Sanskriti Samvardhan Mandal

लालवंडीत (ता. नायगाव) ‘सबसॉइलर’ व ‘मोबाईल श्रेडर’ची प्रात्यक्षिके; संस्कृति संवर्धन मंडळ संचलित कृषि विज्ञान केंद्र आणि रिलायन्स फाउंडेशन यांच्या संयुक्त विद्यमाने शाश्वत शेतीसाठी शेतकऱ्यांना मार्गदर्शन.

“शेतीमध्ये शाश्वत प्रगती साधायची असेल, तर केवळ पारंपरिक पद्धतींवर अवलंबून न राहता शेतकऱ्यांनी आधुनिक तंत्रज्ञानाचा स्वीकार करणे ही काळाची गरज आहे,” असे प्रतिपादन जिल्हाधिकारी राहुल कर्डिले यांनी केले. सगरोळी (ता.बिलोली) येथील कृषी विज्ञान केंद्र व रिलायन्स फाउंडेशन यांच्या संयुक्त विद्यमाने राबविण्यात येत असलेल्या “हवामान अनुकूल शाश्वत विकास प्रकल्पा” अंतर्गत लालवंडी (ता.नायगांव) येथील प्रक्षेत्रावर दि. 14 मे रोजी आयोजित कार्यक्रमात ते बोलत होते.

यावेळी त्यांनी जमिनीतील कडक थर फोडून पाण्याची साठवण क्षमता वाढविण्यासाठी ‘सबसॉइलर’ यंत्राचा तसेच पिकांच्या अवशेषांचे जागीच सेंद्रिय खतामध्ये रूपांतर करण्यासाठी ‘मोबाईल श्रेडर’चा वापर अत्यंत उपयुक्त असल्याचे सांगितले. या आधुनिक तंत्रज्ञानामुळे जमिनीचा पोत सुधारण्यास मोठी मदत होणार असल्याचेही त्यांनी स्पष्ट केले.

कार्यक्रमात कृषी विज्ञान केंद्राच्या डॉ. प्रियंका खोले यांनी ‘ट्रॅक्टरचलित श्रेडर’ व ‘सबसॉइलर’ या यंत्रांचे शेतात प्रत्यक्ष प्रात्यक्षिक सादर केले. जमिनीतील कठीण थर फोडल्यामुळे पाण्याची मुरण्याची क्षमता वाढते, तर पिकांचे अवशेष न जाळता त्याचे बारीक तुकडे करून जमिनीत मिसळल्यास नैसर्गिक खत तयार होऊन जमिनीची सुपीकता वाढते, अशी माहिती त्यांनी दिली.

यंदाच्या हवामान अंदाजाच्या पार्श्वभूमीवर ‘एल निनो’च्या संभाव्य परिणामांचा सामना करण्यासाठी आवश्यक कृषी उपाययोजनांबाबतही शेतकऱ्यांमध्ये जागरूकता निर्माण करण्यात आली. जमिनीतील ओलावा टिकवून ठेवणे, पाणी बचतीच्या संवर्धन पद्धती अवलंबणे तसेच खतांचा संतुलित वापर करून पिकांची जोमदार वाढ साधण्याचे आवाहन यावेळी करण्यात आले.

कार्यक्रमास संस्कृती संवर्धन मंडळाचे चेअरमन प्रमोद देशमुख, लालवंडीचे सरपंच प्रकाश जोंधळे, जिल्हा अधीक्षक कृषी अधिकारी दत्तकुमार कळसाईत, उपविभागीय कृषी अधिकारी गिते, तालुका कृषी अधिकारी दिपेश देवरे, डॉ. माधुरी रेवणवार, सर्जेराव ढवळे, व्यंकट शिंदे, संतोष तेलंगे, संदीप पुयड, शिवम गायकवाड, दिनेश शिंदे, नारायण मोरे यांच्यासह परिसरातील शेतकरी मोठ्या संख्येने उपस्थित होते.

लक्ष्यवेध समर कॅम्प : सात दिवस… आणि आयुष्यभरासाठी दिशा!

