸੌਂਫ ਤੇ ਕਾਲੀ ਮਿਰਚ ਵਰਗੇ ਨਾਯਾਬ ਤੋਹਫਿਆਂ ਨਾਲ ਭਰਪੂਰ ਸੀ । ਸਾਡਾ ਦੇਸੀ ਘਿਓ ਤੇ ਸਰ੍ਹੋਂ ਦਾ ਤੇਲ ਖਾਣੇ ਪਕਾਉਣ ਲਈ ਸਭ ਤੋਂ ਉਤਮ ਸੀ ।
ਫੇਰ ਆਏ ਡਾਲਡੇ, ਰਿਫਾਈਂਡ ਅਤੇ ਬੇਕਰੀਆਂ। ਉਪਰੋਂ ਡਾਕਟਰੀ ਧੰਦਾ ਬਣ ਗਿਆ । ਉਹਨਾਂ ਨੇ ਪੰਜਾਬੀਆਂ ਦੀ ਖੁਰਾਕ ਹੀ ਬਦਲਕੇ ਰੱਖ ਦਿੱਤੀ । ਜਿਹੜੇ ਘਰਾਂ 'ਚ ਕਦੇ ਦਵਾਈ ਨਹੀਂ ਸੀ ਬੜੀ ਅੱਜ ਉਹੀ ਘਰ ਚ ਬੱਚੇ ਵੀ ਦਵਾਈਆਂ ਤੇ ਪਲ ਰਹੇ ਹਨ ।
ਅਸੀਂ ਕਦੀ ਨਹੀਂ ਸੋਚਿਆ ਕਿ ਸਾਡੇ ਬਜੁਰਗ ਤਿਲ ਅਤੇ ਅਲਸੀ ਕਿਉਂ ਖਾਂਦੇ ਸਨ । ਕਲੌਂਜੀ ਦੇ ਕੀ ਫਾਇਦੇ ਸਨ ?
ਗੂਗਲ ਤੇ flax seed and black seed ਪਾ ਕੇ ਦੇਖ ਲਓ ਕਿ ਪੂਰੀ ਦੁਨੀਆਂ ਹੁਣ ਇਹਨਾਂ ਦੀ ਚਾਹਵਾਨ ਹੈ । ਪਰ ਉਹਨਾਂ ਨੂੰ ਪਤਾ ਨੀ ਕਿ ਇਹ ਖਾਣੇ ਕਿਵੇਂ ਹਨ ।
ਦੇਖਾ ਦੇਖੀ ਆਪਣੇ ਦਵਾਈਆਂ ਵਰਗੇ ਖਾਣੇ ਨਾ ਛੱਡੋ । ਆਪ ਤੇ ਆਪਣੇ ਪਰਿਵਾਰ ਨੂੰ ਬਾਜ਼ਾਰ ਦੇ ਖਾਣੇ ਤੋਂ ਬਚਾਓ।

ਸਟੀਵਨ ਪੌਲ ਸਟੀਵ ਜੌਬਜ਼
24 ਫਰਵਰੀ 1955 –5 ਅਕਤੂਬਰ 2011)
ਸਟੀਵਨ ਪੌਲ ਸਟੀਵ ਜੌਬਜ਼ ਇੱਕ ਅਮਰੀਕੀ ਉਦਯੋਗੀ ਅਤੇ ਖੋਜੀ ਸੀ। ਇਸਨੂੰ ਐਪਲ ਦੇ ਸੀ.ਈ.ਓ. (ਮੁੱਖ ਕਾਰਜਕਾਰੀ ਅਧਿਕਾਰੀ) ਵਜੋਂ ਜਾਣਿਆ ਜਾਂਦਾ ਹੈ। ਅਗਸਤ 2011 ਵਿੱਚ ਉਨ੍ਹਾਂ ਨੇ ਇਸ ਪਦ ਤੋਂ ਅਸਤੀਫ਼ਾ ਦੇ ਦਿੱਤਾ ਸੀ। ਜਾਬਸ ਪਿਕਸਰ ਏਨੀਮੇਸ਼ਨ ਸਟੂਡੀਓਜ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਵੀ ਰਹੇ। 2006 ਵਿੱਚ ਉਹ ਦ ਵਾਲਟ ਡਿਜਨੀ ਕੰਪਨੀ ਦੇ ਨਿਰਦੇਸ਼ਕ ਮੰਡਲ ਦੇ ਮੈਂਬਰ ਵੀ ਰਹੇ, ਜਿਸਦੇ ਬਾਅਦ ਡਿਜਨੀ ਨੇ ਪਿਕਸਰ ਦਾ ਅਧਿਗਰਹਣ ਕਰ ਲਿਆ ਸੀ। 