05/05/2022
यशवंतराव चव्हाण महाराष्ट्र मुक्त विद्यापीठाच्या विद्यार्थ्यांचा स्नेहसंमेलन आणि निरोप समारंभ उत्साहात साजरा.
सायली महाविद्यालय बोरीवली, मुंबई येथील यशवंतराव चव्हाण महाराष्ट्र मुक्त विद्यापीठाच्या विद्यार्थ्यांचा स्नेहसंमेलन आणि निरोप समारंभ अगदी उत्साहात साजरा करण्यात आला. यावेळी प्रमुख अतिथी म्हणून प्रियदर्शनी शैक्षणिक आणि सामाजिक विकास मंडळ मुंबईचे अध्यक्ष श्री. आशीर्वाद लोखंडे सर आणि सहसचिव सौ.प्रतिमा गरुड तसेच यशवंतराव चव्हाण महाराष्ट्र मुक्त विद्यापीठ मुंबई विभागाचे अध्यक्ष डॉ.श्री. वामन नाखले , कृतज्ञता फाउंडेशन,मुंबईचे अध्यक्षा डॉ. सौ. प्रज्ञा लोखंडे, सिनेनट श्री. प्रदीप कबरे आणि वाहतूक पोलीस इन्स्पेक्टर श्री.आवटे साहेब यांच्या हस्ते दीप प्रज्वलन करण्यात आले.
विद्यार्थ्यांना संबोधित करताना जीवनात सकारात्मकता आणण्याची शपथ श्री. प्रदीप कबरे यांनी विद्यार्थ्यांना दिली. तसेच पोलीस इन्स्पेक्टर आवटे साहेबांनी जिद्द आणि चिकाटीने आपण कसे यश प्राप्त करू शकतो याचे स्वतःचे उदाहरण देऊन विद्यार्थ्यांचे मनोबल वाढविले. डॉ. श्री वामन नाखले सरांनी विद्यार्थ्यांसाठी आणखी नवीन अभ्यासक्रम उपलब्ध करून देण्याचे आश्वासन दिले. अध्यक्षीय भाषणात श्री आशीर्वाद लोखंडे सरांनी विद्यार्थ्यांचे कौतुक करताना पुढील वाटचालीसाठी त्यांना शुभेच्छा दिल्या.
दोन आठवड्यांपासून विद्यार्थ्यांनी या कार्यक्रमाचे नियोजन सुरू केले होते. दरम्यान विद्यार्थ्यांनी सांस्कृतिक कार्यक्रम महाराष्ट्र दिनाच्या आणि आंतरराष्ट्रीय कामगार दिनाच्या शुभेच्छा देऊन , मान्यवरांच्या हस्ते ध्वजारोहण करून श्रीगणेशाला श्रीफळ अर्पण करून गणेश वंदना सादर करून कार्यक्रमाची सुरुवात केली आणि उपस्थितांचे मनोरंजन केले. शेवटच्या वर्षातील विद्यार्थ्यांना गुलाब पुष्प आणि भेटवस्तू देऊन निरोप देण्यात आला. विद्यार्थ्यांनी आठवण म्हणून महाविद्यालयासाठी क्रीडासाहित्य भेट म्हणून दिली.
कार्यक्रमाचे सूत्रसंचालन श्री. सुबोध आणि सौ.अपर्णा तसेच कु. निशा आणि कु. शुभम या विद्यार्थ्यांनी केले. प्राध्यापक श्री. सुभाष शेलार यांनी सर्व मान्यवरांचे विद्यार्थ्यांचे आभार व्यक्त केले.