दि. 5 मे, पहाटेचे पाच वाजले होते. शारदानगरच्या परिसरात पक्ष्यांचा किलबिलाट सुरू होता. वसतिगृहाच्या प्रांगणात काही मुले अजूनही डोळे चोळत उभी होती, तर काही उत्साहाने दिवसाची सुरुवात करण्यास सज्ज होती. पहिल्याच दिवशी थोडीशी घाबरलेली, घराची आठवण काढणारी हीच मुले… आज आत्मविश्वासाने उभी होती.

श्री. छत्रपती शिवाजी हायस्कूल, सगरोळी येथे दि. 5 ते 11 मे 2026 दरम्यान ‘लक्ष्यवेध समर कॅम्प’ आयोजित करण्यात आला. म्हणजे फक्त उपक्रमांची मालिका नव्हती… ती होती स्वतःला शोधण्याची एक सुंदर संधी. मोबाईलपासून दूर, पण स्वयंशिस्त जीवनाच्या अधिक जवळ नेणारा हा अनुभव होता.

सकाळी योग, सूर्यनमस्कार आणि शिस्तबद्ध परिपाठ…
दिवसभर खेळ, स्विमिंग, रोबोटिक्स, कला आणि नृत्य…
आणि संध्याकाळी मित्रांसोबत गप्पा, हशा आणि नव्या आठवणी…
“आज मी स्वतः माझे कपडे धुतले!” — एका विद्यार्थ्याच्या चेहऱ्यावरचा आनंद शब्दांत मावत नव्हता.
“मी पहिल्यांदाच पाण्यात उतरून पोहलो!” — दुसऱ्याने अभिमानाने सांगितले.
आणि एका छोट्या मुलीने हसत सांगितले — “आता मला आईशिवायही राहता येतं!”
रोबोटिक्सच्या सत्रात जेव्हा एका विद्यार्थ्याने पहिल्यांदाच छोटासा मॉडेल चालवला, तेव्हा त्याच्या डोळ्यात चमक होती — “मी काहीतरी बनवू शकतो!” हा विश्वास त्याला मिळाला होता.
बालाघाट डोंगररांगांच्या जंगल सफारीत निसर्गाचा अनुभव घेताना, मांजरा नदीच्या काठावर बसताना, मऊ वाळूत खेळ खेळताना किंवा घोडेस्वारी करताना… प्रत्येक क्षण विद्यार्थ्यांना काहीतरी नवीन शिकवून गेला.

आणि मग आला समारोपाचा दिवस… 11 मे
जे विद्यार्थी पहिल्या दिवशी स्टेजवर उभं राहायलाही घाबरत होते, त्याच विद्यार्थ्यांनी आज आत्मविश्वासाने योग, मल्लखांब आणि मानवी मनोरे सादर केले. टाळ्यांचा कडकडाट झाला… पण त्या टाळ्यांपेक्षा मोठा होता त्यांचा स्वतःवरचा विश्वास! यावेळी कार्यक्रमात बोलताना पालकांनीही सुनियोजित उपक्रमांमुळे सात दिवसांत माझ्या मुलात दडलेले सुप्त गुण पाहण्यात आल्याने समाधान व्यक्त केले.

या सात दिवसांत त्यांनी केवळ उपक्रम केले नाहीत…
तर त्यांनी स्वावलंबन, शिस्त, मैत्री, सहकार्य आणि आत्मविश्वास यांचे धडे शिकले.
‘लक्ष्यवेध’ म्हणजे लक्ष्य गाठण्याची सुरुवात…
आणि या शिबिराने प्रत्येक विद्यार्थ्याला त्याच्या आयुष्याच्या योग्य दिशेचा वेध दिला. सहभागी विद्यार्थ्यांपैकी अर्ध्या मुलांनी तर याच शाळेत प्रवेश घेण्याचे निश्चित केले.

खरंच… हे शिबीर नव्हतं, तर आयुष्य घडवणारा एक अनुभव होता!

TECHNOTICS 2026 : ATL विद्यार्थ्यांची रोबोटिक्समध्ये झेप – ZiMMER सोबत शिकण्याची अनोखी संधी!