1995 ਵਿੱਚ ਆਈ ਫਿਲਮ ਟੁਆਏ ਸਟੋਰੀ ਵਿੱਚ ਉਨ੍ਹਾਂ ਨੇ ਬਤੋਰ ਕਾਰਜਕਾਰੀ ਨਿਰਮਾਤਾ ਕੰਮ ਕੀਤਾ। ਜੌਬਜ਼ ਦੇ ਅਧਿਕਾਰਿਤ ਜੀਵਨੀਕਾਰ, ਵਾਲਟਰ ਆਇਜ਼ੈਕਸਨ ਨੇ ਉਸ ਨੂੰ "ਰਚਨਾਤਮਕ ਉਦਯੋਗਪਤੀ" ਦੱਸਿਆ ਹੈ," ਜਿਸਦੇ ਸੰਪੂਰਨਤਾ ਲਈ ਜਨੂੰਨ ਅਤੇ ਉਸਦੀ ਜ਼ੋਰਦਾਰ ਡਰਾਈਵ ਨੇ ਛੇ ਉਦਯੋਗਾਂ- ਨਿੱਜੀ ਕੰਪਿਊਟਰ, ਐਨੀਮੇਟਡ ਫਿਲਮ, ਸੰਗੀਤ, ਫੋਨ, ਗੋਲੀ ਕੰਪਿਊਟਿੰਗ ਅਤੇ ਡਿਜ਼ੀਟਲ ਪ੍ਰਕਾਸ਼ਨ ਵਿੱਚ ਇਨਕਲਾਬ ਲੈ ਆਂਦਾ।"
5ਅਕਟੂਬਰ 2011 ਨੂੰ 56 ਸਾਲ ਦੀ ਉਮਰ ਵਿੱਚ ਉਣਾ ਦੀ ਕੈਲੇਫੋਰਨੀਆ,ਅਮਰੀਕਾ ਵਿਚ ਓਨਾ ਦੀ ਕੈਂਸਰ ਨਾਲ ਮੌਤ ਹੋ ਗਈ।

ਅੱਜ ਦਾ ਵਿਚਾਰ (4 ਅਕਤੂਬਰ) ਸਿਆਣਾ ਮਨੁੱਖ ਪੜ੍ਹਿਆ ਲਿਖਿਆ ਹੋਵੇ,ਇਹ ਕੋਈ ਜਰੂਰੀ ਨਹੀ ਤੇ ਨਾ ਹੀ ਪੜ੍ਹੇ ਲਿਖੇ ਦਾ ਸਿਆਣਾ ਹੋਣਾ ਜਰੂਰੀ ਹੁੰਦਾ ਹੈ।

ਅੱਜ ਦੇ ਦਿਨ : 4-10-1876 ਪ੍ਰਸਿੱਧ ਕਵੀ ਧਨੀ ਰਾਮ ਚਾਤਰਿਕ ਦਾ ਜਨਮ।
2009 ਚਮਤਕਾਰਾਂ ਦਾ ਪਰਦਾਫਾਸ਼ ਕਰਨ ਵਾਲੇ ਤਰਕਸ਼ੀਲ ਲੇਖਕ ਬੀ ਪਰਮਨੰਦ ਦਾ ਦਿਹਾਂਤ।
1920 ਕਾਮਰੇਡ ਸਤਪਾਲ ਡਾਂਗ ਦਾ ਜਨਮ।
1957 ਰੂਸ ਨੇ ਪੁਲਾੜ ਵਿਚ ਸੰਸਾਰ ਦਾ ਪਹਿਲਾ ਉਪ ਗ੍ਰਹਿ ਸਪੂਤਨਿਕ ਛੱਡਿਆ।

*ਕਾਮਰੇਡ ਸਤਪਾਲ ਡਾਂਗ* ਦਾ ਜਨਮ 4 ਅਕਤੂਬਰ 1920 ਨੂੰ ਰਾਮ ਨਗਰ (ਰਸੂਲ ਨਗਰ) ਗੁਜਰਾਂ ਵਾਲਾ ਪਾਕਿਸਤਾਨ ਵਿਖੇ ਹੋਇਆ।ਉਨਾਂ ਗੌਰਮਿੰਟ ਤਸਕਾਲਜ ਲਾਹੌਰ ਤੋਂ ਬੀ ਏ ਕੀਤੀ।ਉਹ ਆਲ ਇੰਡੀਆ ਸਟੂਡੈਂਟ ਫੈਡਰੇਸ਼ਨ ਦੇ ਜਨਰਲ ਸਕੱਤਰ ਤੇ ਵਲਡ ਯੂਥ ਫੈਡਰੇਸ਼ਨ ਦੇ ਮੀਤ ਪ੍ਰਧਾਨ ਰਹੇ।1943 ਵਿਚ ਸੀ ਪੀ ਆਈ ਦੀ ਪਹਿਲੀ ਕਾਂਗਰਸ ਬੰਬਈ ਵਿਚ ਬਤੌਰ ਡੈਲੀਗੇਟ ਸ਼ਾਮਲ ਹੋਏ।ਉਨਾਂ ਨੂੰ ਗਦਰ ਪਾਰਟੀ ਦੇ ਸੋਹਣ ਸਿੰਘ ਭਕਨਾ, ਸੋਹਣ ਸਿੰਘ ਜੋਸ਼,ਤੇਜਾ ਸਿੰਘ ਸੁੰਤਤਰ ਨਾਲ ਇਕੋ ਰੇਲ ਦੇ ਡੱਬੇ ਵਿਚ ਸਫਰ ਕਰਨ ਦਾ ਸੁਭਾਗ ਪ੍ਰਾਪਤ ਹੋਇਆ।1947 ਦੀ ਵੰਡ ਸਮੇਂ ਉਹ ਚੈਕਲਸੋਵੇਕੀਆ ਦੀ ਰਾਜਧਾਨੀ ਪਰਾਗ ਵਿੱਚ ਸਨ।ਉਥੇ ਚੀਨੀ ਡੈਪੂਟੇਸ਼ਨ ਨਾਲ ਵਿਚਾਰ ਚਰਚਾ ਕੀਤੀ।1952 ਵਿਚ ਉਹ ਛੇਹਾਰਟੇ ਆ ਗਏ ਤੇ ਉਨਾਂ ਦੀ ਸ਼ਾਦੀ ਕਾਮਰੇਡ ਵਿਮਲਾ ਡਾਂਗ ਨਾਲ ਹੋਈ।