SNDT Women's University Mumbai India

19/09/2026

एसएनडीटी महिला विद्यापीठाच्या प्रभारी कुलगुरूपदी कर्नल प्रा. डॉ. हेमलता के. बागला
सातत्य, सहकार्य आणि सामूहिक जबाबदारीतून विद्यापीठाच्या प्रगतीचा संकल्प

मुंबई, दि. १९ सप्टेंबर २०२६ : कर्नल प्रा. डॉ. हेमलता के. बागला यांनी एसएनडीटी महिला विद्यापीठाच्या प्रभारी कुलगुरूपदाचा पदभार १९ सप्टेंबर २०२६ रोजी स्वीकारला. विद्यापीठाच्या अधिकारी व कर्मचाऱ्यांनी त्यांचे यावेळी उत्साहात स्वागत केले.

पदभार स्वीकारल्यानंतर डॉ. हेमलता के. बागला यांनी एसएनडीटी महिला विद्यापीठाचे संस्थापक भारतरत्न महर्षी धोंडो केशव कर्वे यांच्या प्रतिमेस अभिवादन करून त्यांना आदरांजली वाहिली. महिला शिक्षण आणि सक्षमीकरणासाठी महर्षी कर्वे यांनी दिलेल्या ऐतिहासिक योगदानाचे त्यांनी स्मरण केले.

यावेळी विद्यापीठाच्या माजी कुलगुरू प्रा. उज्वला चक्रदेव, माजी प्र-कुलगुरू डॉ. रुबी ओझा, कुलसचिव डॉ. विलास नांदवडेकर, अधिष्ठाता (अति. भार) आणि संचालक, UGC-MMTTC डॉ. जयश्री शिंदे, परीक्षा नियंत्रक डॉ. संजय नेरकर, ​आजीवन अध्ययन आणि विस्तार विभागाचे संचालक डॉ. प्रभाकर चव्हाण, क्रीडा संचालक डॉ. कविता खोलगडे, अभियंता आशिष कांबळे, सहायक वित्त व लेखाधिकारी जान्हवी भोळे, सहायक कुलसचिव श्री मनोज गोसावी, सहायक कुलसचिव श्री अंगद पुकळे तसेच विद्यापीठातील अन्य अधिकारी उपस्थित होते.

पदभार स्वीकारल्यानंतर डॉ. हेमलता के. बागला यांनी विद्यापीठातील विविध विभागांच्या कामकाजाचा आढावा घेतला. विद्यापीठासमोरील सद्य शैक्षणिक व प्रशासकीय प्राधान्यक्रमांची माहिती घेत त्यांनी संबंधित अधिकाऱ्यांशी संवाद साधला. यावेळी शैक्षणिक उपक्रम, परीक्षा, प्रशासकीय कामकाज तसेच विद्यापीठातील इतर महत्त्वाच्या बाबींचा आढावा घेण्यात आला.

यावेळी डॉ. हेमलता के. बागला यांनी सातत्य, सहकार्य आणि सामूहिक जबाबदारी यावर भर देत विद्यापीठाच्या शैक्षणिक व प्रशासकीय उपक्रमांना अधिक बळकटी देण्यासाठी सामूहिक प्रयत्नांची गरज व्यक्त केली.

एसएनडीटी महिला विद्यापीठाची समृद्ध परंपरा आणि वारसा पुढे नेताना महिला शिक्षण, सक्षमीकरण, नवोन्मेष आणि भविष्यकालीन कौशल्याधारित शिक्षणाला चालना देण्यासाठी सामूहिकपणे कार्य करण्याची आपली बांधिलकी त्यांनी व्यक्त केली.