संस्कृती संवर्धन मंडळ, सगरोळी यांच्या वतीने ZiMMER Group यांच्या संयुक्त विद्यमाने श्री छत्रपती शिवाजी हायस्कूल व ज्यू. कॉलेज, शारदानगर सगरोळी येथील अटल टिंकरिंग लॅबमध्ये ५ व ६ मे रोजी आयोजित रोबोटिक्स वर्कशॉप उत्साहात व यशस्वीरीत्या पार पडले.

या कार्यशाळेसाठी श्री. सुनील रायबागी (Managing Director – Asia Operations), श्री. ऋषिकेश कुलकर्णी (Chief Operating Officer, ZiMMER Automation India Pvt. Ltd.), श्री. अनय घाटपांडे (Business Development Manager, ZiMMER Group India) हे ZiMMER Group चे जागतिक मान्यवर उपस्थित राहून विद्यार्थ्यांना मार्गदर्शन करत होते.

या दोन दिवसांत विद्यार्थ्यांना रोबोटिक्स, ऑटोमेशन आणि Industry 4.0 याविषयी मूलभूत ते सखोल माहिती देण्यात आली. विशेषतः DoBot Robot च्या माध्यमातून रोबोटिक आर्मचे कार्य, प्रोग्रामिंग व औद्योगिक वापर याचे प्रात्यक्षिक देण्यात आले.

या कार्यशाळेत विद्यार्थ्यांना Automation व Robotics Engineering मधील करिअर संधी, Artificial Intelligence, Industrial IoT व Smart Manufacturing ची ओळख, प्रोजेक्ट्स अधिक प्रभावी बनवण्यासाठी तज्ज्ञ मार्गदर्शन मिळाले.

या वेळी ZiMMER Group च्या प्रतिनिधींनी अटल लॅबमधील विद्यार्थ्यांचे 3D Printer, Environment Monitor, Height Measuring Device, Sanskriti Walking Robot इत्यादि विविध नाविन्यपूर्ण प्रकल्प पाहिले.

👩‍🎓👨‍🎓 विद्यार्थ्यांच्या प्रतिक्रिया अत्यंत सकारात्मक होत्या. अनेकांनी रोबोटिक्स क्षेत्रात करिअर करण्याची प्रेरणा मिळाल्याचे सांगितले.

🤝 या कार्यशाळेमुळे ZiMMER Group व अटल टिंकरिंग लॅब यांच्यात भविष्यातील सहकार्याचा मजबूत पाया निर्माण झाला आहे. दरमहा ऑनलाइन मार्गदर्शन, प्रोजेक्ट मेंटरिंग व तांत्रिक प्रशिक्षण यासाठी पुढाकार घेण्यात येणार आहे.

✨ एकूण ६७ विद्यार्थ्यांच्या सक्रिय सहभागामुळे हा उपक्रम अत्यंत यशस्वी ठरला.

राज्य शासनाच्या SQAFF मूल्यांकनात A+ प्रमाणित जिल्हयातील एकमेव शाळा आणि सलग तीन वेळेस मुख्यमंत्री माझी शाळा सुंदर शाळा स्पर्धेत विभाग स्तरावर निवड झालेल्या श्री छत्रपती शिवाजी हायस्कूल या 'निवासी संकुलात' केवळ शिक्षण नव्हे, तर विद्यार्थ्यांचा सर्वांगीण विकास आणि कडक शिस्त हे आमचे वैशिष्ट्य आहे. शैक्षणिक वर्ष 2026-27 साठी वसतिगृह प्रवेश प्रक्रिया आता सुरू होत आहे.