1953 ਤੋਂ 1967 ਤਕ ਛੇਹਾਰਟੇ ਦੀ ਭਰਿਸ਼ਟਾਚਾਰ ਵਿਰੋਧੀ ਕਮੇਟੀ ਦੇ ਪ੍ਰਧਾਨ ਵੀ ਰਹੇ।ਉਨਾਂ ਸ਼ਹਿਰ ਵਿਚ ਬਾਲ ਸੰਭਾਲ ਕੇਂਦਰ, ਡਿਸਪੈਂਸਰੀਆਂ,ਮੈਟਰਨਿਟੀ ਹਸਪਤਾਲ, ਲਾਇਬਰੇਰੀ,ਕਮਿਊਨਿਟੀ ਹਾਲ ਤੇ ਰੀਡਿੰਗ ਰੂਮ ਬਣਵਾਏ।1965 ਦੀ ਲੜਾਈ ਵਿਚ 60 ਦੇ ਕਰੀਬ ਸ਼ਹਿਰੀ ਜੋ ਪਾਕਿਸਤਾਨੀ ਬੰਬਾਰੀ ਵਿੱਚ ਸ਼ਹੀਦ ਹੋਏ ਉਨਾਂ ਦੇ ਸਸਕਾਰ ਦਾ ਪ੍ਰਬੰਧ ਕੀਤਾ ਤੇ ਉਨਾਂ ਦੀ ਯਾਦ ਵਿਚ ਸ਼ਹੀਦ ਮੈਮੋਰੀਅਲ (ਜੰਝ ਘਰ) ਬਣਾਇਆ।1967 ਵਿੱਚ ਪਹਿਲੀਵਾਰ ਗਿਆਨੀ ਗੁਰਮੁੱਖ ਸਿੰਘ ਮੁਸਾਫਿਰ ਨੂੰ ਭਾਰੀ ਫਰਕ ਨਾਲ ਹਰਾ ਕੇ ਵਿਧਾਇਕ ਬਣੇ ਤੇ ਲਗਾਤਾਰ 1980 ਤੱਕ ਜਿੱਤਦੇ ਰਹੇ।ਉਹ ਸਿਵਲ ਸਪਲਾਈ ਮੰਤਰੀ ਵੀ ਰਹੇ।ਉਨਾਂ ਰਹਾਇਸ਼ ਛੇਹਾਰਟਾ ਦੀ ਮਜਦੂਰ ਬਸਤੀ ਵਿੱਚ ਹੀ ਰੱਖੀ।ਕਾਮਰੇਡ ਡਾਂਗ ਦੇ ਲੇਖ ਪੰਜਾਬੀ,ਅੰਗਰੇਜ਼ੀ ਤੇ ਉੜਦੂ ਦੇ ਅਖਬਾਰਾਂ, ਮੈਗਜ਼ੀਨਾਂ ਵਿੱਚ ਛੱਪਦੇ ਰਹੇ।1977 ਵਿੱਚ ਉਨਾਂ ਨੂੰ 'ਪਦਮ ਵਿਭੂਸ਼ਨ'ਨਾਲ ਸਨਮਾਨਿਆ ਗਿਆ।1988 ਵਿੱਚ ਉਨਾਂ **ਦਹਿਸ਼ਤਗਰਦੀ* *ਦੀਆਂ ਜੜਾਂ ਕਿਥੇ ਹਨ**ਕਿਤਾਬ ਲਿਖੀ।15 ਜੂਨ 2013 ਨੂੰ ਛੇਹਰਟਾ ਵਿਖੇ ਸਦਾ ਲਈ ਅਲਵਿਦਾ ਕਹਿ ਗਏ।

*ਪੰਜਾਬੀ ਦੇ ਕਵੀ ਧਨੀ ਰਾਮ ਚਾਤਰਿਕ* ਦਾ ਜਨਮ 4 ਅਕਤੂਬਰ 1876 ਨੂੰ ਪ੍ਰਸਿੱਧ ਕਿਸਾਕਾਰ ਇਮਾਮਬਖ਼ਸ਼ ਦੇ ਪਿੰਡ ਪਸੀਆਂ,ਜਿਲਾ ਸਿਆਲਕੋਟ ਵਿਚ ਲਾਲਾ ਪਹੂ ਮਲ ਦੇ ਘਰ 'ਚ ਹੋਇਆ।ਅਜੇ ਡੇਢ ਸਾਲ ਦੀ ਉਮਰ ਸੀ ਜਦ ਇਨਾਂ ਦਾ ਪਰਿਵਾਰ ਲੋਪੋਕੇ,ਜਿਲਾ ਅੰਮਿ੍ਤਸਰ ਵਿੱਚ ਆਣ ਵੱਸਿਆ।
17 ਸਾਲ ਦੀ ਉਮਰ ਵਿੱਚ ਪ੍ਰਸਿੱਧ ਕਵੀ ਤੇ ਲੇਖਕ ਭਾਈ ਵੀਰ ਸਿੰਘ ਦੀ ਵਜੀਰ ਹਿੰਦ ਪ੍ਰੈਸ ਵਿੱਚ ਕੰਮ ਕਰਨ ਲਗ ਪਏ।ਉਨਾਂ ਦੇ ਪ੍ਰਭਾਵ ਸਦਕਾ ਕਵਿਤਾਵਾਂ ਲਿਖਣ ਲੱਗ ਪਏ ਤੇ ਇਨਾਂ ਦੇ ਪਰਚੇ 'ਖਾਲਸਾ ਸਮਾਚਾਰ' ਵਿਚ ਕਵਿਤਾਵਾਂ ਛੱਪਣ ਲੱਗੀਆਂ।