Contented Heart

*بسم الله الرحمن الرحيم
*
السلام عليكم ورحمة الله وبركاته جو مصیبت تم کو پہنچتی ہے،وہ تمھارے اپنے اعمال ہی کی بدولت پہنچتی ہے،اور اللہ تمھاری بہت سی برائیوں سے درگذر بھی فرمادیتا ہے۔ (الشوریٰ 42:30)

گذشتہ ہفتے ہونے والی تباہی سے ہم سب واقف ہیں، نیزترکی کے اِس زلزلے سے ہم کم از کم پانچ چیزیں سیکھ سکتے ہیں:

1. آپ کی توقع کے بر عکس،آپ کی زندگی پل بھر میں بدل سکتی ہے اور آپ اِس کا اندازہ بھی نہیں لگا سکتے۔ یہاں کسی چیز کی کوئی ضمانت نہیں ہے۔

2. آپ بغیر کسی مالی پریشانی کے آرام سے زندگی گذار رہے ہوں گے اور یکایک آپ زکوٰۃ کے مستحق بن سکتے ہیں۔

3. زندگی بہت مختصر ہے۔ بدقسمتی سے، ہم زندگی کے پچھلے لمحات کی اتنی قدر نہیں کرسکے، جتنی ہمیں کرنی چاہیےتھی۔
4. پہلا ابتدائی زلزلہ ترکی میں صبح کی اولین ساعتوں میں آیا۔ پھر بھی ہم میں سے کچھ لوگ اپنے عزیزوں کے لیے، راتوں کودلوں میں رنجشیں لے کرسو جاتے ہیں۔

5. بہت سے مرحومین نے رمضان کے مہینے کے لیے منصوبہ بندی کی ہو گی اور بے تابی سے اس کی آمد کاانتظار کر رہے ہوں گے۔ انہیں کیا معلوم تھا کہ وہ ایک اور رمضان نہیں دیکھ سکیں گے۔

اے اللہ! ہمیں رمضان تک پہنچنے کی توفیق عطا فرما۔ مرحومین پر رحم فرمااور زلزلے سے متاثر ہونے والوں کو تحفظ عطا فرما۔آمین!

جی پی ایس ایس، جی پی ایس آئ، ایم ٹی ایس اور عثمانیہ فیملی کے عزیزو!

*آئیے ہم سب مل کر زلزلہ زدگان کے لیے دعا کریں اور اپنے اور پوری انسانیت کے لیے استغفار کریں۔اللہ سے صحیح راستے پر چلنے کی دعا کریں اور ترکی اور شام میں ضرورت مند لوگوں کی مدد کرنے کے لیے اپنی وسعت کے مطابق، رقم دینے کے لیے آگے آئیں۔ صدقہ کے طور پر آپ کا عطیہ آپ کو ہر نقصان سے بچا سکتا ہے۔*

صدقہ کے روحانی اثرات:

یہ انسان کے دل کو بغض، حرص اور مال کی جنونی محبت جیسے گناہوں سے پاک کرتا ہے۔[38]
صدقہ سے مال میں اضافہ ہوتا ہے۔(39)
صدقہ نحوست کو دور کرتا ہے۔(35)
صدقہ پل صراط کو عبور کرنے میں مددگار ثابت ہوگا۔ [40]
صدقہ جنت کی ضمانت دیتا ہے۔ [41]

جزاک اللہ خیراً
اللہ تعالیٰ آپ سب کو اپنے حفظ و امان میں رکھے!

Ar Rahman Foundation
+91 735 3588 555
Davanagere 577003 INDIA

*اس سے پہلے کہ بہت دیر ہو جائے!*

"غالبا فلاں کا قلبِ ماہیت اجنبی لڑکیوں کے ساتھ اٹھنے بیٹھنے اور قرآن کے حکم غض بصر کی نافرمانی کا نتیجہ ہے، آکسفورڈ کی لڑکیوں کے نظاروں نے دل کو اتنا زنگ آلود کر دیا کہ حدیث ہاتھ کا فن ہے، اور دل حب رسول اور حب آل رسول سے محروم ہے، اللہ شقاوت اور بدبختی سے حفاظت فرمائے۔"