अधिक माहितीसाठी संपर्क:
श्री छत्रपती शिवाजी हायस्कूल व कनिष्ठ महाविद्यालय,
सगरोळी, ता. बिलोली, जि. नांदेड. (UDISE No : 27150807603)

संपर्क :
7972768149 (संभाजी गायकवाड (मुख्याध्यापक)
9356915276 (गीता गायकवाड (वसतिगृह अधीक्षिका)
9049063650 (लक्ष्मीकांत इनामदार (वसतिगृह अधीक्षक)

प्रवेश रजिस्ट्रेशन लिंक:
https://docs.google.com/forms/d/e/1FAIpQLSe5mNK5aGkwGsZiT0oGXSZOe0IsNNrdkOzmp9f7AMWgUdKNpg/viewform

संस्कृति संवर्धन मंडळ संकुलातील श्री. छत्रपती शिवाजी हायस्कूल, राजर्षि श्री छत्रपती शाहू सैनिकी विद्यालय आणि द् कन्सेप्ट स्कूल या तिन्ही विभागाच्या विद्यार्थ्यानी दहावी बोर्ड परीक्षेत मिळवलेल्या नेत्रदीपक यशाबद्दल सर्व विद्यार्थी व अध्यापक यांचे अभिनंदन..

Sainiki Vidyalay Sagroli Shri. Chhatrapati Shivaji High School Sagroli

प्रिय वाचक
नमस्कार,

संस्थेच्या विविध विभागातील माहे मार्च - एप्रिल २०२६ दरम्यान झालेल्या उपक्रमाचा वृत्तांत अर्थात *विद्यावृत* आपणास देत आहोत. कृपया अवलोकन करावे.

धन्यवाद.. !

Vidyavrutta Mar Apr 26

एचएससी (12 वी) निकाल 2026 – संकुलातील विज्ञान, कला व व्यवसाय अभ्यासक्रम शाखेतील विद्यार्थ्यांचे उल्लेखनीय यश!

फेब्रुवारी 2026 मध्ये राज्य उच्च माध्यमिक शिक्षण मंडळाने घेतलेल्या (बारावी) परीक्षेचा निकाल जाहीर झाला असून संस्कृती संवर्धन मंडळ, सगरोळी अंतर्गत श्री छत्रपती शिवाजी हायस्कूल व ज्युनियर कॉलेज (विज्ञान, कला व व्यवसाय अभ्यासक्रम) तसेच राजर्षी श्री. छत्रपती शाहू सैनिकी उच्च माध्यमिक विद्यालय, शारदानगर, सगरोळी या दोन्ही विभागातील विद्यार्थ्यांनी उल्लेखनीय यश संपादन केले आहे. विविध शाखांमधील विद्यार्थ्यांनी आपल्या कष्ट, जिद्द आणि शिस्तीच्या जोरावर उत्कृष्ट कामगिरी नोंदवली आहे.

श्री छत्रपती शिवाजी हायस्कूल व ज्युनियर कॉलेज
🔬 विज्ञान शाखा (Science Stream)
विज्ञान शाखेचा एकूण निकाल 92.77% लागला असून विद्यार्थ्यांनी उत्कृष्ट कामगिरी नोंदवली आहे.
🏆 गुणवंत विद्यार्थी:
🥇 गोनेवार प्रियंका – 71.17%
🥈 अंकमवार पूजा – 67.33%
🥉 लासोने आदित्य – 64.67%

📚 कला शाखा (Arts Stream)
कला शाखेचा निकाल 73.52% लागला असून एकूण 34 विद्यार्थी परीक्षेला बसले होते. त्यापैकी 25 विद्यार्थी उत्तीर्ण झाले आहेत. 1 विद्यार्थ्याने विशेष प्रावीण्य (Distinction) मिळवले असून 6 विद्यार्थ्यांनी द्वितीय श्रेणी मिळवली आहे.
🏆 प्रमुख गुणवंत विद्यार्थी:
🥇 शेख सना अतिक मोहम्मद – 75.60%
🥈 मेटके शिवानी शंकर – 57%
🥉 टेकवाड अश्विनी सायलू – 53.83%

🎓 व्यावसायिक (MCVC) शाखा
व्यावसायिक अभ्यासक्रमातील विद्यार्थ्यांनीही उल्लेखनीय यश मिळवले आहे.
🏆 केंद्रातील प्रथम क्रमांक:
🥇 विठ्ठल वाडेटल्लू – 76%
🥈 संदीप इबितवार – 68.50%
🥉 चैतन्य देसाई – 68.30%