ਕੁਝ ਚਿਰ ਮੁੰਬਈ ਚਲੇ ਗਏ ਤੇ ਇਥੇ ਆਣ ਕੇ ਸੁਦਰਸ਼ਨ ਪ੍ਰੈਸ ਲਾ ਲਈ।18/12/1954 ਨੂੰ ਸਦਾ ਵਾਸਤੇ ਚਲੇ ਗਏ।ਉਨਾਂ ਦੀਆ ਪ੍ਰਸਿਧ ਰਚਨਾਵਾਂ ਭਰਥਰੀ ਹਰੀ,ਚੰਦਨਵਾੜੀ,ਨਲ ਦਮਯੰਤੀ,ਕੇਸਰ ਕਿਆਰੀ,ਸੂਫੀਖਾਨਾ,ਨੂਰ ਜਹਾਂ ਬਾਦਸ਼ਾਹ ਬੇਗਮ ਆਦਿ ਸਨ।ਸਭ ਤੋਂ ਵਧ ਉਨਾਂ ਦੀ ਰਚਨਾ,'
ਤੂੜੀ ਤੰਦ ਸਾਂਭ ਵੇਚ ਵੱਟ ਕੇ,
ਲੰਬੜਾਂ ਤੇ ਸ਼ਾਹਾਂ ਦਾ ਹਿਸਾਬ ਕਟ ਕੇ -----
ਮਾਰਦਾ ਦਮਾਮੇ ਜੱਟ ਮੇਲੇ ਆ ਗਿਆ।'

ਅੱਜ ਦਾ ਵਿਚਾਰ (1ਅਕਤੂਬਰ ) ਅਸੀਂ ਸਾਲਾਂ ਦੀ ਗਿਣਤੀ ਨਾਲ ਬੁੱਢੇ ਨਹੀਂ ਹੁੰਦੇ, ਸਗੋਂ ਨੈਤਿਕਤਾ ਤੋਂ ਕਿਨਾਰਾਕਸ਼ੀ ਨਾਲ ਬੁੱਢੇ ਹੁੰਦੇ ਹਾਂ।

ਅੱਜ ਦੇ ਦਿਨ:
1854 ਭਾਰਤ ਵਿੱਚ ਡਾਕ ਟਿਕਟ ਸ਼ੁਰੂ।
1938 ਭਾਰਤ ਸਰਕਾਰ ਵੱਲੋਂ ਲੜਕੇ ਦੇ ਵਿਆਹ ਦੀ ਉਮਰ 18 ਸਾਲ ਤੋਂ 21ਸਾਲ ਤੇ ਲੜਕੀ ਦੀ 15 ਤੋਂ 18 ਸਾਲ ਕੀਤੀ ਗਈ।
1949 ਕਾ:ਮਾਉ ਜੇ ਤੁੰਗ ਦੀ ਅਗਵਾਈ ਹੇਠ ਕਮਿਊਨਿਸਟ ਪਾਰਟੀ ਨੇ ਚੀਨ ਵਿੱਚ ਰਾਜ ਸਤਾ ਸੰਭਾਲੀ।

ਵਿਸ਼ਵ ਬਜ਼ੁਰਗ ਦਿਵਸ (1991)

ਵਿਸ਼ਵ ਸਵੈ-ਇਛਕ ਖੂਨ ਦਾਨ ਦਿਵਸ

ਬਜ਼ੁਰਗ ਹੁੰਦੇ ਨੇ ਬੋਹੜ ਦੀਆਂ ਛਾਵਾਂ, ਨਸੀਬਾਂ ਵਾਲੇ ਛਾਂ ਮਾਣਦੇ: ਯੂ ਐਨ ਉ ਨੇ 14 ਦਸੰਬਰ 1990 ਨੂੰ ਇਕ ਮਤੇ ਰਾਂਹੀ ਇਕ ਅਕਤੂਬਰ ਨੂੰ ਵਿਸ਼ਵ ਬਜ਼ੁਰਗ ਦਿਵਸ ਮਨਾਉਣ ਦਾ ਫੈਸਲਾ ਕੀਤਾ।2011 ਦੀ ਜਨਗਨਣਾ ਅਨੁਸਾਰ ਪੰਜਾਬ ਦੀ 2.77 ਲੱਖ ਅਬਾਦੀ ਵਿੱਚੋਂ 100 ਸਾਲ ਦੀ ਉਮਰ ਤੋਂ ਵੱਧ ਲਗਭਗ 19,000 ਬਜ਼ੁਰਗਾਂ ਵਿੱਚੋਂ ਦਸ ਹਜ਼ਾਰ ਤੋਂ ਵੱਧ ਔਰਤਾਂ ਸਨ।60 ਸਾਲ ਤੋਂ ਵੱਧ ਉਮਰ ਵਾਲੇ ਬਜ਼ੁਰਗਾਂ ਵਿੱਚ ਆਉਂਦੇ ਹਨ।ਭਾਰਤ ਵਿੱਚ 60 ਸਾਲ ਤੋਂ ਵਧ ਉਮਰ ਵਾਲੇ ਬਜ਼ੁਰਗਾਂ ਦੀ ਗਿਣਤੀ ਵਿੱਚ ਪੰਜਾਬ ਚੌਥੇ ਨੰਬਰ ਤੇ ਹੈ।ਕੇਰਲਾ, ਗੁਜਰਾਤ, ਦਿੱਲੀ, ਕਰਨਾਟਕ ਆਦਿ ਰਾਜਾਂ ਵਿਚ ਲੰਮੀ ਉਮਰ ਵਾਲੇ ਬਜ਼ੁਰਗ ਜਿਆਦਾ ਹੁੰਦੇ ਹਨ।