ایک دین کے عالم نے ایک دین کے عالم کے خلاف مندرجہ بالا تبصرہ اپنے ایک تنقیدی مضمون میں کیا ہے۔ جب راقم الحروف نے اپنے ایک دوست کے واسطے سےفاضل مضمون نگار سے اس تلخی کی وجہ معلوم کی تو انہوں نے بتایا کہ آکسفورڈ کے محقق نے منصور پور کے کسی عالم صاحب پر پہلے اسی طرح نقد کیا ہے،جس کے بعد انہوں نے اپنا تنقیدی مضمون،انہیں کچھ احساس دلانے کے لیے لکھا ہے۔ اس کے بعد ہم نے دونوں مضامین کا مطالعہ کیا تو پتہ چلا کہ یہ اختلاف حضرت علی کرم اللہ وجہہ کی شان میں موجود ایک حدیث(من كنت مولاه فعلى مولاه) کی وجہ سے ہواہے۔ آکسفورڈ کے عالمی شہرت یافتہ اسکالر نےبعض وجوہات کی بنا پر اس کی صحت پر عدم اطمینان کا اظہار کیا ہے،جب کہ فریق ثانی کا اصرار ہے کہ زیر بحث حدیث صحیح ہے۔

معزز قارئین! کیایہ مسئلہ واقعی اتنا پیچیدہ ہے کہ ہم ایک دوسرے کی نیتوں کو نشانہ بناے بغیر،ایک دوسرے کی ذات پر تبصرہ کیے بغیر اور ناشائستہ کلمات کا استعمال کیے بغیر،اس باب میں معروضی انداز میں اپنا اپنا نقطۂ نظر بیان نہیں کر سکتے؟ کیا اس کے لئے ضروری ہے کہ ہم ایک دوسرے کے مخالف ہوجائیں؟اس میں کوئی شبہ نہیں ہے کہ تنقید ایک زندہ معاشرے کی علامت ہوتی ہے۔ صحت مند تنقید سے علم کا تزکیہ ہوتا ہے ، غور و فکر کے نئے دروازے کھلتے ہیں۔ لیکن یہ فوائد اسی وقت حاصل ہوں گے جب ہم بنیادی اخلاقی قدروں کو پامال نہ کریں ، ورنہ اس سے الٹا نتیجہ برآمد ہوگا ہماری ساری کوششیں Counter-productive ثابت ہوں گی۔
میرے عزیز دینی بھائیوں! آخر ہم کب تک أہل بیت کی محبت کے نام پر،صحابۂ کرام کی محبت کے نام پر، انبیاء اور اولیاء کی محبت کے نام پر ایک دوسرے پر لعن طعن کرتے رہیں گے؟ ہمیں اس بات کا استحضار کیوں نہیں رہتا کہ ہمارے منہ اور قلم سے نکلا ہر لفظ فرشتوں کے ہاں بھی ریکارڈ ہو رہا ہے؟ ہم سے مولی علی رضی اللہ عنہ کی فضیلت کے بارے میں تو سوال نہیں ہوگا ، البتہ آپ رضی اللہ عنہ کی ذات کو بنیاد بنا کر ہم جو ایک دوسرے پر الزام تراشیاں کر رہے ہیں ، اس بابت ضرور پوچھا جائے گا ، ابھی بھی وقت ہے کہ ہم ایک دوسرےپر ناصبیت اور رافضیت کے فتوے لگانا چھوڑ دیں اور ایک دوسرے کو معاف کر کے مثبت اور تعمیری سرگرمیوں میں مصروف ہَوں برادران وطن کے ذہنوں میں اسلام کے تئیں جو غلط فہمیاں ہیں ، ہم انہیں دور کرنے کی کوشش کریں۔ ہم اپنا داعیانہ فریضہ انجام دیں اس سے پہلے کی بہت دیر ہو جائے! ورنہ آنے والی نسلوں کو جب پتہ چلے گا کہ ملک میں جب اکثریتی طبقہ مسلمانوں کو مٹانے کی کوشش کر رہا تھا اس وقت ہمارا مذہبی طبقہ آپس میں مسلک مسلک کھیل رہا تھا! اور پھر شاید اپنے خالق کے حضور بھی ہمیں معافی نہ مل سکے اس لئے بیدار ہوجائیں اس سے پہلے کہ بہت دیر ہوجائے!

*مرغوب الرحمن ندوی*

https://youtu.be/c9AnNSoGrLU

For God's sake, have mercy on children! خدا را بچوں پر رحم کیجئے