19/07/2026
छत्रपती संभाजीनगर जिल्ह्यातील कन्नड तालुक्यातील पांगरा येथील जिल्हा परिषद शाळेतील एका शिक्षकाच्या दीर्घकाळ गैरहजेरीच्या प्रकरणामुळे शिक्षण विभागात खळबळ उडाली आहे.
भगवान बोराडे हे २०१९ पासून शाळेत नियमित गैरहजर असल्याचा आरोप असून, त्याचवेळी ते स्वतःची शैक्षणिक संस्था चालवत असल्याची बाबही समोर आली आहे. विशेष म्हणजे, शाळेत उपस्थित नसतानाही संबंधित शिक्षकाने जिल्हा परिषदेचा नियमित पगार घेतल्याचा मुद्दा जिल्हा परिषदेच्या स्थायी समितीच्या बैठकीत उपस्थित करण्यात आला.
या गंभीर प्रकरणाची दखल घेत मुख्य कार्यकारी (CEO)मिन्नू पी.एम. यांनी गटशिक्षणाधिकाऱ्यांना (मो.सबाहन नईमोदीन) कारणे दाखवा नोटीस बजावण्याचे आदेश दिले आहेत. तसेच संबंधित प्रकरणात देखरेखीत हलगर्जीपणा झाल्याचा ठपका ठेवत केंद्रप्रमुखांच्या वेतन कपातीचे आदेश देण्यात आल्याची माहिती बैठकीत देण्यात आली.
स्थायी समितीच्या बैठकीत सदस्यांनी प्रश्न उपस्थित करत, इतकी वर्षे शिक्षक गैरहजर असतानाही प्रशासनाच्या निदर्शनास ही बाब का आली नाही, याबाबत तीव्र नाराजी व्यक्त केली. यामुळे विद्यार्थ्यांच्या शिक्षणाचे मोठे नुकसान झाल्याची भावना सदस्यांनी व्यक्त केली.
काहींच्या चुकीमुळे संपूर्ण शिक्षक समाजाला दोषी ठरवू नका
या घटनेनंतर शिक्षकांमध्येही तीव्र प्रतिक्रिया उमटल्या आहेत. कर्तव्यात कसूर करणाऱ्या आणि विद्यार्थ्यांच्या भवितव्याशी खेळणाऱ्या कोणत्याही शिक्षकावर कठोर कारवाई झालीच पाहिजे, अशी भूमिका प्रामाणिक शिक्षकांनी घेतली आहे.
मात्र, अशा मोजक्या निष्काळजी शिक्षकांमुळे राज्यातील लाखो प्रामाणिक जिल्हा परिषद शिक्षकांची प्रतिमा मलीन होणे योग्य नाही, अशी भावना व्यक्त होत आहे. दुर्गम आणि आदिवासी भागात अत्यंत प्रतिकूल परिस्थितीतही अनेक शिक्षक निष्ठेने सेवा बजावत असून, त्यांच्या कार्याचाही तितकाच सन्मान झाला पाहिजे.
#महाशिक्षक #शिक्षक #जिल्हापरिषद #शिक्षण #प्रामाणिकशिक्षक #संभाजीनगर