ਜਾਪਾਨ ਵਿੱਚ ਸਤੰਬਰ ਦੇ ਤੀਜੇ ਸੋਮਵਾਰ ਨੂੰ ਬਜ਼ੁਰਗਾਂ ਪ੍ਰਤੀ ਸਨਮਾਨ ਦਿਵਸ ਮਨਾਇਆ ਜਾਂਦਾ ਹੈ।ਉਥੇ ਚੰਗੀਆਂ ਸਹੂਲਤਾਂ ਕਾਰਨ ਬਜ਼ੁਰਗਾਂ ਦੀ ਗਿਣਤੀ ਵਿੱਚ ਤੇਜੀ ਨਾਲ ਵਾਧਾ ਹੋਇਆ ਹੈ।1966 ਵਿੱਚ ਸੌ ਸਾਲ ਤੋਂ ਵੱਧ ਵਾਲੇ ਕੁਝ ਸੈਂਕੜੇ ਹੀ ਬਜ਼ੁਰਗ ਸਨ,1998 ਵਿੱਚ ਦਸ ਹਜ਼ਾਰ ਤੇ 2014 ਵਿੱਚ ਮਨਾਏ ਬਜ਼ੁਰਗ ਸਨਮਾਨ ਦਿਵਸ ਤੇ 59 ਹਜ਼ਾਰ ਨੂੰ ਚਾਂਦੀ ਦੀਆਂ ਪਲੇਟਾਂ ਦੇ ਕੇ ਸਨਮਾਨਿਤ ਕੀਤਾ ।ਜਾਪਾਨ ਵਿੱਚ ਸੌ ਤੋਂ ਵੱਧ ਵਾਲੇ 67782 ਬਜ਼ੁਰਗ ਹਨ।
।ਬਜ਼ੁਰਗਾਂ ਵਿੱਚ ਆਮ ਤੌਰ ਤੇ ਸੂਗਰ, ਜੋੜ-ਦਰਦ, ਤਣਾਅ,ਉਦਾਸੀ,ਉੱਚਾ ਸੁਣਨਾ,ਨਜ਼ਰ ਕਮਜੋਰ,ਯਾਦਦਾਸ਼ਤ ਕਮਜ਼ੋਰ ਹੋ ਜਾਂਦੀ ਹੈ।ਜਿਸ ਕਰਕੇ ਕੁਝ ਲੋਕ ਬਜ਼ੁਰਗਾਂ ਨੂੰ ਆਪਣੇ ਤੇ ਬੋਝ ਸਮਝਦੇ ਹਨ।
ਆਉ!ਵੱਧ ਰਹੇ ਬਿਰਧ ਆਸ਼ਰਮਾਂ ਦੀ ਗਿਣਤੀ ਨੂੰ ਘੱਟ ਕਰਨ ਦਾ ਯਤਨ ਕਰੀਏ।ਹੈਵਨਲੀ ਪੈਲਸ,ਦੋਰਾਹਾ (ਲੁਧਿਆਣਾ) ਵਿਖੇ ਬਜ਼ੁਰਗਾਂ(ਸੀਨੀਅਰ ਸੀਟੀਜਨ) ਲਈ ਚੌਦਾਂ ਏਕੜ 'ਚ ਬਣਿਆ ਹੋਇਆ ਹੈ।ਇਥੇ ਪੰਜ ਤਾਰਾ ਜਿੰਨੀ ਸਹੂਲਤਾਂ,ਸਫਾਈ ਤੇ ਹਰਿਆਵਲ ਨਜ਼ਰ ਆਉਦੀ ਹੈ।ਥੀਏਟਰ, ਲਾਇਬਰੇਰੀ,ਡਾਕਟਰੀ,ਵਾਈ ਫਾਈ ਆਦਿ ਸਹੂਲਤਾਂ ਹਨ।ਇਥੇ ਮਨਮਰਜੀ ਨਾਲ ਬਜ਼ੁਰਗ ਆਉਦੇ ਹਨ।"ਬਜ਼ੁਰਗਾਂ ਨੂੰ ਪਿਆਰ,ਸਾਥ ਸਕੂਨ ਤੇ ਸੁਰੱਖਿਆ ਦੀ ਲੋੜ ਹੁੰਦੀ ਹੈ।ਇਸ ਲਈ ਜਿਹੜੇ ਲੋਕ ਬਜ਼ੁਰਗਾਂ ਜਾਂ ਮਾਪਿਆਂ ਦਾ ਸਤਿਕਾਰ ਨਹੀ ਕਰਦੇ ਉਹ ਜਿੰਦਗੀ ਵਿੱਚ ਸਿਰ ਉੱਚਾ ਕਰਕੇ ਹੱਥ ਨਹੀ ਮਿਲਾ ਸਕਦੇ।
'ਘਰ ਵਿਚ ਨਾ ਮੰਦਰ ਬਨਾਣਾ,ਨਾ ਕੋਈ ਦੇਵਤਾ ਰੱਖਣਾ।ਪਰ ਬਜ਼ੁਰਗਾਂ ਲਈ ਜਗ੍ਹਾ,ਘਰ ਵਿੱਚ ਸਦਾ ਰੱਖਣਾ।