18/09/2026

17/09/2026

एसएनडीटी महिला विद्यापीठाच्या दूरस्थ व ऑनलाइन शिक्षण केंद्रात प्रवेश सुरू
महिलांना उच्च शिक्षणाची सुवर्णसंधी; ३० सप्टेंबरपर्यंत प्रवेशाची अंतिम मुदत

मुंबई, दि. १७ सप्टेंबर २०२६ : एसएनडीटी महिला विद्यापीठाच्या दूरस्थ व ऑनलाइन शिक्षण केंद्रात (CDOE) शैक्षणिक वर्ष २०२६-२७ च्या जुलै २०२६ सत्रासाठी विविध पदवी व पदव्युत्तर अभ्यासक्रमांच्या प्रवेश प्रक्रियेला सुरुवात झाली आहे. प्रवेशासाठी ३० सप्टेंबर २०२६ ही अंतिम मुदत असून, नियमित महाविद्यालयात जाऊन शिक्षण घेणे शक्य नसलेल्या युवती व महिलांसाठी उच्च शिक्षण पूर्ण करण्याची ही महत्त्वपूर्ण संधी आहे.

पदवी अभ्यासक्रमांमध्ये बी.ए., बी.कॉम., बी.एम.एस. (Bachelor of Management Studies) आणि बी.ए. मास मीडिया यांचा समावेश आहे. बी.ए. व एम.ए. अभ्यासक्रमांसाठी मराठी, हिंदी, इंग्रजी, इतिहास, राज्यशास्त्र, समाजशास्त्र आणि अर्थशास्त्र या विषयांमध्ये शिक्षणाची सुविधा आहे. तसेच पदव्युत्तर स्तरावर एम.कॉम., एमबीए आणि एम.ए. शिक्षणशास्त्र हे अभ्यासक्रम उपलब्ध आहेत.

बी.एम.एस. आणि एमबीए या अभ्यासक्रमांसाठी प्रवेश परीक्षा (CET) घेण्यात येणार असून, ही परीक्षा १० ऑक्टोबर २०२६ रोजी ऑनलाइन पद्धतीने होणार आहे. या प्रवेश परीक्षेसाठी इच्छुक विद्यार्थिनींना ५ ऑक्टोबर २०२६ पर्यंत अर्ज करता येणार आहे.

दूरस्थ व ऑनलाइन शिक्षण केंद्रामार्फत राबविण्यात येणारे अभ्यासक्रम UGC-DEB मान्यताप्राप्त असून, विद्यार्थिनींना ऑनलाइन प्रवेश प्रक्रिया, तज्ज्ञ शिक्षकांचे मार्गदर्शन, ई-पुस्तक स्वरूपातील स्वयं-अध्ययन साहित्य, ऑनलाइन समुपदेशन सत्रे, विविध अभ्यास व परीक्षा केंद्रांची सुविधा, शासकीय नियमानुसार शिष्यवृत्ती आणि रोजगाराभिमुख करिअर विकासाच्या संधी उपलब्ध आहेत. हे अभ्यासक्रम राष्ट्रीय शैक्षणिक धोरणाशी (NEP) सुसंगत आहेत.

विद्यार्थिनींच्या मार्गदर्शनासाठी मुंबई (मुख्यालय), पुणे (उपकेंद्र) आणि चंद्रपूर-बल्लारपूर (उपकेंद्र) येथे संपर्क केंद्रे उपलब्ध आहेत.

पदवी अभ्यासक्रमांसाठी https://sndtadm.dulive.ac आणि पदव्युत्तर अभ्यासक्रमांसाठी https://sndtcdoeadm.samarth.edu.in/ या संकेतस्थळांवर ऑनलाइन अर्ज करता येईल.

या प्रवेश संधीचा लाभ घेऊन महिलांनी आपले उच्च शिक्षण पूर्ण करून उज्ज्वल भवितव्य घडवावे, असे आवाहन एसएनडीटी महिला विद्यापीठाचे कुलसचिव डॉ. विलास नांदवडेकर आणि दूरस्थ व ऑनलाइन शिक्षण केंद्राचे संचालक डॉ. मंगेश कदम यांनी केले आहे. अधिक माहितीसाठी ८२८६८७८२०८/ ८३६९६०७८७५ या क्रमांकावर संपर्क साधावा किंवा WhatsApp संदेश पाठवावेत.