🪖 सैनिकी विद्यालय, सगरोळी
सैनिकी विद्यालयाचा निकाल अत्यंत उल्लेखनीय ठरला आहे. परीक्षार्थी: 38 , उत्तीर्ण: 37. एकूण निकाल: 97.36%
🥇वाघोलीकर सुजल – 68.00%
🥈आवरूल गुरुप्रसाद – 60.50%
🥉पांचाळ प्रेम – 57.83%

या उल्लेखनीय यशाबद्दल सर्व विद्यार्थ्यांचे, त्यांच्या पालकांचे व मार्गदर्शक शिक्षकांचे मनःपूर्वक अभिनंदन! विद्यार्थ्यांच्या मेहनतीला, शिक्षकांच्या मार्गदर्शनाला आणि पालकांच्या पाठिंब्याला हे यश समर्पित आहे.

📌 प्रवेश सूचना
इयत्ता ११वी व्यवसाय अभ्यासक्रम शाखा प्रवेशासाठी इच्छुक विद्यार्थ्यांनी संपर्क साधावा:
📞 साहेबराव भिसे – 7875563732
📞 अशोक मिद्दलवार – 9665654871

“कार्याचा गौरव, नव्या वाटचालीचा संकल्प : महाराष्ट्र दिनी ५० कार्यकर्त्यांचा सन्मान”

महाराष्ट्र दिनाच्या औचित्याने संस्थेतील विविध शाखांमध्ये वर्षभरात उल्लेखनीय कार्य करणाऱ्या ५० कार्यकर्त्यांचा सन्मानपूर्वक गौरव करण्यात आला. या सोहळ्याने संस्थेच्या कार्यकर्त्यांच्या समर्पण, मेहनत आणि योगदानाचा सन्मान करत एक प्रेरणादायी वातावरण निर्माण केले.

यावेळी चेअरमन प्रमोद देशमुख यांनी मार्गदर्शन करताना संस्थेतील सर्व विभागांमधील समन्वय अधिक दृढ करण्याची गरज अधोरेखित केली. विद्यार्थी केंद्रित उपक्रमांना अधिक प्राधान्य देत शिक्षण प्रक्रियेला अधिक परिणामकारक बनवण्याचे आवाहन त्यांनी केले.

तसेच, संस्थेतील अंतर्गत व्यवस्थापन अधिक सुलभ आणि कार्यक्षम करण्यासाठी श्री. शीतलकुमार जोशी व आयटी टीमने विकसित केलेल्या डिजिटल प्रणालीचा नियमित वापर करण्याचे महत्त्व त्यांनी सांगितले. या प्रणालीमुळे कामे अधिक जलद, अचूक आणि पारदर्शक पद्धतीने पूर्ण होतील, असा विश्वास त्यांनी व्यक्त केला.

संस्था आणि परिसरात राबवले जात असलेले पर्यावरणपूरक प्रकल्प हेच संस्थेच्या कार्याचा गाभा असल्याचे नमूद करत, या उपक्रमांकडे विशेष लक्ष देण्याचेही त्यांनी आवर्जून सांगितले.

संस्थेच्या कनिष्ठ महाविद्यालयातील अध्यापिका श्रीमती किरण सलगर यांनी भौतिकशास्त्र विषयावर लिहिलेल्या पुस्तकाचे प्रकाशन यावेळी आ प्रमोद देशमुख यांच्या हस्ते करण्यात आले. यावेळी व्यासपीठावर सचिव डॉ जयंत जकाते, खजिनदार श्री संजीव सगरोळीकर आणि शालेय व्यवस्थापन समिती अध्यक्ष सुनील देशमुख उपस्थित होते.

"शांती, करुणा आणि अहिंसेचा मार्ग दाखवणाऱ्या तथागत गौतम बुद्धांना वंदन! बुद्ध पौर्णिमेच्या सर्वांना मंगलमय शुभेच्छा!" 🌟

"राकट देशा, कणखर देशा, दगडांच्या देशा. मंगल देशा, पवित्र देशा, महाराष्ट्र देशा. प्रणाम घ्यावा माझा श्री महाराष्ट्र देशा!" महाराष्ट्र दिन व कामगार दिनाच्या हार्दिक शुभेच्छा ..