Popular prathamik vidhyalaya Margao goa

*पॉप्युलर विद्यालयाचा वार्षिक क्रीडा महोत्सव जल्लोषात*
पॉप्युलर विद्यालयाचा क्रीडा महोत्सव राया सासष्टी क्रीडा मैदानावर उत्साहात पार पडला.
याप्रसंगी व्यासपीठावर प्रमुख अतिथी या नात्याने उत्तर गोवा जिल्हा पंचायत मुख्य कार्यकारी अधिकारी माननीय श्री अजय गावडे, सन्माननीय अतिथी श्री विनायक र. कामत, पॉप्युलर व्यवस्थापन समितीचे अध्यक्ष श्री विठ्ठल प्रभू पर्रीकर, सचिव श्री सचिन भांडारे, पॉप्युलर विद्यालयाच्या मुख्याध्यापिका सुचित्रा राजीव देसाई, पालक शिक्षक संघाचे अध्यक्ष श्री मंदार म्हापसेकर आदी मान्यवर उपस्थित होते.
याप्रसंगी मान्यवरांचे पारंपारिक रित्या स्वागत करून त्यांच्या हस्ते मशाल प्रज्वलित करून खेळाचे उदघाट्न करण्यात आले.
दरम्यान पूर्व प्राथमिक विद्यालयाच्या विद्यार्थ्यांनी देशभक्ती गीताच्या धूनवर नृत्य सादर केले. प्राथमिक विद्यालयाच्या विद्यार्थ्यांनी देशभक्ती गीतावर कवायती नृत्य सादर करून मान्यवरांची मने जिंकली. तसेच माध्यमिक विद्यालयाच्या विद्यार्थ्यांनी डंबेल कवायती तसेच आकर्षक पिरॅमिड सादर करून उपस्थितांच्या टाळ्या मिळवल्या.
मध्यंतरी पूर्व प्राथमिक विद्यार्थ्यांच्या धावणे लिंबू चमचा अशा विविध स्पर्धा झाल्या. प्राथमिकच्या विद्यार्थ्यांच्या टग ऑफ वॉर , पुस्तक संतुलन, बटाटे शर्यत अशा विविध स्पर्धा पार पडल्या. तसेच माध्यमिक विद्यार्थ्यांच्या सॅकरेस, रिले, धावणे अशा अनेक स्पर्धा घेण्यात आल्या.
या खेळातील विजेत्यांना मान्यवरांच्या हस्ते बक्षिसे देण्यात आली. तसेच गटवार झालेल्या या खेळाच्या शर्यतीत ग्रीन हाऊसला विजयश्री प्राप्त झाली.
पॉप्युलर विद्यालयाचा शैक्षणिक वर्ष २०२२-२३चा हा क्रीडा महोत्सव शिस्तबद्धरित्या सादर केल्याबद्दल प्रमुख अतिथी श्री अजय गावडे यांनी विद्यालयाचे भरभरून कौतुक केले. तसेच पुढील वाटचालीसाठी शुभेच्छा दिल्या.
मुख्याध्यापिका सुचित्रा राजीव देसाई यांनी मान्यवरांचे स्वागत केले.
पॉप्युलर व्यवस्थापन समितीचे अध्यक्ष श्री विठ्ठल प्रभू पर्रीकर यांनी प्रास्ताविक केले तसेच खेळ व व्यायाम याची आजच्या पिढीला असलेली गरज आपल्या भाषणातून व्यक्त केली.
कार्यक्रमाचे सूत्रसंचालन शिक्षिका मनीषा काळे यांनी तर आभार शिक्षिका स्मिता लवंदे यांनी केले. पॉप्युलर विद्यालयाचा वार्षिक क्रीडा महोत्सव मुख्याध्यापिका सुचित्रा राजीव देसाई तसेच शारीरिक शिक्षक विजय भोसले यांच्या मार्गदर्शनाखाली पार पडला.