12/09/2026

शिक्षक हे सामाजिक अभियंते; नव्या पिढीच्या जडणघडणीत महत्त्वाची भूमिका - डॉ. प्रशांत काळे
मुंबई, दि. १२ सप्टेंबर २०२६ : एस.एन.डी.टी. महिला विद्यापीठाच्या पी.व्ही.डी.टी. महाविद्यालयाच्या वतीने भारताचे माजी राष्ट्रपती डॉ. सर्वपल्ली राधाकृष्णन यांची जयंती आणि शिक्षक दिन उत्साहात साजरा करण्यात आला. या कार्यक्रमाला डॉ. प्रशांत काळे आणि डॉ. सुभाष चव्हाण प्रमुख अतिथी म्हणून उपस्थित होते.
यावेळी डॉ. प्रशांत काळे यांनी, “आपण प्रत्येक व्यक्तीकडून काही ना काही शिकत असतो. शिक्षक हे सामाजिक अभियंते असून समाजाला नवी दिशा देण्यासोबतच नव्या पिढीची जडणघडण करण्याचे महत्त्वपूर्ण कार्य सातत्याने करतात,” असे मत व्यक्त केले. विद्यार्थिनींनी महापुरुषांचे विचार आत्मसात करून ते आपल्या जीवनात आचरणात आणावेत, असे आवाहनही त्यांनी केले.
डॉ. सुभाष चव्हाण यांनी विद्यार्थिनींनी लक्ष विचलित न होऊ देता एकाग्रतेने ज्ञान ग्रहण करून आपले ध्येय साध्य करावे, असे सांगितले. आज माहितीचे स्रोत मोठ्या प्रमाणात उपलब्ध असून विद्यार्थिनींनी त्याचा सकारात्मक आणि प्रभावी उपयोग करावा, असे त्यांनी नमूद केले.
अध्यक्षीय समारोप करताना प्राचार्य डॉ. संजय शेडमाके यांनी विद्यार्थिनींनी अभ्यासावर लक्ष केंद्रित करून जास्तीत जास्त ज्ञान आत्मसात करावे, असे आवाहन केले. “जे अधिक ज्ञान ग्रहण करतात तेच उत्तम शिक्षक बनू शकतात,” असे सांगत त्यांनी व्यक्तिमत्त्व विकासातून स्वतःमध्ये सकारात्मक बदल घडवून आणण्याचे आवाहन केले.
डॉ. सिद्धार्थ घाटविसावे यांनी आयुष्यात आपण काय करतो आणि काय करायला हवे, हे प्रत्येकाने निश्चित केले पाहिजे. प्रामाणिकपणे विद्याग्रहण करणारे विद्यार्थी जीवनात यशाच्या शिखरावर पोहोचतात, असे मत व्यक्त केले. डॉ. प्रविण काळे यांनी विद्यार्थ्यांच्या आयुष्यात शिक्षकांचे महत्त्व अनन्यसाधारण असून विद्यार्थ्यांमधील अवगुण दूर करून त्यांच्या जीवनात सकारात्मक परिवर्तन घडवून आणण्याचे कार्य शिक्षक करतात, असे सांगितले.
यावेळी विद्यार्थिनींनी महाविद्यालयातील सर्व शिक्षकांचा सन्मान करून शिक्षकांप्रती कृतज्ञता व्यक्त केली. कार्यक्रमाला महाविद्यालयातील विद्यार्थिनी मोठ्या संख्येने उपस्थित होत्या. यावेळी डॉ. प्रविण काळे, डॉ. सिद्धार्थ घाटविसावे, डॉ. भूपेंद्र बनसोड, डॉ. अमोल उबाळे, डॉ. राकेश रामराजे, डॉ. प्रतिभा उरसळ, डॉ. प्रज्ञा खोपकर, डॉ. सुवर्णा पापल, डॉ. कविता ठाकूर यांच्यासह महाविद्यालयातील शिक्षक उपस्थित होते.

