04/06/2021
CHRISTIAN HIGH SCHOOL SERKAWN CHANCHIN TLANGPUI
Souvenir, Silver Jubilee. 8th February 1986.
Christian High School Serkawn.
India ram pum leh Mizoram state bîkah pawh hma kan sawn chakna ber pakhat chu zirna lamah hian a ni a. Indopui II tâwp dâwn thleng khân Mizoram pumpuiah college chu sawi loh High School tak ngial pawh pakhat mah kan la nei hauh lo tih han sawi hian tûn laia thangtharte tân chuan a awihawm lo rum rum âwm e. Nihmahsela, chu chu thu dik tak a ni si a. Tûnah chuan Mizoramah High School 140 chuang leh college ngawt pawh 10 chuang a awm tawh si a. 1935 ah khân AG McCall I.C.S. Superintendent, Lushai Hills, chuan Aizâwlah Welsh Mission hnuaiah High School hawn a rawt a. A chhan chu Mizoramah High School pakhat mah a la awm loh vâng leh Mizoram pâwna High School-te chuan Mizoram mamawh an phuhrûk tâwk lova hriatna a awm avâng a ni ber. Amaherawhchu he rawtna hi tih puitlin a ni ta lo va. 1944-ah Aizâwlah vântlângin Mizo High School an din ta chauh va Lunglei lamah pawh High School din duhna alo awm a, 1948-ah Lunglei High School chu din a lo ni ta a. Hêng High School-te hi Mission din an ni lo nâ a, mission chuan tha an thawh tha hle a, a bul an tum thîn a ni.
1950 hnu lamah khân Baptist Kohhran chuan Sêrkâwn M.E. School-a zir chhuakte hlawhtlinzia hre rengin Kohhran/mission high school din duhna a lo nei lian tan ta a; rorêlna sângah te pawh sawi zauh zauh a ni ta a. A tîr lamah chuan mission-in din tûrin beiseina a awm a, amaherawhchu an din theih tâk loh avângin Dt. 26.8.1959-ah executive committee special meeting-ah Kohhran High School hawn thu ngaihtuah a ni ta a; hawn ni se tih a ni a, Education Department chu high school hawn theih dân lo ngaihtuah tûra tih a ni ta a. Education Department Committee chuan 1960-ah hawn hman tum ni se tih a ni a, mahse, zirtîrtu tûr inpe pakhat chauh (Tv. Vânlalliana, Lunglâwn) a awm avângin 1960-ah chuan din theih a ni ta rih lo va.
1960-ah Rev. R.F. Tuckera chu Delhi-a B.ed train zovin, a vawi hnihna atân Sêrkâwnah a lo thleng chho leh a, an nupain 1961-a school tan thei tûrin an inbuatsaih a.
A tîrah chuan Headmaster bâkah zirtîrtu pahnih lâk tum a ni a. Amaherawhchu remchân lohna avângin Pu R.L. Rokhûma chauh lâk a ni ta rih a; ani hi Lunglei Govt. High school-a k*m 6 lai lo thawk tawh a ni a.
Tichuan, dt.8.2.1961-ah Pathian hnêna hlânna inkhawmna neiin Sêrkâwn Christian High School chu hawn a lo ni ta a ni. A tantirh k*mah hian naupang 26 chauh lâk an ni a, Rev. RF. Tucker-a te nupa leh Pu RL Rokhûmate’n an ho phawt a. Dt. 14.1.1961-ah Pu Laikûnga Hmâr B.A. exam tûr chu Hostel warden atân lâk a ni a, amaherawhchu a hna a rawn zawm nghâl theih rih loh avângin Pu R. Thangzuala, Pûkpui chu a nghet lovin Hostel Warden-ah hman a ni a, Dt. 6.5.1961-ah Pu Laikûnga Hmâr-in a hna a rawn zawm ta a.
A tîrah chuan Sikulpui kan tih thin, hmâna Primary, M.E. school leh he mi laia teacher training school atâna hman mêk chu High School chuan a tâwm ve phawt a, High School Hostel naupang erawh chu June thla atangin Mission Bungalow (No.1) ruak luahtîr an ni rih a.
Sêrkâwn Christian High School tum ber chu naupangte Krista Chhandamna an hmuh theihna tûr a tanpui a, ram leh hnam leh Kohhran tana mi hman tlak ni tûra chher chhuah a ni. Naupang mize pumpui tisa, rilru leh thlarau dâwmkâna, a mihring puite nêna tha taka khawsa thei tûr a buatsaih a tum a ni. A tawi zâwngin sawi ta ila hemi sikul tum bulpui ber chu naupang nungchang siam that (Character building) a ni. Sikul thuvawn (Motto) atân pawh, ‘The Utmost for the Highest’ (Sâng ber atân theihtâwp emaw A sâng ber atân theihpatâwp) tih thlan a ni. He thuvawn hian zirtîrtute leh zirtute pawh an theihtâwp chhuah reng tûrin a cho hle a ni.
A tîrah chuan hmanraw hrang hrang kan tlachham hle a, school pumin vawi hnih lai chu mau an pu a. Zunin, êkin, Hostel khum dâp, school huanpal pin leh school hostel tihfai hnate naupangin an thawk vek a. Hostel-a awmte chuan an thing leh tui hman tûr pawh an in tum chawp a, k*t hnathawh a tam tâwk hle a ni. A k*m khatna atangin naupang 26 lek chuan school sports an nei nghâl a, Principal Rev. R.F. Tuckera hovin mualah an tûl ve hle hlawm a ni.
A tîra school uniform chu kekawr/pawnfên dum, kawr dumpâwl dal, necktie dumpâwl a ni a, k*m engngemaw zât hnuah kawr puan tûr hmuh that a harsat deuh avâng leh a dâk duh êm avângin kawr dumpâwl duk deuh hman ani leh ta zawk a, necktie pawh hman zui a ni ta lo a ni.
Sêrkâwn Christian High School chu private liau liau a la nih avângin school Calender pawh mahniin a insiam chawp mai a. School luh kâr laka chawlh neih tam thain a hre lo va. Inrinni-ah pawh chawhma chu sikul kal a ni thîn a. Zirlaiin ngawrh takin zir a ni a, October thla tâwp thlengin sikul kal a ni a. November thla atangin thlasik chawlh neih a ni thîn. K*m khatnaah chuan exam result chu hetiang hi a ni:-
Exam zawng zawng – 26
Passed - 21
Pass Percentage -80.7% a ni.
Dt. 1.2.1962 ah Pu C. Kaisânga, Pâwi District Council-a Secr