ਖੂਨਦਾਨ ਕੌਮੀ ਸਵੈ-ਇੱਛਾ ਖੂਨ ਦਾਨ ਦਿਵਸ ਪਹਿਲੀਵਾਰ 01 ਅਕਤੂਬਰ 1975 ਨੂੰ ਇੰਡੀਅਨ ਸੁਸਾਇਟੀ ਆਫ ਬਲਡ ਟਰਾਂਸਫਿਉਜ਼ਨ ਐਂਡ ਇਮਿਊਨੋਹੀਮੈਟਾਲੋਜੀ ਵੱਲੋਂ ਮਨਾਇਆ ਗਿਆ ਇਸ ਸੁਸਾਇਟੀ ਦੀ ਸਥਾਪਨਾ 1971 ਵਿੱਚ ਡਾ ਜੇ ਜੀ ਜੋਲੀ ਤੇ ਕੇ ਸਵਰੂਪ ਕਰਿਸ਼ੇਨ ਨੇ ਕੀਤੀ।ਹਰ ਮਨੁੱਖ ਦੇ ਖੂਨ ਦਾ ਇਕ ਗਰੁੱਪ(ਏ,ਬੀ,ਉ ਤੇ ਏ ਬੀ) ਹੁੰਦਾ ਹੈ,ਜਿਸ ਬਾਰੇ ਹਰੇਕ ਨੂੰ ਜਾਣਕਾਰੀ ਹੋਣੀ ਚਾਹੀਦੀ ਹੈ ਤਾਂ ਕਿ ਕਿਸੇ ਵੀ ਅਣਸੁਖਾਵੀ ਘਟਨਾ ਮੌਕੇ ਮਰੀਜ ਨੂੰ ਉਸਦੇ ਗਰੁੱਪ ਦਾ ਖੂਨ ਦੇ ਕੇ ਬਚਾਇਆ ਜਾ ਸਕੇ।ਲੱਗਭਗ 400 ਸਾਲ ਪਹਿਲਾਂ ਵਿਗਿਆਨੀਆਂ ਨੇ ਮਨੁੱਖੀ ਸਰੀਰ ਦੇ ਖੂਨ ਸਬੰਧੀ ਤਜਰਬੇ ਸ਼ੁਰੂ ਕਰ ਦਿੱਤੇ ਸਨ।
ਖੂਨ ਦੇ ਗਰੁਪ ਦਾ ਸਭ ਤੋਂ ਪਹਿਲਾਂ 1901 ਵਿੱਚ ਅਮਰੀਕਾ ਦੇ ਜੀਵ ਵਿਗਿਆਨੀ ਕਾਰਲ ਲੈਂਡਸਟੇਨਰ ਨੇ ਲਾਇਆ ਸੀ।1907 ਵਿਚ ਡਾ ਰਿਊਬਸ ਉਟਨਬਰਗ ਨੇ ਖੂਨ ਦਾ ਅਦਾਨ ਪ੍ਰਦਾਨ ਕੀਤਾ ਸੀ।ਕਾਰਲ ਲੈਂਡਸਟੇਨਰ ਨੂੰ ਉਸ ਦੀਆਂ ਸੇਵਾਵਾ ਲਈ 1930 ਵਿੱਚ ਨੋਬਲ ਇਨਾਮ ਤੇ ਮਰਨ ਉਪਰੰਤ 1946 ਵਿੱਚ ਲਾਸਕਰ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ।
ਖੂਨਦਾਨ ਕਰਨ ਵਾਲੇ ਨੂੰ ਦਿਲ ਦੀਆਂ ਬਿਮਾਰੀਆਂ ਦਾ ਖਤਰਾ ਘੱਟ ਹੁੰਦਾ ਹੈ ਤੇ ਖੂਨ ਦੇ ਲਾਲ ਸੈਲ ਬਨਣ ਦੀ ਪ੍ਰੀਕਿਰਿਆ ਤੇਜ ਹੋਣ ਨਾਲ ਵਿਅਕਤੀ ਤਾਜਗੀ ਮਹਿਸੂਸ ਕਰਦੇ ਹਨ।ਹਰ ਸਾਲ ਦੇਸ਼ ਵਿਚ 9 ਮਿਲੀਅਨ ਖੂਨ ਇਕੱਠਾ ਹੁੰਦਾ ਹੈ ਜਦ ਕਿ ਬਾਰਾਂ ਮਿਲੀਅਨ ਖੂਨ ਦੀ ਲੋੜ ਹੁੰਦੀ ਹੈ।70% ਲੋਕ ਸਵੈ ਇੱਛੁਕ ਤੇ 30%ਖੂਨ ਰਿਸ਼ਤੇਦਾਰ,ਦੋਸਤ ਦਿੰਦੇ ਹਨ।
ਇਕ ਦਿਨ ਵਿੱਚ 38 ਹਜ਼ਾਰ ਤੋਂ ਵਧ ਖੂਨ ਦੇਣ ਵਾਲਿਆਂ ਦੀ ਲੋੜ ਹੁੰਦੀ ਹੈ।ਤ੍ਰਿਪੁਰਾ ਵਿੱਚ 93% ਲੋਕ ਖੂਨ ਦਾਨ ਕਰਦੇ ਹਨ ਜਦ ਕਿ ਤਾਮਿਲਨਾਡੂ ਤੇ ਮਹਾਂਰਾਸ਼ਟਰ ਵੀ ਖੂਨ ਦਾਨ ਦੇਣ 'ਚ ਅੱਗੇ ਹਨ।ਸਵਿਜਟਰਲੈਂਡ ਵਿੱਚ ਇਕ ਹਜ਼ਾਰ ਪਿੱਛੇ 113,ਜਪਾਨ 70 ਤੇ ਭਾਰਤ ਵਿੱਚ ਅਠ ਲੋਕ ਖੂਨ ਦਾਨ ਕਰਦੇ ਹਨ।ਓ ਗਰੁਪ ਦੀ ਸਭ ਤੋਂ ਵੱਧ ਮੰਗ ਹੈ।ਖੂਨ ਦਾਨ ਦਿਵਸ ਤੇ ਸਮਾਜਿਕ ਸੰਸਥਾਵਾਂ ਵੱਲੋਂ ਵਿਸ਼ੇਸ ਖੂਨ ਦਾਨ ਕੈਂਪ ਲਾਏ ਜਾਂਦੇ ਹਨ।