12/09/2026

एसएनडीटी महिला विद्यापीठाच्या आंतर-महाविद्यालयीन क्रीडा स्पर्धांना उत्स्फूर्त प्रतिसाद
मुंबई, दि. १० सप्टेंबर २०२६ : एसएनडीटी महिला विद्यापीठाच्या क्रीडा आणि शारीरिक शिक्षण विभागाच्या वतीने आयोजित आंतर-महाविद्यालयीन योग, बुद्धिबळ, टेबल टेनिस, कुस्ती आणि कबड्डी स्पर्धा २०२६’ या स्पर्धा ९ व १० सप्टेंबर २०२६ रोजी एसएनडीटी महिला विद्यापीठाच्या जुहू संकुलात उत्साहात पार पडल्या.
स्पर्धांच्या उद्घाटन समारंभास एसएनडीटी महिला विद्यापीठाच्या कुलगुरू प्रा. उज्वला चक्रदेव यांची विशेष उपस्थिती होती. यावेळी त्यांनी सहभागी युवा खेळाडूंना प्रेरणादायी मार्गदर्शन केले. क्रीडा क्षेत्रातील शिस्त, चिकाटी, आत्मविश्वास आणि संघभावना यांचे महत्त्व अधोरेखित करताना खेळाडूंनी केवळ क्रीडांगणावरच नव्हे, तर जीवनाच्या प्रत्येक क्षेत्रात उत्कृष्ट कामगिरी करण्यासाठी प्रयत्नशील राहावे, असे आवाहन त्यांनी केले.
या स्पर्धांमध्ये विद्यापीठाशी संलग्न विविध महाविद्यालयांतील विद्यार्थिनींनी उत्स्फूर्त सहभाग नोंदविला. योग, बुद्धिबळ, टेबल टेनिस, कुस्ती आणि कबड्डी या विविध क्रीडा प्रकारांमध्ये खेळाडूंनी आपल्या कौशल्याचे आणि क्रीडासामर्थ्याचे प्रदर्शन केले.
कार्यक्रमास डॉ. कविता खोलगडे, संचालक, क्रीडा आणि शारीरिक शिक्षण विभाग तसेच डॉ. नितीन प्रभुतेंडुलकर, सहाय्यक अधिष्ठाता (विद्यार्थी विकास) यांची उपस्थिती होती.
विद्यार्थिनींच्या सर्वांगीण विकासामध्ये क्रीडा क्षेत्राचे महत्त्व लक्षात घेऊन एसएनडीटी महिला विद्यापीठाकडून अशा विविध क्रीडा उपक्रमांना सातत्याने प्रोत्साहन दिले जात आहे.

12/09/2026

श्रीवर्धनमध्ये ‘महर्षी कर्वे आदर्श महाविद्यालय’ उभारणीला गती
श्रीवर्धन : श्रीवर्धन व परिसरातील मुलींना स्थानिक पातळीवरच दर्जेदार आणि परवडणारे उच्च शिक्षण उपलब्ध व्हावे, या उद्देशाने एस.एन.डी.टी. महिला विद्यापीठाच्या वतीने श्रीवर्धन येथे साकारण्यात येत असलेल्या ‘महर्षी कर्वे आदर्श महाविद्यालय’ प्रकल्पाचा मंत्रालयातील बैठकीत आढावा घेण्यात आला.

या बैठकीत विद्यापीठाच्या अधिकाऱ्यांनी प्रकल्पाची सद्यस्थिती, बांधकामाची प्रगती, आवश्यक निधी तसेच विविध प्रशासकीय बाबींची माहिती दिली. प्रकल्पाचे काम जलद गतीने पूर्ण करण्यासाठी उच्च व तंत्र शिक्षण विभागाशी समन्वय साधून आवश्यक कार्यवाही करण्याच्या सूचना संबंधित अधिकाऱ्यांना देण्यात आल्या.

श्रीवर्धन व परिसरातील मुलींच्या उज्ज्वल भविष्यासाठी महत्त्वपूर्ण ठरणाऱ्या या प्रकल्पासाठी निधीची कमतरता भासू दिली जाणार नाही, असे आश्वासन यावेळी देण्यात आले. तसेच महाविद्यालयात सध्या कार्यरत असलेल्या कर्मचाऱ्यांच्या नियमितीकरणाबाबतही सकारात्मक विचार करण्याचे आश्वासन देण्यात आले.