Jamdar High School Education Society Nagpur

जामदार हायस्कूलचे उत्कर्ष ८९वे स्नेहसंमेलन उत्साहात पार पडले

*जामदार हायस्कूल, रेशीमबाग येथे ८९ वे उत्कर्ष स्नेहसंमेलन उत्साहात संपन्न*

नागपूर येथील जामदार हायस्कूल, रेशीमबाग येथे जामदार बालक मंदिर (प्राथमिक), हायस्कूल व विज्ञान कनिष्ठ महाविद्यालय यांचे संयुक्त ८९ वे उत्कर्ष स्नेहसंमेलन अत्यंत उत्साहपूर्ण वातावरणात व थाटात पार पडले. या स्नेहसंमेलनाचे उद्घाटन प्रसिद्ध उद्योजक माननीय शशिकांत चौधरी यांच्या हस्ते झाले, तर नैवेद्यम ग्रुपचे माननीय दिलीप कामदार हे प्रमुख अतिथी म्हणून उपस्थित होते.

उद्घाटनप्रसंगी माननीय शशिकांत चौधरी यांनी भारतातील प्रसिद्ध उद्योजकांचा संघर्षमय प्रवास विद्यार्थ्यांसमोर उलगडून सांगितला. त्यांच्या यशकथांमधून प्रेरणा घेऊन विद्यार्थ्यांनीही कठोर परिश्रमाने उत्तुंग शिखर गाठावे, असे अमूल्य मार्गदर्शन त्यांनी केले. यावेळी माननीय दिलीप कामदार यांनी विद्यार्थ्यांना मार्गदर्शन करताना “जीवनात योग्य दिशेने पुढे जाण्याची तयारी ठेवली, तर परिस्थिती नक्कीच बदलते” असा मोलाचा संदेश दिला.

कार्यक्रमाची सुरुवात महाराष्ट्र गीताने करण्यात आली. उद्घाटनप्रसंगी संभाजी वंदना व गणेश वंदना या ऐतिहासिक नाट्यछटींचे प्रभावी सादरीकरण करण्यात आले. स्नेहसंमेलनात विद्यार्थ्यांनी विविध गीतांवर आधारित आकर्षक नृत्य सादरीकरण करून उपस्थितांची मने जिंकली. तसेच शालांत परीक्षेत प्रथम क्रमांक मिळविणाऱ्या विद्यार्थ्यांना बक्षिसे प्रदान करून त्यांचे कौतुक करण्यात आले.स्नेहसंमेलनानंतर शाळेत विद्यार्थ्यांनी तयार केलेल्या कला प्रदर्शन व विज्ञान प्रदर्शनाचे आयोजन करण्यात आले. या प्रदर्शनाचे उद्घाटन गिनीज बुक ऑफ वर्ल्ड रेकॉर्डधारक सुनील वाघमारे तसेच श्रीमती चित्रा तुर यांच्या हस्ते करण्यात आले. या प्रदर्शनाच्या माध्यमातून विद्यार्थ्यांच्या विविध कलागुणांना व वैज्ञानिक विचारांना वाव देण्याचा स्तुत्य उपक्रम शाळेत राबविण्यात आला.

या ८९ व्या स्नेहसंमेलन प्रसंगी जामदार एज्युकेशन सोसायटीचे अध्यक्ष दिलीप भराडे, सचिव महेश अंधारे, सहसचिव संदीप सेलगावकर, कोषाध्यक्ष उदय कामत हे प्रामुख्याने उपस्थित होते. याशिवाय जामदार प्राथमिकच्या मुख्याध्यापिका सौ. दाभेकर मॅडम व हायस्कूलचे मुख्याध्यापक श्री. निमगावकर यांचीही उपस्थिती लाभली.

कार्यक्रमाचे सुत्रसंचालन उत्सव समिती प्रमुख कुमारी मंजुषा बोरीकर व संदीप चटप यांनी केले, पाहुण्यांचा परिचय श्री पेशकर तर आभार प्रदर्शन सौ. वेळेकर यांनी केले. स्नेहसंमेलन यशस्वी होण्यासाठी शिक्षकवृंद, विद्यार्थी व पालकांचे मोलाचे सहकार्य लाभले.

जामदार हायस्कूलमध्ये विद्यार्थ्यांकडून इको-फ्रेंडली दिवे व आकाशकंदील निर्मिती

नागपूर (रेशीमबाग) – राष्ट्रीय हरित सेनेच्या अंतर्गत जामदार हायस्कूल, रेशीमबाग येथे दिवाळीच्या पार्श्वभूमीवर विद्यार्थ्यांकडून इको-फ्रेंडली दिवे आणि आकाशकंदील तयार करण्याचा उपक्रम राबविण्यात आला. पर्यावरणपूरक सण साजरा करण्याचा संदेश देत विद्यार्थ्यांनी उत्स्फूर्तपणे या उपक्रमात सहभाग नोंदवला.

या उपक्रमाद्वारे विद्यार्थ्यांमध्ये सर्जनशीलता, पर्यावरण जाणीव आणि स्वनिर्मितीचा उत्साह दिसून आला. जामदार हायस्कूलच्या वतीने सर्व विद्यार्थ्यांचे मनःपूर्वक कौतुक करण्यात आले. शाळेचे शिक्षक व हरित सेनेचे मार्गदर्शक यांनी विद्यार्थ्यांना पर्यावरण संवर्धनाचा संदेश देत अशा उपक्रमांमध्ये सातत्याने सहभाग घेण्याचे आवाहन केले.

जामदार हायस्कूल रेशीमबाग नागपूर येथील विद्यार्थी सोहम कठाळे वर्ग 8 ब च्या विद्यार्थ्यांने रेखाटलेले गणेशाचे चित्र

दहीहंडीचा आनंद लुटतांना जामदार हायस्कूलचे विद्यार्थी