ਰੈਡ ਕਰਾਸ ਸੁਸਾਇਟੀ ਵਲੋਂ ਭਾਰਤ ਵਿੱਚ ਬਲਡ ਬੈਂਕ ਸਥਾਪਤ ਹਨ ਜਿਥੇ ਐਮਰਜੈਂਸੀ ਵਿੱਚ ਖੂਨ ਲਿਆ ਤੇ ਦਿੱਤਾ ਜਾ ਸਕਦਾ ਹੈ।ਖੂਨ ਦਾ ਦਾਨ ਪ੍ਰਦਾਨ ਕਰਨ ਸਮੇਂ ਜਾਤਪਾਤ,ਊਚ-ਨੀਚ ਜਾਂ ਧਰਮ ਨਹੀਂ ਵੇਖਿਆ ਜਾਂਦਾ।ਸਾਰਿਆਂ ਦੇ ਖੂਨ ਦਾ ਗਰੁੱਪ ਤਾਂ ਹੋਰ ਹੋ ਸਕਦਾ ਹੈ ਪਰ ਰੰਗ ਨਹੀਂ,ਰੰਗ ਲਾਲ ਹੀ ਰਹੇਗਾ।
'ਖੂਨਦਾਨ ਜੀਵਨ ਦਾਨ' 'ਖੂਨ ਦਾਨ ਮਹਾਨ ਦਾਨ।'

ਅੱਜ ਦਾ ਵਿਚਾਰ (3 ਅਕਤੂਬਰ) ਜਦੋਂ ਈਸਾਈ ਮਿਸ਼ਨਰੀ ਅਫਰੀਕਾ ਆਏ ਤਾਂ ਉਨਾਂ ਕੋਲ ਬਾਈਬਲ ਸੀ ਅਤੇ ਸਾਡੇ ਕੋਲ ਜ਼ਮੀਨ,ਉਨਾਂ ਸਾਨੂੰ ਅੱਖਾਂ ਮੀਟ ਕੇ ਅਰਦਾਸ ਕਰਨੀ ਸਿਖਾਈ।ਜਦੋਂ ਸਾਡੀਆਂ ਅੱਖਾਂ ਖੁੱਲੀਆਂ ਤਾਂ ਉਨਾਂ ਕੋਲ ਜ਼ਮੀਨ ਸੀ,ਸਾਡੇ ਕੋਲ ਬਾਈਬਲ।(ਜੋਮੋ ਕੋਨਿਆਟੋ ਅਫਰੀਕੀ ਵਿਦਵਾਨ)
🌹🌹📚📚✒️🖋️📙📓🌹📓📙🖋️🌻🪴📓🌹
ਅੱਜ ਦੇ ਦਿਨ :
3-10-1939 ਗੁਰਦੁਆਰਾ ਸੁਧਾਰ ਲਹਿਰ ਦੇ ਮੋਢੀ ਜਥੇਦਾਰ ਤੇਜਾ ਸਿੰਘ ਭੁੱਚਰ ਦਾ ਦਿਹਾਂਤ।
1977 ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਦਿੱਲੀ ਵਿੱਚ ਗਿਰਫਤਾਰ ।
1978 ਭਾਰਤ ਦਾ ਪਹਿਲਾ ਟੈਸਟ ਟਿਉਬ ਬੱਚਾ(ਲੜਕੀ) ਕਾਨੂੰ ਪ੍ਰੀਆ ਅਗਰਵਾਲ ਉਰਫ ਦੁਰਗਾ ਦਾ ਕਲਕੱਤਾ ਵਿੱਚ ਜਨਮ।
1996 ਪਾਕਿ ਦੇ 16 ਸਾਲਾ ਕਿਰਕਿਟ ਖਿਡਾਰੀ ਸ਼ਾਹਿਦ ਅਫਰੀਦੀ ਨੇ 37 ਬਾਲਾਂ ਵਿਚ ਸੈਂਕੜੇ ਮਾਰਿਆ।

ਜੰਗਲ ਜੀਵ ਸੁਰੱਖਿਆ ਹਫਤਾ (3 ਤੋਂ 8 ਅਕਤੂਬਰ)।

ਅਰਦਾਸ ਭਾਵ ਬੇਨਤੀ ਮਨ ਦੇ ਅੰਦਰੋਂ ਨਿਕਲੀ ਅਵਾਜ਼ ਜਾਂ ਹੂਕ।ਕਿਹਾ ਜਾਂਦਾ ਅਰਦਾਸ ਨਾਲ ਹੌਂਸਲਾ, ਮੁਸ਼ਕਲ ਨਾਲ ਲੜਨ ਦੀ ਹਿੰਮਤ ਤੇ ਦਲੇਰੀ ਆਉਦੀ ਹੈ।ਅਰਦਾਸ ਕਰਕੇ ਵਿਅਕਤੀ ਆਪਣੇ ਆਪ ਨੂੰ ਸ਼ੁਰਖਰੂ ਹੋਇਆ ਤੇ ਸ਼ਾਤ ਮਹਿਸੂਸ ਕਰਦਾ ਹੈ।ਅਰਦਾਸ ਉਸ ਵੇਲੇ ਵੀ ਕੀਤੀ ਜਾਂਦੀ ਜਦੋਂ ਵਿਅਕਤੀ ਮੁਸ਼ਕਲ ਬਿਮਾਰੀ,ਪੁਲਸ ਕੇਸ, ਮੁਕੱਦਮੇ ਆਦਿ ਵਿੱਚ ਫਸਿਆ ਹੋਵੇ।ਜਿਥੇ ਵਧੇਰੇ ਹੜ, ਭੁਚਾਲ,ਸੋਕਾ,ਜੰਗਲੀ ਜਾਨਵਰਾਂ ਦਾ ਡਰ ਹੋਵੇ ਉਥੇ ਲੋਕ ਵਧੇਰੇ ਦੇਵੀ ਦੇਵਤਿਆਂ ਵਿੱਚ ਵਿਸ਼ਵਾਸ ਰੱਖਦੇ ਹਨ ਤੇ ਉਹ ਇੱਕਠੇ ਹੋ ਕੇ ਉਕਤ ਕਰੋਪੀਆਂ ਤੋਂ ਬਚਣ ਲਈ ਆਰਤੀ ਦੇ ਰੂਪ ਵਿੱਚ ਅਰਦਾਸ ਕਰਦੇ ਹਨ।ਨਾਸਤਕ ਵਿਅਕਤੀ ਕਦੇ ਅਰਦਾਸ ਨਹੀ ਕਰਦੇ।ਉਹ ਸਾਰੀ ਪ੍ਰਕਿਰਤੀ ਨੂੰ ਕੁਦਰਤ ਦਾ ਨਿਯਮ ਮੰਨਦੇ ਹਨ।ਜੋ ਚੀਜ਼ ਪੈਦਾ ਹੋਈ ਹੈ ਉਸਦਾ ਅੰਤ ਵੀ ਨਿਸਚਤ ਹੈ। ਜਿੰਦਗੀ ਦੀ ਦੌੜ ਵਿੱਚ ਮਨੁੱਖੀ ਚਿੰਤਾਵਾਂ ਵੱਧ ਗਈਆਂ ਹਨ।ਚਿੰਤਾਵਾਂ ਦੇ ਹੱਲ ਲਈ ਕੁੱਝ ਲੋਕਾਂ ਨੇ ਅਰਦਾਸ ਕਰਨ ਦੇ ਨਵੇਂ ਨਵੇਂ ਤਰੀਕੇ ਲੱਭ ਲਏ ਹਨ।ਜਨਮ ਦਿਨ ਤੇ ਲੰਮੀ ਉਮਰ ਦੀ ਅਰਦਾਸ, ਮੌਤ ਤੋਂ ਬਾਅਦ ਅੰਤਮ ਤੇ ਆਤਮਾ ਨੂੰ ਸ਼ਾਂਤੀ ਦੇਣ,ਨਵੇਂ ਕੰਮ ਲਈ ਉਦਘਾਟਨੀ,ਕਿਸੇ ਸਮਾਗਮ,ਵਿਆਹ, ਤਿਉਹਾਰ ਲਈ ਰੱਖੇ ਸਹਿਜ ਜਾਂ ਅਖੰਡ ਪਾਠ ਉਪਰੰਤ ਵਾਹਿਗੁਰੂ ਦੇ ਸ਼ੁਕਰਾਨੇ, ਬਿਮਾਰੀ, ਮੁਕੱਦਮੇ ਆਦਿ ਵਾਸਤੇ ਅਰਦਾਸਾਂ ਕੀਤੀਆਂ ਜਾਂਦੀਆਂ ਹਨ।ਰਾਜਸੀ ਨੇਤਾ ਚੋਣ ਪ੍ਰਚਾਰ ਅਰਦਾਸਾਂ ਨਾਲ ਹੀ ਸ਼ੁਰੂ ਕਰਦੇ ਹਨ ਪਰ ਜਿੱਤਣਾ ਤਾਂ ਇਕੋ ਨੇ ਹੀ ਹੁੰਦਾ ਹੈ,ਕਿਸਦੀ ਅਰਦਾਸ ਠੀਕ ਹੈ ਜਾਂ ਕਿਸਦੀ ਗਲਤ।ਗ੍ਰੰਥੀ, ਪੁਜਾਰੀ, ਮੌਲਵੀ ਤੇ ਹੋਰ ਧਰਮਾਂ ਵਾਲੇ ਆਪੋ ਆਪਣੇ ਢੰਗ ਨਾਲ ਅਰਦਾਸਾਂ ਕਰਦੇ ਹਨ।ਅਰਦਾਸ ਤੋਂ ਪਹਿਲਾਂ ਆਪਣੀ ਭੇਟਾ ਵੀ ਦਸ ਦਿੰਦੇ ਹਨ।ਪਰ ਨਾਸਤਕ ਲੋਕ ਸਮਝਦੇ ਹਨ ਕਿ ਸਾਨੂੰ ਅਰਦਾਸ ਕਰਨ ਦੀ ਬਜਾਏ ਹਿੰਮਤ ਮਿਹਨਤ ਅਤੇ ਖੁਦ ਤੇ ਭਰੋਸਾ ਰੱਖਣਾ ਚਾਹੀਦਾ ਹੈ।ਉਨਾਂ ਨੂੰ ਆਪਣੀ ਸ਼ਕਤੀ ਉਪਰ ਭਰੋਸਾ ਹੁੰਦਾ ਹੈ, ਇਸ ਕਰਕੇ ਅਰਦਾਸ ਨੂੰ ਸਮਾਂ ਬਰਬਾਦ ਕਰਨਾ ਸਮਝਦੇ ਹਨ। ਇਹ ਸਹੀ ਕਿਹਾ ਗਿਆ ਹੈ, 'ਅਰਦਾਸ ਵਿਚ ਜੁੜੇ ਹੱਥਾਂ ਨਾਲੋਂ ਕਿਸੇ ਦੇ ਦੁੱਖ ਦਰਦ ਜਾਂ ਮੁਸ਼ਕਲ ਵਿੱਚ ਵਧਾਏ ਹੱਥ ਮਹਾਨ ਹੁੰਦੇ ਹਨ।